Read Imbabura Highland Quichua HECHOS 1 Bible Online

HECHOS 1 - Imbabura Highland Quichua bible

HECHOS 1

¹Diosca, paipaj jucha illaj Espirituta cachamushami nishcami Punda libropica, Jesús imatalla rurashpa, imatalla yachachishpa callarishcatami, quiquin Teofiloman ña villarcani.

²Jesusta jahua pachapi chasquishca punllacamanmi villajurcani. Diospaj jucha illaj Espíritu yarichijpi villachun cachangapaj agllashcacunaman mandashca jipami, jahua pachapi chasqui tucurca.

³Paicunamanmi, ninanda llaquichi tucushpa huañushpa causarishca jipa, ama ishcai shungu tucunajuchun, tauca ricuchinacunahuan, chuscu chunga punllacaman, cutin cutin ricurijurca. Chashna ricurishpami, Taita Dios mandajujmanda villajurca.

⁴Jesusca, paicunahuan cashpallatami, cashna nishpa mandarca: —Jerusalenmandaca na maimambash rishpami, ñuca Taita cachamushapacha nishcata shuyanajuna canguichi. Chaitaca, ñuca villajujta ña uyarcanguichimi.

⁵Juanga, yacuhuanllami bautizajurca. Ashtahuangarin cangunaca, asha punlla jipallami, Diospaj jucha illaj Espirituhuan bautizai tucunguichi— nircami.

⁶Jesushuan tandanajushcacunaca, cashna nishpami tapunajurca: —Apunchi Jesús, ¿cunan punllacunallatacha cai Israel llactataca, ñucanchillata mandachun cutin alichingui?— ninajurcami.

⁷Shina nijpimi Jesusca, cashna nirca: —Ima huatacuna, ima punllacunapacha chashna tucunatapash, na yachai ushanachu canguichi. Ima hora chashna tucunataca, ñuca Taitallatami ninan ushaihuan churarca.

⁸Ashtahuangarin Diospaj jucha illaj Espíritu cangunapajman shamujpimi, ushaita japinguichi. Chai ushaihuanmi, Jerusalenbi, tucui Judea llactapi, Samaria llactapi, cai pacha tucuri manñacaman ñucamanda villagringuichi— nijurcami.

⁹Shina nijujpillatami, paicuna ricujta Jesustaca jahua pachaman vichai aparca. Paitaca, fuyu quilpajpimi, paicunaca na ashtahuan ricui usharca.

¹⁰Jahua pachaman Jesús rijujta vichai ricunajujpimi, yuraj churajunata churajushca ishcai runacuna, ñapash paicunapaj ladopi shayarimurca.

¹¹Paicunaca cashnami ninajurca: —Galilea llacta runacuna. ¿Imashpata cangunaca, jahua pachata ricunajunguichi? Cangunapaj chaupimanda jahua pachaman apai tucushca cai Jesusllatami, jahua pachaman rijujta canguna imashna ricushcashnallata, cutin shamunga— ninajurcami.

¹²Chai jipami, Olivos shuti urcumanda, Jerusalenman tigranajurca. Chai urcuca, Jerusalenmandaca shuj kilometropishnami.

¹³Ña chai puebloman chayashpaca, paicuna causanajuj jahua altibajo huasimanmi vitsianajurca. Chai huasipica: Pedro, Jacobo, Juan, Andrés, Felipe, Tomás, Bartolomé, Mateo shuti runacunapash, Alfeo shuti runapaj churi Jacobopashmi causanajurca. Shinallata Zelote nishca Simonbash, Jacobopaj huauqui Judaspash, chaipillatami causanajurca.

¹⁴Paicunaca, huaquin huarmicunandi, Jesuspaj mama Mariandi, Jesuspaj huauquicunandimi tandanajushpa, Diosta shujllashnalla yarishpa mañarianajurca.

¹⁵(Chai punllacunapimi, Jesusta crij puracunaca, patsaj ishcai chungashna tandanajun carca). Pedroca, paicunahuan cashpami jatarishpa, cashna nijurca:

¹⁶“Tucui crijcuna. Ñaupa punllacunapimi Judas runamandaca, Diospaj jucha illaj Espíritu, Davidman villashpa escribichishca. Chai villashca pactachunmi Judas runaca, Jesusta prezu japichun, ricuchingapaj pushamurca.

¹⁷Judas runaca, ñucanchi purami carca. Ñucanchishnallata villachun, paitapash agllashcami carca.

¹⁸Pai chashna nalita rurashpa jatushca culquihuanga, alpatami randirca. Chai alpapillatami Judasca, jahuamanda umahuan urmashpa, chaupi vijsapi tugyajpi, tucuilla chunlluli llujshishpa huañurca.

¹⁹Chashna tucushcataca, Jerusalenbi tucui causajcunami yacharca. Chaimandami chai alpataca, paicunapaj rimaipica, Acéldama nishpa shutichirca. Shina nishpaca, Yahuarlla Pamba nijunmi.

²⁰Salmos libropica, cashna nishpa escribishcami tiajun: ‘Pai causajushca huasica, jichushca pambashna cachun, chaipica pipash ama causachun’ nijunmi. Shinallata: ‘Paiman rurachun mingashcatapash, shuj runa rurachun’ nishpami villajun.

²¹Apunchi Jesús ñucanchihuan maiman cashpapash rishpa, shamushpa purijushca punllacunapimi, ñucanchita cumbashpa cai runacunaca purinajurca.

²²Cai runacunaca, Juan bautizai callari punllamandapacha, ñucanchi ricujta Jesús jahua pachaman rishca punllacamanmi, ñucanchihuan purinajurca. Jesús causarishcata ñucanchihuan villagrichunga, shuj runata agllashunchi” nijurcami.

²³Pedro shina nijpimi, agllanajuchun ishcai puracunata churarca. Shujca, Justo nishca José Barsabás shutimi carca. Shujca, Matías shutimi carca.

²⁴Shina agllashpami, cashna nishpa mañanajurca: “Jatun Dioslla, canmi tucuicunapaj shunguta rijsingui. Cai ishcai puramanda maijanda can agllashcatapash, ñucanchiman ricuchihuai.

²⁵Cambajta rurashpa ñucanchihuan villajuchun agllapangui. Judas runaca, pai rina pushtuman ringapajmi, canda na cazurca” nishpami mañanajurca.

²⁶Shina mañashpa suerteta rurajpica, Matías shuti runapajmi urmarca. Chaimandami Matiasca, villachun cachashca chunga shuj runacunahuan tandanajurca.