Read Imbabura Highland Quichua JUAN 6 Bible Online

JUAN 6 - Imbabura Highland Quichua bible

JUAN 6

¹Chai jipami Jesusca, Galilea shuti cucha manñaman yalirca. Chai cuchaca, Tiberias shutipashmi can.

²Huañunajuj gentecunata Jesús alichijujta ricunajushpami, ashtaca ashtaca gentecuna catinajurca.

³Jesusca, urcuman vichai rijushpami, paipaj yachajujcunandi tiarirca.

⁴Judiocuna pascua fiestata rurana punllacunapash, ñami pactamujurca.

⁵Jesús vichai ricujushpaca, ashtaca gentecuna paipajman shamunajujujtami ricurca. Shina ricujushpami: —Cai tucuilla gentecuna micunajuchunga, ¿maipita tandaguta randigrishun?— nishpa, Felipeta tapurca.

⁶Ashtahuangarin Felipe imata nijta yachangapajllami tapurca. Imata ruranatapash, Jesusca ñami yacharca.

⁷Felipeca, cashna nishpami tigrachirca: —Tucuicunaman ashagu ashagu carangapaca, ishcai patsaj denario nishca culquihuan randishca tandapash na pactangachu— nijurcami.

⁸Jesuspaj yachajuj puracunamandaca, Simón Pedropaj huauqui Andresmi, Jesustaca cashna nijurca:

⁹—Caipi shuj huambragumi, picha cebada tandaguta, ishcai pijiguhuan charijun. Cai tucuilla gentecuman carangapaca caigullahuanga, ¿maitata pactangayari?— nijurcami.

¹⁰Shina nijujpimi, Jesusca: —Shina cashpaca, tucuicunata tiachipaichi— nirca. Chai urcupica, jihua juyailla viñashcami carca. Chaipimi jaricunaca, picha huarangashna tiarinajurca.

¹¹Jesusca, chai tandacunata japishpa, Taita Diosta pagui nishpami, paipaj yachajujcunaman curca. Chai yachajujcunami, chaipi tianajujcunaman caranajurca. Shinallata pijitapashmi, mashnata munashcaguta micunajurca.

¹²Na munashpa tianajujta ricushpami, paipaj yachajujcunataca: —Ama yanga shitachun puchucunataca tandachipaichi— nishpa mandarca.

¹³Paicunaca, chunga ishcai canasta jundatami tandachirca. Picha cebada tandamandallami na micuita ushashpa, chashna puchuchirca.

¹⁴Jesús chashna juyailla rurajujta ricunajushpami, chai gentecunaca cashna ninajurca: —Dios ima nishcata villachij runaguca, cai pachaman shamungami nishpami, pundata ña villashca. Caica, chai runapachami— ninajurcami.

¹⁵Ashtahuangarin Jesusca, paita japishpa, jatun mandajta rurangapaj munanajujta yachashpami, chai urcumanllata pailla cutin tigrarca.

¹⁶Ña tutayajujpimi, Jesuspaj yachajujcunaca, mama cuchaman urai llujshinajurca.

¹⁷Paicunaca, shuj canoapi tiarishpami, Capernaum shuti puebloman ringapaj, mama cuchata chimbai callarinajurca. Ña alipacha tutayashcami carca. Jesusca, paicunapajman nara shamushcachu carca.

¹⁸Shina rinajujpimi, ninan huaira jatarishpa, mama cucha yacutaca caiman chaiman shitajurca.

¹⁹Picha kilometrota, na cashpaca sucta kilometrotashnami, paipaj yachajujcunaca ña rinajurca. Shina rinajushpami Jesusca, yacu jahuata purishpa, canoaman shamujujta ricunajurca. Paita ricushpaca, ninandami manllarinajurca.

²⁰Paicuna manllarijpimi Jesusca: —Ñucami cani, na manllarinachu canguichi— nirca.

²¹Shina nijpimi Jesustaca, cushijushpa canoapi tiachirca. Shina tiachishpaca, paicuna rinajuj puebloman ñapashmi chayagrinajurca.

²²Chai cayandi tutamandami, mama cucha chimbaman quedashca gentecunaca, cashna ninajurca: “Cainaca, shujlla canoami caipi carca. Chaipica, paipaj yachajujcunallami rirca. Jesusca, na paicunahuan rircachu” ninajurcami.

²³Shina ninajujpimi, Tiberías shuti pueblomanda canoacuna chayamurca. Chai cucha vichaigupillami Apunchi Jesusca, Taita Diosta pashi nishpa, tandata gentecuna micuchun carashca carca.

²⁴Chaipica Jesuspash, paipaj yachajujcunapash illajtami, chai gentecunaca ricurca. Shinamandami chai canoacunapi tiarishpa, Capernaum shuti pueblopi Jesusta mascangapaj rinajurca.

²⁵Chai gentecuna mama cuchata chimbashpa, Jesusta tuparishpaca: —Rabí, ¿ima horasta caiman chayamurcangui?— nishpami tapunajurca.

