Read Imbabura Highland Quichua JUAN 10 Bible Online

JUAN 10 - Imbabura Highland Quichua bible

JUAN 10

¹Na panguta na yaicushpa, maitapash vitsiashpa yaicuj runaca shuhuaj, huañuchij runami can.

²Ashtahuangarin llamacunata michij runaguca, pungutami yaicujun.

³Michij runagu yaicuchunga, punguta cuidashpa causajmi pascan. Llamacunaca, michij runagu rimajujtaca rijsinllami. Shina cajpimi michij runaguca, paipaj llamacunata shutipi cayachishpa, corralmanda llujchijun.

⁴Michij runaguca, pai michishpa purijuj llamacunata tucuillata llujchishpaca, ñaupashpami rijun. Llamacunapash, michij runagu rimajujta rijsishpaca, catishpa rinllami.

⁵Na rijsishca runa rimajta uyashpaca, napacha catinllu. Ashtahuangarin chai na rijsishca runa rimajta uyashpaca, llamacunaca maitapash calpanllami— nijurcami.

⁶Paicunata yarichingapajmi, Jesusca cashna nijurca. Ashtahuangarin imamanda chashna nijujtapash, paicunaca na yacharcachu.

⁷Jesusca, cutinmi paicunataca cashna nijurca: —Napacha llullashpami, quiquingunataca cashna nijuni: Ñucami, llamacuna yaicuna pungu cani.

⁸Ñucapaj punda shamujcunaca, tucuicunami shuhuacuna, huañuchijcuna carca. Ashtahuangarin llamacunaca, paicunataca na uyarcachu.

⁹Ñucallami pungu cani. Maijambash ñucamanda yaicushpaca quishpiringami. Corralman yaicushpa, llujshishpa purijllami, ali micunaguta taringa.

¹⁰Shuhuaca apangapaj, huañuchingapaj, tucuchingapajllami shamun. Ñucaca, causaita causagrinata juyaillagutapacha charichunmi shamurcani.

¹¹Ñucallami, aliguta michij cani. Aliguta michij cashpami, ñucapaj llamacunamandaca huañusha.

¹²Ashtahuangarin culquimandalla michishpa purij runaca, napacha aliguta michinllu. Na paipaj llamacuna cajpimi, atuj shamujujta ricushpapash, llamacunata saquishpa pacajushpa calpan. Atuj shamushpaca, llamacunata apashpami, tucuillata caita chaita calpachin.

¹³Culquimandalla michishpa purij runaca, llamacunaca imapash cachun yashpami pacajushpa calpan.

¹⁴Ñucallami, aliguta michij cani. Shina cashpami, ñucapaj llamagucunataca rijsini. Shinallata paicunapash ñucataca rijsihuanmi.

¹⁵Imashnami ñucapaj Taitapash ñucata rijsihuan, chashnallatami ñucapash ñucapaj Taitataca rijsini. Ñucapaj llamacunamandaca huañushallami.

¹⁶Shinallata na cai corralmanda shuj llamacunatapash charinimi. Paicunatapash pushamunami cani. Paicunami, ñuca villachijushcata uyashpa cazunajunga. Shina cazujpica, shujlla corralmi tucunga. Shina tucujpimi, paicunataca ñucalla michijusha.

¹⁷Chaimandami ñucapaj Taitaca juyahuan. Paicunamanda huañushpapash, cutinmi causarisha.

¹⁸Ñucata huañuchitaca, pipash na ushangachu. Ashtahuangarin ñucallatami huañuchi tucusha. Huañuchi tucungapajpash, cutin causaringapajpash ushaita charinimi. Chashna ruranataca, ñucapaj Taita mandashcatami chasquircani— nijurcami.

¹⁹Jesús chashna nijujpimi judiocunaca, paicunapura maitapash nirishpa cutin fiñanajurca.

²⁰Paicuna purami, ashtacacuna cashna ninajurca: —Cai runaca aya jundashca, juizu illajmari can. ¿Imapajta paitaca uyanajunguichi?— ninajurcami.

²¹Ashtahuangarin huaquingunaca, cashnami ninajurca: —Aya jundashca cashpaca, na cashna juyailla villachinmanllu. Aya cashpaca, ¿imashnata ñausacunapaj ñavitaca pascaita ushanmanyari?— ninajurcami.

²²Jerusalenbica, Diospaj huasita Diosman mingashcata yarishpami, fiestata ruranajurca. Chai punllacunaca, tamia quillacunami carca.

