Read Imbabura Highland Quichua JUAN 3 Bible Online

JUAN 3 - Imbabura Highland Quichua bible

JUAN 3

¹Fariseo puramanda Nicodemo shuti shuj runami tiarca. Paica, judiocunata mandaj puramandami carca.

²Chai runami, Jesuspajman tuta shamushpa, cashna nijurca: —Rabí, quiquin yachachijuchunga Taita Dios cachamushcatami yachanchi. Taita Dios quiquinhuan cajpillami, cashna imagutapash juyaillata rurashpa ricuchijungui. Shina ruranataca, pipash na ushanllu— nijurcami.

³Shina nijpimi Jesusca, cashna nishpa tigrachirca: —Napacha llullashpami, quiquindaca cashna nijuni: Pipash cutin na huacharishpaca, Taita Dios mandajujtaca napacha ricuita ushangachu— nircami.

⁴Shina nijpimi Nicodemoca, cashna nirca: —Shuj rucu runaca, ¿imashnata cutin huacharita ushanga? ¿Cutin huacharingapaca, mamapaj vijsamanllu cutin yaicuita ushanga?— nircami.

⁵Shina nijpimi Jesusca, cashna nishpa tigrachirca: —Napacha llullashpami, quiquindaca cashna nijuni: Maijambash yacumanda, Diospaj Espiritumanda na cutin huacharishpaca, Taita Dios mandajujman napacha yaicuita ushangachu.

⁶Aichamanda huacharishpaca, aichallatami can. Ashtahuangarin Diospaj Espiritumanda huacharishpaca, Diospaj Espiritutami charin.

⁷“Cutin huacharinapachami canguichi” nishcamandaca, na manllarinachu cangui.

⁸Huaira shamushpaca, maita munashcata huairamunllami. Maimanda shamujujta, maiman yalijujtapash na yachanguichu. Huairataca, huacashpa yalijujtallami uyangui. Diospaj Espiritumanda tucuilla huacharijcunapash, shinallatami— nijurcami.

⁹Shina nijpimi, Nicodemoca: —¿Imashnata chashnaca tucungayari?— nishpa tigrachirca.

¹⁰Shina nijpimi Jesusca, cashna nishpa tigrachirca: —Quiquinga, Israel llactapi jatun yachachij cashpapash, ¿caitaca nachu yachangui?

¹¹Napacha llullashpami, quiquindaca cashna nijuni: Imatapash yachashcatami, ñucanchica villachinajunchi. Imatapash ricushcatami, chashnapachami nishpa villachinajunchi. Ashtahuangarin ñucanchi villachishcataca, na uyangapaj munashpami causanguichi.

¹²Cai pachapi imapash tiajmandami quiquingunaman villachijurcani. Chaitapash na cringapaj munashpaca, jahua pachapi imalla tiajcunamanda villachijpicarin, ¿imashnata cringuichiyari?

¹³Pipash na jahua pachaman rishcachu. Ashtahuangarin Runa Aichayu tucushca ñucallami, jahua pachamanda shamurcani. Shina cashpami, jahua pachapi causajuni.

¹⁴Moisesca, jirru culebrata rurashpami, jichushca pambapi caspipi huarcurca. Shinallatami, Runa Aichayu tucushca ñucapash, caspipi huarcui tucunapacha cani.

¹⁵Shina huarcui tucujpimi, pipash ñucata crishpaca, na chingaita chingagringa. Ashtahuangarin causaitami causagringa.

¹⁶Taita Diosca, cai pachapi causajcunata ninanda juyashpami, paipaj shujlla Churiguta caramurca. Pipash paita crishpaca, na chingaita chingagringachu, ashtahuangarin causaitami causagringa.

¹⁷Taita Diosca, cai pachapi causajcunata ninan llaquiman cachangapaca, na paipaj Churita cachamurcachu. Ashtahuangarin cai pachapi causajcunaca, paimandalla quishpirichunmi cachamurca.

