Read Imbabura Highland Quichua DEUTERONOMIO 31 Bible Online

DEUTERONOMIO 31 - Imbabura Highland Quichua bible

DEUTERONOMIO 31

¹Moisesca, cai shimicunata tucui israelcunaman ashtahuan villashpami,

²cashna nijurca: “Cai punllami ñucaca, patsaj ishcai chunga huatata charini. Cangunahuan maiman llujshitapash, cutin yaicumuitapash na ashtahuan ushanichu. Chai jahuami, Mandaj Diosca: ‘Cai Jordán yacutaca, na chimbanguichu’ nihuarca.

³Cangunata Mandaj Taita Diosca, paillatami cangunata ñaupashpa ringa. Chai llactapi causajcunata cangunapaj ñaupajpi pai tucuchijpimi, chai llactataca cangunapaj cachun japinguichi. Josuemi, Mandaj Dios imashna nishcashnallata pushashpa chimbanga.

⁴Mandaj Diosca, chai llactapi causajcunataca, amorreocunata mandaj Sehón shuti, Og shuti jatun mandajcunata llaquichishcashnallatami llaquichinga. Paicunataca, paicuna mandanajuj llactacunandimi tucuchirca.

⁵Chaipi causajcunataca, Mandaj Diosmi cangunapaj maquipi churanga. Paicunataca, tucuita ñuca mandashcashnallatami rurana canguichi.

⁶Cangunaca, shinlli tucushpa, ali yuyaita japichi. Na manllarinachu canguichi, paicunataca na manllanachu canguichi. Cangunata Mandaj Taita Diosmi, cangunahuan ringa. Paica napacha saquingachu, na jichushpa saquingachu” nijurcami.

⁷Chai jipami Moisesca, Josueta cayashpa, tucui israelcunapaj ñaupajpi cashna nirca: “Shinlli tucushpa, ali yuyaita japingui. Canmi, cai gentecunahuanga, cangunapaj ñaupa taitacunaman carashami nishpa, Mandaj Dios juramentushca llactaman yaicugringui. Canmi, chai alpacunataca, paicunapaj cachun cungui.

⁸Mandaj Diosmi, canda ñaupashpa ringa. Paimi canhuan canga. Candaca napacha saquingachu, na jichushpa saquingachu. Ama manllaichu, manllana yuyai japichumbash ama saquichu” nircami.

⁹Moisesca, cai mandashca shimicunata escribishpami, Mandaj Dioshuan ari ninajushpa escribishcata alichishca arcata apaj Levipaj mirai curacunaman, israelcunata tucui mandaj rucucunamambash curca.

¹⁰Paicunatami Moisesca, cashna nishpa mandarca: “Cada canchis huata tucuripica, divicunata cungana huatapash, malquicunahuan chugllata rurana fiestapashmi canga.

¹¹Chai punllacunapimi tucui israelcunaca, canda Mandaj Taita Dios agllashca pueblopi, paipaj ñaupajpi tandanajunga. Chaipica, cai mandashca shimicunatami, tucuicunapaj ñaupajpi paicuna uyajta leyina canguichi.

¹²Tucui gentecunatami jaricunata, huarmicunata, huahuacunata, cangunapaj pueblocunapi causaj shuj llactamanda runacunatapash tandachina canguichi. Cai shimicunata uyashpa yachajuchun, cangunata Mandaj Taita Diosta manllaihuan cazuchun, cai mandashca shimicunata pactachishpa causachunmi, chashna tandachina canguichi.

¹³Shinallata paicunapaj miraicuna nara yachashca cashpapash, canguna japingapaj rinajuj llactapi, cangunata Mandaj Taita Diosta manllashpa causanata uyashpa yachajuchunmi, chashna tandachina canguichi. Chai llactata japingapaca, Jordán yacuta chimbanami canguichi” nijurcami.

¹⁴Mandaj Diosca, Moisestaca cashnami nirca: “Ricui, ñami can huañuna punllapash chayamushca. Josueta cayashpa, ñucahuan tuparina jatun carpapi shuyaichi. Chaipimi, pai imatalla ruranataca cusha” nircami. Shina nijpimi Moisespash, Josuepash rishpa, Dioshuan tuparina jatun carpapi shuyanajurca.

¹⁵Chaipimi Mandaj Diosca, pilarshnalla shayajuj fuyupi ricurirca. Pilarshnalla shayajuj fuyuca, jatun carpaman yaicuna pungu jahuapimi shayarirca.

