Read Imbabura Highland Quichua JUAN 5 Bible Online

JUAN 5 - Imbabura Highland Quichua bible

JUAN 5

¹Chai jipami Jerusalenbica, judiocuna fiestata ruranajurca. Jesuspash, chaimanmi vichai rirca.

²Jerusalenbica, llamacunahuan yaicuna pungu patapimi, cuchayashca yacu tian. Chai cuchaca, hebreo rimaipica, Betesda shutimi. Chai cucha manñamanga, picha corredorcunami tian.

³Chai corredorpica ashtaca huañunajuj, ñausa, janga, suchu gentecunami sirinajurca. Paicunaca, chai yacuta cuyuchinatami shuyanajurca.

⁴Jahua pachamanda shuj ángel urai shamushpami, chai yacutaca huaquimbi huaquimbilla cuyuchin carca. Chai yacu cuyurijhuan, punda huashajujllami, ima nanaita charishpapash, ali tucun carca.

⁵Chai corredorpica, ña quimsa chunga pusaj huatata huañujuj runami sirijurca.

⁶Shina sirijujta Jesús ricushpaca, ña unai huatata huañujujta yachashpami: —¿Nachu ali tucungapaj munanguiman?— nishpa tapurca.

⁷Shina tapujpimi, chai huañujuj runaguca, cashna nishpa tigrachirca: —Yacu cuyurijhuan, yacupi ñucata huashajuchijtaca, pitapash na charipanichu, Taitalla. Ñuca rijujpillatami, shujra mishashpa huashajun— nircami.

⁸Shina nijpimi, Jesusca: —Jatari, can mandashpa sirijushcata aparishpa rilla— nirca.

⁹Shina nijhuan ali tucushpami, chai runaca pai mandashpa sirijushcata aparishpa, ri callarirca. Chai punllapica, samana punllami carca.

¹⁰Judiocuna chaita ricushpami, cashna ninajurca: —Cunanga, samana punllamari. Mandashpa sirijushcata cashna aparishpa rijushpaca, nalitamari rurajungui— ninajurcami.

¹¹Shina nijpimi, cashna nishpa tigrachirca: —Ñucata alichijmi: ‘Quiquin mandashpa sirijushcata aparishpa rilla’ nihuarca— nircami.

¹²Shina nijpimi: —¿Pita candaca: ‘Mandashpa sirijushcata aparishpa rilla’ nirca?— nishpa, chai runataca tapunajurca.

¹³Ashtahuangarin chai runaca, maijan paita alichishcatapash na rijsircachu. Chaipi tianajuj gentecunamanda Jesús ña anchurishca cajpimi, na rijsi usharca.

¹⁴Chai jipami Jesusca, pai alichishca runataca, Diospaj huasi ucupi tuparirca. Shina tuparishpami, cashna nijurca: —Ricui, cunanga ña ali tucushcami cangui. Ama ashtahuan juchata rurashpa causanguichu. Juchata rurashpaca, ashtahuanmi llaquichi tucungui— nijurcami.

¹⁵Shina nijujpimi chai runaca, judiocunapajman rishpaca: —Jesusmi, ñucataca alichihuashca— nishpa villachijurca.

¹⁶Shina alicachishcamandami judiocunaca, Jesusta ninanda fiñashpa huañuchingapaj mascai callarirca. Jesusca, samana punllapimi chai runataca alichirca.

¹⁷Shinamandami Jesusca, cashna nishpa tigrachirca: —Ñucapaj Taitaca, cunangaman imagutapash rurajunllami. Chaimandami, ñucapash rurajunilla— nircami.

¹⁸Shina nijpimi judiocunaca, Jesusta huañuchishumbacha nishpa, ashtahuan yarinajurca. Samana punllatami faquinshna, yangapi churashpallapash na fiñachijurcachu. Ashtahuangarin Taita Dioshuan chimbapura tucushpami, Taita Diostaca ñucapaj Taitapachami nijurca.

¹⁹Jesusca, paicunataca cashnami nijurca: “Napacha llullashpami, quiquingunataca cashna nini: Diospaj Churi cashpapash, ñucapaj munaica imatapash na rurai ushanichu. Ashtahuangarin ñucapaj Taita imaguta rurajujtapash ricushpami, paipaj Churi cashpa paishnallata imagutapash rurajuni.

²⁰Ñucapaj Taitaca, paipaj Churi cajpimi, ñucataca ninanda juyahuan. Shinallata imata rurajushpapash, paica tucuitami ñucaman ricuchijun. Cunan ñuca imata rurajujtapash yali ashtahuan rurai ushachunmi ricuchihuanga. Chaita ricushpami, ninanda manllaringuichi.

²¹Imashnami ñucapaj Taitaca, huañushcacunata causachishpa causaita caran, chashnallatami ñucapash paipaj Churi caimanda, maijan munajman causaita carani.

²²Ñucapaj Taitaca, pitapash na llaquichinllu. Ashtahuangarin ñucamanmi, chai llaquichinataca paipaj Churi cajpi carahuarca.

