Read Imbabura Highland Quichua JUAN 7 Bible Online

JUAN 7 - Imbabura Highland Quichua bible

JUAN 7

¹Chashna nishca jipaca, Galilea llactapimi Jesusca purijurca. Judiocuna paita huañuchishumbacha nishcata yachashpami, Judea llactapica na quedangapaj munarca.

²Judiocunaca, carpacunapi causanajushcata yarishpami, fiestata ruran carca. Chai fiestata rurana punllacunami, ña chayamujurca.

³Shinamandami Jesustaca, paipaj huauquicunaca cashna ninajurca: —Can imagutapash rurajujta, canda catijcuna ricunajuchun, caimanda llujshishpa, Judea llactaman rilla.

⁴Maijambash alicachishpa ricuchun munashpaca, na pacallapi imatapash ruranllu. Can chashna rurajunata yachashpaca, tucuicuna ricunajujtami rurana cangui— ninajurcami.

⁵Jesustaca, paipaj huauquicunapash na crishpami, chashnaca ninajurca.

⁶Shina nijpimi Jesusca, cashna nijurca: —Ñuca chaiman rina punllami, nara chayamun. Cangunapaj rinaca, ima punllapash alimi.

⁷Cai pachapajtalla rurashpa causajcunaca, cangunataca na millanayachinllu. Imatapash nalitallami rurashpa causanguichi nijujpimi, ñucataca ninanda na ricunayachihuan.

⁸Cangunaca, chai fiestaman vichai richilla. Ñuca rina punlla nara chayamujpimi, na vichai rijuni— nijurcami.

⁹Shina nishpami, Galilea llactapillata Jesusca quedarca.

¹⁰Paipaj huauquicuna fiestaman ña rishca jipami, Jesusca chaimanllata vichai rijurca. Na paicunahuan rijushpami, jipaman pacalla rijurca.

¹¹Judiocuna chai fiestapi Jesusta mascanajushpami: —¿Maipishi chai runaca?— ninajurca.

¹²Chaiman rishca ashtaca gentecunami, Jesustaca ninanda nalicachishpa parlanajurca. Huaquingunaca: “Chai runaca alipachami” ninajurcami. Ashtahuangarin shujcunaca: “Napacha alichu. Gentecunata umachishpallami purijun” ninajurcami.

¹³Ashtahuangarin judiocunata manllashpami, Jesusmandaca pacalla parlanajurca.

¹⁴Chai fiesta punllacuna ña chaupiyajujpimi Jesusca, Diospaj huasiman yaicurca. Chaipimi gentecunaman yachachijurca.

¹⁵Shina yachachijujta uyashpami, judiocunaca ninanda manllarishpa cashna ninajurca: —¿Maipita chai tucuita yachajushcanga? Paica, na yachajushcachu carca— ninajurcami.

¹⁶Shina nijpimi Jesusca, cashna nishpa tigrachirca: —Na ñucapaj munaica, cashna yachachijunichu. Ashtahuangarin ñucata cachamuj Taita yachachishcatami yachachijuni.

¹⁷Na ñucapaj munai cashna yachachijushpami, Taita Dios yachachijujpilla villachijuni. Chaitaca, Taita Dios munashcata pactachingapaj munajllami yachai ushanga.

¹⁸Pipash paipaj munailla villachijushpaca, gentecuna ninanda alicachishpa ricunajuchunllami villachijun. Ashtahuangarin pipash paita mandashpa cachamujta alicachinajuchun villachijushpaca, napacha llullashpami villachijun. Shina cashpami, paipi ima nalipash na tian.

¹⁹Mandashca shimicunataca, Moisesmi quiquingunaman curca. Chaita charishpapash, quiquingunaca maijambash na pactachishpami causanajunguichi. ¿Imamandata ñucataca huañuchingapaj munanguichi?— nijurcami.

²⁰Shina nijpimi, chai ashtaca gentecunaca cashna nishpa tigrachirca: —Canga, aya jundashca runamari cangui. Candaca, ¿pita huañuchingapaj munanyari?— ninajurcami.

²¹Shina nijpimi Jesusca, cashna nishpa tigrachirca: —Shuj aligutami rurarcani. Chaimandallami quiquingunaca, tucuicuna manllaringuichi.

²²Quiquingunapash, samana punllapimi jari huahuacunataca, circuncisión nishcata ruranajunguichi. Shina ruranajuchunga, Moisesmi mandarca. (Na pailla callarircachu. Ashtahuangarin quiquingunapaj ñaupa taitacunami, chashna ruranataca callarishca).

²³Moisés mandashcata ama faquinshna yangapi churashca cachun nishpami, samana punlla cajpipash runagutaca, circuncisionda rurashpa causanajunguichi. Samana punllapimi, shuj huañujuj runaguta aligutapacha alichircani. ¿Chaita ruraimandallachu ninanda fiñahuanguichi?

²⁴Chashnami canga nishpalla, na pitapash juchachinachu canguichi. Imata rurashcatapash aliguta ricushpami, juchachi ushana canguichi— nijurcami.

²⁵Shinamandami Jerusalenmanda huaquin runacunaca, cashna ninajurca: —¿Nachu cai runata huañuchingapaj mascanajun?

²⁶Ricuichi, tucuicunapaj ñaupajpi villachijujpipash, paitaca na imatapash nishpami uyanajun. ¿Nachu mandajcunapash paitaca, Quishpichij Cristopachami nishpa rijsinajurca imashi?

²⁷Cai runataca, maimanda shamushcatapash, ñucanchica alipachami yachanchi. Ashtahuangarin Quishpichij Cristo shamujpica, maimanda shamushcatapash pipash na yachangachu— ninajurcami.