¹⁶Chaipimi Mandaj Diosca, Moisestaca cashna nijurca: “Ricui, canga huañushpami, cambaj ñaupa taitacunahuan tandanajungui. Can huañujpica, cai israelcunaca paicuna causangapaj rinajuj llactapi causanajushpaca, chai llactapi tiaj shuj dioscunata catishpa, huainayangapajmi jatarinajunga. Shina rurashpami, ñuca paicunata ari nichishcatapash saquishpa, yangapi churanajunga.

¹⁷Chaimandami chai punllapica, paicunahuanga nina japirinshna fiñarisha. Shinallata paicunata jichushpa saquishpa, paicunaman ñuca ñavita na ricuchijpimi, paicunaca tucuchi tucunga. Paicunataca, ashtaca nalicuna, ninan llaquicunami japinga. Shinamandami chai punllapica, cashna ninajunga: ‘¿Nachu cai llaquicunaca, ñucanchi Taita Dios, na ñucanchi chaupipi cajpi japij shamushca?’ ninajungami.

¹⁸Ashtahuangarin chai punllapica, chai tucui nalicunata rurashcamandami, ñuca ñavitaca napacha ricuchisha. Shuj dioscunaman tigrarishcamandami, chashna rurasha.

¹⁹Cunanga, cai candanata escribinguichi. Chai jipaca, israelcunaman yachachingui. Cai candanataca, israelcunata fiñashpa llaquichinata ricuchijuchun, paicunapaj shimihuambacha candanajuchun yachachingui.

²⁰Paicunapaj ñaupa taitacunaman carashami nishpa juramentushca llactamambash, ñucallatami pushasha. Chai llactapica lechepash, balun mishquipash ashtacapachami tian. Chaipica, na munangacaman micushpami virayanajunga. Chai jipaca, shuj dioscunapajman tigrarishpa chaicunata servishpami, ñucata fiñashpa ñucahuan ari ninajushcatapash yangapi churanajunga.

²¹Ashtaca nalicuna, ninan llaquicuna japijpimi, cai candanaca paicunata yarichishpa ñavi ñavi rimanga. Paicunapaj miraicunapaj shimihuambash candashpami yarinajunga. Paicunaman carashami nishpa juramentushca llactaman nara chayashpallata, paicuna imata yarinajujtaca ñami yachani” nijurcami.

²²Moisesca, cai candanataca chai punllallata escribishpami, israelcunaman yachachijurca.

²³Nun shuti runapaj churi Josuetaca, cashna nishpami mandarca: “Shinlli tucushpa, ali yuyaita japingui. Canmi, israelcunataca ñuca paicunaman carashami nishpa juramentushca llactaman pushangui. Ñucami canhuan casha” nircami.

²⁴Moisesca, cai mandashca shimicunataca shuj libropimi, tucuringacaman escribirca.

²⁵Chai jipami Moisesca, Mandaj Dioshuan ari ninajushpa escribishcata alichishca arcata apaj levitacunata, cashna nishpa mandarca:

²⁶“Cai mandashca shimicunata japishpa, cangunata Mandaj Taita Dioshuan ari ninajushpa escribishcata alichishca arca ladopi churaichi. Chaipimi, cangunata fiñashpa llaquichinata ricuchishpa chaipi tiajunga.

²⁷Ñucami, canguna na cazujcuna cajtapash, shinlliyashcacuna cajtapash yachani. Ricuichi, cunan cangunahuan ñuca causajujpipash, Mandaj Diosta napacha cazujcunami canguichi. Ñuca huañushca jipacarin, ashtahuan nalicunami tucunguichi.

²⁸Cangunapaj aillucunata mandaj rucucunata, caishuj mandajcunatapash, ñuca ñaupajman tandachimuichi. Shina tandachimujpimi, cai shimicunata paicuna uyajta rimasha. Shinallata paicunata fiñashpa llaquichinata ricuchijuchunmi, jahua pachatapash, cai pachatapash cayasha.

²⁹Ñuca huañushca jipa, canguna cashna tucunatami yachani: Cangunaca, huaglicunapacha tucushpami, canguna catinajuchun ñuca mandashca ñanmandapash anchuringuichi. Shinallata Mandaj Diospaj ñaupajpi, cangunapaj maquihuan nalicunata rurashpa fiñachishcamanda, jipa punllacunapi jatun nalicuna shamunatapash yachanimi” nijurcami.

³⁰Shina nishca jipami Moisesca, tandanajushca tucuilla israelcuna uyajta cai candana shimicunataca callarimanda tucuringacaman rimajurca: DEUTERONOMIO