Read Imbabura Highland Quichua HECHOS 10 Bible Online

HECHOS 10 - Imbabura Highland Quichua bible

HECHOS 10

¹Cesarea shuti pueblopica, Cornelio shuti runami causajurca. Paica, Italia llactamanda patsaj soldadocunata mandajmi carca.

²Chai runaca, paipaj tucui huasi ucu puracunandimi, Taita Diosta yariashpa, manllashpa causajurca. Shinallata gentecunata llaquishpami, imagutapash ninanda caran carca. Paica, Taita Diosta punllandi mañashpami causajurca.

³Ña punlla chishashpa, quimsa horas tucujujpimi, Taita Dios cachamujpi shuj angelca, pai maipi tiajushca ucuman yaicushpa, muscuipishna paiman shutilla ricurishpa: —Cornelio— nirca.

⁴Shina nijpimi, angeltalla ricushpa ninanda manllarishpa: —¿Imatata nihuangui, Taitalla?— nishpa tapurca. Shina tapujpimi angelca, cashna nirca: —Can mañajushcapash, shujcunata llaquishpa can imaguta carajushcapash, Taita Diosca yarichunmi, jahuaman chayamushca.

⁵Cunanga, Pedro nishca Simonda pushamuchun, Jope shuti puebloman runacunata cachangui.

⁶Paica, carata jacushpa chaquichij Simonbaj huasipimi, mama cucha manñapi mingarishpa tiajun. Pedro shamushpami, imatalla can ruranataca villanga— nircami.

⁷Shina nishpa ángel rijpimi Cornelio runaguca, paita servij ishcai runacunata, paita cumbashpa purij, Diosta yarij soldadotapash cayarca.

⁸Paiman shina ricurishcata tucuita parlashca jipami, chai quimsandi runacunata Jope shuti puebloman cacharca.

⁹Chai cayandi punllapica, paicuna rishpa chai puebloman ña chayagrijujpimi, chaupi punlla tucujurca. Chai horaspimi Pedroca, pai mingarishca tiajuj huasi jahuaman, Diosta mañangapaj vitsiarca.

¹⁰Chai jahuapi tiajushpaca, ninandami yarjachirca. Micunata paiman yanungacamanmi, muscuipishnapacha Pedroca ricujurca.

¹¹Jahua pacha pascariajtami ricujurca. Chaimandaca, chuscundi pundapi huatashca jatun fachatashnami, cai pachaman urai shamujujta ricurca.

¹²Chai huatashcapica, chuscu chaquita charij tucui animalcuna, alpata llucashpa purij animalcuna, jahuata purij alasyu animalcunapashmi ricurirca.

¹³Chaicunata ricujujpillatami, jahua pachamanda rimamuj uyarishpa: —Pedro, jatari. Caicunata huañuchishpa micui— nirca.

¹⁴Shina nijpimi Pedroca, cashna nirca: —Apunchi Jesuslla, na micuna imapash mapa micunataca, ima horallapash napacha micushcanichu— nircami.

¹⁵Shina nijpimi, chai rimajllata cutin tigrachishpa cashna nirca: —Taita Dios micunalla nishcataca, canga ama yangapi churaichu— nircami.

¹⁶Chai jatun fachashna, quimsa viajecaman ricuchishpaca, cutinmi jahua pachaman apai tucurca.

¹⁷Shina muscuipishna ricushcata Pedro na yachai ushashpami, imata nishpata, cashna ricuchihuan yashpa tiajurca. Shina tiajujpimi, Cornelio cachamushca runacunaca, tapui tapui rishpa, Simonbaj huasiman chayagrirca.

¹⁸Paicuna chayashpaca: —Pedro nishca Simón shuti runaguca, ¿caipichu capan?— nishpami tapunajurca.

¹⁹Pedroca, muscuipishna ricushcata yarishca tiajujpimi, Diospaj Espirituca cashna nirca: —Ricui, quimsa runacunami candaca mascanajun.

²⁰Jatarishpa uriajui. Paicunahuan rinataca, ama ishcai shungu tucunguichu. Ñucami, paicunataca caiman cachamurcani— nircami.

²¹Shina nijpi Pedro uriajushpaca, Cornelio cachamushca runacunataca cashnami nirca: —Canguna mascajuj runaca, ñucami capani. ¿Imata ningapajta shamupanguichi?— nircami.

²²Shina nijpimi, paicunaca cashna ninajurca: —Patsaj soldadocunata mandaj Cornelio cachamujpimi shamupanchi. Paica, Taita Diosta manllashpa, imatapash cashcatapacha rurashpa causajpimi, Judea llactapi tucui causajcunapash alicachin. Jucha illaj ángel, paiman ricurishpami cashna nishca: ‘Pedrotaca, cambaj huasiman shamuchun cayashpa, pai villajujta uyangui’ nishcami— ninajurcami.

²³Pedroca, pai mingarishca tiajuj huasipillatami, paicunatapash mingachirca. Cayandi punlla Pedro jatarishpa paicunahuan rijujpica, Jope shuti pueblomanda shuj crijcunapashmi cumbashpa rinajurca.

²⁴Chai cayandi punllami, Cesarea shuti puebloman chayagrirca. Chaipimi Cornelio runaguca, paipaj familiacunatapash, paipaj ashtahuan ali cumbacunatapash cayashpa shuyajurca.

