Read Imbabura Highland Quichua DEUTERONOMIO 30 Bible Online

DEUTERONOMIO 30 - Imbabura Highland Quichua bible

DEUTERONOMIO 30

¹Cambaj ñaupajpi cai tucui villashca shimicuna, bendiciashca shimicuna, ninanda nalicachishca shimicuna cambajman shamujpimi, cashna tucunga: Shina japij shamujpimi, canda Mandaj Taita Dios llujchishpa cachashca tucuilla llactacunapica, ninanda llaquiringui.

²Shina llaquirishpami, canda Mandaj Taita Diospajman tigraringui. Shinallata cambash, cambaj huahuacunapashmi, tucuita cunan ñuca yachachishcashnallata, tucui shunguhuan, tucui almahuan, pai rimashca shimicunata pactachinguichi.

³Shina rurajpimi Mandaj Diosca, cambaj llacta puracuna prezu apai tucushcataca, cutin tigrachimushpa cangunata llaquinga. Canda Mandaj Taita Diosca, shuj gente puracunapajman caita chaita cachashca cashpapash, cutinmi tandachimunga.

⁴Canda Mandaj Taita Diosca, cambaj llacta puracunataca, cai pachapi tiaj ashtahuan caru llactacunapi cajpipash, chaimandapashmi japishpa tandachimunga.

⁵Canda Mandaj Taita Diosca, cambaj ñaupa taitacuna, paicunapaj cachun japinajushca llactaman cutin tigrachimushpami chai llactataca, cambaj cachun cunga. Shinallata ashtaca alicunata rurashpami huahuacunatapash, cangunapaj ñaupa taitacunaman cushcataca yali mirachinga.

⁶Canda Mandaj Taita Diosllatami, cambaj shungutapash, cambaj miraicunapaj shungutapash, circuncisión nishcata ruranshna ruranga. Canda Mandaj Taita Diosta tucui shunguhuan, tucui almahuan juyashpa, cai llactapi causai ushachunmi, shina ruranga.

⁷Canda Mandaj Taita Diosca, ninanda nalicachishca tucui cai shimicunatami, canda fiñajcunapaj jahuapi cachamunga. Canda na ricunayachij runacuna catiriashpa canda llaquichishcamandami, chashna cachamunga.

⁸Canga, Mandaj Diospajman tigrarishpami, pai rimashca shimicunata uyashpa, pai mandashca tucui shimicunata pactachinajuchun cunan ñuca mandashcata pactachishpa causangui.

⁹Shina causajpimi, canda Mandaj Taita Diosca, cambaj maquihuan tucui imatalla rurashcatapash, canmanda llujshishca huahuacunatapash, cambaj animalcuna huachashca huahuacunatapash, tarpushpa fucuchishca granocunatapash, canman alita rurashpa ashtacata mirachinga. Mandaj Diosca, cambaj ñaupa taitacunahuan cushijushcashnallatami, canman alita rurashpa canhuambash cushijunga.

¹⁰Canda Mandaj Taita Dios rimashca shimicunata cazushpa causajpimi, chashna cushijunga. Cai libropi tiajuj mandashca shimicunata, pactachinajuchun cushca shimicunata cazujpimi, chashna cushijunga. Canda Mandaj Taita Diospajman tucui shunguhuan, tucui almahuan tigrarijpimi, chashna cushijunga.

¹¹Cai mandashcacunata pactachinajuchun cunan ñuca mandashcacunaca, na yapa shinllichu, carupipash na canllu.

¹²Na jahua pachapi tiajunllu. Jahua pachapi cajpica, cashnami ninguiman: ‘¿Pita ñucanchipaj randi jahua pachaman rishpa, ñucanchi pactachinajuchun uyachingapaj chai mandashcataca apamunga?’ ninguimanmi.

¹³Shinallata na mama cucha chimba ladoman tiajunllu. Mama cucha chimba ladoman tiajujpica, cashnami ninguiman: ‘¿Pita ñucanchipaj randi, mama cuchata chimbashpa, ñucanchi pactachinajuchun uyachingapaj chai mandashcata apamunga?’ ninguimanmi.

¹⁴Ashtahuangarin cai shimicunaca, cambaj ladopillatami tiajun. Can pactachi ushachunga, cambaj shimipillata, cambaj shungupillatami tiajun.

¹⁵Ricui, cunanmi causaitapash, alitapash, huañuitapash, llaquitapash, cambaj ñaupajpi churani.

¹⁶Cunanmi ñucaca, canda Mandaj Taita Diosta juyachun, paipaj ñambi purichun, pai mandashcacunata, pactachinajuchun pai cushca shimicunata, imata rurachun mandashcacunatapash pactachishpa causachun mandani. Causaita charichun, cangunapash ashtacata mirachun, cangunapaj cachun japishpa canguna causagrinajuj llactapi, canda Mandaj Taita Diospash bendiciachunmi, chashna mandani.

¹⁷Ashtahuangarin cambaj shungupash Diosmanda anchurishpa, mandashcatapash na uyashpa chingashca causanguiman. Shinallata shuj dioscunatara servishpa causanguiman.

¹⁸Shina causajtaca, ñucami nalicachishpa rimashpa, cangunaca huañunguichipachami nijuni. Jordán yacuta chimbashpa, canguna japigrijushca llactapica, na unaita causai ushashpami huañunguichi.

¹⁹Cunanga, cangunata fiñashpa llaquichinata ricuchunmi, jahua pachatapash, cai pachatapash cayani. Causaitapash, huañuitapash, bendiciai tucunatapash, ninanda nalicachi tucunatapash, cangunapaj ñaupajpimi churani. Cambash, cambaj miraicunapash causangapaca, causaita agllaichiyari.

²⁰Cangunata Mandaj Taita Diosta juyashpa, pai rimashca shimicunata uyashpa, paita catinguichiyari. Shina causashpami, unai causaita charinguichi. Mandaj Diosllata, cangunapaj ñaupa taita Abrahamman, Isaacman, Jacoboman carashami nishpa juramentushca llactapi causangapajmi, shina cazushpa causana canguichi” nijurcami.