Read Imbabura Highland Quichua HECHOS 11 Bible Online

HECHOS 11 - Imbabura Highland Quichua bible

HECHOS 11

¹Na israelcunapash, Diospaj Shimita chasquishcatami villachun cachashcacunapash, Judea llactapi causanajuj crijcunapash uyarca.

²Jerusalenman Pedro vichai rijpica, circuncisión nishcata ruraj israelcunami ninanda nalicachishpa, cashna ninajurca:

³—¿Imashpata circuncisionda na rurashcacunapaj huasiman yaicushpa, canga paicunahuan micurcangui?— ninajurcami.

⁴Shina nijpimi, imata rurashcatapash callarishpa Pedroca, cashna nishpa villajurca:

⁵—Jope shuti pueblopi cashpa, Diosta mañajushpami, muscuipishna cashnata ricurcani: Chuscundi manñapi huatashca fachashna, jahua pachamanda ñucapajman urai shamujujtami ricurcani.

⁶Chai huatashcapi tiajujta ali ricujushpaca, chuscu chaquita charij animalcunatapash, sacha animalcunatapash, llucashpa purij animalcunatapash, jahuata rij alasyu animalcunatapashmi ricurcani.

⁷Chaita ricujujpimi, jahua pachamanda rimaj uyarishpa cashna nihuarca: ‘Pedro, jatarishpa caicunata huañuchishpa micui’ nihuarcami.

⁸Shina nijpimi: ‘Na micuna imapash mapa micunataca, ima horapash na micushcanichu, Apunchi Jesús’ nircani.

⁹Shina nijpimi, jahua pachamanda cutin rimashpaca: ‘Taita Dios micunallami nishcataca, canga ama yangapi churaichu’ nihuarca.

¹⁰Chai jatun fachatashna, quimsacaman ricuchimushpaca, jahua pachaman cutin aparcallami.

¹¹Shuj huasipimi mingarishpa tiajurcani. Chaimanmi, ñucata pushachun cachamushca quimsa runacunaca, Cesarea shuti pueblomanda ñapash chayamurca.

¹²Paicuna chayamujpimi, Diospaj Espirituca: ‘Ama ishcai shungu tucushpa, paicunahuan ringuilla’ nihuarca. Shina nijpimi, cai suctandi huauquicunahuan shuj runapaj huasiman chayarcanchi.

¹³Chai runaca, paipaj huasipi ángel paiman ricurishcatami, ñucanchiman parlarca. Chai angelmi, chai runaman cashna nishca carca: ‘Pedro nishca Simonda, Jope shuti pueblomanda pushamuchun runacunata cachai.

¹⁴Paimi, cambash, cambaj tucui huasi ucu purandi, imashna quishpirinataca villanga’ nishpami parlashca carca.

¹⁵Diospaj jucha illaj Espíritu ñucanchipajman punda shamushcashnallatami, ñuca villai callarijhuan, paicunapajmambash shamurca.

¹⁶Chaipimi, Apunchi Jesús cashna nishcata yarircani: ‘Juanga, yacupillami bautizajurca. Ashtahuangarin cangunaca, Diospaj jucha illaj Espirituhuanmi bautizai tucunguichi’ nishcatami yarircani.

¹⁷Apunchi Jesucristota crijpimi, Taita Diosca paipaj Espirituta ñucanchiman cararca. Chashnallatami crijpica, paicunamambash cararca. Taita Dios chashna carajujta ñuca jarcangapaca ñucaca, ¿pita cani?— nijurcami.

¹⁸Pedro chashna nijta uyanajushpami, imatapash na nishpa, Taita Diostaca punchapambagumi cangui nishpa cashna ninajurca: —¡Na israelcunapash llaquirishpami, Taita Diospajman tigrarishca! Shina cajpimi, causaita causagrinata paicunamambash carashca— ninajurcami.

¹⁹Esteban runaguta huañuchishpaca, shuj crijcunatapash ninandami catiriashpa llaquichinajurca. Chaimandami Fenicia shuti, Chipre shuti llactacunaman, Antioquía shuti puebloman, caita chaita pacajushpa rinajurca. Paicunaca, shujcunaman na villashpami, Judea llactapilla Diospaj Shimitaca villanajurca.

²⁰Ashtahuangarin paicuna purapimi, Chipre llactamanda, Cirene shuti pueblomanda huaquin crijcuna tiarca. Paicunami, Antioquía puebloman shamushpa, griego nishca gentecunamambash, Apunchi Jesusmanda ali villaita villanajurca.

²¹Apunchi Jesús paicunaman ushaita carajpimi, nali causanajushcata saquishpa, ashtacacuna Apunchi Jesusta crinajurca.

²²Chashna crinajujta Jerusalenbi tandanajuj crijcuna uyashpami, Bernabé shuti runagutaca, Antioquía puebloman cachanajurca.

²³Pai chaiman chayashpaca, Taita Dios ninanda juyashpa quishpichijujta ricushpami, ninanda cushijurca. Paica: “Apunchi Jesusta catijushcata na saquishpami, tucui shunguhuan aligutapacha catina canguichi” nishpa, tucuicunaman aliguta yachachijurca.

²⁴Bernabé runaguca, Diospaj jucha illaj Espíritu junda, alipacha crij, ali shungutapash charij runagumi carca. Pai aliguta villajujpimi, ashtaca gentecuna Apunchi Jesusta crinajurca.

²⁵Chai jipami Bernabé runaguca, Tarso shuti puebloman Saulota mascangapaj rirca. Paita tuparishpaca, Antioquía pueblomanmi pushamurca.

²⁶Chaipica, tandanajuj crijcunahuan shuj huatata causanajushpami, ashtaca gentecunaman yachachinajurca. Antioquía pueblopimi crijcunataca, “Cristota catijcunami” nishpa, punda shutichi callarirca.

²⁷Chai punllacunapimi, Dios ima nishcata villaj huaquingunaca, Jerusalenmanda Antioquía puebloman urai shamunajurca.

²⁸Paicuna puramanda Agabo shuti runa shayarishpami, Diospaj Espíritu yarichijpi: “Cai pachapica, ninan yarjaimi tiagrin” nishpa villarca. Claudio shuti runa mandajui punllacunapimi, chashna ninan yarjai japirca.

²⁹Shina tucujpimi yachajujcunaca, paicuna carai ushanagutalla, Judea llactapi causanajuj crijcunaman, culquiguta carashpa cachangapaj yarinajurca.

³⁰Paicuna carashcataca, Judea llactapi causanajuj crijcunata mandaj rucucunaman cuchunmi Bernabeman, Sauloman mingashpa cacharca.