Read Imbabura Highland Quichua DEUTERONOMIO 29 Bible Online

DEUTERONOMIO 29 - Imbabura Highland Quichua bible

DEUTERONOMIO 29

¹Israelcunata ari nichijuchun Mandaj Dios, Moab llactapi Moisesta mandashca shimicunaca, caicunami. Horeb shuti urcupi ari ninajushca jahuami, cutin ari ninajurca.

²Moisesca, tucui israelcunata cayashpami, cashna nijurca: “Egipto llactapi Faraondapash, paita tucuilla servijcunatapash, paipaj llactapi tucui causajcunatapash, cangunapaj ñaupajpi Mandaj Dios imatalla rurajtaca, cangunallata ricushcanguichimi.

³Canguna imashna cajta ricungapaj jatun llaquicunata rurajujta, imapash ricuchinacunata ricuchijujta, jatun manllarinacunata rurajujtaca, cangunapaj ñavihuambachami ricurcanguichi.

⁴Shina cajpipash Mandaj Diosca, chaita canguna yachana shungutaca, cunangaman nara cushcachu. Ricuchun ñavitapash, uyachun rinritapash nara cushcachu.

⁵Jichushca pambataca, chuscu chunga huatatami cangunataca pushamujurcani. Chai tucui huatacunapipash, canguna churajushcacunaca na maucayashcachu. Cangunapaj chaquipi churajushcacunallapash na maucayashcachu.

⁶Tandatapash na micushpa, vinotapash, sidratapash na ufiashpami purircanguichi. ‘Ñuca, cangunata Mandaj Taita Dios cajta yachachunmi, chashna pushamurcani’ nircami.

⁷Cai llactaman chayamujpica, Hesbón shuti pueblota jatun mandaj Sehón shuti runapash, Basán llactata jatun mandaj Og shuti runapashmi, ñucanchihuan macanajungapaj llujshimurca. Paicunataca ñucanchimi misharcanchi.

⁸Shina mishashpa paicunapaj llactata japishpami, Rubenbaj, Gadpaj aillucunamambash, Manasespaj chaupi aillumambash, paicunapaj cachun paicunaman curcanchi.

⁹Shina cashcamanda ari ninajushca cai shimicunataca pactachishpami, tucuita rurana canguichi. Canguna tucui imata rurashcapash ali llujshichunmi, chashna pactachina canguichi.

¹⁰Cangunaca, cunanga tucuicunami, cangunata Mandaj Taita Diospaj ñaupajpi canguichi. Aillucunata umashna mandajcunapash, cangunata mandaj rucucunapash, cangunata caishuj mandajcunapash, tucui Israel jaricunapash, caipimi canguichi.

¹¹Cangunapaj huahuacunapash, cangunapaj huarmicunapash caipimi canguichi. Shinallata shuj llactamanda shamushpa cangunapaj chaupipi causajcunapash, yamdata chijtajcunamanda callarishpa, yacuta ashtajcunacaman caipimi.

¹²Cangunata Mandaj Taita Dios cangunahuan ari nishcata chasquingapajmi, caipi canguichi. Cunanga, cangunata Mandaj Taita Dios ari nishpa juramentushcata pactachingapajmi, caipi canguichi.

¹³Cunanga, cangunapaj ñaupa taita Abrahamman, Isaacman, Jacoboman juramentushcashnallata, pai agllashca gentecuna cachun, shinllitapacha churangapaj, paipash cangunapaj Taita Dios cachunmi, chashna ari nichini.

¹⁴Cai ari nishcatapash, cai juramentushcatapash, na cangunahuanlla rurajunichu.

¹⁵Ashtahuangarin ñucanchita Mandaj Taita Diospaj ñaupajpi, cunan caipi ñucanchihuan tandanajushca gentecunahuambash, cunan caipi ñucanchihuan nara tandanajushca gentecunahuambashmi, chashna rurani.

¹⁶Egipto llactapi imashna causashcatapash, ñucanchi shamunajushpa llacta chaupicunata yalimushcatapash, cangunallata alimi yachanguichi.

¹⁷Chai llactacunapi causajcuna millanayaicunata ruranajujtapash, caspita, rumita, culquita, orota rurashca yanga dioscunata paicuna charijtapash ricurcanguichimi.

