Read Imbabura Highland Quichua JUAN 20 Bible Online

JUAN 20 - Imbabura Highland Quichua bible

JUAN 20

¹Domingo tutamandata nara ali punllayajpillatami, Magdala shuti pueblomanda María huarmiguca, Jesusta pambashcata ricungapaj rirca. Chaiman chayashpaca, chai utujuta quilpashca rumita ladoman churashcatami ricujurca.

²Chaita ricujushpaca Simón Pedroman, Jesús juyashca caishuj yachajujpajmambash calpamushpami cashna nijurca: —Apunchi Jesustaca utujumanda apashcamari. Maipi churashcatapash, na yacharinllu— nishpami, villaj shamurca.

³Shina nijpimi, Jesusta pambashca utujuta ricungapaj Pedropash, caishuj yachajujpash llujshishpa rinajurca.

⁴Ishcandi calpashpaca, caishuj yachajujrami Pedrotaca mishashpa, chai utujuman punda chayagrirca.

⁵Ña chayashpaca, chai utuju ladoman urai rishpami, chaipica fachacunatalla ricurca. Ashtahuangarin na yaicushpami shayajurca.

⁶Jipaman Simón Pedro chayamushpaca, utuju ucuman yaicurcallami. Paipash fachacunatallami ricurca.

⁷Jesuspaj umata pilluchishca telataca, na caishuj fachacunahuan tandachishpa, shican pillushca shuj pushtupi tiajujtami ricurca.

⁸Utujuman punda chayamushca caishuj yachajujpashmi, catishpa yaicurca. Paipash, chaipica fachacunatalla ricushpami crirca.

⁹“Huañushcacunapaj chaupimanda causarinapachami” nishpa tiajujtaca, paicunaca nara ali yachaita usharcachu.

¹⁰Chashna illajta ricushpami, chai yachajujcunaca paicunapaj huasiman tigranajurca.

¹¹Ashtahuangarin María huarmiguca, Jesusta pambashca utuju ñaupajpimi huacajurca. Paica huacajushpandimi, utuju ucutaca quinrai chapashpa ricujurca.

¹²Shina ricujushpaca, yurajta churajushca ishcai angelcuna tianajujtami ricujurca. Jesús huañushcata churashca pushtupica, shuj angelca uma ladoman, shujca ura chaquiman tianajujtami ricujurca.

¹³Chai angelcunami: —Quiquinga, ¿imamandata huacajungui?— nishpa tapurca. Shina tapujpimi María huarmiguca, cashna nirca: —Ñucata Mandaj Jesusta apashcamandami huacajuni. Paitaca, maipi churashcatapash na yachapanichu— nircami.

¹⁴Shina nishpa tigrarishpa ricushpaca, Jesús shayajujtami ricujurca. Ashtahuangarin Jesustaca na rijsircachu.

¹⁵Shina ricujpimi Jesusca: —Quiquinga, ¿imashpata huacajungui? ¿Pitata mascajungui?— nishpa tapurca. Shina tapujpimi María huarmiguca, huertata cuidaj runagumi yashpa cashna nijurca: —Ñucata Mandajlla, Jesús huañushcata maipi churangapaj apashca cashpaca villachihuailla, ñuca apamugripashallami— nijurcami.

¹⁶Shina nijujpimi Jesusca: —¡María!— nirca. Shina nijpimi: —¡Raboni!— nishpa tigrachirca. (Raboni nishpaca, Yachachij nijunmi).

¹⁷Shina nijpimi Jesusca, cashna nijurca: —Ñucataca ama tacarihuaichu. Nara ñuca Taitapajman vichai rinichu. Ashtahuangarin ñucapaj huauquicunapajman rishpa, cashna villachigripai: ‘Ñucapaj Taitaca, quiquingunapajpash Taitami capan. Ñucapaj Taita Diosca, quiquingunapajpash Taita Diosmi capan. Paipajmanmi vichai rina cani’ nigripai— nijurcami.

