Read Imbabura Highland Quichua JUAN 11 Bible Online

JUAN 11 - Imbabura Highland Quichua bible

JUAN 11

¹Chai punllacunapimi, Lázaro shuti runaguca huañujurca. Paica, María shuti, Marta shuti panicunandimi, Betania pueblopi causajurca.

²(Chai huañujuj Lázaro runagupaj pani Mariami, Apunchi Jesuspaj chaquipica, mishquillagu ashnajuj jambita javirca. Shina javishpaca, paipaj ajchahuanmi fichachirca).

³Chai panicunami: —Apunchi Jesús, quiquin ninanda juyashca Lázaro runaguca huañujunmi— nishpa, Jesusman villachigrichun cacharca.

⁴Shina nijta Jesús uyashpami, cashna nijurca: —Cai ung:uihuanga, na huañungachu. Ashtahuangarin Taita Diostaca, punchapambagumi cangui ninajuchun, Taita Diospaj Churipash, chai ungushca runamanda punchapambagumi cangui ni tucuchunmi, chashna tucushca— nijurcami.

⁵Martatapash, paipaj ñañatapash, Lázaro runatapash, Jesusca ninandami juyarca.

⁶“Lázaro runaguca huañujunmi” nishpa villachijpipash Jesusca, ishcai punllatami chaipillata quedarca.

⁷Ishcai punlla jipami, Jesusca paipaj yachajujcunataca: —Judea llactaman cutin tigrashunchi— nirca.

⁸Shina nijpimi, paipaj yachajujcunaca cashna ninajurca: —Rabí, cunanga quiquinda rumicunahuan huañuchingapajmi judiocunaca munarca. Shina cajpipash, ¿cutinllu chaimanllata ringapaj munajungui?— ninajurcami.

⁹Shina nijpimi Jesusca, cashna nishpa tigrachirca: —Punllacunaca, chunga ishcai horastami charin. Punllapi purijujca, indi punchayachijujpi ricushpami, na nitijashpa purijun.

¹⁰Ashtahuangarin tutapi purijujca, paipi micha na tiajpimi nitijanlla— nijurcami.

¹¹Shina nishpami Jesusca, cashnatapash nijurca: —Ñucanchipaj cumba Lázaro runaguca, ña puñujunmi. Ashtahuangarin paita rijchachingapajmi rigrijuni— nijurcami.

¹²Shina nijujpimi, paipaj yachajujcunaca: —Ña ali tucushpamari puñujunga, Apunchi Jesús— ninajurca.

¹³Paicunaca, ali tucushpa puñujujpimi, chashna nijunga yanajurcami. Ashtahuangarin Lázaro huañushca cajpimi, Jesusca chashnaca nijurca.

¹⁴Chai jipallami, paicuna aliguta yachachun Jesusca, cashna nishpa villachirca: —Lázaro runaguca huañushcami.

¹⁵Pai tucurijujpica, ñuca na chaipi cashca cashpami cushijuni. Quiquinguna ñucata crinajuchunmi, paica huañushca. Shina cajpipash jacu, ripashunchi— nircami.

¹⁶Tomastaca, “chai punllallatami ishcandimi huacharishca” nishpami, rijsin cashca. Paimi, paihuan cumba tucushpa purinajuj yachajujcunata cashna nirca: —Ñucanchipash paihuan huañungapaj, paita catishunchilla— nircami.

¹⁷Lázaro shuti runagutaca, huañushpa ña chuscu punllata pambai tucushcatami Jesusca japigrirca.

¹⁸Betania shuti puebloca, Jerusalenmanda ishcai kilómetro chaupi yalillami carca.

¹⁹Chaipica turi huañushcamandami Martandi, Mariandi llaqui llaqui tianajurca. Paicunata cushichingapajmi judiocunaca, ashtacacuna shamushca carca.

²⁰“Jesús shamujun” nijta uyashpami, Martaca paita tuparingapaj rirca. Ashtahuangarin Mariaca, huasipimi shuyajurca.

