Read Imbabura Highland Quichua HECHOS 13 Bible Online

HECHOS 13 - Imbabura Highland Quichua bible

HECHOS 13

¹Antioquía shuti pueblopi tandanajuj crij puracunapica, Dios ima nishcata villajcunapash, yachachijcunapashmi tiarca. Paicunaca Bernabepash, Niger nishca Simonbash, Cirene shuti pueblomanda Lucio shuti runapash, Galilea llactata mandaj Herodes runahuan viñashca Manaén shuti runapash, Saulopashmi, chaipi causanajurca.

²Diospajta shina rurashpa causanajushpami, na micushpa Apunchi Jesusta mañashpa tianajurca. Shina tianajujpimi, Diospaj jucha illaj Espirituca, paicunaman cashna nirca: “Bernabetapash, Saulotapash shicanyachipaichi. Paicunataca, ñucapajta rurachunmi agllarcani” nircami.

³Shina nijpica, na micushpa Diosta mañashpami Bernabepaj, Saulopaj uma jahuapi maquita churashpa: “Aliguta ripanguichi” nishpa cachanajurca.

⁴Diospaj jucha illaj Espíritu cachajpimi Bernabendi, Saulondi, Seleucia shuti puebloman urai chayagrirca. Chaimandaca barcopimi, Chipre shuti llactaman chimbarca.

⁵Chai llactapi tiaj Salamina puebloman chayashpaca, Judea llactamandacuna tandanajuna huasicunapimi, Taita Diospaj Shimita villanajurca. Juanbash, paicunata ayudashpami purijurca.

⁶Chipre shuti llactapi villashpandi rinajushpaca, Pafos shuti pueblomanmi chayagrirca. Chaipimi, Judea llactamanda Barjesús shuti yumbu runata tuparirca. Paica: “Dios ima nishcata villajmi cani” nishpapash, llulla villajmi carca.

⁷Chai runaca, chai llactata mandaj Sergio Paulo shuti runahuanmi, cumba tucushpa causarca. Sergio shuti runaca, alipacha yarishpa purij cashpami, Taita Diospaj Shimita villajta uyanayachirca. Chaimandami Bernabetapash, Saulotapash, cayachun cacharca.

⁸Paicuna villajujpica, chai mandajca ama crichunmi, chai yumbu runaca jarcarca. (Paica, Elimas shutipashmi carca).

⁹Saulopash, Pablo shutimi carca. Paica, Diospaj jucha illaj Espíritu junda cashpami, chai yumbutaca ñavita ricunman quedarca.

¹⁰Shina ricujushpami, cashna nirca: —¡Canga, tucuita umachishpa nalita ruranatallami yarijungui! ¡Shina cashpami, imatapash cashcatapacha ruranata fiñashpa, diablopaj churi cangui! ¿Imashpata Jatun Dios munashcata aligutalla rurashpa causachun na saquishpa, pandachishpa purijungui?

¹¹Cunanga, Jatun Dios fiñashpa llaquichijpimi, canga ñausa tucungui. Indi shitajujtapash, unaicamanmi na ricungui— nircami. Shina nijhuanmi chai yumbuca, ñausa tucushpa imatapash na ricui usharca. Shina cashpami muyundi purishpa, paita maquimanda aisashpa pushachun mascajurca.

¹²Chashna tucushcata chai llactata mandaj ricushpaca, ninanda manllarishpami, Apunchi Jesusmanda yachachijpi crirca.

¹³Pabloca, paipaj cumbacunandi, Pafos shuti pueblopi barcota japishpami, Panfilia shuti llactapi tiaj Perge shuti puebloman chayagrirca. Ashtahuangarin Juanga, paicunatalla saquishpami, Jerusalenman tigrarca.

¹⁴Paicunaca ishcandimi Perge shuti pueblomandaca, Pisidia shuti llactapi tiaj Antioquía puebloman rinajurca. Chaipimi samana punllapica, tandanajuna huasiman yaicushpa tiarinajurca.

¹⁵Chai ucupica, Moisés mandashca shimicunatapash, Dios ima nishcata villajcuna escribichishcatapashmi, shuj runa leyirca. Chai jipami, tandanajuna huasipi mandajcunaca: —Caipi gentecunaman aliguta yachachishpa, imagutapash yachachinata charishpaca villapaichilla, huauquicuna— nichun cacharca.

¹⁶Shina nijpi Pablo jatarishpaca, maquihuan señasta rurashpami, upallaichi nishpa cashna nijurca: —Tucui caipi tianajuj Israel gentecunapash, Taita Diosta manllajcunapash, uyahuaichi.

