Read Imbabura Highland Quichua JUAN 13 Bible Online

JUAN 13 - Imbabura Highland Quichua bible

JUAN 13

¹Pascua fiestata rurana punllacuna ña chayajujpimi Jesusca, cai pachata saquishpa paipaj Taitapajman tigrana punlla chayamujujtaca yacharca. Jesusta catishpa cai pachapi causajcunataca, ninandami paica juyajurca. Paicunataca, huañuna punlla chayangacamanmi ninanda juyajurca.

²Jesusca, paipaj yachajujcunahuanmi micushpa tiajurca. Simonbaj churi Judas Iscariotepaj shungupimi, Jesusta japichingui nishpa, diabloca ña yarichishcalla carca.

³Jesusca, ima tiashcatapash tucuita pai mandajuchun, paipaj Taita ushaita carashcataca alipachami yacharca. Taita Dios cachamujpi shamushcatapash, Taita Diospajmanllata cutin tigranatapashmi yacharca.

⁴Jesusca, micushpa tiajuimanda jatarishpami, paipaj jahualla churajunaguta llujchirca. Shina llujchishpami, shuj chaquichina finduguta japishpa chumbilishcapi satirirca.

⁵Chai jipami, shuj bateapi yacuta churashpa, yachajujcunapaj chaquita maillachi callarirca. Shina maillachishpaca, pai chumbilishcapi satirishca finduhuanmi chaquichirca.

⁶Simón Pedropaj chaquita maillachingapaj chayamujpica: —Apunchi Jesuslla, ¿quiquinrachu ñucapaj chaquitaca maillachigrihuangui, imata?— nircami.

⁷Chashna nijpimi Jesusca, cashna nishpa tigrachirca: —Imamanda ñuca cashna rurajujtapash, cunanga nara yachanguichu. Ashtahuangarin jipamanmi yachangui— nircami.

⁸Shina nijpimi Pedroca: —Ñucapaj chaquitaca, napacha maillachihuanguichu— nirca. Shina nijpimi Jesusca, cashna nishpa tigrachirca: —Quiquimbaj chaquita ñuca na maillachijpica, na ñucapaj purachu cangui— nircami.

⁹Shina nijpimi Simón Pedroca, cashna nirca: —Shina cashpaca Apunchi Jesuslla, ama chaquitalla maillachishpa maquindi, umandi armachihuayari— nircami.

¹⁰Shina nijpimi Jesusca, cashna nijurca: —Pipash ña maillarishca cashpaca, na ashtahuan mapa cashpami chaquitalla maillan. Quiquingunapash ña mapa illajmi canguichi. Shina cajpipash na tucuicuna mapa illajchu canguichi— nijurcami.

¹¹Jesusca, maijan paita huañuchijcunaman japichinatapash yacharcami. Shina yachashpami: “Quiquingunaca, na tucuicuna mapa illajchu canguichi” nirca.

¹²Jesusca, paicunapaj chaquita maillachishca jipami, paipaj jahualla churajunaguta churajushpa, cutin mezaman tigrarca. Shina tigrashpami, paicunataca cashna nijurca: —Imapaj ñuca cashna rurajtapash, ¿nachu yachanguichi?

¹³Cangunaca: ‘Yachachijmi cangui, Mandajmi cangui’ nishpaca, aligutami nihuanguichi. Chaillatami cani.

¹⁴Quiquingunata Yachachij, quiquingunata Mandaj cashpapash, chaquitaca maillachinimi. Ñuca rurajujshnami quiquingunapash, shujmanda shujmanda chaquitaca maillachirina canguichi.

¹⁵Ñuca rurajujshna, quiquingunapash rurashpa causanajuchunmi chashnaca maillachini.

¹⁶Napacha llullashpami, quiquingunataca cashna nijuni: Gañanga, paipaj amotaca na yalichu can. Shinallata mandajpi rij runapash, paita mandajtaca na yalichu can.

¹⁷Cashna ñuca mandajujtaca, ñami yachanguichi. Chaita pactachishpa causajushpaca, ninandami cushijunguichi.

¹⁸Quiquingunata ñuca cashna nishpaca, na tucuicunata nijunichu. Ñucapajlla causanajuchun agllashcacunataca rijsinimi. Ashtahuangarin Dios escribichishca Shimipica: ‘Ñucahuan tandata micushpa tiajllatami, ñucataca fiñahuarca’ nijunmi. Chashna nijushca shimica pactanapachami.

¹⁹Nara chaica pactajpillatami, quiquingunaman cashna villachijuni. Ña pactajpica, ñuca maijan cajta crinajuchunmi, cashna villachijuni.