¹⁸Paipaj Churita crijtaca, na llaquichi tucunapachami nishcachu canga. Ashtahuangarin na crijtaca, Taita Diospaj shujlla Churita na crishcamandami, llaquichi tucunapachami nishcami canga.

¹⁹Michami, cai pachaman shamurca. Gentecunaca, paicunapaj ruraicuna nali cajpimi, michata juyangapaj randica, yana yana tutapishna causanatara ashtahuan juyarca. Chashna causajuimandaca, llaquichi tucunapachami nishcami canga.

²⁰Nalitalla rurashpa tucuilla causajcunaca, michataca na ricunayachishpami causanajun. Paicuna nalita ruranajujpi ama jarcashpa rimanajuchunmi, michaman na quimirinajun.

²¹Ashtahuangarin na llullashpa villachijuj Shimita catishpa causajcunaca, michaman quimirinajunmi. Taita Dios munashcata rurashpa causanajushca ricurichunmi, chashna quimirinajun— nijurcami.

²²Shina nishca jipami Jesusca, paipaj yachajujcunandi, Judea llactaman shamurca. Chai llactapi paicunandi cashpami bautizajurca.

²³Juanga, ashtaca yacu tiajpimi, Salim shuti pueblo ladolla Enón shuti llactapipash bautizajurca. Gentecuna paipajman chayamujpimi, paica bautizajurca.

²⁴Juanga, nara prezu japi tucushpami, chashna bautizajurca.

²⁵Shuj punllami, Juanbaj yachajujcunahuan, judiocunahuan, Diospaj ñaupajpi mapa illaj ricurinamanda ninanda rimarinajurca.

²⁶Chashna rimarinajushpami, Juanbajman shamushpa cashna ninajurca: —Rabí ricui, Jordán yacu chimba ladopi quiquinhuan tiajushca chai runamandami, quiquinga villachijurcangui. Paica bautizajunmi, paipajmanmi tucuicuna shamunajun— ninajurcami.

²⁷Shina nijpimi Juanga, cashna nishpa tigrachirca: —Taita Dios ushaita carajpillami, maijambash imagutapash ruraita ushan.

²⁸Quiquingunallatami, ñuca cashna imata nijushcatapash yachanguichi: ‘Na Quishpichij Cristo canichu. Ashtahuangarin Taita Dios ñucata ñaupashpa villajuchun, cachamushcallami cani’ nijurcanimi.

²⁹Cazarajuj huarmica, cusapajmi capan. Ashtahuangarin cusapaj juyashca cumbaca, paipaj ladopi cashpami, chai cusa rimashca shimita uyashpa ninanda cushijun. Ñucapash, chai cusapaj cumbashna cashpami ninandapacha cushijuni.

³⁰Quishpichijca, ashtahuan ashtahuan jatunyachi tucunatami charin. Ashtahuangarin ñucami, ashtahuan yangapi churai tucuna cani.

³¹Jahua pachamanda shamujujca, tucuicunata mandajmi. Cai pachamanda runaca, alpapi imapash tiajmandallami parlan. Ashtahuangarin jahua pachamanda shamujujca, tucuicunatami mandajun.

³²Paica, pai ricushcata, pai uyashcatami, chashnapachami nishpa villachijun. Ashtahuangarin pai villachishcataca, pipash na chasquingapaj munanllu.

³³Imashna causanata pai yachachijpi pipash chasquishpaca, Taita Dios na llullashpa villachijujtami ricuchijun.

³⁴Taita Dios cachamujpi shamushcami, Diospaj Shimigutalla villachijun. Taita Diosca paipaj Espiritutaca, na mitsashpami caramujun.

³⁵Taita Diosca, paipaj Churita ninanda juyashpami, tucui imatapash mandajuchun, paipaj maquipi churarca.

³⁶Diospaj Churita maijambash crij cashpaca, causaita causagrinatami charin. Ashtahuangarin Diospaj Churita na cazungapaj munashpaca, causaita causagrinataca napacha charingachu. Ashtahuangarin ninanda fiñashpa Taita Dios llaquichinaca, paipaj jahuapimi shuyajun— nijurcami.