Read Imbabura Highland Quichua JUAN 19 Bible Online

JUAN 19 - Imbabura Highland Quichua bible

JUAN 19

¹Chashna caparinajujpimi Pilatoca, Jesusta japishpa astichun mandarca.

²Chai jipaca soldadocunaca, cashata ahuashpa rurashca coronatami, Jesuspaj umapi churachirca. Shinallata morado, jahualla churajunatapashmi churachirca.

³Chashna churachishpallami: —¡Judiocunata Jatun Mandaj, quiquinga juyaillagumari cangui!— nij tucushpalla ñavipi huactanajurca.

⁴Pilatoca, cutinllata canllaman llujchishpami cashna nijurca: —Ricuichi, cai runataca ima nalita rurashcatapash na ricunichu. Chaita quiquinguna yachachunmi, caiman llujchimuni— nijurcami.

⁵Jesusca, cashata ahuashpa rurashca coronata umapi churajushca, morado jahualla churajunata churajushcami llujshijurca. Shina llujshijujpimi Pilatoca: —¡Cai runata ricuichi!— nirca.

⁶Shina nijpimi curacunata mandajcunapash, Diospaj huasita cuidajcunapash, Jesusta ricushpaca: —¡Chacatailla! ¡Chacatailla!— nishpa ninanda caparinajurca. Shina caparinajujpimi Pilatoca, cashna nijurca: —Cai runataca, quiquingunallata apashpa cruzpi chacataichilla. Ñucaca, ima nalita rurashcatapash na ricunichu— nijurcami.

⁷Shina nijujpimi judiocunaca, cashna nishpa tigrachinajurca: —Ñucanchica, shuj mandashcatallami charinchi. Chai mandashcapi nijunshnaca, chai runaca: ‘Taita Diospaj Churimi cani’ nishpa purijuimandaca huañunapachami can— ninajurcami.

⁸Chashna ninajujpimi Pilatoca, ashtahuan manllarirca.

⁹Pai mandashpa tiajuna ucuman cutin yaicushpaca: —Quiquinga, ¿maimandata cangui?— nishpami tapurca. Ashtahuangarin Jesusca, upalla shayajurcallami.

¹⁰Shina shayajujpimi Pilatoca, Jesusta cashna nijurca: —¿Imashpata na ñucahuan parlangui? Quiquinda cacharingapajpash, ushaita charinimi. Chacatangapajpash ushaita charinimi. Chaitaca, ¿nachu yachangui?— nijurcami.

¹¹Shina nijujpimi Jesusca, cashna nishpa tigrachirca: —Taita Dios quiquinman ushaita na carashca cajpica, ñucataca imata ruraitapash na ushanguimanllu. Tucuimanda yalica, ñucata quiquinman cushca runami, quiquindapash yali juchata charin— nijurcami.

¹²Shina nijujpimi Pilatoca, Jesusta imashnata cacharishayari yajurca. Ashtahuangarin judiocunaca, cashna nishpami ninanda caparinajurca: —Chai runata quiquin cacharishpaca, na Cesarpaj ali cumbachu cangui. Maijambash: ‘Ñucami jatun mandaj cani’ nirijushpaca, Cesartami ninanda fiñan— ninajurcami.

¹³Shina ninajujta uyashpami Pilatoca, Jesusta canllaman llujchishpa, pai mandashpa tiajushcapi tiarirca. Chai ucuca, Rumicunahuan rurashca ucumi carca. Chaimandami hebreo rimaipica, Gabata nishpa shutichishca.

¹⁴Pascua fiesta micuipaj alichinajujpi, ña chaupi punlla chayajujpica: —¡Ricuichi, quiquingunata jatun Mandaj runaca caipimi!— nishpami judiocunaman ricuchirca.

¹⁵Shina nijpimi paicunaca, ashtahuan caparinajushpa: —¡Llujchilla, llujchilla! ¡Chacatailla!— nishpa ninanda caparinajurca. Shina caparijpimi Pilatoca: —¿Quiquingunata jatun Mandajtachu chacatachisha?— nirca. Shina nijpimi, curacunata mandajcunaca: —Ñucanchica, Cesartallami jatun mandajta charinchi— nishpa tigrachirca.

¹⁶Shina ninajujpimi, paicunallata Jesusta chacatagrichun, Pilatoca cushpa saquirca. Shina saquijpimi, paicunaca Jesusta apashpa rinajurca.

¹⁷Jesusca, cruzta aparishpa llujshishpami, Uma Tullu shuti lomaman chayagrirca. Chai lomaca, hebreo rimaipica Gólgota shutimi can.

¹⁸Chai lomapimi, Jesustaca chacatanajurca. Paitaca, ishcai runacunapaj chaupipi churashpami chacatanajurca.

¹⁹Jesús chacatariajuj cruzpi churachunmi, Pilatoca escribishcata cacharca. Chai escribishca tablapica, cashnami nijurca: “CAICA, NAZARET PUEBLOMANDA JESUSMI. PAICA, JUDIOCUNATA JATUN MANDAJMI” nijurcami.

²⁰Chai shimicunataca hebreo, griego, latín rimaicunapi escribishcami carca. Jesusta chacatashca pushtuca, Jerusalén pueblo ladollapimi carca. Shina cajpimi judiocunaca, ashtacacuna chai escribishcataca leyinajurca.