¹⁸Canguna purapica, pactarallapash jari cashpa, huarmi cashpa, na cashpaca maijan familia cashpa, na cashpaca maijan aillupura cashpapash, ñucanchita Mandaj Taita Diosta cunanda paicunapaj shungupi cunganman. Shina cungashpara, chai llactacunapi causajcunapaj dioscunata servingapaj rinman. Canguna purapica, imapash jayajta, ajenjota fucuchij sapita charij yurashna tianman.

¹⁹Shina tiashpara, ninanda nalicachishca cai shimicunata uyashpapash, paillata bendiciarishpa paipaj shungupi cashna nijunman: ‘Shinlli shungu cashpapash, machashpa, yacunayaita yalichishpaca, casilla ali causaitami charisha’ nijunman.

²⁰Chashna nalita rurashcataca, Mandaj Diosca napacha cungangapaj munangachu. Ashtahuangarin ninanda cushnijunshna fiñarishpami, Mandaj Diosca paipajlla cachun munashpa, chai runataca llaquichinga. Shina rurashpaca, ninanda nalicachishca shimicunata cai libropi escribishca tiajunshnallatami, Mandaj Diosca chai runataca llaquichinga. Shinami Mandaj Diosca, chai runapaj shutitaca, cai pachamanda chingachinga.

²¹Mandaj Diosca chai runata llaquichingapajmi, tucui Israel aillucunamanda shicanyachinga. Ninanda nalicachishca shimicunata uyashpami, ari nircanguichi. Chai shimicunata, cai mandashca libropi escribishca tiajunshnallata llaquichingapajmi, chashna shicanyachinga.

²²Cangunapaj cati miraicunapash, cangunapaj jipa churicunapash, caru llactacunamanda shamuna runacunapashmi imatapash ninajunga. Paicunaca, huañuchij llaquicunata cai llactaman cachamujta ricushpa, Mandaj Dios cachamushca jatun ung:uicunata ricushpami, chashna rimanajunga.

²³(Paicunapaj tucuilla llactaca, azufrehuan, cachihuanmi rupachi tucunga. Chaipica, imatallapash na tarpungachu, imapash na fucungachu. Chaipica, jihuallapash na viñangachu. Sodoma, Gomorra, Adma, Zeboim shuti pueblocunashnallatami tucunga. Chai pueblocunataca, Mandaj Diosmi ninandapacha ñapash fiñarishpa tucuchirca).

²⁴Ashtahuangarin tucui llactacunapi causajcunapashmi, cashna ninajunga: ‘Mandaj Diosca, ¿imashpashi cai llactataca cashna llaquichirca? Nina japirinshna chashna ninanda fiñarishpa llaquichishcacunaca, ¿imatashi ricuchijun?’ ninajungami.

²⁵Shina ninajujpimi shujcunaca, cashna nishpa tigrachinajunga: ‘Paicunapaj ñaupa taitacunata Mandaj Taita Diosmari, Egipto llactamanda llujchimushpaca, paicunatapash ari nichirca. Chaita na pactachishpa saquishcamandami, chashna rurashca.

²⁶Chashna saquishpamari, shuj dioscunatara servingapaj rishpa, chai dioscunatara cungurinajushca. Paicuna na rijsishca dioscunata, imatallapash na caraj dioscunatami cungurinajushca.

²⁷Chaimandami Mandaj Diosca, cai llactapi causajcunahuanga nina japirinshna fiñarishca. Shina fiñarishpami, ninanda nalicachishca tucui shimicunata cai libropi escribishca tiajunshnallata, paicunapaj jahuapi cachamushca.

²⁸Chashna ninandapacha ñapash fiñarishpa, napacha ricunayachishpami Mandaj Diosca, paicunapaj llactamandaca sapimanda aisanshna llujchishpa, shuj llactaman cachashca. Chaitami cunangaman ricunajunguichi’ ninajungami.

²⁹Imapash pacallacunaca, ñucanchita Mandaj Taita Diospajmi. Ashtahuangarin imatalla ricuchishcacunaca ñucanchipajpash, ñucanchi huahuacunapajpash, causaita causaicaman pactachingapajmi. Tucui cai mandashca shimicunata ñucanchi pactachishpa causanajuchunmi, chashna tianajun.