²³Imashnami ñucapaj Taitata tucuicuna ninanda alicachin, chashnallata paipaj Churitapash ninanda alicachinajuchunmi, chai ushaitaca carahuarca. Paipaj Churi ñucata na alicachishpaca, ñucata cachamuj Taitatapash na alicachijunllu.

²⁴Napacha llullashpami, quiquingunataca cashna nini: Ñuca imata villachijujtapash uyashpa, ñucata cachamuj Taitatapash crishpallami, causaita causagrinataca charin. Paica, huañushcamanda causaita causagrinaman ña yalishcami. Shina cashpami, napacha llaquichi tucunga.

²⁵Napacha llullashpami, quiquingunataca cashna nini: Taita Diospaj Churi imata villachijujta huañushcacuna uyashpa cazuna punllacunaca, cunanmi ña chayamushca. Pipash paita uyajcunaca, causaitami causagringa.

²⁶Ñucapaj Taitallami, causaita carangapaca ushaita charin. Paipaj Churi cajpimi, causaita carachun ñucamambash ushaita carahuarca.

²⁷Llaquichi ushachumbash, Runa Aichayu tucushca cajpimi, ñucaman ushaita carahuarca.

²⁸Ñuca cashna nijujtaca, na manllarinachu canguichi. Huañushpa pambai tucushcacunaca, tucuillami ñuca rimajujta uyanajunga. Chai punllacunaca, ñami chayamujun.

²⁹Chai punllapica, imatapash aliguta rurashpa causajcunallami causaita causanajunga. Ashtahuangarin imatapash nalitalla rurashpa causashcacunaca, ninanda llaquichi tucungapajmi causaringa.

³⁰Ñucapaj munaica, imata ruraitapash na ushanichu. Ñucapaj Taita mandajpi uyashpallami, llaquiman cachajuni. Na ñucapaj munailla chashna rurashpami, imatapash cashcatapacha rurashpa llaquiman cachajuni. Ashtahuangarin ñucata cachamuj Taita munashcatami rurajuni.

³¹Ñucapaj munai ñucamanda villachishpa cashna imatapash nijushpaca, llullashpami nijuiman.

³²Ashtahuangarin shujmi, ñucata alicachishpaca villachijun. Pai ñucamanda villachijuj shimicunaca, napacha llulla cajtami yachani.

³³Quiquingunaca Juanda tapuchunmi, runacunata cacharcanguichi. Paica, ñucamandaca na llullashpami villachijurca.

³⁴Maijan runa ñucamanda villachijuchumbash, na munanichu. Ashtahuangarin cashnataca, quiquinguna quishpirichunmi villachijuni.

³⁵Micha sindishca punchayachinshnami, Juanga villachijurca. Pai punchayachijunshna villachijujtaca, ashacamanllami cushijushpa uyarcanguichi.

³⁶Ñucapaj Taita mingashcatami, imata rurashpapash pactachijuni. Imata rurashpapash, ñucapaj Taita ñucata cachamushcatami ricuchijuni. Juan imata nijushcatapash, ñucami yali ashtahuan villachijuni.

³⁷Shinallata ñucata cachamuj Taitapash, ñucamandami villachijurca. Pai imata rimajujtapash, ima horasllapash na uyashpa, pai imashna cajtapash na ricushpami causanajushcanguichi.

³⁸Paipaj shimicunatapash, quiquingunapaj shungupi na charishpami causanajunguichi. Shina cashpami, Dios ñucata cachamushcatapash na cringuichi.

³⁹Causaita causagrinata japishumbacha yashpami, Dios escribichishca Shimicunataca, aligutapacha ricuna canguichi. Ashtahuangarin chai Shimicunapica, ñucamandami villachijun.

⁴⁰Shina villachijujpipash causaita causagrinata charingapaj ñucapajman shamungapaca, na munashpami causanguichi.

⁴¹Gentecuna ñucata punchapambagumi cangui ninajuchunga, na munanichu.

⁴²Quiquingunataca ñucallata rijsinimi. Taita Diosta quiquinguna na juyajtapash yachanimi.

⁴³Ñucaca, ñucapaj Taitapaj shutipimi shamurcani. Shina cajpipash, ñucataca na chasquishpami causanajunguichi. Maijan cashpapash, quiquin shutipi shamujtaca chasquinguichimanmi.

⁴⁴Quiquingunaca, shujmanda shujmanda alicachirishpa causanatallami yarinajunguichi. Chaimandami, shujlla Taita Dios quiquingunata alicachishpa charichumbash na mascanguichi. Chashna cashpami, ñucata cringapaca na munanguichi.

⁴⁵Ñucapaj Taitaman quiquingunata juchachishpa ñuca villachigrinataca, na yanachu canguichi. Quiquingunaca, Moisés ayudangallami yashpami shuyanajunguichi. Ashtahuangarin paillatami, quiquingunataca juchachinga.

⁴⁶Moisesca, ñuca shamunata villachijushpami escribirca. Pai escribishcata crishpami, ñucataca cringuichiman.

⁴⁷Ashtahuangarin Moisés escribishcata na crishpaca, ¿imashnashi ñuca rimajujtaca crinajunguichi?” nijurcami.