Read Imbabura Highland Quichua JUAN 17 Bible Online

JUAN 17 - Imbabura Highland Quichua bible

JUAN 17

¹Jesusca, cai tucuita villachijushpami, jahua pachata vichai ricushpa cashna nijurca: “Ñuca Taitalla, ñucata japichina horasca ñamari chayamushca. Quiquimbaj Churi ñucataca, punchapambagumi cangui nihuailla. Quiquimbaj Churi ñucapash, punchapambagumi cangui nipashami.

²Tucuicunata mandachunmi, quiquimbaj ushaitaca ñucaman carahuarcangui. Shinallatami quiquin ñucaman carashca tucuilla gentecunamambash, causaita causagrinata carani.

³Na llullaj shujlla Taita Dios cashpami, quiquimbaj Churi Jesucristotaca cachamuhuarcangui. Shina cajta rijsishpallami, pipash causaita causagringa.

⁴Quiquin ñucaman imata rurachun mingashcataca, ñami pactachircani. Shina cashpami, cai pachapica punchapambami cangui nijuni.

⁵Ñuca Taitalla, nara cai pachata churashpallatami, punchapambagumi cangui nijpi canhuanga tiajurcani. Cunambash, chashnallata punchapambagumi cangui nihuayari.

⁶Cai pachapajtalla rurashpa causajcunatami, ñucaman carangapaj agllaparcangui. Paicunamanmi, quiquimbaj shutiguta rijsichircani. Paicunataca quiquimbajlla cajpimi, ñucaman carahuarcangui. Shina cashpami, quiquimbaj shimicunata cazunajun.

⁷Tucui imatalla ñucaman carashcatapash, quiquimbajlla cajtami paicunaca cunambi yachanajun.

⁸Ñuca villachijuchun quiquin mingashca shimicunataca, paicunaman villachijurcanimi. Chaita villachijujpimi, paicunaca chasquirca. Quiquinmanda ñuca shamushcatapash, alipachami yachan. Shinallata quiquin ñucata cachamushcatapash crinmi.

⁹Paicunamandami quiquindaca mañajuni. Cai pachapajtalla rurashpa causajcunamandaca, na mañanichu. Ashtahuangarin quiquin ñucaman carashcacunaca, quiquimbajllami causanajun. Paicunamandami quiquindaca mañajuni.

¹⁰Tucui imatalla ñuca charishcapash quiquimbajmi. Shinallata can imaguta charishcapash ñucapajmi. Paicunapimi, ñucapash punchapambagumi cangui ni tucushcani.

¹¹Cunanga, cai pachapi na quedashpami, quiquimbajman shamugrini. Ashtahuangarin paicunaca, cai pachapillatami quedanajunga. Jucha illaj Taitalla, quiquin ñucaman carashcacunataca, paicunapash ñucanchishnalla shujlla cachun, quiquimbaj ushaihuan aliguta charipangui.

¹²Quiquin ñucaman carashcacunahuan cai pachapi cashpaca, quiquimbaj ushaihuanmi paicunataca aliguta charircani. Paicunaca, shujllapash na chingarcachu. Ashtahuangarin quiquin escribichishca Shimipi nijuj pactachunmi, chingangapaj purijushca runalla chingarca.

¹³Cunanga, quiquimbajmanmi shamugrini. Paicunapash ñuca ninanda cushijunshna cushijunajuchunmi, cai pachapi cashpallata cashna nijuni.

¹⁴Quiquimbaj Shimitapash, paicunaman villachijurcanimi. Ñucapash, paicunapash na cai pachamanda cajpimi, cai pachapajtalla rurashpa causajcunaca millanayachirca.

¹⁵Paicunataca, cai pachamanda anchuchupai nishpaca, na mañanichu. Ashtahuangarin nalita rurachijujmanda jarcapangui nishpallami, quiquindaca mañajupani.

¹⁶Imashnami ñuca na cai pachamanda cani, shinallata paicunapash na cai pachamandachu capan.

¹⁷Quiquin na llullashpa villajuj Shimita catishpa quiquimbajlla causanajuchun, paicunataca charipayari. Quiquimbaj Shimica, napacha llullajchu.

¹⁸Cai pachapi causajcunaman villachijuchunmi, ñucataca cachamuhuarcangui. Shinallatami ñucapash, paicunataca cai pachapi causajcunaman villachijuchun cachajuni.

¹⁹Na llullashpa villajuj Shimita catishpa quiquimbajlla causanajuchunmi, paicunamandaca ñucallata quiquinman cararigrini.

²⁰Quiquindaca, na paicunamandalla mañajupanichu. Paicuna villachinajujpica, shujcunapash ñucataca crinajuhuangami. Paicunamandapashmi mañajupani.

²¹Paicunapura shujlla tucushpa causanajuchun nishpami, quiquindaca mañajupani. Ñuca Taitalla, quiquinhuan ñucahuanga shujllami canchi. Shinallata paicunapash, ñucanchihuan shujlla tucushpa causanajuchunmi mañajupani. Shina causanajujpimi, cai pachapi causajcunaca quiquin ñucata cachamushcata crinajunga.

²²Quiquinhuan ñucahuanga, shujllami canchi. Quiquin ñucata punchapambami cangui nishpa charishcashnami, paicunapash shujlla tucushpa causanajuchun ña curcani.

²³Quiquinga, ñucahuanmi causajungui. Ñucapash, paicunapaj shungupimi causajuni. Shina cajpimi, paicuna purapash shujlla tucushpa, ima pandatapash na rurashpa causanajunga. Quiquinga, ñucataca ninandami juyahuangui. Shinallatami paicunatapash juyajungui. Shina juyajujtapash, quiquin ñucata cachamushcatapash, cai pachapajtalla rurashpa causajcunaca yachangami.

²⁴Ñuca Taitalla, cai pachata nara rurashpallatami, ñucataca ninanda juyashpa charihuarcangui. Quiquin ñucata punchapambagumi cangui nijta ricunajuchunmi, can ñucaman carashcacunaca, ñuca maipimi cani chaipillata paicunapash ñucahuan cachun munani.

²⁵Ñuca Taitalla, quiquinga justomi cangui. Cai pachapajtalla rurashpa causajcunaca, quiquindaca na rijsinajunllu. Ñucallami quiquindaca rijsini. Ashtahuangarin paicunaca, quiquin ñucata cachamushcataca alimi yachan.

²⁶Paicunamanmi, quiquimbaj shutigutaca ña rijsichircani, ashtahuan rijsichisharami. Shina cashpami, quiquin ñucata juyajunshna, paicunapash juyarishpa causanajunga. Shinallata ñucapash paicunapaj shungupimi causajusha” nijurcami.