Read Imbabura Highland Quichua JUAN 4 Bible Online

JUAN 4 - Imbabura Highland Quichua bible

JUAN 4

¹“Jesusca, Juandapash yalimi ashtacacuna paipaj yachajujcuna tucuchun bautizajun” nishpa parlanajujtami, fariseocunaca uyashca carca. Chaitami, Apunchi Jesusca yacharca.

²(Jesusca, na bautizajurcachu. Ashtahuangarin paipaj yachajujcunallami bautizanajurca).

³Shinamandami Jesusca, Judea llactamanda llujshishpa, Galilea llactaman cutin tigrarca.

⁴Chaiman tigrangapaca, Samaria shuti llactatami Jesusca, yalinapacha carca.

⁵Samaria llactapi tiaj Sicar shuti pueblomanmi chayamurca. Chai pueblo ladomanga, ñaupa taita Jacobo, paipaj churi Joseman carashca alpami tiarca.

⁶Chaipimi, yacuta llujchingapaj allashca jatun utuju tiarca. Chaica, Jacobopajmi carca. Jesusca, ninanda purijushpa shaijushca cashpami, yacuta llujchingapaj allashca jatun utuju patapi tiarirca. Ña chaupi punllashnami carca.

⁷Chaipi tiajujpimi, Samaria llactamanda shuj huarmica, yacuta llujchingapaj shamurca. Chai huarmitami, Jesusca: —Asha yacuguta ufiangapaj carahuai— nirca.

⁸Paipaj yachajujcunaca, pueblopi micunata randingapajmi rishca carca.

⁹Yacuguta carahuai nijpimi, Samaria llacta huarmica cashna nirca: —Samaria llacta huarmimi capani. Quiquinga, judío runamari cangui. ¿Imashpata ñucataca, yacuta mañahuangui?— nircami. Judiocunaca, Samaria llactapi causajcunahuanga na tandanajuj cashpami, chashna nirca.

¹⁰Shinamandami Jesusca, cashna nishpa tigrachirca: —Taita Dios quiquinman imaguta carasha nijujtapash, na yachanguichu. ‘Yacuguta carahuai’ nishpa maijan mañajujtapash, na rijsinguichu. Ñucata rijsishpaca, quiquinmi yacuguta mañahuanguiman. Quiquin mañajpica, causaita caraj yacugutami caraiman— nircami.

¹¹Shina nijpimi chai huarmica, cashna nijurca: —Taitalla, quiquinga imahuan yacuta vishingapajpash na charipanguica. Yacuta llujchingapaj allashca cai jatun utujupica, yacupash ucu ucupimari capan. Causaita caraj yacuta carangapaca, ¿maipita charipangui?

¹²¿Quiquinga, ñucanchipaj ñaupa taita Jacobopajpash, ashtahuan yalichu cangui? Paimi, yacuta llujchina cai jatun utujuta allashca. Cai utujumandami paipash, paipaj churicunapash, paipaj animalcunamambash yacuta ufian cashca— nijurcami.

¹³Shina nijpimi Jesusca, cashna nishpa tigrachirca: —Maijambash cai yacuta ufiashpaca, cutin yacunayachingami.

¹⁴Ashtahuangarin ñuca carasha nijuni chai yacuguta maijambash ufiashpaca, cutinga na yacunayachingachu. Ñuca carashca yacuguca, paipaj shungupica causaita carangapaj llujshijuj pugyu yacugushnami canga— nijurcami.

¹⁵Shina nijpimi chai huarmica, Jesusta cashna nirca: —Shina cashpaca Taitalla, chai yacuguta carahuailla. Chaita ufiashpaca, cutinga na yacunayachishachu. Shinallata cutinga, na caiman yacuta llujchingapaj shamupashachu— nircami.

¹⁶Shina nijpimi Jesusca: —Quiquimbaj cusatara pushashpa tigramugri— nijurca.

¹⁷Shina nijujpimi, chai huarmica: —Cusataca na charinichu— nishpa tigrachirca. Shina nijpimi Jesusca, cashna nijurca: —Quiquinga: ‘Cusataca na charinichu’ nishpaca, na llullashpami nijungui.