²⁸Diospaj huasipi yachachijushpami Jesusca, shinllita caparishpa cashna nijurca: —Ari, ñucataca rijsinguichimi, ñuca maimanda cashcatapash yachanguichimi. Ashtahuangarin ñucapaj munaica, na shamurcanichu. Tucuita pactachijjuj ñucapaj Taita cachamujpimi shamurcani. Quiquingunaca, paitaca napacha rijsishpami causanajunguichi.

²⁹Ashtahuangarin paipajmanda ñuca shamushca cashpami, paitaca rijsini. Paimi ñucataca cachamuhuarca— nijurcami.

³⁰Shina nijujpimi Jesustaca, prezu japishumbacha ninajurca. Shina ninajushpapash, paita japina punlla nara chayamujpimi, na japi usharca.

³¹Chai gente puracunamandaca, ashtacacunami Jesusta crinajurca. Paicunaca cashnami ninajurca: —Quishpichij Cristo shamushpaca, ¿cai runagu rurajujtapash yali imatapash juyaillaguta rurai ushangachu, imashi?— ninajurcami.

³²Jesusmanda gentecuna imata parlanajujtapash fariseocunami uyanajurca. Curacunata mandajcunandi, fariseocunandi parlarishpami, Jesusta prezu japichun soldadocunata cacharca.

³³Chaimandami Jesusca, cashna nijurca: —Quiquingunahuanga, asha punllacunata purijusharami. Chai jipami, ñucata Cachamujpajman tigrashalla.

³⁴Quiquingunaca, ñucata mascashpapash, na tarishpami causanguichi. Shinallata ñuca maipi causajuj llactamambash, napacha chayamuita ushanachu canguichi— nijurcami.

³⁵Shina nijujpimi judiocunaca, paicunapura cashna nishpa tapurinajurca: —Ñucanchi paita ama tarichunga, ¿paica maimanshi ringa? Grecia shuti llactapi israelcuna chapurishpa causajcunapajman rishpa, ¿griegocunata yachachingapajchu shina nijun, imashi?

³⁶Paica cashnamari nijun: ‘Quiquingunaca, ñucata mascashpapash, na tarishpallatami causanajunguichi. Shinallata ñuca maipi causajuj llactamambash, napacha chayamui ushanachu canguichi’ nishpaca, ¿imashpashi shina nijun?— ninajurcami.

³⁷Chai jatun fiesta tucurijui punllami, Jesusca shayarishpa shinllita caparishpa, cashna nijurca: —Maijambash yacunayachishpaca, ñucapajman shamushpa ufiaichilla.

³⁸‘Ñucata maijan crijpaj shungu ucumandaca, causaita causagrinata caraj yacucunami llujshinajunga’ nishpami, Dios escribichishca Shimipica villachijun— nircami.

³⁹Chaitaca, paita crijcunalla Diospaj Espirituta chasquina cajpimi, Jesusca chashna nijurca. Taita Dios Jesustaca nara paipaj punchapamba llactaman pushashcachu carca. Chaimandami, Diospaj Espirituca nara shamushca carca.

⁴⁰Jesús villachijujta ashtaca gentecuna uyashpami, huaquingunaca cashna ninajurca: —Paica, Dios ima nishcata villachij runapachami— ninajurcami.

⁴¹Shujcunaca: —Paica Quishpichij Cristomari— ninajurcami. Ashtahuangarin huaquingunaca, cashnami ninajurca: —¿Galilea llactamandachu Quishpichij Cristoca shamuna cashca?

⁴²¿Nachu Dios escribichishca Shimipica: ‘Quishpichij Cristoca, ñaupa taita Davidpaj miraimanda David causajushca Belén pueblomandami shamunga’ nijun?— ninajurcami.

⁴³Shina ninajushpami Jesusmanda rimanajushpa, paicunapura fiñanajurca.

⁴⁴Paicuna puramanda huaquingunaca, Jesusta prezu japingapajmi munanajurca. Shina munashpapash paitaca, pipash na japita usharcachu.

⁴⁵Soldadocunami curacunata mandajcunapajman, fariseocunapajman tigranajurca. Shina tigrajpimi: —¿Imashpata chai runataca, na apamunguichi?— nishpa tapunajurca.

⁴⁶Shina tapujpimi soldadocunaca, cashna nishpa tigrachinajurca: —¡Ima horallapash cai runashna juyailla shimigutaca, pipash na parlashcachu!— ninajurcami.

⁴⁷Fariseocunaca, cashna nishpami tigrachinajurca: —¿Quiquingunapashchu umachi tucurcanguichi?

⁴⁸Ñucanchi mandaj puracunapash, fariseo puracunapash paitaca, pipash na crishcami canchi.

⁴⁹Ashtahuangarin Moisés mandashca shimicunata na yachaj cai gentecunataca, ima llaquipash japishpami ali canman— ninajurcami.

⁵⁰Shina ninajujpimi shuj tuta, Jesushuan parlangapaj shamushca Nicodemo runaguca, paica fariseo purallatami carca. Paimi, chai runacunataca cashna nijurca:

⁵¹—Ñucanchita mandashca shimita cazuj cashpaca, shuj runa imata rurajushcatapash tapuchishpa, ali uyashparami imata ruranatapash ricuna capanchi— nijurcami.

⁵²Shina nijujpimi, cashna nishpa tigrachinajurca: —¿Quiquimbash, Galilea llactamanda runa purachu cangui? ¿Galilea llactamandaca, Dios ima nishcata villachij runaca, ima horallapash shamushcachu? Chaitaca, Dios escribichishca Shimita ali ricushpa yachajungui— ninajurcami.

⁵³Shina nishpaca, paicunapaj huasimanmi tucuilla rinajurca.