²³Jesusca, Diospaj huasi ucupimi, Salomón rurashca corredorpi purijurca.

²⁴Chaipi cajpimi judiocunaca, Jesusta chaupipi churashpa cashna ninajurca: —¿Ima punllacamanda ñucanchi ishcai shungu tucushpa purinajuchunga saquigringui? Canllata Quishpichij Cristo cashpaca, na llullashpa ñucanchiman villachiyari— ninajurcami.

²⁵Shina nijpimi Jesusca, paicunataca cashna nijurca: —Quiquingunaman ña villachijujpipash, napacha cringuichica. Ñucapaj Taitapaj shutipimi, imagutapash rurajuni. Ñuca Quishpichij cajtaca, chai ruraigumi quiquingunaman ricuchijun.

²⁶Ashtahuangarin quiquingunaca, na ñucapaj llamacuna cashpami na crihuanguichi. Chaitaca, ñami quiquingunaman villachijurcani.

²⁷Ñucapaj llamacunaca, ñuca rimajujta uyanajunmi. Ñucapash paicunataca rijsinimi. Paicunapash ñucataca catihuanllami.

²⁸Paicunamanmi, causaita causagrinataca carani. Chaimandami, chingaita chingangapaca na rinajuga. Paicunataca, ñucapaj maquimandaca pipash na quichushpa apangachu.

²⁹Paicunataca, ñucapaj Taitami ñucaman carahuarca. Paimi, tucuitapash yali ushaita charin. Shinamandami ñucapaj Taitapaj maquimandaca, pipash na quichushpa apanga.

³⁰Ñucahuan, ñucapaj Taitahuanga shujllami canchi— nijurcami.

³¹Shina nijpimi judiocunaca, Jesusta huañuchingapaj cutin rumicunata japinajurca.

³²Shinamandami Jesusca, cashna nishpa tigrachirca: —Ñucapaj Taita ushaita caramujujpimi, ashtaca juyailla ruraicunata rurajushpa, quiquingunaman ricuchijushcani. ¿Chai ruraicunamanda, maijanmandata cashna rumicunahuan huañuchingapaj munahuanguichi?— nijurcami.

³³Shina nijujpimi judiocunaca, cashna nishpa tigrachinajurca: —Quiquin ali ruraiguta rurajuimandaca, na rumicunahuan huañuchingapaj munanchica. Ashtahuangarin quiquinga, runa cashpapash Diosmi cani nishpa, Taita Diosta fiñachijuimandami, rumicunahuan huañuchingapaj munanchi— ninajurcami.

³⁴Shina nijpimi Jesusca, cashna nishpa tigrachirca: —Quiquingunata mandashca shimipimi: ‘Dioscunami canguichi’ nishpa, Taita Dios escribichishca.

³⁵Taita Dios villachijushcata crijcunataca: ‘Quiquingunaca, dioscunami canguichi’ nishcami. (Dios escribichishca Shimitaca, na chashnachu nitaca na usharinllu).

³⁶Ñucapaj Taitami ñucataca, ñucapajllami cangui nishpa, cai pachaman cachamuhuarca. Shina cashpami: ‘Taita Diospaj Churimi cani’ nijurcani. Ashtahuangarin quiquingunaca: ‘Diostami fiñachishpa purijungui’ nihuanguichimi.

³⁷Ñucapaj Taita rurachun mandashca ruaraicunata ñuca na rurajujpica, na crinachu cahuanguichi.

³⁸Ashtahuangarin ñucapaj Taita mandashca ruraicunatami rurajuni. Ñucata na crishpapash, ñuca imata rurajujtaca, crinami canguichi. Chaita crishpaca, ñucapaj Taita ñucahuan causajujta, ñucapash ñucapaj Taitahuan causajujtami aliguta yachanguichi— nijurcami.

³⁹Shina nijpimi paicunaca, Jesusta cutinllata prezu japingapaj munanajurca. Ashtahuangarin Jesusca, paicunapaj chaupimanda rircallami.

⁴⁰Jesús chaimanda llujshishpaca, cutinmi Jordán yacu chimba ladoman rishpa quedarca. Chaipimi Juanga, pundaca bautizajushca carca.

⁴¹Ashtaca gentecunami, paipajman shamushpa cashna ninajurca: —Juanga, imatallapash na juyailla rurashpa ricuchircachu. Ashtahuangarin Jesusmanda imaguta villachijushpapash Juanga, na llullashpami villachijurca— ninajurcami.

⁴²Shina ninajushpami, ashtaca gentecuna Jesusta crinajurca.