Read Imbabura Highland Quichua DEUTERONOMIO 7 Bible Online

DEUTERONOMIO 7 - Imbabura Highland Quichua bible

DEUTERONOMIO 7

¹Canguna yaicushpa japina llactamanmi, cangunata Mandaj Taita Diosca pushanga. Chaipica, ashtaca llactacunapi causanajuj heteo, gergeseo, amorreo, cananeo, ferezeo, heveo, jebuseo nishca gentecunatami llujchishpa cachanguichi. Paicunaca, ninan ashtaca cangunata yali shinlli, canchis llactacunami canga.

²Cangunata Mandaj Taita Dios chai llactapi causajcunata, cangunapaj maquipi churajpica, paicunata mishashpami tucuillata tucuchina canguichi. Paicunahuanga, imatapash na ari ninajunachu canguichi. Paicunataca, llaquitapash na llaquinachu canguichi.

³Paicunahuanga, na familiapura tucunachu canguichi. Cangunapaj ushicunataca, paicunapaj churicunahuanga, na cazarachinachu canguichi. Paicunapaj ushicunatapash, na cangunapaj churicunahuan cazarachinachu canguichi.

⁴Cangunapaj churicunataca, Mandaj Diosta catinamanda anchuchijpimi, shuj dioscunatara servinajunga. Shina rurajpimi, Diosca nina japirinshna ninandapacha fiñarishpa, cangunataca ucha tucuchinga.

⁵Ashtahuangarin paicunahuanga, cashnami rurana canguichi: Paicuna rurashca altarcunata urmachishpami, paicunapaj rumi dioscunatapash faquina canguichi. Asera shuti huarmi diosman rijchajcunatapash tucuchishpami, labrashpa rurashca dioscunatapash rupachina canguichi.

⁶Cangunaca, cangunata Mandaj Taita Diospajlla shicanyachishca gentecunami canguichi. Cangunata Mandaj Taita Diosca, paipajlla juyailla gentecuna cachunmi agllarca. Cai pachapi causanajuj tucui gentecunata ashtahuan yali cachunmi agllarca.

⁷Mandaj Diosca, cangunataca tucui gentecunata ashtahuan yali cashcamanda juyashpaca, na agllarcachu. Cangunaca, tucui gentecunata ashtahuan yali yangallacunami carcanguichi.

⁸Ashtahuangarin Mandaj Dios juyashpallami, cangunataca agllarca. Cangunapaj ñaupa taitacunaman juramentushcata pactachingapajmi, ninan ushaita charij maquihuan llujchimurca. Cangunataca Egipto llactata jatun mandaj Faraonbaj ñaupajpi, gañan causanajujmanda cacharichishpami llujchimurca.

⁹Shina cashcamanda Mandaj Taita Diostaca, Taita Diospacha cajta, imata nishcatapash pactachij Taita Dios cajta rijsichiyari. Paita juyashpa, pai mandashcacunata pactachijcunaman, pai ari nishcata huaranga miraicunacaman pactachij, llaquij Diosmi.

¹⁰Ashtahuangarin paita na ricunayachijtaca, cuna cashcata paimambacha cushpami, llaquichishpa tucuchin. Paita fiñajcunataca, cuna cashcata paimambacha ucha cushpami tucuchinga.

¹¹Shina cashcamanda pai mandashcacunata, pactachinajuchun cushca shimicunata, imata rurachun pai mandashcacunata pactachinajuchun cunan ñuca mandashcataca, pactachinami canguichi.

¹²Imata rurachun mandashcacunata uyashpa, aliguta yarishpa pactachishcamandami, canda Mandaj Taita Diosca, cambaj ñaupa taitacunata llaquishpa, ari nishpa juramentushcataca pactachinga.

