Read Imbabura Highland Quichua DEUTERONOMIO 3 Bible Online

DEUTERONOMIO 3 - Imbabura Highland Quichua bible

DEUTERONOMIO 3

¹Chaimanda cutin tigramushpaca, Basán llactaman rina ñanda japishpami vichai shamurcanchi. Shina shamunajujpimi, Basán llactata jatun mandaj Og shuti runaca, paipash, paipaj tucuilla runacunapash ñucanchihuan macanajungapaj, Edrei shuti pueblopi ñucanchihuan tuparingapaj llujshimurca.

²Chaimandami Mandaj Diosca, cashna nihuarca: ‘Paitaca ama manllaichu. Paitaca, paipaj macanajuj runacunandi, tucuilla paipaj llactandimi, cambaj maquipi churarcani. Paicunataca, amorreocunata mandashpa Hesbón pueblopi causajuj, jatun mandaj Sehón shuti runata llaquichishcashnallatami llaquichingui’ nihuarcami.

³Shinami, ñucanchita Mandaj Taita Diosca, Basán llactata jatun mandaj Og shuti runatapash, paipaj runacunatapash, ñucanchi maquipi churarca. Paicunataca, shujllatapash na saquishpami, tucuillata huañuchircanchi.

⁴Shinami, shuj pueblotallapash na saquishpa, paipaj tucuilla pueblocunata quichurcanchi. Og shuti runa mandajuj Basán llactapi tiaj Argob shuti llactapi tiaj, sucta chunga pueblocunatami japircanchi.

⁵Tucui chai pueblocunaca, muyundi ninan jatun pircacunahuan, pungucunahuan, jatun barra jirrucunahuan jarcashcami carca. Muyundi pirca illaj, ashtaca pueblocunatacarin na cuentashcachu carca.

⁶Hesbón pueblota jatun mandaj Sehón shuti runa mandajushca llactapi tucuchishcashnallatami tucuchircanchi. Tucuilla pueblocunapi jaricunatapash, huarmicunatapash, huahuacunatapash huañuchishpami, chashna rurarcanchi.

⁷Tucuilla animalcunatapash, pueblocunapi imalla tiashcacunatapashmi, ñucanchipaj cachun japircanchi.

⁸Shinallata chai huatacunapica alpacunataca, Arnón shuti jatun larca yacumanda, Hermón shuti urcucamanmi japircanchi. Jordán yacu chimba lado llactacunapi causaj amorreocunata ishcai jatun mandajcunapaj maquimandami, chashna japircanchi.

⁹(Chai Hermón urcutaca, Sidón llactapi causajcunaca, Sirión ninajunmi, amorreocunaca Senir ninajunmi).

¹⁰Pugru pambacunapi tiaj tucuilla pueblocunata, tucuilla Galaad llactata, tucuilla Basán llactatami japircanchi. Basán llactapi Og shuti jatun mandaj mandajushca Salca shuti, Edrei shuti pueblocunacamanmi japircanchi.

¹¹Manllanayai jatun runa puracunamandaca, Og shuti jatun mandajllami puchushca carca. Paipaj camaca, jirruta rurashcami carca. Chai camaca, ¿nachu Amón llactapi tiaj Rabá shuti pueblopi tiajun? Chai camaca, shuj runapaj codohuan medishcashnallata, chuscu metro picha centímetro largo, shuj metro pusaj chunga centímetro anchomi carca.

¹²Chai huatacunapi ñucanchi japishpa causanajushca llactacunataca, Rubenbaj, Gadpaj aillucunamanmi curcani. Chai llactacunaca, Arnón shuti yacu ladollapi tiaj Aroer shuti pueblomandaca, Galaad llactapi tiaj urcu chaupicamanmi carca. Chaipi tiaj tucuilla pueblocunatapashmi curcani.

¹³Asha puchushca Galaad llactatapash, jatun mandaj Og shuti runa mandajushca Basán llactatapash, Argob shuti tucuilla llactatapashmi curcani. Chai llactacunaca, manllanayai jatun runacunapaj llactacuna nishcami carca. Chai llactacunatami, Manasespaj chaupi ailluman curcani.

