Read Imbabura Highland Quichua JUAN 12 Bible Online

JUAN 12 - Imbabura Highland Quichua bible

JUAN 12

¹Pascua fiesta punlla chayangapaca, sucta punllalla tiajpimi Jesusca, Betania shuti puebloman rirca. Chaipimi, Lázaro shuti runaguca causajurca. Paitami, huañushcata Jesusca causachishca carca.

²Chaipimi, paiman carangapaj yanurca. Martami, micunagutaca carajurca. Chai mezapica, Lázaro runagupashmi Jesushuan micushpa tiajurca.

³Shina tianajujpimi María huarmiguca, mishquillagu ashnajuj nardo nishca jambita, chaupi litrotashna apashpa shamurca. Chai jambiguca, ninan valishca, ashtahuan ali jambimi carca. Chaitami, Jesuspaj chaquipi javishpa María huarmiguca, paipaj ajchahuan fichachirca. Shina rurajujpica, chai huasi ucu jundami mishquilla ashnajurca.

⁴Jesuspaj yachajuj puramanda, Simonbaj churi Judas Iscariotemi, Jesustaca japichina carca. Paimi cashna nijurca:

⁵—Mishquillagu ashnajuj cai jambitaca, ¿imashpata na quimsa patsaj denario culquipaj jatushpa, chai culquitaca imagutapash na charijcunaman cararca?— nircami.

⁶Judas runaca, imagutapash na charijcunata llaquimandaca na chashna nircachu. Ashtahuangarin shuhua cashpami, chashna nijurca. Gentecuna carashca culquita muchilapi churashcataca, paimi apashpa purin carca. Chai culquitami, shuhuashpandi purin carca.

⁷Judas chashna nijpimi Jesusca, paita cashna nijurca: —Na chashna ninachu cangui. Cai mishquilla ashnajujtaca, ñuca huañushpa pambai tucuna punllapajmi alichishpa charijushca.

⁸Imagutapash na charijcunaca tiangallami. Ashtahuangarin ñucami, quiquingunahuanga na unaicaman caipi casha— nijurcami.

⁹Betania shuti pueblopi, Jesús purijujta yachashpami, judiocunaca ashtacacuna shamunajurca. Paicunaca Jesustapash, Lázaro runatapash ricungapajmi shamunajurca. Lazarotaca, huañushcatami Jesusca causachishca carca.

¹⁰Ashtahuangarin curacunata mandajcunaca, Lazarotapash huañuchishumbacha ninajurca.

¹¹Lazarota causachijta ricushpami judiocunaca, curacunataca na ashtahuan catinajurca. Ashtahuangarin Jesustami crinajurca.

¹²Chai cayandi punllami, Jerusalenbica pascua fiestata ruranajujpi, ashtaca gentecuna shamunajurca. Paicunami, Jerusalenman Jesús shamujujta uyashpaca,

¹³ramos malquicunata cuchushpa, Jesusta tuparingapaj llujshinajurca. Paicunaca cashna nishpami, ninanda caparinajurca: —¡Diosca, ninanda alicachi tucushca cachun! ¡Jatun Diospaj shutipi shamujujca, aligumari cangui ni tucushca cachun! ¡Paica, israelcunata jatun Mandajmi capan!— ninajurcami.

¹⁴Jesusca, escribishcapi nijunshnami, shuj maltun burrota tarishpaca, chaipi tiarirca. Chai escribishcapica, cashnami nijun:

¹⁵“Sion shuti pueblopi causajcuna, na manllanachu canguichi. Ricuichi, quiquingunata jatun Mandajmi shamujun. Mama burrogupaj maltun burropi tiarishcami shamujun” nijunmi.

¹⁶Jesuspaj yachajujcunaca, imapaj chashna rurajujtapash, chai punllacunapica nara yacharcachu. Ashtahuangarin Jesusta punchapamba llactaguman pushashca jipami paipaj yachajujcunaca, Jesusmanda escribishpa imata nijushcata yarinajurca. Shina yarishpami, chaica ña pactamushcata yachanajurca.

