Read Imbabura Highland Quichua JUAN 21 Bible Online

JUAN 21 - Imbabura Highland Quichua bible

JUAN 21

¹Chai jipami Jesusca, paipaj yachajujcunaman cutin ricurirca. Paica, Tiberias shuti cucha manñapimi cashnaca ricurirca:

²Chaipica Simón Pedropash, “chai punllallata ishcandi huacharishcami” nishpa rijsishca Tomaspashmi chaipi carca. Shinallata Galilea llactapi tiaj Caná shuti pueblomanda Natanael shuti runagupash, Zebedeo shuti runapaj ishcandi churicunapash, shuj ishcai yachajujcunapashmi tandanajushca chaipi carca.

³Chaipi cashpami, Simón Pedroca: —Pijita japingapaj rigrinimi— nirca. Shina nijpimi paicunaca: —Ñucanchipash quiquinhuan rishunllami— ninajurca. Shina nishpaca, canoapi tiarishpami rinajurca. Ashtahuangarin paicunaca, shuj pijillatapash na tarishpami punllayanajurca.

⁴Ña punllayajujpimi Jesusca, cucha manñaman ricurirca. Ashtahuangarin paipaj yachajujcunaca, Jesús cajtaca na yacharcachu.

⁵Jesusca paicunataca: —Huahuacuna, ¿micungapaca imagupash tianllu?— nircami. Shina nijpimi paicunaca: —Imagupash na tiapanllu— ninajurca.

⁶Shina nijpimi Jesusca: —Cai canoa ali ladoman linllita shitaichi, taringuichillami— nirca. Shina nijpi linllita shitashpaca, chai linllipi pijicuna junda cajpimi, aisashpa llujchitapash na ushanajurca.

⁷Shina cajpimi, Jesús juyashca yachajujca: —¡Apunchi Jesusmari cashca!— nishpa Pedroman villachirca. Shina nijpimi Simón Pedroca, paipaj churajunata (llujchishca cashpa), cutin huatarishpa yacuman shitarirca.

⁸Yacu manñaman llujshingapaca, shuj cuadrashnami tiarca. Shina cajpimi piji jundashca linllitaca, caishuj yachajujcuna canoapi aisashpa llujchirca.

⁹Ña manñaman llujshishpaca, carbón ninayashcapi piji cusarijujta, tandagupash tiajujtami ricunajurca.

¹⁰Jesusca cashnami nirca: —Cunan japimushca pijicunamanda, huaquinguta apamuichi— nircami.

¹¹Shina nijpimi Simón Pedroca, canoaman vitsiashpa linllitaca, manñaman aisashpa llujchimurca. Chai linllipica, patsaj picha chunga quimsa jatun pijicunalla jundashcami cashca carca. Ashtaca pijicuna junda cajpipash, linllica na liquirircachu.

¹²Chai jipallami Jesusca: —Shamushpa micuichi— nirca. Paicunaca, Apunchi Jesús cajta rijsishpami: “¿Maijanda cangui?” nishpaca, paipaj yachajuj puracunamanda, shujllapash na tapui usharca.

¹³Jesús shamushpami, tandaguta japishpa paicunaman cararca. Shinallata pijigutapashmi cararca.

¹⁴Huañushcacunapaj chaupimanda causarishca jipami Jesusca, caihuanga ña quimsacaman, paipaj yachajujcunaman ricurirca.

¹⁵Paicuna micushca jipami Jesusca, Simón Pedrotaca cashna nirca: —Jonaspaj churi Simón, ¿caishujcunatapash yalichu canga juyahuangui?— nircami. Shina nijpimi Pedroca: —Ari, quiquindaca juyanipachami. Chaitaca quiquinllata yachapanguimi, Apunchi Jesús— nishpa tigrachirca. Shina nijpimi Jesusca: —Shina cashpaca, ñucapaj huahua llamagucunata michipangui— nirca.

¹⁶Shina nishpallami: —Jonaspaj churi Simón, ¿ñucataca juyahuanguipachachu?— nishpa cutin tapurca. Shina nijpimi Pedroca: —Ari, quiquindaca juyanipachami. Chaitaca quiquinllata yachapanguimi, Apunchi Jesús— nishpa tigrachirca. Shina nijpimi Jesusca: —Ñucapaj llamagucunata michipangui— nirca.

¹⁷Caihuanga quimsacamanmi: —Jonaspaj churi Simón, ¿ñucataca juyahuanguipachachu?— nirca. “¿Juyahuanguipachachu?” nishpa, quimsacaman tapuimandami Pedroca, ninanda llaquiyarca. Shina llaquiyashpami, cashna nijurca: —Quiquinga tucuitamari yachapangui. Quiquinda ñuca juyajujtapash yachapanguimi, Apunchi Jesús— nijurcami. Shina nijpimi Jesusca, cashna nijurca: —Shina cashpaca, ñucapaj llamagucunata michipangui.

¹⁸Napacha llullashpami, quiquindaca cashna nijuni: Quiquin chairalla viñai cashpaca, ali chumbilirishpami, quiquin maiman munashcaman rijun carcangui. Ashtahuangarin quiquin rucuyashpaca, ishcandi maquitami chutangui. Quiquindaca, shuj chumbita huatachishpami, na ringapaj munashcaman apashpa ringa— nijurcami.

¹⁹Shina nijushpaca, Pedro imashna huañuchi tucushpapash, Taita Diostaca punchapambagumi cangui nijunatami Jesusca villachijurca. Shina nishpallami, Jesusca: —Ñucata catihuailla— nirca.

²⁰Pedro tigrarishpa ricushpaca, Jesús ninanda juyashca yachajuj catishpa rijujtami ricurca. Chai yachajujmi micunajushpaca, Jesuspi marcarishpa tiajushca carca. Paillatami: “¿Quiquindaca pita japichigrin, Apunchi Jesús?” nishpa tapushca carca.

²¹Chai yachajujta Pedro ricujushpami: —¿Cutin caica imashi tucunga, Apunchi Jesús?— nishpa tapurca.

²²Shina tapujpimi Jesusca, cashna nijurca: —¿Imapajta quiquinga yachangapaj munangui? Ñuca munajpica, ñuca tigramungacaman paica causajunllami. Quiquinga ñucata catihuailla— nijurcami.

²³Chai yachajujta Jesús chashna nijujpimi: “Chai yachajujca, na huañungachu” nishpa, crij puracunaca parlanajurca. “Na huañungachu” nishpaca na villachircachu. Ashtahuangarin: “¿Imapajta yachangapaj munangui? Ñuca munajpica, ñuca tigramungacaman paica causajungallami” nishpami Jesusca villachirca.

²⁴Chashna ni tucushca yachajujllatami, imata ricujushcata, imata uyajushcatapash caipica escribishca. Paica, napacha llullashpa villachijushcatami yachanchi.

²⁵Jesusca, imagutapash ashtahuan ashtaca ashtacatami rurashpa purijurca. Pai imata rurajushcatapash, shuj shujlla escribijpica, chai librocunata churangapaj, cai pachapash na pactanmanllu yanimi. Shina cachun.