¹³Cangunataca juyashpa bendiciashpami, ashtacatapacha mirachinga. Canmanda llujshishca huahuacunata, cambaj pambapi tarpushca chagracunata, ashtahuan shuj granocunata, llullu vinota, aceitetapashmi bendicianga. Shinallata huarmi huagracunapaj huahuacunata, ashtaca llamacunatapashmi bendicianga. Cambaj ñaupa taitacunaman, pai carashami nishpa juramentushca llactapimi, chashna bendicianga.

¹⁴Canga, tucui gentecunata yalimi bendiciai tucungui. Canguna purapica, huahuata na tarichij jaripash, huahuata tarinata na yachaj huarmipash na tiangachu. Animalcunapash huahuata na charijca, na tiangachu.

¹⁵Mandaj Diosca, canmandaca tucui ung:uitami anchuchinga. Egiptopi tiashca huañuchij tucui llaquicunataca, na cambajman cachamungachu. Chaicunataca canllata ricurcanguimi. Ashtahuangarin canda na ricunayachij gentecunapaj jahuapimi, chai llaquicunataca cachamunga.

¹⁶Canda Mandaj Taita Dios, cambaj maquipi churashca tucuilla gentecunatami, na llaquishpa tucuchina cangui. Paicunapaj dioscunataca, nitijachinshna pandachina cajpimi, na servina cangui.

¹⁷Cangunapaj shungupica, cashnami ninajunguichi: ‘Cai llactapi causajcunaca, ñucanchita yali ashtacacunamari. ¿Imashnata tucuchishunyari?’ ninguichimi.

¹⁸Shina cajpipash, paicunataca na manllanachu cangui. Faraondapash, Egiptopi causajcunatapash, cangunata Mandaj Taita Dios imashna llaquichishcataca, aligutami yarina cangui.

¹⁹Canda Mandaj Taita Diosca, can ricujta, ninan llaquicunata cachamushpa, imapash ricuchinacunata ricuchishpa, pipash na rurai ushanallacunata rurashpa, paipaj ushaita charij maquihuan, paipaj rigrata chutashpami, candaca Egiptomanda llujchimurca. Chashnallatami, canda Mandaj Taita Diosca, paicuna ricurimujpi can manllajuj tucui gentecunataca ruranga.

²⁰Shinallata canda Mandaj Taita Diosca, millai balun chuspicunata paicunapajman cachamushpami, cambaj ñaupajmanda pacajushpa quedashcacuna tucuringacaman llaquichinga.

²¹Paicunapaj ñaupajpica, na shaijunshna quedanachu cangui. Canda Mandaj Taita Diosca, cambaj chaupipimi. Paica, manllana jatun Taita Diosmi.

²²Canda Mandaj Taita Diosca, chai llactapi causajcunataca, asha ashami cambaj ñaupajmanda anchuchinga. Sacha animalcuna yapa jundashpa canda ama llaquichinajuchunga, chai gentecunataca na ñapash tucuillata tucuchinachu cangui.

²³Ashtahuangarin canda Mandaj Taita Diosmi, paicunataca cambaj ñaupajpi churanga. Paicunataca, tucuchi tucungacamanmi, ninan llaquicunahuan llaquichinga.

²⁴Paicunata jatun mandajcunatapash, Diosllatami cambaj maquipi churanga. Canmi, paicunapaj shuticunatapash cai pachamanda chingachingui. Can tucuillata tucuchingacamanmi, cangunahuanga pipash na macanajui ushanga.

²⁵Labrashpa rurashca paicunapaj dioscunatapash rupachinami cangui. Paicunapaj culquita, orotapash cangunapaj cachun japingapaj, na munanachu cangui. Nitijanshna ama pandangapajmi, chaicunataca na japina cangui. Chaitaca, canda Mandaj Taita Diosca millanayachinmi.

²⁶Dios tucuchingapaj shicanyachi tucushca ama cangapaca, imapash millanayaicunataca, cambaj huasiman na apanachu cangui. Chaicunataca, Dios tucuchingapaj shicanyachishca cajpimi ninandapacha millanayachina, na ricunayachina cangui.