Read Imbabura Highland Quichua JUAN 15 Bible Online

JUAN 15 - Imbabura Highland Quichua bible

JUAN 15

¹Ñucami, uvas yuragushnapacha cani. Ñucapaj Taitaca, uvas chagrata cuidaj runagushnami capan.

²Ñucapi malquishna causajcuna na fucujpica, paillatami cuchushpa shitanga. Aliguta fucujujtaca, ashtahuan fucuchunmi ima nali tiajujtapash anchuchinga.

³Quiquinguna nalita rurashpa causashcataca, ñuca villachijushca shimicunami ña anchuchirca.

⁴Quiquingunaca, ñucahuanmi causajunalla canguichi. Shina causajpimi, ñucapash quiquingunapaj shungupi causajushalla. Uvas yuramanda malquita anchuchijpica, na chai malquipilla fucunllu. Quiquinguna na ñucahuan causanajushpaca, quiquingunapash chashnallatami canguichi.

⁵Ñucami, uvas yuragu cani. Quiquingunaca, ñucapaj malquicunami canguichi. Ñucahuan causajujpillami, ñucapash paihuan causajushalla. Shina causajujpimi, granota fucunshna causajunga. Quiquinguna ñucahuan na causashpaca, imata ruraitapash na ushashpami causanajunguichi.

⁶Ñucahuan na causajujtaca, na fucuj malquitashnami canllaman shitanga. Ña chaquijpica tandachishpa, ninapi shitajpimi rupajunga.

⁷Quiquinguna ñucahuan causashpa ñuca villachijushca shimicunatapash yariashpa causashpaca, imaguta cashpapash ñucapaj Taitata mañanguichilla. Paica carangallami.

⁸Aliguta fucujunshna causajpimi, ñucapaj yachajujcunapacha cajtaca ricunga. Shina ricushpami, ñucapaj Taitaca punchapambagumi cangui ninajunga.

⁹Ñucapaj Taita ñucata juyanshnami, ñucapash quiquingunataca juyajuni. Ñuca quiquingunata juyajunshna, juyarishpa causanajunguichi.

¹⁰Ñucapaj Taita imata mandashcata pactachijushpami, pai juyajpi causajuni. Quiquingunapash ñuca mandashca shimicunata pactachijushpaca, ñuca juyajujpimi causanajunguichi.

¹¹Cai shimicunataca, quiquinguna ñucahuan cushijunajuchunmi villachijuni. Chashna cashpami, quiquingunaca ninandapacha cushijushpa causanajunguichi.

¹²Quiquingunataca, caitami mandani: Imashnami quiquingunata ñuca juyarcani, chashnallata caishujhuan chaishujhuan juyarishpa causanguichi ninimi.

¹³Maijambash pai juyashca cumbacunamanda huañushpaca, ninandapacha juyajtami ricuchijun.

¹⁴Ñuca imata mandashcata rurashpaca, ñuca juyashca cumbacunami canguichi.

¹⁵Servij runaca, paipaj amo imata rurajta na yachanllu. Ashtahuangarin ñucapaj Taita ñucaman imata villachijushcatapash, tucuitami quiquingunaman ña villachijurcani. Shina cashpami quiquingunataca, ñuca juyashca cumbacunami canguichi nini. Ñucata servijcunami canguichi nishpaca, na ashtahuan nishachu.

¹⁶Quiquingunataca ñucami agllarcani. Shina cajpimi quiquingunaca, ñucataca na agllahuarcanguichi. Aliguta fucuj yuragushna causangapaj rinajuchunmi, quiquingunataca agllarcani. Chai mirashcacunataca, causaita causagrichunmi munani. Chashna cajpica, quiquinguna ñucapaj shutipi ñucapaj Taitata imaguta mañajpipash, paica carangallami.

¹⁷Quiquingunataca, caishujhuan chaishujhuan juyarishpa causanguichi nishpami mandani.

¹⁸Cai pachapajtalla rurashpa causajcunaca, quiquingunataca millanayachingami. Quiquingunata nara ricunayachishpallatami, ñucata ña millanayachishcata yaringuichi.

¹⁹Cai pachapajtalla rurashpa causajcunashna quiquingunapash causajpica, paicunaca quiquingunata juyanmanmi. Ashtahuangarin quiquingunataca, cai pachapajtalla rurashpa causaj puramandami agllarcani. Na cai pachapajta rurashpa causajpimi, quiquingunatapash millanayachin.

²⁰Ñuca villachijushca shimicunata yaringuichi: ‘Servij runaca, paipaj amota na yalichu can’ nircanimi. Ñucata catiriashpa llaquichinshnami, quiquingunatapash catiriashpa llaquichinajunga. Ñuca villachijushca shimicunata cazushpaca, quiquinguna villachijushcatapash cazunajungami.

²¹Ashtahuangarin ñucapaj shutipi villachijujpimi, quiquingunataca cai tucuita llaquichinajunga. Paicunaca, ñucata cachamuj Taitataca na rijsinllu.

²²Juchata rurajcunami canguichi nishpa villachingapaj ñuca na shamujpica gentecunaca, juchata rurashcataca na yachanmanllu carca. Ashtahuangarin cunanga, juchata na rurashcanichu nitaca na ushanajunllu.

²³Pipash ñucata millanayachishpaca, ñucapaj Taitatapash millanayachinmi.

²⁴Paicunapaj ñaupajpica, pipash na ruraita ushashcatami, imagutapash rurashpa purijurcani. Na chashna rurashpa purishca cajpica, paicuna juchata rurashcata na yachamanllu carca. Cunanga, chashna rurashcata ricushca cashpapashmi ñucatapash, ñucapaj Taitatapash millanayachinajun.

²⁵‘Yanga yangamandami, ñucataca millanayachihuarca’ nishpami, paicunata mandashca shimipica villachijun. Chashna nishca pactachunmi millanayachinajun.

²⁶Ashtahuangarin ñucami, ñucapaj Taitapajmanda quiquingunata Cushichijta cachamusha. Chaica, Diospaj na llullaj Espiritumi capan. Chai Espíritu Taitapajmanda shamushpami, ñucamandaca villachijunga.

²⁷Quiquingunaca, ñuca villachi callarishca punllamandapachami, ñucahuan purircanguichi. Shina cashpami quiquingunapash, ñucamandaca chashnapachami nishpa villachinajunguichi.