¹⁸Quiquinga, ñami picha cusata charishcangui. Cunan quiquinhuan causajuj runapash, na quiquimbaj cusachu. Chaitaca, na llullashpami nishcangui— nijurcami.

¹⁹Shina nijujpimi chai huarmica, cashna nijurca: —Taitalla, quiquinga Dios ima nishcata villachijmi cangui yarin.

²⁰Ñucanchipaj ñaupa taitacunaca cai urcupimi, Diostaca ninanda alicachin cashca. Ashtahuangarin quiquingunaca: ‘Jerusalenbillami Diostaca punchapambagumi cangui nina’ ninguichimi— nijurcami.

²¹Shina nijpimi Jesusca, cashna nijurca: —Quiquinga, ñuca villachishcata cripangui. Na cai urcupilla, na Jerusalenbilla Taita Diostaca punchapambagumi cangui nina punllacunami chayamugrin.

²²Quiquingunaca, na rijsishca Diosta mañajcunami canguichi. Ashtahuangarin ñucanchica, paita rijsishpapachami mañanajunchi. Quishpichirinaca, judío puramandami shamun.

²³Ashtahuangarin na nij tucushpalla, tucui shunguhuambacha Taita Diosta ninanda alicachijcunaca, Diospaj Espíritu yuyaita cujujpi, ninanda alicachina punllacunami chayamuna carca. Chai punllami, cunanga ña chayamushca. Chashna ninanda alicachijcunatami, Taita Diosca paita ninanda alicachinajuchun mascan.

²⁴Taita Diosca, Espiritumi capan. Chashna cajpimi, Diospaj Espíritu yuyaita cujujpi ninanda alicachijcunaca, na nij tucushpalla ninanda alicachinata charin— nijurcami.

²⁵Shina nijpimi chai huarmica, cashna nirca: —Mesías nishca Quishpichij Cristo shamunataca yachapanimi. Pai shamushpami, imatapash ñucanchiman tucuita villachinga— nircami.

²⁶Shina nijpimi Jesusca, cashna nirca: —Chaica ñucami cani. Paihuanmi quiquinga parlajungui— nircami.

²⁷Shina parlanajujpimi, paipaj yachajujcunaca chayamurca. Chai huarmihuan Jesús parlajujta ricushpaca, ninandami manllarinajurca. Shina ricushpapash, chai huarmitaca: “¿Imatata tapujungui?” na cashpaca: “¿Imatata chai huarmihuan parlajungui?” nishpaca, maijambash na tapuita usharcachu.

²⁸Chai huarmica, fundutapash chaipillata saquishpami, puebloman tigrarca. Chaipica, gentecunaman cashna nishpami villachijurca:

²⁹—Jacuchi, shuj runaguta ricunguichi. Paica, ñuca tucui imata rurashpa causashcataca, tucuillatami yachashpa villahuarca. ¿Nacha paica, Quishpichij Cristo imashi?— nijurcami.

³⁰Shina nijpimi, chai pueblomandaca llujshinajushpa, Jesuspajman shamunajurca.

³¹Chaicamanmi, Jesuspaj yachajujcunaca: —Rabí, micupayari— ninajurca.

³²Shina nijpimi, Jesusca: —Ñuca micungapaca, quiquinguna na rijsishca micunagutami charini— nirca.

³³Shina nijpimi, paipaj yachajujcunaca caishuj chaishuj: —Pai micuchun, ¿pipash micunaguta apamurcachu imashi?— ninajurca.

³⁴Shina ninajujpimi Jesusca, paicunata cashna nijurca: —Ñucata cachamuj Taita munashcatami, rurashpa tucuchina cani. Chaimi, ñucapaj micunagu capan.

³⁵¿Nachu quiquingunaca: ‘Cozechana punlla chayamungapaca, chuscu quilla tianrami’ nishpa parlanguichi? Ashtahuangarin ñucami, quiquingunata cashna nini: Chagra pambacunata vichai ricuichi. Ña fucushca, cozechanallami.

³⁶Cozechaj runaca, racionda japinmi. Chai fucushca granoca, jahua pachapi causaitami causagringa. Shina cajpimi tarpuj runahuan, cozechaj runahuanga, ishcandillata cushijunajunga.