¹⁷Ñucanchi ñaupa taitacunataca, ñucanchi israelcunapaj Taita Diosmi agllashca. Paicunataca, caru llactamanda shamushpa, Egipto llactapi causajpipash jatumbimi churashca. Chai jipami Diosca, paipaj ninan ushaihuan paicunataca, chai llactamanda llujchishca.

¹⁸Jichushca pambacunapica, chuscu chunga huatatashnami, paicunataca Diosca na fiñarishpa aliguta charijushca.

¹⁹Shina cashpami, Canaán llactapi tiaj canchis llactacunapi causajcunata tucuchishpaca, ñucanchi ñaupa taitacuna chai alpata japichun, Diosca carashca.

²⁰Chai jipamanmi, chuscu patsaj picha chunga huatatashna mandachun, Diosca juezcunata churashca. Paicunaca, Dios ima nishcata villaj Samuel mandangapaj shamuna punllacunacamanmi mandanajushca.

²¹Chai jipaca, jatun mandaj tiachun munashpami, Samuelta mañanajushca. Shina mañajpimi, Cis shuti runapaj churi Saúl runa chuscu chunga huatacaman mandachun, Taita Diosca churashca. Chai runaca, Benjamín aillu puramandami cashca.

²²Chai jipami, Saulta llujchishpa, Davidta mandajuchun churashca. Paimandami, Diosca cashna nishca: ‘Ñuca munashcashnami, Isaí shuti runapaj churi Davidtaca agllarcani. Paimi, ñuca munashcashna imatapash rurajunga’ nishcami.

²³Davidpaj miraimandami, carashapacha nishcashnallata Taita Diosca, israelcunata Quishpichij shamuchun, Jesusta caramurca.

²⁴Jesusca nara shamujpillatami, tucui israelcunaman Juanga, cashna villashca carca: ‘Cangunaca llaquirishpa, Diospajman tigrarishpa bautizarichi’ nircami.

²⁵Juanga, cashna villashpa pactachishpaca, cashnami nirca: ‘Cangunaca, ¿ñucataca pi yahuanguichita? Na canguna shuyanajuj runachu cani. Ricuichi, ñucapaj jipami shuj shamunga. Paitaca, chaquipi churajushcata pascaitallapash, na ushanachu cani’ nishcami carca.

²⁶Huauquicuna, Abrahambaj miraicunami canguichi. Canguna purapica, Taita Diosta manllajcunami canguichi. Cangunamanmi, cai quishpirinamanda villachun, Dios cachamushca.

²⁷Jerusalenbi causajcunaca, paicunata mandajcunahuan parlarishpami, Jesús Quishpichij cajtaca na yachashpa huañuchinajurca. Paita huañuchinataca, Dios ima nishcata villajcuna ña escribishca shimicunata, samana punllacunapi leyinajushpapash, na yachashpami chashna llaquichinajushpa, chai escribishcataca pactachirca.

²⁸Jesusta huañuchingapaca, ima nalita rurashcatapash, na tarircachu. Shina cajpipash, huañuchipacha nishpami Pilatotaca mañanajurca.

²⁹Dios escribichishca Shimipi, Jesusmanda imata nijujtapash pactachishca jipami Jesustaca, caspimanda uriajuchishpa pambarca.

³⁰Ashtahuangarin Taita Diosca, huañushcacunapaj chaupimandami paitaca causachirca.

³¹Jesús causarishpaca, tauca punllacunatami, Galilea llactamandapacha Jerusalengaman, paita cumbashpa vichai rishca runacunaman ricurirca. Paita ricushcacunami, cunanga gentecunaman villanajun.

³²Ñucanchipash, ali villaitami cangunaman villanajunchi. Diosca ñucanchi ñaupa taitacunamanmi, cai villanata pactachishami nishca carca.

³³Chai ali villaitaca, ñaupa taitacunapaj mirai cajpimi, Jesusta Taita Dios causachishpa, ñucanchiman pactachirca. Shujpaj cati escribishca Salmopipash, cashnami nijun: ‘Canga, ñuca Churimi cangui. Cunanga, canmanmi causaita carani’ nijunmi.

³⁴Shinallata: ‘Davidta ninanda llaquishpa pactachishapachami nishcataca, cangunamanmi pactachisha’ nishcami. Cashna nishcataca, Jesuspaj cuerpo ama ismuchun, huañushcacunapaj chaupimanda causachishpami pactachishca.

