Read Imbabura Highland Quichua JUAN 14 Bible Online

JUAN 14 - Imbabura Highland Quichua bible

JUAN 14

¹Quiquingunapaj shungupica, na musparishpa pandarinachu canguichi. Ashtahuangarin Taita Diosta cringuichi, ñucatapash crihuaichi.

²Ñuca Taitapaj huasipica, ashtaca ashtaca causana ucucunacami tian. Chaipi causana na tiajpica, ñucallata quiquingunaman villachiimanmi carcani. Quiquinguna chaipi causanajuchun alichingapajmi rigrijuni.

³Ñuca rishpami, quiquinguna causanata alichisha. Chai jipami, ñuca causajuj llactagupi ñucahuan causanajuchun, quiquingunataca pushangapaj tigramusha.

⁴Quiquingunaca, ñuca maiman rigrijujtapash yachanguichi, ñandapash rijsinguichimi— nijurcami.

⁵Shina nijpimi Tomasca, cashna nirca: —Apunchi Jesús, quiquin maiman rigrijujtapash na yachapanchica. ¿Imashnata ñandacarin rijsishunyari?— nircami.

⁶Shina nijpimi Jesusca, cashna nijurca: —Ñucallami ñan cani. Na llullashpa villachijpash, causaita causagrinata carajpashmi cani. Ñuca Taitapajman ñuca na pushajpica, pipash na paillata chayaita ushanllu.

⁷Ñucata rijsishpaca, ñucapaj Taitatapash rijsinguichimanmi. Cunanmandami paitaca ña rijsinguichi, ricuitapash ñami ricushcanguichi— nijurcami.

⁸Shina nijujpimi Felipe runaguca, cashna nirca: —Apunchi Jesús, shina cashpaca quiquimbaj Taitata rijsichihuayari. Paita rijsishpaca cushijunchimanmi— nircami.

⁹Shina nijpimi Jesusca, cashna nijurca: —Felipe, ¿ñucataca narachu rijsihuangui? Ña unaitami quiquingunahuan causajuni. Maijambash ñucata ricushpaca, ñucapaj Taitatami ricujun. Quiquinga, ¿imashpata Taitata rijsichihuai nihuangui?

¹⁰Ñucapaj Taitaca ñucahuanmi, ñucapash ñuca Taitahuan causajujtaca, ¿nachu cringui? Cai shimicunataca, na ñucapaj munai villachijunichu. Ashtahuangarin ñucahuan causajuj Taitami, ima ruraicunata rurajuchumbash ushaita carahuarca.

¹¹Ñucapaj Taitapash ñucahuan, ñucapash ñuca Taitahuan causajujtaca crinami canguichi. Chaita na crishpapash, ñucapaj ruraicunatallapash crichiyari.

¹²Napacha llullashpami, quiquingunataca nijuni: Pipash ñucata crijca, ñucapaj ruraicunataca paipash rurangallami. Ñuca Taitapajman ñuca rijpimi, paica ñucapaj ruraicunatapash yalita ashtahuan rurajunga.

¹³Ñucapaj shutipi ñucapaj Taitata imaguta mañajpipash, carashallami. Paipaj Churimanda Taita punchapambagumi cangui ni tucuchunmi, chashna carasha.

¹⁴Ñucapaj shutipi imata mañajpipash, carashallami.

¹⁵Ñucata juyashpaca, ñuca mandashca shimicunatami pactachina canguichi.

¹⁶Shuj ali Cushichijta quiquingunaman carachunmi, ñucapaj Taitataca mañasha. Chaimi quiquingunahuanga, causaita causajunga.

¹⁷Chaica, Diospaj na llullaj Espiritumi capan. Cai pachapajtalla rurashpa causajcunaca, paitaca na ricushca, na rijsishca cashpami, na chasquita ushanga. Ashtahuangarin quiquingunaca, quiquingunahuan causanajujpimi rijsinguichi. Paica, quiquingunapaj shungupimi causaita causajunga.

¹⁸Na quiquingunatalla jichushpa saquishachu. Cutinmi quiquingunapajman shamusha.

¹⁹Cai pachapajtalla rurajcunaca, asha punllacunata ñucata ricushpaca, na ashtahuan ricungachu. Ashtahuangarin quiquingunaca, ñucata ricuhuanguichimi. Ñucaca causaitami causajuni, quiquingunapash causaitami causanajunguichi.

²⁰Chai punlla chayamujpimi, ñuca Taitahuan ñuca causajujtaca yachanguichi. Quiquingunapash, ñucahuanmi causanajunguichi. Ñucapash quiquingunapaj shungupimi causajusha.

²¹Ñuca mandashca shimicunata chasquishpa pactachishpa causajujllami, ñucataca juyahuan. Paitaca, ñucapaj Taitapash juyangami. Ñucapash paitaca juyashami, paimanmi ricurisha— nijurcami.

²²(Judas Iscarioteca, na cashna nircachu). Shuj Judasmi, cashna nirca: —Apunchi Jesuslla, ¿imashpata cai pachapajtalla rurashpa causajcunaman na ricurishpa, ñucanchimanlla ricurisha ningui?— nircami.

²³Shina nijpimi Jesusca, cashna nishpa tigrachirca: —Ñucata juyashpaca, ñuca villachishca shimicunata pactachingami. Paitaca, ñucapaj Taitapash juyangami. Paipajman shamushpami, ñuca Taitandi, ñucandi paihuanga causashun.

²⁴Ñucata na juyashpaca, ñuca villachishca shimicunata na pactachijunllu. Quiquinguna uyashca shimicunaca, na ñucapajchu can, Ashtahuangarin ñucata cachamuj ñuca Taitapajmi can.

²⁵Quiquingunahuan cashpallatami, cashna tucuita villachijuni.

²⁶Ñucapaj Taitaca shuj Cushichij, jucha illaj paipaj Espiritutami, ñucapaj shutipi cachamunga. Paimi, imagutapash tucuita yachachijunga. Shinallata ñuca quiquingunaman imata villachijushcatapash tucuitami yarichijunga.

²⁷Ñucashnallata causanajuchunmi, casilla ali causaiguta quiquingunaman carashpa saquini. Chaitaca, cai pachapajtalla rurashpa causajcunaca, na caraita ushanllu. Ashtahuangarin quiquingunapaj shungupica, na musparishpa pandarinachu canguichi, na manllanachu canguichi.

²⁸‘Cunanga rigrinimi, cutin quiquingunapajman tigramushami’ nishcataca ñami uyarcanguichi. Quiquinguna ñucata juyashpaca: ‘Ñucapaj Taitapajman rigrinimi’ nijpica, cushijunguichimanmi. Ñucapaj Taitaca, ñucata yali ushaitami charin.

²⁹Cunanga, ñuca nishcacuna nara tucujpillatami, quiquingunaman ña villachijuni. Ña chashna tucujpica, ñuca nishcataca yarishpa crinajuchunmi, cashna villachijuni.

³⁰Cai pachapajtalla rurachishpa mandajmi ña shamujun. Shina cajpimi quiquingunahuanga, na ashtahuan parlagrini. Chai mandaj shamushpapash, ñucataca na imatapash ruraita ushangachu.

³¹Ashtahuangarin cai pachapi causajcuna ñucapaj Taitata juyajujta yachachunmi, ñucapaj Taita mandashcashna imatapash pactachijuni. Cunanga, jatarishpa jacuchi.