²⁵Pedro chaiman chayajpimi, Cornelio runaguca tuparingapaj llujshimushpa, Pedrota alicachingapaj cungurirca.

²⁶Ashtahuangarin Pedroca, paita shayachishpami: —Shayari, ñucapash canshnallata runallami cani— nirca.

²⁷Paihuan parlashpandi, ucuman yaicushpaca, ashtaca gentecuna tandanajushca tianajujtami ricurca.

²⁸Pedroca, paicunataca cashnami nijurca: —Judea llactamanda runahuan, caru llactamanda runahuan tandanajunapash, na cashpaca paicunapaj huasiman chayanapash millanayai cajtaca, cangunallata yachanguichimi. Ashtahuangarin Taita Dios ñucaman ricuchishpami: ‘Pitapash, ama yangapi churashpa mapami ninguichu’ nihuarca.

²⁹Shinamandami cayajpica, imatapash na nishpa shamunilla. Chaimandami: ‘¿Imagupajta cayahuanguichi?’ nishpa tapuni— nijurcami.

³⁰Shina nijpimi Cornelioca, cashna nirca: —Cunanshna chishipimi, cai ñuca huasipi micuitapash na micushpa, Diostaca mañajurcani. Shina tiajujpimi, punchapamba churajushca runagu ñuca ñaupajpi shayarijta ricurcani. Chaica, ña chuscu punllami tucupan.

³¹Paimi, cashna nihuarca: ‘Cornelio, can mañajujtaca, Taita Dios uyashcami. Shujcunata llaquishpa can imaguta carajujtapash yariajunmi.

³²Cunanga, Jope shuti pueblopi tiajuj Pedro nishca Simonda pushamuchun cachangui. Paica, carata jacushpa chaquichij Simonbaj huasipimi, mama cucha manñapi mingarishpa tiajun. Pedro shamushpami, can imata ruranatapash villanga’ nihuarcami.

³³Shina nijpimi, cambajman cachamuparcani. Alita shamuparcangui. Cunanga, tucuicunami Taita Diospaj ñaupajpi can villajta uyangapaj caipi capanchi. Taita Dios canman tucui mandashcacunata uyangapajmi munapanchi— nijurcami.

³⁴Pedro villai callarishpaca, cashnami nijurca: —Taita Diosca, na pitapash ñavita ricushpalla chasquinllu. Chaitaca, cunanga alipachami yachani.

³⁵Maijan llactapi cashpapash, paita manllashpa, imatapash cashcatapacha rurajtami, Diosca alicachin.

³⁶Taita Diosca shuj villanatami, israelcunaman villachun cachamurca. Jesucristomanda casilla ali causai tianatami, ali villaita villajurca. Jesucristoca tucuicunata Mandajmi.

³⁷Galilea llactamanda callarishpa, Judea llactacaman bautizarichi nishpa Juan villajushca jipamanda ima tucushcatapash, cangunallata yachanguichimi.

³⁸Nazaret pueblomanda Jesús ushaita charichunga, Taita Diosmi jucha illaj paipaj Espirituta cararca. Taita Dios paihuan cajpimi Jesusca, tucui imata cashpapash, aliguta rurashpa purijurca. Shinallata diablo llaquichishpa charijuj nanaicunahuan huañunajuj gentecunatapashmi alichijurca.

³⁹Judea llactapipash, Jerusalenbipash, Jesús imatalla rurashcata ricushcatami, ñucanchica villanajunchi. Paitaca, caspipi huarcushpami huañuchinajurca.

⁴⁰Ashtahuangarin Taita Diosca, quimsa punlla chayajpi causachishpami, ñucanchiman ricurichun saquirca.

⁴¹Na tucui gentecunaman ricurircachu. Ashtahuangarin pundamandapacha Taita Dios agllashcacuna cajpimi, ñucanchimanlla ricurirca. Huañushcacunapaj chaupimanda causarimujpimi, ñucanchica paihuan micushpa, ufiashpa tianajurcanchi.

⁴²Causajcunatapash, huañushcacunatapash ricushpa llaquichijuchunga, Taita Diosca Jesustami churashca. Chashna nishpa tucuicunaman villagringuichi nishpami, Jesusca ñucanchita mandarca.

⁴³‘Paita crijpica, tucuicunapaj juchacunatami Diosca anchuchinga’ nishpami, Dios ima nishcata villajcunaca, tucuicuna Jesusmanda villanajushca— nijurcami.

⁴⁴Cai shimicunata Pedro villajujpillatami, chai villashcata tucui uyajcunapajman Diospaj jucha illaj Espíritu shamurca.

⁴⁵Pedrohuan shamushcacuna, circuncisión nishcata rurashca crijcunaca, Diosca na israelcunamambash, paipaj Espirituta talinshna cachamujta ricushpami, ninanda manllarinajurca.

⁴⁶Shuj shuj rimaicunata rimashpa, Taita Diostapash juyaillagupachami cangui nijta uyashpami, chashna manllarinajurca.

⁴⁷Chaimandami Pedroca, cashna nirca: —Diospaj jucha illaj Espiritutaca, paicunapash ñucanchishnallatami chasquirca. Paicunata yacupi bautizarinataca, pipash na jarcai ushanllu— nircami.

⁴⁸“Paicunataca, Apunchi Jesuspaj shutipi bautizaichi” nishpami mandarca. Chai jipami, Pedrotaca: “Huaquin punllagullatapash shuyapaira” ninajurca.