³⁵Shinamandami shuj Salmopipash: ‘Cambajta ruraj Jucha Illajtaca, ismuchumbash na saquishachu’ nijun.

³⁶Davidca, pai causajui punllacunapi causajcunamanmi, Taita Dios munashcashna aliguta rurajushca. Pai huañushpaca, paipaj ñaupa taitacunahuanmi pambai tucushca. Paipaj aichaca ismushcami.

³⁷Ashtahuangarin Taita Dios causachijpimi, Jesuspaj aichaca na ismurca.

³⁸Huauquicuna, caitaca yachanapachami canguichi: ‘Jesusta crijpimi, cangunapaj juchacunataca Dios anchuchinga’ nishpami, cangunaman villanajunchi.

³⁹Cai tucuicunata Moisés mandashca shimicunata pactachinajushpapash, imatapash cashcatapacha rurashcatashna Dios chasquichunga, na ushashpami causarcanguichi. Jesusta crijpillami, Diosca imatapash cashcatapacha rurashcatashna pitapash chasquin.

⁴⁰Dios ima nishcata villajcuna nishcashna, llaqui ama japichunga, aliguta yaringuichi. Paicunami, cashna villashca:

⁴¹‘Uyaichi, ñucata yangapi churajcuna, manllarishpa maipipash chingagrichi. Canguna causanajui punllacunapimi, shuj ruranata rurasha. Chai rurashcata maijanguna cangunaman villajpipash, na crishpallatami causanguichi’ nishcami— nijurcami.

⁴²Judea llactamandacuna tandanajuna huasimanda Pablondi, Bernabendi villashpa llujshijpimi, na israelcunaca: “Cayapash samana punllapi, caicunata cutin villaj shamupanguichi” nishpa, cutin cutin mañanajurca.

⁴³Chai tandanajushca gentecunata cayacaman nishpa cachajpimi, Judea llactamanda tauca runacuna, israelcuna yachachinajujta aliguta catijcunapash Pablota, Bernabeta catishpa rinajurca. Paicuna chai gentecunaman yachachishpaca: “Taita Dios ninanda juyajujta yarishpa, aligutami catina canguichi” ninajurcami.

⁴⁴Cayandi samana punllapipash, chai pueblopi causajcunaca, Taita Diospaj Shimita uyangapaca, ashamandallami na tucuilla tandanajurca.

⁴⁵Ashtahuangarin ashtaca gentecuna tandanajujta Judea llacta gentecuna ricushpaca, ninandami fiñarirca. Pablo ña villajujpica, napacha chashnachu nishpami, paicunaca nali shimicunata rimanajurca.

⁴⁶Ashtahuangarin na manllashpami Pablondi, Bernabendi cashna nishpa villanajurca: —Taita Diospaj Shimitaca, cangunamanrami villanapacha carcanchi. Ashtahuangarin cai villajujta yangapi churashpami, causaita causagrinataca na munashcata ricuchinguichi. Ricuichi, shinamandami na israelcunaman villangapaj rigrinchi.

⁴⁷Jatun Diospash ñucanchitaca, cashna nishpami mandashca: ‘Shuj llactacunapi causajcunata michashna punchayachij cachunmi, candaca churarcani. Tucui cai pachapi causajcunaman can villajpi, quishpirichunmi churarcani’ nishcami— ninajurcami.

⁴⁸Shina villajpimi: “Jatun Diospaj Shimica juyaillagumari” nishpa, na israelcunaca ninanda cushijunajurca. Causaita causagrichun Jatun Dios agllashcacunaca tucuillami crinajurca.

⁴⁹Tucui chai llactapimi, Jatun Diospaj Shimitaca maipipash villanajurca.

⁵⁰Ashtahuangarin Diosta yarij, alicachi tucushca huarmicunamambash, chai pueblota mandajcunamambashmi: “Chai runacunataca macashunchi” nishpa, Judea llactamanda gentecuna yachachinajurca. Chaita uyashpami gente jatarishpaca Pablota, Bernabetapash catishpa, chai llactamandaca calpachinajurca.

⁵¹Paicunaca, chai gentecunata fiñashpami, chaquipi catijuj alpatapash chafsirishpa rinajurca. Shina rishpaca, Iconio pueblomanmi chayagrirca.

⁵²Chaipimi Jesusta crishpa catijcunaca, Diospaj jucha illaj Espíritu junda cashpa cushijushpa causanajurca.