²⁶Shina nijpimi Jesusca, cashna nishpa tigrachirca: —Napacha llullashpami, quiquingunataca cashna nini: Quiquingunaca, juyaillata ñuca rurashpa ricuchijuimandaca, na shamushcanguichica. Ashtahuangarin tandata na munajta micunajushcata yarishpallami, ñucataca mascahuanguichi.

²⁷Ismushpa tucurinalla micunata japingapaca, na ruranachu canguichi. Ashtahuangarin causaita causagrinata caraj micunaguta japingapajmi munana canguichi. Chai micunagutaca, Runa Aichayu tucushca ñucallami, quiquingunaman carasha. Chaita carajuchunmi, Taita Diosca ñucata cachamuhuarca— nijurcami.

²⁸Shina nijpimi: —Taita Dios munashcata pactachingapaca, ¿imatata rurana capanchi?— nishpa tapunajurca.

²⁹Shina nijpimi Jesusca, cashna nirca: —Pai cachamushca ñucata crinajuchunmi munan. Chaimi, Taita Dios munashcata pactachina capan— nircami.

³⁰Shina nijpimi, cashna nishpa tapunajurca: —Quiquinda cringapaca, ¿imagutata juyailla rurashpa ricuchinguiyari? Na cashpaca, ¿imagutata ruranguiyari?

³¹‘Tandaguta micunajuchunga, jahua pachamandami caramujurca’ nishpa escribishcami tiajun. Chaipi nijunshnami, ñucanchipaj ñaupa taitacunaca, jichushca pambacunapi maná shuti micunaguta micushpa purinajushca— ninajurcami.

³²Shina nijpimi Jesusca, cashna nijurca: —Napacha llullashpami, quiquingunataca cashna nijuni: Jahua pachamanda cachamushca tandataca, na Moisés cararcachu. Ashtahuangarin ñucapaj Taitami, jahua pachamandaca paipaj tandatapacha quiquingunaman caramujun.

³³Taita Dios caramushca tandagumi, cai pachapi causajcunaman causaita causagrinataca carangapaj, jahua pachamanda shamushca— nijurcami.

³⁴Shina nijpimi: —Chai tandagutaca, tucui punlla ñucanchiman carajuilla, Apunchi Jesús— ninajurca.

³⁵Shina nijpimi Jesusca, paicunata cashna nijurca: —Ñucami, causaita causagrinata caraj tandagu cani. Maijambash ñucapajman shamushpaca, ima horallapash na yarjachingachu. Ñucata crishpaca, ima horallapash na yacunayachingachu.

³⁶Ashtahuangarin ñami nircani: Quiquingunaca ñucata ricushpapash, na crishpami purinajunguichi.

³⁷Ñucapaj Taita ñucaman carashca gentecunaca, tucuicunami ñucapajman shamunajunga. Ñucapajman shamujcunataca, na tigrachishpa canllaman cachashachu.

³⁸Jahua pachamandaca, na ñuca munashcata rurangapaj shamurcanichu. Ashtahuangarin ñucata cachamuj Taita munashcaguta pactachingapajmi shamurcani.

³⁹Ñucata cachamuj Taitapaj munaica, caimi capan: Ñucapaj Taita ñucaman caramujuj gentecunataca, shujtallapash na chingachishpa, tucurimui punllapica tucuillata causachijuchunmi munan.

⁴⁰Ñucata cachamuj Taitami, quiquingunataca cashna causanajuchun munajun: Paipaj Churi ñucata ricushpa maijambash crishpaca, causaita causagrichunmi munan. Ñucata crijcunataca, tucuicunatami tucurimui punllapica causachisha— nijurcami.

⁴¹“Ñucami, jahua pachamanda shamushca tandagu cani” nishpami, Jesusca villajurca. Shinamandami, Judea llactapi causajcunaca fiñashpa, cashna nalicachinajurca:

⁴²—Cai runaca, Josepaj churi Jesusllamari. Paipaj taitata, mamatapash ñucanchica rijsinchimari. ¿Imashpata paica: ‘Jahua pachamandami shamurcani’ nirijunyari?— ninajurcami.

⁴³Chashna ninajujpimi Jesusca, cashna nishpa tigrachirca: —Canguna purapica, na chashna fiñashpa nalicachinachu canguichi.

⁴⁴Ñucata cachamuj Taita ñucapajman pushamujpillami, pipash shamun. Paitaca, ñucami tucurimui punllapi causachisha.

⁴⁵‘Taita Diosmi, tucuicunata yachachinga’ nishpami, pai ima nishcata villajcunaman ña escribichishca. Shinallata ñuca Taita yachachijujta uyashpa yachajujcunallami ñucapajman shamun.

⁴⁶Ñucapaj Taitataca, pipash na ricushcachu. Ñucallami, Taita Diospajmanda shamushca cashpa, ñucapaj Taitataca ricujurcani.

⁴⁷Napacha llullashpami, quiquingunataca cashna nini: Ñucata crijllami, causaita causagrinata charin.

⁴⁸Ñucami, causaita causagrinata caraj tandagu cani.