²¹Shinamandami judiocunapaj curacunata mandajcunaca, Pilatotaca cashna nigrirca: —‘Judiocunata jatun Mandajmi’ nishpaca, na escribinachu carcangui. Ashtahuangarin ‘Ñucami, judiocunata jatun Mandaj cani’ nishpa, paillata nijushcata escribipai— ninajurcami.

²²Shina nijpimi Pilatoca: —Ñuca imata escribishcapash, ñami escribishca tiajun— nirca.

²³Soldadocunaca, Jesusta chacatashpami, paipaj churajunataca chuscupi chaupishpa, shuj shuj japinajurca. Shinallata paipaj jahualla churajunatapashmi japinajurca. Chai churajunaca, na sirashcachu carca. Jahuamanda ura pundacaman, jatunda ahuashcami carca.

²⁴Shina cajpimi, paipura cashna ninajurca: —Ama chaupirishpa, maijambaj urmachumbash suerteta rurashunchi— ninajurcami. Dios escribichishca Shimipi nishcashna pactachunmi, chashna ruranajurca. Chaipica cashnami nijun: “Ñuca churajunataca, paicunapura chaupirircami. Ñuca churajunapaj jahuapillatami, suerteta ruranajurca” nijunmi.

²⁵Jesús chacatariajuj ladomanga, paipaj mamapash, paipaj ñañandi, Cleofas shuti runapaj huarmi Mariandi, Magdala shuti pueblomanda Mariandimi, chaipi shayanajurca.

²⁶Jesusca, paipaj mamatapash, pai juyashca yachajujtapash, chaipi shayajujtami ricurca. Shina ricushpami Jesusca, paipaj mamagutaca: —Ricui mama, caipimi cambaj churi— nirca.

²⁷Chai jipami, paipaj juyashca yachajujtapash cashna nirca: —Ricui, caipimi quiquimbaj mama— nircami. Shina nishcamandapachami, chai yachajuj runaguca paipaj huasipi causajuchun, Jesuspaj mamagutaca pusharca.

²⁸Chai jipami Jesusca, ña tucuita pactachishcata yacharca. Shina yachashpami, Dios escribichishca Shimipi nijuj pactachun: —Yacunayanmi— nirca.

²⁹Shina nijpimi soldadocunaca, shuj fundupi junda tiajuj vinagrepi esponjata mutiyachirca. Chaitaca, hisopo nishca caspi pundapi churashpami, Jesús chupachun shimiman chayachinajurca.

³⁰Chai vinagreta Jesús chupashpaca: —Ñami tucuita pactachircani— nircami. Shina nishpallami, umata urai huarcushpaca, paipaj espirituta Diosman mingashpa huañurca.

³¹Pascua fiestapaca, shuj punllallami tiarca. Cayapaca, samana punllapi ashtahuan jatun fiesta cajpimi, cruzpi chacatai tucushcacunaca, ama chaipillata saquishca cachunmi, judiocunaca Pilatopajman rishpa: —Chaquita faquishpa cruzmanda uriajuchingapaj richun cachapai— ninajurca.

³²Shina mañagrijpi soldadocuna shamushpami, Jesusta chaupipi churashpa, chacatai tucushca runacunapaj chaquitaca ishcandipajta faquirca.

³³Ashtahuangarin Jesuspajman chayashpaca, ña huañushcatami ricunajurca. Shina cajpimi, chaquitaca na faquinajurca.

³⁴Shina na faquishpapash, shuj soldadoca Jesuspaj costillaspimi, lanzahuan tujsirca. Shina tujsijpimi yahuarpash, yacupash llujshirca.

³⁵Shinamandami chaita ricuj runaca, chashnapachami nishpa villachijun. Pai villachijushca shimicunaca, na llullachu. Quiquingunapash crinajuchunmi, cashna villachijun. Chaitaca paipash yachambachami.

³⁶Dios escribichishca Shimipimi: “Paipaj tullutaca, shujllatapash na faquishcachu canga” nijun. Chai nishcami pactarca.

³⁷Dios escribichishca Shimipillata, shuj pushtupimi: “Paita tujsishca gentecunaca, cutinmi paitaca ricunajunga” nijun.

³⁸Tucui chai jipami, Arimatea shuti pueblomanda Joseca, Jesús huañushcata pambangapaj saquichun, Pilatota mañangapaj rirca. Shina mañajpimi Pilatoca, Jesús huañushcata apachun saquirca. Shina saquijpimi, Jesús huañushcata apashpa rirca. Joseca, judiocunata manllashpami, Jesús yachachijujtaca, pacalla uyashpa purin carca.

³⁹Paitaca, Nicodemo shuti runagupashmi cumbarca. Nicodemoca, pundatami Jesushuan parlangapaj shuj tuta rishca carca. Shina cashpami chai runaguca, mirra nishcahuan, áloe nishcahuan chapushca mishquillagu ashnajuj jambicunataca, shuj quintaltashna apamurca.

⁴⁰Jesús huañushcata apashpaca, mishquillagu ashnajuj chai jambita fachacunapi javishpami pilluchinajurca. Judiocunaca, chashna pambanatami yachan carca.

⁴¹Jesusta chacatashca ladomanga, shuj huertami tiarca. Chai huertapica, pitapash nara pambashca mushuj utujuta rurashcami tiarca.

⁴²Chai utujuca ladolla cajpimi, Jesuspaj cuerpogutaca, chaipi churashpa jarcarca. Judiocuna pascua fiestata rurana ña chayajujpimi, chaillapi churanajurca.