Read Imbabura Highland Quichua HECHOS 14 Bible Online

HECHOS 14 - Imbabura Highland Quichua bible

HECHOS 14

¹Iconio shuti puebloman Pablondi, Bernabendi chayajpimi, cashna tucurca: Paicunaca, Judea llactapi causajcuna tandanajuj huasiman ishcandi yaicushpami, Diospaj Shimita villanajurca. Shina villanajujpimi, Judea llactapi causajcunapash, griego nishca gentecunapash, ashtaca gentecacuna Jesusta crinajurca.

²Ashtahuangarin Judea llactamanda na crijcunaca, crijcunata llaquichingapajmi, na israelcunaman huagli yuyaita cushpa pandachinajurca.

³Shinamandami, chaipilla ashtaca punllacunata shuyanajurca. Apunchi Jesusta yariashpami, na manllashpa villanajurca. “Diosca ninandami juyan” nishpa villajpimi, Apunchi Jesús paicunaman ushaita carajpi, imatapash juyaillagucunata, pipash na rurai ushashcacunatapash rurashpa ricuchinajurca.

⁴Chai pueblopi causajcunaca, ishcaipimi shicanyarca. Huaquingunaca, Judea llactapi causajcunatami catinajurca. Shujcunaca, villachun cachashcacunatami catinajurca.

⁵Chashna tucushpaca, Judea llactapi causajcunandi, na israelcunandi, paicunata mandajcunahuan parlarishpami Pablotapash, Bernabetapash pingaichishpa, rumicunahuan huañuchingapaj jatarinajurca.

⁶Pablondi, Bernabendi chaita yachashpami, Licaonia shuti llactapi tiaj Listra shuti, Derbe shuti pueblocunaman, tucui muyundi llactacunamambash pacajushpa rinajurca.

⁷Chai llactacunapipashmi, ali villaita villashpa purinajurca.

⁸Listra shuti pueblopimi, shuj runagu tiajurca. Paica, huacharishca punllamandapacha, na puri ushaj suchu runagumi carca. Paica, ima horapash na puri ushanllu carca.

⁹Chai runaguca, Pablo villajujpimi aliguta uyajurca. Ali tucushapachami yashpa crishpa uyajujtami, Pabloca ricurca.

¹⁰Shinata ricushpami, chai runagutaca: —Jatarishpa aliguta shayarilla— nishpa, shinllita rimarca. Shina nijpimi, fahuashpa ñapash puri callarirca.

¹¹Pablo chashna alichijta ricushpami, chai gentecunaca licaonia nishca rimaipi, cashna nishpa caparinajurca: —Dioscunamari runacunashnalla tucushpa, ñucanchipajman jahua pachamanda uriajumushca— ninajurcami.

¹²Bernabetaca, Júpiter shuti diosmi ninajurcami. Pablotaca, villaj cajpimi, Mercurio shuti diosmi ninajurca.

¹³Chai puebloman yaicuna pungupica, Júpiter shuti diospaj huasimi tiarca. Chai huasimanda curami, sisacunatapash apamurca. Ashtaca gentecunahuan tandanajushpami Pablopaj, Bernabepaj ñaupajpi, animalcunata cushpa huañuchingapaj munarca.

¹⁴Chashna ruragrinajujtaca, villachun cachashca Pablondi, Bernabendi uyashpami, paicuna churajushcata liquinajurca. Chai tucui gentecunapaj chaupiman caparishpa calpashpami,

¹⁵cashna ninajurca: —Cangunaca, ¿imashpata cashna ruranguichi? Ñucanchipash, cangunashnallata runami canchi. Chashna yanga dioscunata saquishpa, causaj Taita Diospajman tigrarishpa quishpirichunmi, cangunaman villaj shamurcanchi. Paimi jahua pachata, cai pachata, mama cuchata, tucui ima tiachumbash churashca.

¹⁶Ñaupa punllacunapi causajcunataca, paicuna munashcashna causanajuchunmi Diosca saquirca.

¹⁷Shina cashpapash, pai juyashpa charijushcatami ricuchin cashca. Chaimandami, tamiachishpa granocunatapash fucuchishpa, ñucanchiman ima aligutapash carashpa cushichijun— ninajurcami.

¹⁸Shina nishpami huagracunata huañuchishpa, diosman caranshna carangapaj munajtaca Pablohuan, Bernabehuanga ashamandalla mana jarcai ushanajurca.

¹⁹Chai jipami, Judea llacta gentecunaca, Antioquía pueblomanda, Iconio shuti pueblomanda huaquinguna shamushpa, chaipi gentecunaman huagli yuyaita cujpi Pablotaca, rumicunahuan peganajurca. Chashna rurashpaca, huañushcami yashpami, pueblomanda aisashpa canllaman shitagrinajurca.

²⁰Shina shitajpipash, Jesusta crishpa catijcunaca, Pablota chaupipi churashpami shayarinajurca. Pai jatarishpaca, cutin chai pueblomanllatami yaicugrirca. Chai cayandi punllami Pabloca, Bernabendi, Derbe shuti puebloman rirca.

²¹Chai pueblopipash, ali villaita villanajujpimi, Jesusta crishpa catijcunaca ashtacacuna tiarca. Chai jipaca Listra, Iconio, Antioquía shuti pueblocunamanmi tigranajurca.

²²Chaipimi, Jesusta crishpa catijcuna aliguta crishpa catinajuchun Pablohuan, Bernabehuanga, cashna nishpa aliguta yarichinajurca: “Ninan llaquicunata apashpami, Taita Dios mandajuj llactaman yaicugrina canchi” ninajurcami.

²³Shinallata crijcuna tandanajushca pueblocunapimi, mandaj rucucuna tiachun agllashpa churanajurca. Shina churashpaca, na micushpami, Jatun Diosta mañanajurca. Chai jipami, paicuna crinajuj Apunchi Jesusman minganajurca.

²⁴Pablondi Bernabendi, Pisidia shuti llactata yalishpaca, Panfilia shuti llactamanmi shamunajurca.

²⁵Chai llactapi tiaj Perge shuti pueblopi, Diospaj Shimita villashpaca, Atalia shuti pueblomanmi urai rinajurca.

²⁶Chai pueblomandaca, barcopimi Antioquía puebloman muyumurca. Chaipimi: “Taita Dios cangunata ninanda juyashpa pushachun” nishpa, crijcunaca Pablotapash, Bernabetapash, Diosman mingashca carca.

²⁷Chaiman chayashpa tucuilla crijcunata tandachishpami, cashna nishpa villanajurca: “Taita Dios ñucanchihuan cashpami, aliguta rurachunga ninan ushaita cararca. Na israelcunaman villajpi, paicuna crichumbash paillatami, punguta pascanshna ushaita cararca” ninajurcami.

²⁸Chai pueblopimi, yachajujcunahuan unaicaman quedarca.