Read Imbabura Highland Quichua DEUTERONOMIO 28 Bible Online

DEUTERONOMIO 28 - Imbabura Highland Quichua bible

DEUTERONOMIO 28

¹Dios tucui mandashcacunata, cunan ñuca yachachishcata cazushpa pactachingapaj, canda Mandaj Taita Dios rimashca shimicunata aligutapacha uyajpica, cashnami tucunga: Canda Mandaj Taita Diosca, candaca tucui cai pachapi tiaj llactacunata ashtahuan yali jatumbimi churanga.

²Canda Mandaj Taita Dios rimashca shimicunata cazujpica, tucui cai bendiciashca shimicunami pactamunga:

³Canga, pueblopipash bendiciai tucushcami cangui. Pambapipash, bendiciai tucushcami cangui.

⁴Canmanda llujshishca huahuacunapash, cambaj pambapi fucushcacunapash, cambaj animalcuna huachashca huahuacunapash, cambaj huagracuna, llamacuna miranapash bendiciai tucushcami canga.

⁵Cambaj canastapash, tandata rurangapaj chapuna cambaj jatun bateapash, bendiciai tucushcami canga.

⁶Canga, maiman yaicunapipash, bendiciai tucushcami cangui. Maimanda llujshinapipash, bendiciai tucushcami cangui.

⁷Canhuan macanajungapaj jatarij canda fiñajcunataca, Mandaj Diosmi mishanga. Canhuan macanajungapaca, shujlla ñandami llujshimunajunga. Ashtahuangarin cambaj ñaupajmandaca, canchis ñandami caita chaita calpanajunga.

⁸Mandaj Diosca, cambaj granocunapipash, cambaj maquihuan tucui imatalla ruranapipashmi bendicianga. Canda Mandaj Taita Dios carashca llactapimi, chashna bendicianga.

⁹Canda Mandaj Taita Diosca, pai mandashcacunata pactachishpa, pai munashcashna causajpica, Mandaj Dios carashami nishpa juramentushcashnallatami, paipajlla cachun shicanyachishcataca shinllitapacha churanga.

¹⁰Shina rurajpimi, cai pachapi causaj tucui gentecunaca, Mandaj Diospaj shutipi canmanda mañajujta ricushpa, candaca ninanda manllanajunga.

¹¹Mandaj Diosca, tucui alicunatami ninandapacha mirachinga. Canmanda llujshishca huahuacunata, cambaj animalcuna huachashca huahuacunata, cambaj alpapi fucushca granocunatami, ninanda mirachinga. Chai llactata carashapachami nishpa, cambaj ñaupa taitacunaman Mandaj Dios juramentushca llactapimi, chashna mirachinga.

¹²Mandaj Diosca, cambaj maquihuan imatalla rurashcacunata bendiciangapajmi, imapash juyaillacunata alichishcata pascanshna, jahua pachata pascanga. Tamiana punllacunapillata tamiachingapajmi, chashna ruranga. Canga, tauca llactacunamanmi, imacunatapash mañachingui. Ashtahuangarin canga, imatapash na mañanguichu.

¹³Mandaj Diosca candaca, umashna mandachunmi churanga, chupashna cachunga na churangachu. Canllami mandashpa causangui. Candaca, pipash na mandangachu. Canda Mandaj Taita Dios mandashcacunata cazushpa causajpimi, chashna ruranga. Chaicunata pactachishpa cazushpa causachunmi, cunan canman yachachijuni.

¹⁴Cunan ñuca canman mandashca shimicunamandaca, ali ladomambash, lluqui ladomambash na anchurijpi, shinallata shuj dioscunata na catishpa, chai dioscunata servingapaj na rijpimi, chashna alipi churanga.

¹⁵Ashtahuangarin canda Mandaj Taita Dios rimashca shimicunata na uyashpa, pai mandashca tucui shimicunata, pactachinajuchun cushca shimicunata, cunan ñuca mandashcata na cazujpica, cashnami tucunga: Cai tucui llaquicunami, cambaj jahuapi japij shamunga.

¹⁶Canga pueblopipash, ninanda nalicachi tucushcami cangui. Pambapipash, ninanda nalicachi tucushcami cangui.

¹⁷Cambaj canastapash, tandata rurangapaj chapuna cambaj jatun bateapash, ninanda nalicachi tucushcami canga.