²¹Martaca, Jesustaca cashnami nijurca: —Apunchi Jesús, quiquin cai llactapi cajpica, ñucapaj turiguca na huañunmanllu caparca.

²²Ashtahuangarin cunambash yachanimi. Taita Diosta quiquin tucui imaguta mañajpipash, Taita Diosca caramungallami— nijurcami.

²³Shina nijpimi Jesusca: —Quiquimbaj turiguca causaringami— nirca.

²⁴Shina nijpica Martaca, cashnami nijurca: —Tucurimui punllapi huañushcacuna causarijpimi, ñucapaj turigupash causaringa. Chaitaca yachapanimi— nijurcami.

²⁵Shina nijpimi Jesusca, cashna nijurca: —Ñucami causachijpash, causaita causagrinata carajpash cani. Ñucata crijcunaca, huañushca cashpapash causaringami.

²⁶Cunan causajushpallata, ñucata crijcunaca causaita causaicaman na huañungachu. ¿Ñuca nishcata cringuichu?— nijurcami.

²⁷Shina nijpimi Martaca, cashna nirca: —Ari, Apunchi Jesús. Quiquin Quishpichij Cristo cajtaca crinipachami. Taita Dios cachamujpi, cai pachaman shamushca paipaj Churigumi capangui— nircami.

²⁸Shina nishpallami Martaca, paipaj ñaña Mariapajman rirca. Shina rishpami: —Ñucanchita Yachachijmi shamushca. Paimi, candaca shamui nijun— nishpami, pacalla villachirca.

²⁹Chashna villachijpimi María huarmiguca, ñapash jatarishpa, Jesusta tuparingapaj shamurca.

³⁰Jesusca, nara chai puebloman chayarcachu. Paica, Marta tuparishca pushtupillatami shuyajurca.

³¹Mariata cushichingapaj shamushca judiocunaca, huasimanda María ucha llujshishpa rijujtami ricunajurca. Shina ricunajushpami: —Paipaj turita pambashca ladoman huacangapajmi rijun— nishpa catinajurca.

³²Jesusta tuparimushpami María huarmiguca, paipaj ñaupajpi cungurishpa, cashna nirca: —Apunchi Jesús, quiquin caipi cajpica, ñuca turiguca na huañupanmanllu carca— nircami.

³³Shina nishpa María huacajujpimi, paita cumbashpa shamushca judiocunapash huacanajurca. Shina huacanajujta Jesús ricujushpami, shungupi ninanda llaquiyashpa, llaqui llaqui tucujurca.

³⁴Shina llaquiyashpaca: —¿Maipita paitaca pambaparcanguichi?— nishpami tapurca. Shina tapujpimi: —Jacu ricupashun, Apunchi Jesús— ninajurca.

³⁵Jesuspash huacarcami.

³⁶Shina huacajujta ricushpami: —Ricuichi, Lazarotaca ninandami juyan cashca— nishpa judiocunaca parlarinajurca.

³⁷Ashtahuangarin paicuna puramanda huaquingunaca, cashnami ninajurca: —Paica, ñausa runagutapash ñavita alichircami. Lazarotapash ama huañuchunga, ¿nacha imallatapash ruranman carca?— ninajurcami.

³⁸Jesusca, cutin ninanda llaquiyajushpami, Lázaro runaguta pambashca utujuman chayarca. Chai jatun utujutaca, rumihuan jahualla jarcashcami carca.

³⁹Chaiman chayashpami Jesusca: —Rumita suchuchipaichi— nirca. Shina nijpimi, huañushcapaj pani Martaca, cashna nirca: —Paita pambashcapash, ñami chuscu punlla capan. Ña ashnayashcami capanga, Apunchi Jesús— nircami.

⁴⁰Shina nijpimi Jesusca, cashna nijurca: —¿Nachu quiquindaca: ‘Crishpaca, Taita Diospaj punchapambaguta ricunguimi’ nircani?— nijurcami.