¹⁴Manasespaj churi Jair shuti runaca, Argob shuti tucuilla llactatami, Gesur shuti, Maaca shuti llacta linderocaman paipaj cachun japirca. Chai llactataca, paipaj shutita shutichishpami, Basán-havot-jair shutita shutichirca. Chai llactaca, cunangaman chai shutillatami.

¹⁵Galaad llactataca, Maquir shuti runamanmi curcani.

¹⁶Rubenbaj, Gadpaj aillucunamambash, Galaad llactamandaca, Arnón shuti jatun larca yacucamanmi curcani. Chai llacta linderoca, chaupi pugru pambamandaca, Jaboc shuti jatun larca yacucamanmi. Chai linderomi, amonitacunapaj lindero.

¹⁷Shinallata Arabá shuti llactapashmi, Jordán yacuhuan lindero cachun, Cineret shuti cuchamandaca, Arabá nishca Cachi tiaj Cuchacaman curcani. Pisga shuti urcu ura chaquiman, indi llujshimuj ladomanmi curcani.

¹⁸Cangunataca, cashna nishpami mandarcani: ‘Cangunata Mandaj Taita Diosca, cai llactatami cangunapaj cachun carashca. Shina cajpipash imatapash na manllaj tucui runacunaca, macanajunacunahuan alichirishpa, cangunapaj huauqui israelcunata ñaupashpa richilla.

¹⁹Cangunaman ñuca cushca pueblocunapica, cangunapaj huarmicunata, cangunapaj huahuacunatalla saquinguichi. (Ashtaca animalcunata canguna charijtaca, ñucallata yachanimi). Chaicunataca, cangunaman ñuca carashca pueblocunapi saquinguichilla.

²⁰Mandaj Diosca, cangunapaj huauquicunatapash, cangunatashnallatami samachinga. Shinallata cangunata Mandaj Taita Dios, Jordán yacu chimba ladopi paicunaman carashca llactata, paicunapash japichunmi cunga. Chai jipami, cangunaman ñuca cushca llactaman tucuicunallata cutin tigranguichi’ nircanimi.

²¹Chai punllacunaca Josuetapashmi, cashna nishpa mandarcani: ‘Cangunata Mandaj Taita Diosca, chai ishcai jatun mandajcunata imashna rurashcataca, cambaj ñavihuambacha ricurcanguimi. Mandaj Diosca, can maitalla yalina mandanajuj tucuilla llactacunatapash, chashnallatami ruranga.

²²Paicunataca ama manllaichu. Cangunata Mandaj Taita Diosmi, cangunamandaca macanajunga’ nircanimi.

²³Chai huatacunallatami Mandaj Diostaca, cashna nishpa mañarcani:

²⁴‘Mandaj Jatun Dioslla, canllatami jatun manllarinacunata, cambaj jatun ushaita, canda servij ñucaman ricuchi callarishcangui. Canshna cai tucui juyaillacunata rurai ushajca, jahua pachapipash, cai pachapipash, ¿maijan diospash tianllu?

²⁵Shina cashcamanda ñucataca, Jordán yacu chimba ladoman chimbachun saquihuayari. Ñucataca, chai juyailla llactatapash, juyailla urcucunatapash, Líbano shuti llactatapash ricuchun saquihuayari’ nishpami mañarcani.

²⁶Mandaj Diosca, canguna nalita rurashcamandaca, ñucahuanmi fiñarirca. Chaimandami, ñuca mañajujtaca na uyahuarca. Mandaj Diosca, cashnami nihuarca: ‘Ña upallai. Chaitaca, na ashtahuan mañanachu cahuangui.

²⁷Cunanga, chai Pisga shuti urcuman vichai rilla. Chaipica, janaj ladotapash, ura ladotapash, indi llujshimuj ladotapash, indi huashajuj ladotapash muyushpa, cambaj ñavihuambachami ricungui. Shina ricushpapash, chai Jordán yacutaca, napacha chimbanguichu.

²⁸Cunanga Josuetaca, cushichishpa shinllichishpa mandangui. Paimi, israelcunata ñaupashpa rishpa, can ricugrijuj llactataca, paicunapaj cachun cunga’ nihuarcami.

²⁹Shina nijpimi, Bet-peor shuti pueblopi tiaj pugru pambapi quedarcanchi.