¹⁸Canmanda llujshishca huahuacunapash, cambaj pambapi fucushcacunapash, cambaj huagracuna, llamacuna miranapash, ninanda nalicachi tucushcami canga.

¹⁹Canga maiman yaicunapipash, ninanda nalicachi tucushcami cangui. Maimanda llujshinapipash, ninanda nalicachi tucushcami cangui.

²⁰Mandaj Diosca candapash, cambaj maquihuan tucui imatalla rurashcacunatapash, ninanda nalicachi tucunata cachamushpami, can tucuringacaman llaquichishpa, ninanda manllarinata ruranga. ‘Can nalicunata rurashpa ñucata saquishcamanda, ñapash can tucurichunmi chashna llaquicuna shamunga’.

²¹Mandaj Diosca, huañuitami canman cachamunga. Cambaj cachun can japigrijuj llactamanda can chingangacamanmi, chashna cachamunga.

²²Mandaj Diosca, tulluyachij ung:uihuan, ninanda calenturachij ung:uihuan, rupashpa nanachij chupu ung:uihuanmi candaca llaquichinga. Na tamiachishpa, jatun llaquicunata cungashcapi cachamushpa, chagracunatapash chingachishpami llaquichinga. Chai llaquicunaca, can tucuringacamanmi catiriashpa llaquichinga.

²³Cambaj jahuaman tiajuj jahua pachapash, bronceshnami tucunga. Can sarujuj alpapash jirrushnami tucunga.

²⁴Mandaj Diosca, cambaj llactaman tamiata cachamungapaj randica, ñutu alpata, uchufatami cachamunga. Can tucuringacamanmi, jahua pachamandaca chashna llaquichinga.

²⁵Mandaj Diosca, canda fiñajcunapaj ñaupajpi mishai tucuchunmi saquinga. Canga, chai fiñajcunahuan macanajungapaj shujlla ñanda llujshimushpapash, paicunapaj ñaupajmandaca canchis ñandami, caita chaita calpangui. Candaca, cai pachapi mandanajuj tucui llactacunapimi llaquichinga.

²⁶Canguna huañushca aichacunaca, jahuata rij tucui alasyu animalcuna, cai pachapi tiaj animalcuna micungapajmi canga. Chai animalcunata manllachingapaca, pipash na tiangachu.

²⁷Mandaj Diosca, Egipto llactapishnami candaca, úlcera ung:uicunahuan, chupu ung:uicunahuan, caracha ung:uicunahuan, shijshi ung:uicunahuan llaquichinga. Chai ung:uicunataca, napacha jambiri ushanguichu.

²⁸Mandaj Diosca candaca, loco tucunahuan, ñausa tucunahuan, shungupi musparinahuanmi llaquichinga.

²⁹Canga, ñausa runa tacarishpalla purijunshnami, chaupi punllapipash tacarishpalla puringui. Cambaj causaipi imata rurashcapash, nali llujshingachu. Tucui punllacuna llaquichi tucushpalla, imatapash quichui tucushpallami causangui. Canda quishpichingapaca, pipash na tiangachu.

³⁰Can cazarangapaj purijuj huarmihuambash, shuj runarami puñunga. Huasita shayachishpapash, chai huasipica na causanguichu. Uvasta tarpushpapash, chai uvastaca na micunguichu.

³¹Cambaj huagrapash, cambaj ñaupajpillatami huañuchi tucunga. Canga, chai aichataca na micunguichu. Cambaj burrotapash, cambaj ñaupajmandallata quichushpa apashpapash, na tigrachimungachu. Cambaj llamacunapash, canda fiñajcunapaj maquipimi churai tucunga. Chai llaquimanda canda llujchingapaca, pipash na tiangachu.

³²Cambaj churicunapash, cambaj ushicunapash, shuj gentecunapaj maquipimi churai tucunga. Chaitaca, cambaj ñavihuambachami ricungui. Shina ricushpa punllandi huacajujpillatami, cambaj ñavipash amsayanga. Cambaj maquipash, ushai illajmi tucungui.

³³Cambaj alpacunapi trabajashpa fucuchishca granocunataca, can na rijsishca runacunami micunajunga. Canga, punllandi ninanda llaquichishpa charijpimi causangui.