²⁰Napacha llullashpami, quiquingunataca cashna nijuni: Ñuca cachashcata maijan chasquijpash, ñucatami chasquin. Shinallata ñucata maijan chasquijpash, ñucata cachamuj Taitatami chasquin— nijurcami.

²¹Shina nijushpallami Jesusca, shungupi ninanda llaquiyashpa, paicuna yachachun cashna nirca: —Napacha llullashpami, quiquingunataca cashna nijuni: Quiquinguna purapi tiajujllatami, ñucataca huañuchijcunaman japichigrihuan— nircami.

²²Shina nijpimi, paipaj yachajujcunaca maijanda chashna nijujtapash na yachashpa, paipura ñavita chimbapura ricurinajurca.

²³Paipaj yachajuj puramanda shujtaca, ninandami Jesusca juyan carca. Paica, Jesuspaj ladopimi marcarishca tiajurca.

²⁴Jesús maijanda chashna nijujtapash tapuchunmi, Simón Pedroca chai tiajujtaca, umata shitashpa ricurca.

²⁵Shina rurajpimi paica, Jesuspi ashtahuan marcarishpa: —Quiquindaca, ¿maijanda japichigrijun, Apunchi Jesús?— nishpa tapurca.

²⁶Shina tapujpimi Jesusca: —Shuj runamanmi, tandata chaupishpaca, mutiyachishpa caragrini. Chaita japij runami, chai canga— nircami. Shina nishpaca, Simón runapaj churi Judas Iscariote runamanmi, tandata mutiyachishpa Jesusca cararca.

²⁷Chaita micujpimi Satanasca, Judas runapaj shunguman yaicurca. Shina tiajujpimi Jesusca: —Quiquin imata rurasha yajushcatapash ucha pactachilla— nishpa, Judastaca nirca.

²⁸Ashtahuangarin Jesushuan micushpa tianajujcunaca, imamanda Judasta chashna nijtapash maijambash na yacharcachu.

²⁹Judasca, culqui muchilata apashpami purin carca. Jesús chashna nijpimi, huaquingunaca cashna yarinajurca: “Cai fiestapajmi, imagutapash randimugri nijun yarin, na cashpaca imagutapash na charijcunaman carachunmi cachajun yarin” yanajurcami.

³⁰Judas runaca, chai tandata japishpa micushpallami llujshishpa rirca. Ña tutayashcapachami carca.

³¹Judas runa llujshishpa rijpimi Jesusca, cashna nijurca: —Cunanga, Runa Aichayu tucushca ñucami, punchapambagumi cangui ni tucugrini. Shinallata Taita Diospash, ñucamandami punchapambagumi cangui ni tucugrin.

³²Taita Diosca, ñucamanda punchapambagumi cangui ni tucushpami, Taita Diosca paimandallatapash punchapambagumi cangui ni tucunga. Chaitaca ñallami ricuchigrini.

³³Ñuca huahuacunalla, ashagutallami cangunahuanga tiajugrini. Shina cajpimi, ñucataca mascahuanguichi. Ashtahuangarin: ‘Ñuca rijuj llactaman cangunaca, na shamui ushanachu canguichi’ nishpami, judiocunataca ña nircani. Shinallatami cunanga, quiquingunatapash nini.

³⁴Nara mandashca mushujtapachami, cashna nishpa quiquingunataca mandani: Caishujhuan, chaishujhuan ninanda juyarishpami causana canguichi. Ñuca imashnami quiquingunata ninanda juyani, chashnallatami quiquingunapash, caishujhuan chaishujhuan ninanda juyarishpa causana canguichi.

³⁵Shina juyarishpa causanajujta ricushpami, ñucapaj yachajujcuna cajtaca tucuicuna rijsinajunga— nijurcami.

³⁶—Apunchi Jesús, ¿quiquinga maimanda rigrijungui?— nishpa, Simón Pedro tapujpimi Jesusca, cashna nishpa tigrachirca: —Ñuca maiman rijujman cunanllata catishpa ritaca, na ushanguichu. Ashtahuangarin jipamanmi, ñucataca catimungui— nircami.

³⁷Shina nijpimi Pedroca, cashna nijurca: —¿Imashpata cunanllata, quiquinda catishpa ritaca na ushana capani? Huañuna cajpipash, quiquimbaj randi huañushallami, Apunchi Jesuslla— nijurcami.

³⁸Shina nijpimi Jesusca, paitaca cashna nijurca: —¿Quiquinga, ñucapaj randi huañushallami ninguichu? Napacha llullashpami, quiquinda cashna nini: Gallo nara cantajpillatami, quiquinga quimsacaman ñucataca na rijsinichu nigringui— nijurcami.