³⁷‘Shujmi tarpun, shujmi cozechan’ nishpaca, na llullashpami shina parlanajun.

³⁸Quiquinguna na tarpushcatami, cozechachun cacharcani. Shujcunami tarpurca. Ashtahuangarin quiquingunarami, shujcuna tarpushcaman yaicushpa tandachinguichi— nijurcami.

³⁹Samaria llactapi causanajuj ashtaca gentecunami, chai huarmi villachijujpi crinajurca. Chai huarmica: ‘Ñuca imata rurashpa causajushcatapash, tucuitami villachihuarca’ nishpami villachijurca.

⁴⁰Shina crishpami, Samaria llactapi causajcunaca, Jesuspajman shamushpa: —Ashaguta shuyapai— ninajujpi Jesusca, ishcai punllata paicunahuan chaipi quedarca.

⁴¹Chaipi cashpa Jesús villachijujta uyashpami, ashtahuan shujcunapash crinajurca.

⁴²Paicunaca, chai huarmitaca cashnami ninajurca: —Cunanga, pai villachijujtapacha uyashpami, na quiquin villachijpilla crinajunchi. Paica, cai pachapi causajcunata Quishpichij Cristopacha cajtami yachanchi— ninajurcami.

⁴³Jesusca, ishcai punllata Samaria llactapi cashpami, Galilea llactaman llujshishpa rirca.

⁴⁴“Dios ima nishcata villachijtaca, chai llactamandallata cajpipash, alicachishpa chasquinataca na yachanllu” nishpami, Jesusllata ña villachishca carca.

⁴⁵Ashtahuangarin Galilea llactaman chayajpica, chai llactapi causajcunaca, cushijushpami Jesustaca chasquirca. Pascua fiesta punllacunapi, Jerusalenbi Jesús imatalla rurajujtami ricushca carca. Paicunapash, chai fiestaman rishca cashpami, chaitaca ricushca carca.

⁴⁶Jesusca, Galilea llactapi tiajuj Caná shuti pueblomanmi, cutin tigramurca. Chaipimi, yacuta vinoman tigrachishca carca. Capernaum shuti pueblopimi, jatun mandaj churashca mandaj runapaj churiguca, huañunalla sirijurca.

⁴⁷Judea llactamanda, Galilea llactaman Jesús tigramushcata uyashpami, chai mandaj runaguca, ñapash Jesuspajman shamurca. Shina shamushpaca: —Ñuca churigumi huañunalla sirijupan. Paita alichipangui, urai ripashun— nircami.

⁴⁸Shina nijpimi Jesusca, chai runagutaca cashna nirca: —Imatapash rurashpa na ricuchijpi, jatun manllarinacunata rurashpa na ricuchijpica, quiquingunaca ñucataca na cringuichimanllu— nircami.

⁴⁹Shina nijpimi jatun mandaj churashca mandaj runaca, cashna nirca: —Ñuca churigu nara huañujpillata uchalla urai ripashunyari, Apunchi Jesús— nircami.

⁵⁰Shina nijpimi Jesusca, cashna nirca: —Rilla, quiquimbaj churiguca ñamari ali tucushca— nijpimi chai runaca, Jesús nishcata crishpa tigrarca.

⁵¹Pai ña urai rijujpi, paita servijcuna tuparishpami: —Quiquimbaj churiguca, ñami ali tucushca— nishpa villachinajurca.

⁵²Shina villachijpica: —¿Ima horasmandata ña samachi callariparca?— nishpami tapurca. Shina tapujpimi: —Caina chaupi punlla yalishcallapimi, tabardillo nanaitaca yalichirca— ninajurcami.

⁵³Shina nijpimi: “Quiquimbaj churiguca, ñami ali tucushca” nishpa, chai horasllata Jesús nishcata taitaca yarirca. Shinamandami paipash, paipaj huasipi tucuilla causajcunandi, Jesusta crirca.

⁵⁴Judea llactamanda, Galilea llactaman Jesús tigramushpami, caihuanga ña ishcaicaman juyaillata rurashpa ricuchijurca.