³⁴Chai tucui llaquicunata cambaj ñavihuambacha ricushpami, loco tucungui.

³⁵Mandaj Diosca, cambaj cunguripipash, changapipash ismuchijlla ung:uihuanmi llaquichinga. Na jambiri ushanalla ung:uihuanmi, chaqui pundamanda callarishpa umacaman llaquichinga.

³⁶Mandaj Diosca candapash, canda mandaj cachun churashca jatun mandajtapashmi, prezu apachun saquinga. Cambash, cambaj ñaupa taitacunapash na rijsishca caru llactamanmi apachun saquinga. Chaipimi, caspita, rumita rurashca shuj dioscunata servishpa causangui.

³⁷Mandaj Diosllata, tucui chai gentecunapajman apajpimi, paicunapaca manllarishpa ricui tucungapajlla, yarichij shimicunata rimashpa, asishpa ricui tucungapajlla cangui.

³⁸Ashtaca muyucunata pambaman llujchishpami tarpungui. Shina tarpushpapash langostacuna tucuchijpimi, ashatalla tandachingui.

³⁹Uvasta tarpushpa aliguta cuidashpa charishpapash, jurucuna micujpimi, uvastapash na pallangui, vinotapash na ufiangui.

⁴⁰Cambaj tucui alpacunapi olivos chagracunata charishpapash, chai olivos granocuna tucuilla urmajpimi, aceitehuambash na javiringui.

⁴¹Churicunatapash, ushicunatapash charinguimi. Ashtahuangarin paicunata prezu apajpimi, canhuanga na causanga.

⁴²Cambaj tucuilla yuracunatapash, cambaj alpapi fucushca granocunatapash langostacunami tucuchinga.

⁴³Shuj llactamanda shamushpa cambaj llactapi causaj runarami, canda ashtahuan yalishpa, canda mandangapaj jataringa. Canga, ashtahuan yangallami tucungui.

⁴⁴Paimi, canman imatapash mañachinga. Canga, imata paiman mañachitapash na ushanguichu. Paimi umashna mandajunga, canga chupashnami cangui.

⁴⁵Cai tucui llaquicuna cambaj jahuapi japij shamushpami, can tucuringacaman catiriashpa llaquichinga. Canda Mandaj Taita Dios rimashca shimicunata na cazushcamandami, chashna llaquichinga. Pai mandashcacunata, pactachinajuchun cushca shimicunata, can pactachishpa causachun pai mandashcatami na cazushcangui.

⁴⁶Shina llaquichishcamandaca, tucui causaipimi cambash, cambaj miraicunapash, shuj gentecuna ricushpa yarina, ninanda manllarina canguichi.

⁴⁷Canda Mandaj Taita Diostaca, tucui shunguhuan, ninan cushijuihuanga na servishcanguichu. Tucui imatalla ashtacatapacha charishcamandami, na chashna servishcangui.

⁴⁸Shinamandami, Mandaj Dios cachamushca canda fiñajcunatara servishpa causangui. Yarjaihuan, yacunaihuan, churajuna illaj, tucui imapash illajmi servishpa chashna causangui. Chashnami Mandaj Diosca, cunga tullupi jirru yugota apachinshna, candaca tucuchingacaman llaquichinga.

⁴⁹Mandaj Diosca, canda llaquichinajuchunga, can na yachashca shimicunata rimaj shuj runacunatami, cai pacha caru llactamanda cai pacha tucuri manñamanda apamunga. Chai runacunaca, jatun angashnami ñapash chayamunga.

⁵⁰Paicunaca, millai ñavi gentecunami canga. Rucu runagutapash na cazungachu, huahuagutapash na llaquingachu.

⁵¹Can tucuringacamanmi, cambaj animalcuna mirashcatapash, cambaj alpacunapi fucushcatapash micunajunga. Canda tucuchingacamanmi, trigotapash, llullu vinotapash, aceitetapash, cambaj huarmi huagracuna, llamacuna mirashcatapash micunajunga.

⁵²Cambaj tucui pueblocunatami, chaupipi churanajunga. Cambaj tucui llactapi can yariashpa causashca, ali shinllipacha, ninan jatun pircacunatami urmachinajunga. Canda Mandaj Taita Dios carashca tucuilla llactata, tucuilla pueblocunatami, chaupipi churanajunga.