¹⁷Lázaro runagu huañushpa pambai tucushcataca, Jesusmi cayachishpa causachirca. Chaitaca, Jesusta catishpa rijcuna ricushca cashpami, shujcunamambash villachinajurca.

¹⁸Chashna juyailla causachishcata yachashpami, ashtaca gentecuna Jesusta tuparingapaj llujshimurca.

¹⁹Ashtahuangarin fariseocunaca, paicunapura parlarishpami cashna ninajurca: —Ña ricunguichimi. Yanga saquishpaca, na imatapash rurai usharinllu. Ricuichi, gentecunaca tucuillamari paitalla catinajun— ninajurcami.

²⁰Pascua fiesta punllacunapi Diosta mañangapajmi, ashtaca gentecuna Jerusalenman vichai rinajushca carca. Chaipimi, griego nishca huaquin gentecunapash tiarca.

²¹Paicunaca, Felipe shuti runapajman quimirishpami: —Ñucanchipash, Jesusta ricungapajmi munapanchi, taitalla— ninajurca. Felipeca, Galilea llactapi tiaj Betsaida shuti pueblomandami carca.

²²Shina nijpimi Felipeca, Andresman villachigrirca. Paicunaca ishcandimi, Jesusman villachingapaj rirca.

²³Shina villachijpimi Jesusca, cashna nishpa tigrachirca: —Runa Aichayu tucushcata punchapambagumi cangui ni tucuna punllacunami ña chayamushca.

²⁴Napacha llullashpami, quiquingunataca cashna nijuni: Trigo muyu alpapi na urmashpa na ismushpaca, pailla tiajunllami. Ashtahuangarin ismunshna viñashpami, ninanda miran.

²⁵Maijambash paipaj causaitalla juyarishpa causajushpaca, chingaitami chingagringa. Ashtahuangarin maijambash cai pachapi causanata millanayachishpaca, causaitami causagringa.

²⁶Ñucata servingapaj munashpaca, pipash catihuaichilla. Ñucata servijujca, ñuca causajuj llactagupimi paipash causagringa. Ñucata servijtaca, ñucapaj Taitami ninanda alicachinga— nijurcami.

²⁷Cunanmi, ñucapaca ninan llaqui chayamushca. Shina cajpica, ¿imata nipasha? Ñuca Taitalla, ama llaquichi tucuchun quishpichihuai, ¿nipashachu imatayari? Ashtahuangarin caitaca, pactachingapajmi shamurcani.

²⁸Quiquin punchapambagu cajtaca ricuchipayari, ñuca Taitalla— nijurcami. Shina nijhuanmi, jahua pachamandaca cashna rimamurca: —Ñami ñuca punchapambagu cajtaca ricuchircani. Ña punchapamba cajtaca, cutimbash ricuchishami— nijmi uyarimurca.

²⁹Chashna rimajujtaca, chaipi shayanajuj ashtaca gentecunapashmi uyarca. Paicunaca: —Rayomari culun nijun— ninajurcami. Huaquingunaca: —Angelmari, paitaca rimamun yarin— ninajurcami.

³⁰Shina ninajujpimi Jesusca, cashna nishpa tigrachirca: —Ñucapaj ali cachunga, na cashna uyarimunllu. Ashtahuangarin quiquingunapaj ali cachunmi, cashna uyarimun.

³¹Cai pachapajtalla rurashpa causajcunata juzganami, cunanga chayamushca. Cai pachapajtalla rurachishpa mandajca, cunanmi shitai tucunga.

³²Caspipi jahuaman huarcui tucushpaca, tucuicunatami ñucapajman pushamusha— nijurcami.

³³Chashna nishpaca, paillata imashna huañuchi tucunatami Jesusca villachijurca.