⁴⁹Quiquingunapaj ñaupa taitacunaca, jichushca pambacunapimi maná shuti micunaguta micushpa purinajurca. Chaita micushpapash, tucuillami huañunajurca.

⁵⁰Caimi, jahua pachamanda shamushca tandaguca capan. Chai tandaguta maijambash micushpaca, na huañungachu.

⁵¹Ñucami, jahua pachamanda shamushca causajuj tandagu cani. Chai tandata maijambash micushpaca, causaitami causagringa. Ñuca carana tandaguca, ñuca aichagumi capan. Ñucallatami, cai pachapi causajcuna causaita causagrichun carangapaj huañusha— nijurcami.

⁵²Shina nijpimi judiocunaca, paicunapura fiñanajushpa cashna ninajurca: —¿Imashnata caica, paipaj aichataca ñucanchi micunajuchun caraita ushangayari?— ninajurcami.

⁵³Shina nijpimi Jesusca, cashna nijurca: —Napacha llullashpami, quiquingunataca cashna nijuni: Runa Aichayu tucushca ñucapaj aichaguta na micushpa, ñucapaj yahuargutapash na ufiashpaca, causaita causagrinataca na charinguichica.

⁵⁴Ñucapaj aichaguta micuj, ñucapaj yahuartapash ufiajllami, causaita causagrinataca charin. Paitaca, tucurimui punllapimi causachisha.

⁵⁵Ñucapaj aichaguca, micunapachami capan. Ñucapaj yahuarpash, ufianapachami capan.

⁵⁶Ñucapaj aichaguta micuj, ñucapaj yahuarta ufiajllami, ñucahuan shujlla tucushpa causajun. Shinallata ñucapash, paipaj shungupimi causajuni.

⁵⁷Ñucata cachamuj Taitaca, causaitami causajun. Ñucapash, ñucapaj Taitamandami causajuni. Shinallatami ñucata micujpash, ñucamandalla causajunga.

⁵⁸Cai tandaguca, jahua pachamanda shamushca tandami capan. Maijambash cai tandata micushpallami, causaita causagringa. Cai tandaguca, na quiquingunapaj ñaupa taitacuna micushca tandashnachu capan. Paicunaca, maná shuti micunaguta micushpa purinajushpapash, huañurcallami— nijurcami.

⁵⁹Cai shimicunataca, Capernaum shuti pueblopi tandanajuna huasi ucupimi, Jesusca yachachijurca.

⁶⁰Jesuspaj ashtaca yachajujcunaca chaita uyashpami, cashna ninajurca: —Pai yachachijuj shimicunataca, napacha cati ushanallachu. ¿Pita cashna nijujtaca, uyaita ushangayari?— ninajurcami.

⁶¹Chashna fiñashpa nalicachinajujta yachashpami, Jesusca paipaj yachajujcunata cashna nijurca: —¿Ñuca yachachijuj shimicunachu, quiquingunata fiñachin?

⁶²Runa Aichayu tucushca ñuca punda causajushcaman vichai rijujta ricushpacarin, ¿imatashi ninguichi?

⁶³Diospaj Espiritullami, causaita causagrinataca caramujun. Chaitaca, na gentecunapaj ushaihuanlla japinllu. Ñuca quiquingunaman villajuj shimicunaca, causaita caraj Espiritumi capan.

⁶⁴Cashna nijujpipash huaquingunaca, quiquinguna purapi napacha crishcami canguichi— nijurcami. Huaquinguna paita na crinatapash, huañuchijcunaman maijan paita japichinatapash, Jesusca callarimandallatami yacharca.

⁶⁵Shinamandami, paicunataca cashna nijurca: —Quiquingunamanmi, cashna nishpa ña villachijurcani: ‘Ñucapaj Taita ñucapajman pushamujpillami, pipash shamui ushan’ nishpami villachijurcani— nijurcami.

⁶⁶Shina nijujpimi, Jesusta catijcunaca, ashtacacuna paita saquishpa, na ashtahuan catirca.

⁶⁷Shinamandami Jesusca, paipaj chunga ishcai yachajujcunatapash: —¿Quiquingunapash ñucata saquishpa ringapaj munanguichi?— nirca.

⁶⁸Shina nijpimi Simón nishca Pedroca, cashna nishpa tigrachirca: —Apunchi Jesús, ¿pipajmanda rishunyari? Quiquinllami, causaita causagrinata caraj shimigucunataca charingui.

⁶⁹Ñucanchica quiquinda crij cashpami, causajujlla Taita Diospaj Churi, Quishpichij Cristo cajtapacha yachapanchi— nijurcami.

⁷⁰Shina nijujpimi Jesusca, cashna nishpa tigrachirca: —Quiquingunataca, chunga ishcaitami agllarcani. Shina cashpapash quiquinguna puramanda shujca, diablomi can— nircami.

⁷¹Chashna nishpaca, Simonbaj churi Judas Iscariotetami shina nijurca. Paimi, chunga ishcai yachajuj puracuna cashpapash, Jesustaca huañuchijcunaman japichishapacha yajurca.