⁵³Canda fiñajcuna, chaupipi churashpa muspachishpa llaquichijpimi, canda Mandaj Taita Dios carashca, canmanda llujshishca churitallata, cambaj ushitallata micungui.

⁵⁴Canguna purapica, fiñarinatapash na yachaj, ali juyaj runapash, paipaj huauquitallata, paipaj juyashca huarmitallata, causaj quedashca paipaj churitallatami, fiña ñavihuan ricunga.

⁵⁵Pai micujushca churipaj aichata, pimambash ama carangapajmi chashna ricunga. Cangunata fiñajcuna cambaj tucui pueblocunata chaupipi churashpa muspachinajujpi, micuna na tiajpimi shina canga.

⁵⁶Canguna purapica ali juyaj, fiñarinata na yachaj, paipaj chaqui tablahuanga, ima horapash na alpapi saruj, alipacha juyaj huarmipashmi, paipaj juyashca cusata, churita, ushita fiña ñavihuan ricunga.

⁵⁷Chairalla huacharishpa llujshishca, pai ungushca huahuacunatapashmi pacalla micunga. Cangunata fiñajcuna cangunapaj tucui pueblocunata chaupipi churashpa muspachijpi, ima micunapash illajpimi chashna micunga.

⁵⁸CANDA MANDAJ TAITA DIOSCA, ninanda alicachina, jatun manllarina shutimi: Chai shutita na manllashpa, cai libropi escribishca tianajuj tucui cai mandashca shimicunata na pactachijpimi, shina llaquicunaca japinga.

⁵⁹Shina na cazujpimi, Mandaj Diosca canmambash, cambaj miraicunamambash, huañuchij llaquicunata manllanayaita mirachinga. Na ucha tucurij huañuchij jatun llaquicunata, ima horapash na tucurij, ninan nalipacha ung:uicunatami mirachinga.

⁶⁰Egipto llactapishnallatami, can manllashca tucui llaquicunata apamunga. Chai tucui llaquicunaca, candaca napacha saquingachu.

⁶¹Mandashca shimicunata escribishca cai libropi na tiaj, huañuchij tucui ung:uicunatapashmi, Mandaj Diosca can tucuringacaman cachamunga.

⁶²Cangunaca, luzerocunashna ashtacacuna cangapaj randica, ashallami quedanguichi. Canda Mandaj Taita Dios rimashca shimicunata na cazushcamandami, shina tucunguichi.

⁶³Mandaj Diosca, alicunata cangunaman rurashpa, cangunata ashtacata mirachishpami cushijun carca. Chashnallatami Mandaj Diosca, cangunata ninanda llaquichishpa tucuchishpapash cushijunga. Canguna japingapaj yaicumunajun llactamandaca, anchuchi tucunguichimi.

⁶⁴Mandaj Diosca, tucui shuj gentecunapajmanmi, cai pacha tucuri manñamandaca, caishuj lado manñacaman caita chaita cachanga. Chaipica, cangunapaj ñaupa taitacunapash, na rijsishca dioscunatami servishpa causanguichi. Caspita, rumita rurashca shuj dioscunatami servinguichi.

⁶⁵Chai llactacunapipash, na samashpami puringuichi. Cambaj chaqui tablapash, na samangachu. Chaipimi Mandaj Diosca, manllana shunguta, nali ricui ushaj ñavita, llaquilla almahuan causanata cunga.

⁶⁶Cambaj causaica, cambaj ñaupajpi imatapash puchahuan huarcushcashnami canga. Shinamandami tutapash, punllapash manllaihuan causangui. Canga, ima horapash huañunallami causangui.

⁶⁷Tutamandaca: ‘¡Ucha chishashcanman!’ ninguimi. Chishica: ‘¡Ucha punllayashcanman!’ ninguimi. Cambaj ñavihuambacha ricujushpa, shungupi ninanda manllashpa chujchushpami chashna ningui.

⁶⁸Mandaj Diosca: ‘Cai ñandaca, ima horapash na cutinga tigranguichu’ nircami. Chai ñandallatami candaca, barcocunapi Egiptoman cutin tigrachinga. Chaipi gañan causangapajmi jaricunapash, huarmicunapash cangunata fiñaj runacunaman jatui tucunguichi. Ashthuangarin candaca, pipash na randingapaj munangachu” nijurcami.