Read Imbabura Highland Quichua DEUTERONOMIO 33 Bible Online

DEUTERONOMIO 33 - Imbabura Highland Quichua bible

DEUTERONOMIO 33

¹Taita Diospajta ruraj Moisesca, pai nara huañushpallatami, taita Israelpaj miraicunataca bendiciajurca. Pai bendiciashca shimicunaca, caicunami.

²Paica cashnami nijurca: “Mandaj Diosca, Sinaí shuti urcumandami shamurca. Seir shuti urcumandami punchayachijurca. Parán shuti urcumandapachami, punchapamba ricurirca. Paipajlla causaj, chunga huaranga huarangacunapaj chaupipimi shamurca. Paipaj ali lado maquipica, mandashcatami ninatashna apashpa shamurca.

³Pai agllashca gentecunataca juyarcarami. Tucui paipajlla shicanyashcacunami, paipaj maquipi causanajurca. Chaimandami, maita rinata can ricuchishcata chasquishpa, can yachachishcata catinajurca.

⁴Mandashcata Moisés cujushpaca, Jacobopaj mirai tandanajushca gentecunapaj cachunmi curca.

⁵Gentecunata mandajcuna Israel aillucunahuan tandanajujpica, Jesurún shuti pushtupimi jatun mandaj tucurca.

⁶Rubén ailluca, ama huañushpa causajuchunlla. Chai aillu runacunaca, ama huaquingunalla cachun” nishpami bendiciajurca.

⁷Judá aillutaca, cashna nishpami bendiciarca: “Mandaj Dioslla, Judá aillu mañajujtaca uyapairi. Paipaj gentecunatapash pushapairi. Paicunata fiñajcunataca, paipaj maquihuan mishachun, cambash ayudapairi” nircami.

⁸Leví aillutaca, cashnami nijurca: “Can charishca Tumim nishcapash, Urim nishcapash, Diosta yariashpa causaj runapajmi canga. Paitami, Masah nishca Meriba shuti yacupi cashpa, paihuan fiñanajushpa pai imashna cajta ricurcangui.

⁹Paimi, paipaj taita mamataca: ‘Ima horapash na ricushcanichu’ nirca. Paipaj huauquicunatapash: ‘Na rijsinichu’ nircami. Paipaj huahuacunatapash: ‘Na ricushcanichu’ nircami. Paicunami, cambaj Shimicunata cazunajurca. Canman ari nishcatapashmi pactachinajurca.

¹⁰Paicunami, Jacobopaj miraicunamambash, aliguta ricushpa mandanata yachachinajunga. Can mandashcatami, israelcunaman yachachinajunga. Shinallata inciensotapash, cambaj ñaupajpimi cushnichinajunga. Tucuillata rupachina animaltapash, cambaj altarpimi churanajunga.

¹¹Mandaj Dioslla, paicuna imaguta rurashcatapash bendiciapairi. Paicunapaj maquihuan imaguta rurashcatapash cushijuihuan chasquipairi. Paicunata fiñajcunatapash, paicunata millanayachij runacunatapash, ima horapash ama jatarichun huasha tulluta faquipairi” nijurcami.

¹²Benjamín aillutaca, cashnami nirca: “Paicunaca, Mandaj Dios juyashcacunami. Imatapash na manllashpami, paipaj ladopi aliguta causanga. Paicunataca pacashpa charijungallami. Diospaj rigra ucupimi causanajunga” nircami.

¹³Josepaj aillutaca, cashnami nijurca: “Cangunapaj alpacunataca, Mandaj Dios bendiciapachun. Jahua pachamanda juyailla jamzi paramuhuan, manllanayai ucu ucupi tiaj yacuhuambash bendiciapachun.

¹⁴Rupai punllacunapica, ashtahuan ali granocunata fucuchishpa, luna punllacunapica, micunayai granocunata fucuchishpa bendiciapachun.

¹⁵Punda huatacunamandapacha tiaj urcucunapica, ashtahuan ali granocunatami fucuchinga. Causaita causaicaman tiaj lomacunapica, ashtaca granocunata fucuchishpa bendiciapachun.

