Read Imbabura Highland Quichua JUAN 2 Bible Online

JUAN 2 - Imbabura Highland Quichua bible

JUAN 2

¹Quimsa punlla jipami, Galilea llactapi tiaj Caná shuti pueblopica, cazarai boda tiarca. Jesuspaj mamapashmi chaipi carca.

²Chai bodaman shamupaichi nijpimi Jesusca, paipaj yachajujcunandi rirca.

³Chaipi vino tucurijpimi, Jesuspaj mamaca: —Vinoca tucurishcami— nirca.

⁴Shina nijpimi Jesusca, cashna nijurca: —¿Mama, imashpata chaitara nihuangui? Ñuca imaguta rurana horaspash nara chayamunllu— nijurcami.

⁵Shina nijujpimi paipaj mamaca, chaipi servijcunataca: —Imaguta pai mandashcata ruranguichilla— nirca.

⁶Chai boda huasipica, rumita rurashca sucta jatun funducunami yacuta churangapaj tiarca. Judiocuna imashna ruranata yachanshnallata, Diospaj ñaupajpi mapa illaj tucungapajmi, chai funducunapi yacuta charin carca. Uchilla funducunamanda yacuta talijpica, huaquinga ishcaita, huaquinga quimsata apaj funducunami carca. Jesusca chai servijcunataca:

⁷—Cai funducunapi yacuta jundachipaichi— nijpimi, fundu shimicaman jundachinajurca.

⁸Chaipimi Jesusca, cashna nijurca: —Cunanga, cai funducunamanda ashata vishishpa, jatun serviciopajman apaichi— nijurcami. Shina nijujpimi, vishishpa apanajurca.

⁹Yacuta vinoman tigrachishcataca, maimanda apamushcatapash na yachashpatami, jatun serviciora malirca. Yacuta vishimushca servijcunallami chaitaca yacharca. Chai servicioca noviota cayachishpami,

¹⁰cashna nijurca: —Tucuicunami callaripica, ali vinotara ufiachun caran. Ña tucuilla ufiashca jipami, chagrushca vinotaca caran. Ashtahuangarin quiquinga, ¿ali vinotarachu cunangaman alichishpa charijurcangui?— nijurcami.

¹¹Galilea llactapi tiaj Caná shuti pueblopimi, Jesusca cashna juyaillata rurashpa ricuchishpa callarirca. Chaipimi, pai punchapamba cajtaca ricuchirca. Chaita ricushpami paipaj yachajujcunaca, Jesusta crinajurca.

¹²Chai jipami Jesusca, paipaj mamandi, paipaj huauquicunandi, paipaj yachajujcunandi, Capernaum puebloman urai rirca. Paicunaca, huaquin punllatallami chaipi carca.

¹³Judiocuna pascua fiestata rurana punllacuna ña pactajujpimi Jesusca, Jerusalenman vichai rirca.

¹⁴Chaipi cashpami, Diospaj huasi ucupica huagracunata, llamacunata, palomacunata jatunajujta Jesusca ricurca. Shinallata culquicunata cambiashpa tianajujtapashmi ricurca.

¹⁵Jesusca, huascata azialta rurashpami llamacunata, huagracunata, Diospaj huasi ucumanda tucuillata canllaman calpachirca. Shinallata cambiaj runacunapaj culquicunatapash, mezacunatapash shitashpami saquirca.

¹⁶Palomacunata jatujcunatapash Jesusca, cashnami nijurca: —Caicunataca llujchishpa apaichi. Ñuca Taitapaj huasitaca, jatushpa tiana huasitaca na ruranachu canguichi— nijurcami.

¹⁷Shinata ricushpami, paipaj yachajujcuna: “Quiquimbaj huasiguta juyashpami huañujuni” nishpa, escribishca tiajujta yarinajurca.

¹⁸Shinamandami judiocunaca, cashna nishpa tapunajurca: —Chashnata rurashpaca, ¿imatata ñucanchiman juyaillaguta rurashpa ricuchinguiyari?— ninajurcami.

¹⁹Shina ninajujpimi Jesusca, cashna nishpa tigrachirca: —Diospaj cai huasitaca, urmachishpa saquichilla. Ñucami, quimsa punllapica cutin shayachisha— nijurcami.

²⁰Shina nijujpimi, judiocunaca cashna ninajurca: —Chuscu chunga sucta huatacamanmi, Diospaj cai huasitaca shayachinajurca. ¿Quiquinga, quimsa punllapillami cutin shayachisha ninguichu?— ninajurca.

²¹Ashtahuangarin Jesusca, paipaj cuerpotami, Diospaj huasitashna yarishpa chashna nijurca.

²²Huañushcacunapaj chaupimanda Jesús causarijpimi, paipaj yachajujcunaca chashna nishcataca yarinajurca. Chaimandami, Dios escribichishca Shimipi imata nijujtapash, Jesús imata nishcatapash crinajurca.

²³Pascua fiesta punllacunapimi Jesusca, Jerusalenbi purijurca. Chaipica, pai imatapash juyaillata rurajujta ricushpami, ashtaca gentecuna paita crinajurca.

²⁴Ashtahuangarin tucuilla gentecuna imashna cajta yachashpami Jesusca, paicunataca cringapaca na munarca.

²⁵Runacuna imashna causanajujta maijan villajuchumbash, Jesusca na munarcachu. Runacunapaj shungupi imata yarinajujtapash, paillata ña yacharcami.