Read Imbabura Highland Quichua DEUTERONOMIO 34 Bible Online

DEUTERONOMIO 34 - Imbabura Highland Quichua bible

DEUTERONOMIO 34

¹Moisesca, Moab llacta pambacunamandaca, Nebo shuti urcuman vichai rishpami, Jericó shuti pueblo chimba purapi tiaj Pisga shuti urcuman rirca. Mandaj Diosca, tucui Galaad llactatami, Dan aillupaj llactacaman ricuchirca.

²Neftalí aillupaj tucuilla llactata, Efraín aillupaj, Manasés aillupaj tucuilla llactacunata, Judá aillupaj tucuilla llactatapashmi, indi huashajuj lado mama cuchacaman ricuchirca.

³Shinallata Neguev pambatapash, Jordán yacu pugru pambatapash, palmera quirucuna tiaj Jericó pambatapash, Zoar shuti pueblocamanmi ricuchirca.

⁴Chai tucuita ricuchijushpami Mandaj Diosca, cashna nirca: “Abrahamman, Isaacman, Jacobomambash carashami nishpa juramentushca llactaca, cai llactami. Paicunamanmi: ‘Cangunapaj miraicunamanmi carasha’ nishpa juramenturcani. Cambaj ñavihuambacha ricuchunllami saquini. Ashtahuangarin chaiman chimbaitaca, na ushanguichu” nircami.

⁵Chai jipami, Mandaj Diosta servij Moisesca, Mandaj Dios imashna nishcashnallata, Moab llactapi huañurca.

⁶Paitaca, Moab llactapillatami, Bet-peor shuti pueblo chimba purapi tiaj, pugru pambapi pambarca. Moisesta maipi pambashcataca, cunangaman pipash na yachanllu.

⁷Moisesca, patsaj ishcai chunga huatata charishpami huañurca. Paipaj ñavica, ima horapash na amsayarcachu. Paica, ali shinllipachami carca.

⁸Israelcunaca, Moisés huañushcamandaca, quimsa chunga punllacamanmi, Moab pambacunapi huacanajurca. Shinami, huañui tiajpi imashna huacan cashcashnallata, Moisés huañushcamanda ninanda llaquirishpa, huacashpa pactachirca.

⁹Nun shuti runapaj churi Josueca, paipaj umapi Moisespaj maquita churajpimi, ali yachaita cuj espirituhuan junda tucushpa, alipacha yachajushca tucurca. Chaimandami israelcunaca, Mandaj Dios imashna Moisesta mandashcashnallata, Josuetapash cazunajurca.

¹⁰Israel llactapica, Moisés runashna shuj villaj runaca, ima horapash na tiarcachu. Mandaj Diosca, Moisesta rijsishcamandami, ñavi ñavi rimajurca.

¹¹Tucui ricuchinacunata, jatun manllarinacunata, Egipto llactapi rurachun Mandaj Dios cachajpi Moisés rurashcashnaca, pipash na rurarcachu. Chaicunataca, Faraonbaj ñaupajpi, tucui paita servijcunapaj ñaupajpi, paipaj tucui chai llactapimi chashna rurajurca.

¹²Moisesca, ninan ushaita charishpami, jatun manllarinacunata, manllanayai ruranacunatapash, tucuilla israelcuna ricujta rurajurca.