¹⁶Shinallata ali alpacunapi tucui imalla ashtahuan ali tiashcacunahuan bendiciapachun. Zarza casha yurapi causajushca Diospaj juyaica, Josepaj umaman shamupachun. Paipaj huauqui puracunapi mandaj runapaj umamambash shamupachun.

¹⁷Pai juyailla canaca, punda huachashca jari huagrashnami. Paipaj ushaica, búfalo nishca huagrapaj cachushnami. Chaicunahuan tupanshnami shuj gentecunataca, cai pacha tucuri manñacunaman tucuillata cachanga. Efrainbaj mirai paicunaca, chunga huaranga huarangacunami. Manasespaj mirai paicunaca, huaranga huarangacunami” nircami.

¹⁸Zabulón aillutaca: “Zabulón, canga maiman llujshishpapash cushijungui” nircami. Isacar aillutapash: “Canga, cambaj carpacunapi cushijushpa causanguilla” nircami.

¹⁹“Paicunaca, gentecunataca paicunapaj urcumanmi cayanga. Chaipimi, imatapash cashcatapacha rurashpa, animalcunata Diosman cushpa huañuchinajunga. Chaimandami, mama cucha yacupi ashtacapacha tiajcunata micunajunga. T'iyu alpapi pacashca juyaillagucuna tiajtapashmi japinajunga” nircami.

²⁰Gad aillutaca, cashnami nirca: “Gad ailluman ashtaca alpacunata caraj Diosca, aligumi cangui ni tucushca cachun. Gad ailluca, leonshna samashpami rigratapash, umatapash micungapaj aisashpa surcun.

²¹Paica, ashtahuan ali alpatami, paipaj cachun agllan. Chaipimi, mandajman cungapaj ali alpata alichishca charirca. Paimi, gentecunata ñaupashpa shamurca. Mandashca shimicunata, imatapash cashcatapacha rurashpa, imata rurachun Mandaj Dios mandashcacunataca, israelcunahuanmi pactachirca” nircami.

²²Dan aillutaca, cashnami nirca: “Dan ailluca, huahua leonshnami Basán urcumandapacha fahuamujun” nircami.

²³Neftalí aillutaca, cashnami nirca: “Neftalí aillumanga, imata cashpapash na ushangacamanmi carashca. Mandaj Dios bendiciashcataca, ashtacatapachami charin. Paipaj alpaca, indi huashajuj ladomanda urai ladocamanmi” nircami.

²⁴Aser shuti aillutaca, cashnami nirca: “Aser ailluca, Jacobopaj mirai puracunapi bendiciai tucushca cachun. Paipaj huauquicunapipash, juyai tucushca cachun. Paipaj chaquitapash, aceitepi mutiyachijuchun.

²⁵Cambaj pungucunata jarcanacunaca, jirruta, bronceta rurashcami canga. Cambaj ushaipash, can causana punllacunashnami canga.

²⁶Jesurún nishcapaj Taita Dioshuan chimbapurangapaca, pipash na tianllu. Paica canda ayudangapajmi, jahua pachapi tiarin. Paipaj ninan ushaihuanmi, fuyu jahuapi tiarin.

²⁷Can pacajunaca, causaita causajuj Taita Diosmi. Causaita causajuj Diospaj rigrapash, cai pachacamanmi. Canda fiñajcunataca, cambaj ñaupajmanda llujchishpa cachashpami: ‘Paicunata tucuchi’ nishpa mandarca.

²⁸Israelcunaca, imatapash na manllashpami causanajunga. Taita Jacobopaj miraicunapaj pugyuca, trigopash, uvaspash tiaj llactapimi, paicunapajlla tiajunga. Jahua pachamandapashmi, jamzi paramuta shutuchimunga.

²⁹Israelcunalla, cushijuichiyari. ¿Pita cangunashna, Mandaj Dios quishpichishca gentecuna tianyari? ¿Pita escudoshna canda pacaj, canda mishachij espadashna Diosca tianyari? Chashnamandami, canda fiñajcunaca pingai tucushpa urai cumurinajunga. Cangunami, paicunapaj urcu jahuacunapi sarunguichi” nijurcami. DEUTERONOMIO