¹⁸Shina nijujpi, Magdala shuti pueblomanda María huarmiguca, Apunchi Jesusta ricujushcatapash, paiman Jesús imatalla nijushcatapash, Jesuspaj yachajujcunaman villachingapaj rijurca. Shinallata Jesús paicunaman imata villachijuchun mingashcatapashmi villachijurca.

¹⁹Chai domingo chishillatami ña tutayajujpi, Jesuspaj yachajujcunaca tandanajushca tianajurca. Paicunaca judiocunata manllashpami, pungucunata ali vicharishpa tianajurca. Shina tianajujpimi, Jesusca yaicumushpa paicunapaj chaupipi shayarishpa: —Quiquingunapaca, casilla ali causaigu tiachun— nirca.

²⁰Shina nishpallami, paipaj ishcandi maquitapash, costillastapash paicunaman ricuchirca. Paipaj yachajujcunaca, Apunchi Jesusta ricushpaca ninandami cushijunajurca.

²¹Shinamandami Jesusca, cutin cashna nirca: —Quiquingunapaca, casilla ali causaigu tiachun. Imashnami ñucapaj Taita ñucata cachamuhuarca, chashnallatami quiquingunatapash cachani— nircami.

²²Shina nishpallami, paicunapajman fucushpa cashna nijurca: —Diospaj jucha illaj Espirituta chasquichi.

²³Maijambaj juchacunatapash quiquinguna cungajpica, paicunapaj juchacunaca cungai tucushcami canga. Shinallata maijambaj juchacunatapash quiquinguna na cungajpica, na cungai tucushcachu canga— nircami.

²⁴“Chai punllallata ishcandi huacharishcami” nishpa rijsishca Tomasca, Jesuspaj chunga ishcai yachajuj puracuna cashpapash, paicunapajman Jesús shamushca horasca illashcami carca.

²⁵Chai jipami, caishuj yachajujcunaca: —Apunchi Jesusta ricurcanchimi— nishpa, Tomasman villachinajurca. Shina nijpimi Tomasca, cashna nijurca: —Paipaj maquipi clavoscunahuan tacai tucushcata ricushpa, chai chugripi ñuca maqui dedota satishpallami crisha. Shinallata paipaj costillas chugripi, ñuca maquita na satishpaca napacha crishachu— nijurcami.

²⁶Pusaj punlla jipami, chai huasi ucupillata Jesuspaj yachajujcunaca, cutin tandanajushca tianajurca. Tomaspash chaipimi carca. Shina tianajujpimi, pungucunata ali vichashca cajpipash, Jesusca yaicumushpa, paicunapaj chaupipi shayarishpaca: —Quiquingunapaca, casilla ali causaigu tiachun— nirca.

²⁷Shina nishpallami Jesusca, Tomastaca cashna nijurca: —Quiquimbaj maqui dedota, ñucapaj maqui chugripi churashpa ali ricui. Shinallata quiquimbaj maquita, ñucapaj costillas chugripi satishpa ricui. Ama chashna na crishpa purijuichu. Ashtahuangarin ñucataca crinami cangui— nijurcami.

²⁸Shina nijujpimi Tomasca: —¡Ñucata Mandaj, ñucapaj Taita Diosmari cangui!— nirca.

²⁹Shina nijpimi Jesusca, cashna nijurca: —Tomás, quiquinga ñucata ricushpapachami crihuashcangui. Ñucata na ricushpapash crijcunaca, ninandami cushijunajun— nijurcami.

³⁰Jesusca, imatapash juyaillagutami ashtacata rurashpa purijurca. Chaitaca, paipaj yachajujcunapash ricunajurcami. Imata ricushcatapash, na tucuita cai libropica escribishcachu.

³¹Ashtahuangarin Jesusca, Quishpichij Cristo cajtapash, Taita Diospaj Churi cajtapash crinajuchunmi caitaca escribishca. Paita crishpaca, paipaj shutipi causaita causagrinata charichunmi escribishca.