⁴¹Shina nijujpimi, huañushcata pambashca utujumandaca, jarcashca rumita suchuchirca. Chai jipallami Jesusca, jahua pachata vichai ricushpa cashna nijurca: —Ñuca Taitalla, ñuca mañajujta uyashcamandami, quiquindaca pagui nijuni.

⁴²Ñuca mañajujta quiquin uyajujtaca yachanipachami. Quiquin ñucata cachamushcata, muyundi shayanajun cai tucuilla gentecuna crinajuchunmi, cashna mañajuni— nijurcami.

⁴³Shina nishpallami: —¡Lázaro, chaimanda llujshimui!— nishpa caparirca.

⁴⁴Shina caparijhuanmi, huañushca Lázaro runaguca maquindi, chaquindi pillushca, umatapash telahuan pillushca llujshimurca. Shina llujshimujpimi, Jesusca: —Pillushcacunata pascashpa, richun saquipaichi— nirca.

⁴⁵Jesús chashna causachijta ricushpami, Mariata cumbangapaj shamushca judiocunaca, ashtacacuna Jesusta crinajurca.

⁴⁶Ashtahuangarin huaquingunaca, Jesús imata rurashcata villachingapajmi, fariseocunapajman rinajurca.

⁴⁷Shinamandami curacunata mandajcunapash, fariseocunapash, mandaj puralla tandanajushcacunahuan cashna ninajurca: —Chai runataca, ¿imatata rurashunchi? Imatapash juyaillacunata ninanda rurashpami ricuchishpa purijun.

⁴⁸Paita imatapash na nishpa yangata saquijpica, tucuillami crishpa catigrinajunga. Chashna catijpica, Roma llactamanda soldadocuna shamushpami, Diospaj huasitapash, ñucanchipaj llactatapash tucuchinajunga— ninajurcami.

⁴⁹Chai huatapica, Caifás shuti curami, curacunata mandaj carca. Paimi, tucuicunata cashna nijurca: —Quiquingunaca, imatapash na yachajmi canguichi.

⁵⁰Cai llactapi causajcuna, tucuilla huañuchi tucungapaj randica, shujlla runa huañushpa ashtahuan ali canataca, yaritapash na yarishpami causanajunguichi— nijurcami.

⁵¹Caifas runaguca, na paipaj munai chashna nijurcachu. Ashtahuangarin paica, chai huatapimi curacunata mandaj cashpami, chai llactapi causajcunamanda Jesús huañunata Dios yarichijpi villachijurca.

⁵²Jesusca, na chai llactapi causajcunamandalla huañunachu carca. Ashtahuangarin Taita Diospaj huahuacuna tucushpaca, caipi chaipi causajcunapash shujlla tucunajuchunmi, paica huañuna carca.

⁵³Tandanajushpa parlarishca chai punllamandami, Jesustaca huañuchishumbacha ninajurca.

⁵⁴Shinamandami Jesusca, judiocunahuan tandanajushpa puritaca na ashtahuan usharca. Ashtahuangarin chaimanda llujshishpa rishpaca, Judea llacta jichushca pamba manñaman tiajuj Efraín shuti pueblomanmi chayagrirca. Chaipimi, paipaj yachajujcunandi quedarca.

⁵⁵Judiocuna pascua fiestata rurana punllacunami ña chayamujurca. Paicunaca, Taita Diospaj ñaupajpi mapa illaj tucungapaj nishpami, ashtacacuna Jerusalenman vichai rinajurca.

⁵⁶Chaiman chayashpami, Jesustaca mascanajurca. Diospaj huasi ucupi paicuna tandanajushpaca, caishuj chaishujmi: —Jesusca, ¿cai fiestaman shamungachu, imashi? ¿Ima ninguichita?— nishpa tapurinajurca.

⁵⁷Curacunata mandajcunapash, fariseocunapash, Jesustaca prezu japingapaj munashpami: —Jesús maipi purijujta yachashpapash, ucha villachij shamupanguichi— nishpa mandashca carca.