³⁴Shina nijpimi gentecunaca, cashna nishpa tigrachirca: —Mandashca shimicunapica: ‘Quishpichij Cristoca, causaitami causajunga’ nishpa villachijujtami uyanajunchi. ¿Quiquinga: ‘Runa Aichayu tucushcataca, jahuaman huarcui tucunapachami’ ninguichu? ¿Imashpata chashna ningui? ¿Runa Aichayu tucushca runaca, maijandayari?— ninajurcami.

³⁵Shina ninajujpimi Jesusca, cashna nijurca: —Punchayachij michaguca, ashacamanllami quiquingunahuanga purijusha. Yana tuta quiquingunata ama ñapash japichunga, micha tiajpillatami purina canguichi. Tutapi purijcunaca, maiman rijurijtapash na yachanllu.

³⁶Michagu quiuquingunahuan caipi cajpillata, ucha crihuanguichi. Shina crishpami, michapaj huahuacuna tucunguichi— nijurcami. Jesusca, chashna tucuita nishpallami, paicunapaj chaupimanda llujshishpa, paicunamanda pacajushpa rirca.

³⁷Tucuicuna ricunajujta imatapash juyaillata rurashpa ashtacata Jesús ricuchijpipash, paitaca na crinajurcachu.

³⁸Paicuna na crijpimi, profeta Isaías nishca shimicunaca pactarca. Paica cashnami nijurca: “Jatun Dioslla, ñucanchi villachishcataca, pipash na cringapaj munanllu. Jatun Dios ninan ushaita charijtaca, pipash na ricunllu” nishcami.

³⁹Paicuna imamanda na crinatapash, Isaiasllatami cashna nijurca:

⁴⁰“Diosmi, paicunapaj ñavitaca ñausayachirca. Shinallata paicunapaj shungutapashmi shinlliyachirca. Paicunapaj ñavica ama ricuchun, paicunapaj shungupash ama yachai ushachunmi, chashna rurarca. Ñuca paicunata alichijpi ali tucungapajpash, ñucapajman na tigramunllu” nijurcami.

⁴¹Jesustaca, punchapamba cajta ricushca cashpami, Isaiasca chashna nishpa villachijushca.

⁴²Chashna tucuita nishpa villachijujpimi, Jesustaca ashtacacuna mandaj puracunapash crinajurca. Tandanajuna huasimanda ama llujchishpa cachai tucungapajmi, fariseocunata manllashpa, crijmi canchi nishpaca na villachinajurca.

⁴³Paicunaca, Taita Dios alicachinataca na yapa munashpami, gentecuna alicachinatara ashtahuan munarca.

⁴⁴Jesusca, shinllita rimashpami cashna nijurca: “Maijambash ñucata crijca, na ñucatalla crijunllu. Ashtahuangarin ñucata cachamuj Taitatapashmi crin.

⁴⁵Ñucata ricujushpaca, ñucapaj Taitatami ricujun.

⁴⁶Ñucami, michagushna punchayachingapaj cai pachaman shamurcani. Ñucata crijcunaca, tucuicuna ama ashtahuan yana yana tutapishna causanajuchunmi shamurcani.

⁴⁷Ñuca villachijuj shimicunata uyashpapash, na cazujtaca ñucaca na juzgashachu. Cai pachapi causajcunata juzgangapaca, na shamurcanichu. Ashtahuangarin cai pachapi causajcunataca, quishpichingapajmi shamurcani.

⁴⁸Maijambash ñucata na ricunayachishpa, ñuca villachijushca shimicunata na chasquishpaca, pi juzganatapash ñami charin. Paitaca, ñuca villachijushca shimicunallatami, tucurimui punllapica juzganga.

⁴⁹Ñucapaj munaica, na cashna villachijunichu. Ashtahuangarin ñucata cachamuj Taitami imata nichumbash, imata villachijuchumbash ñucataca mandahuarca.

⁵⁰Pai villachijuchun mandashca shimicunaca, causaita causagrinatami caran. Chaitaca yachanimi. Chaimandami ñuca imata villachijushpapash, ñucapaj Taita mandashcatalla villachijuni” nijurcami.