Read Imbabura Highland Quichua HECHOS 15 Bible Online

HECHOS 15 - Imbabura Highland Quichua bible

HECHOS 15

¹Chai jipami Judea llactapi causaj huaquingunaca, Antioquía shuti puebloman shamunajurca. Paicunami, chaipi causaj crijcunaman, cashna nishpa yachachinajurca: “Circuncisión nishcata Moisés ruraichi nishcata na pactachishpaca, na quishpiri ushanachu canguichi” ninajurcami.

²Chaimandami Pablopash, Bernabepash, paicunahuan ninanda fiñarishpa rimarinajurca. Villachun cachashcacunahuan, crijcunata mandaj rucucunahuan parlarishpa chaita alichinajuchunmi, Pablota, Bernabetapash huaquin crijcunandi, Jerusalenman cachangapaj yarinajurca.

³Antioquía shuti pueblopi tandanajushca crijcuna cachajpica, Fenicia, Samaria shuti llactacunatami yalinajurca. Chaicunapi crijcunamanmi, na israelcunapash Diospajman tigrarishcata villanajurca. Shina villajpica, tucui crijcunami ninanda cushijunajurca.

⁴Paicuna Jerusalenman chayajpica, tandanajuj crijcunandi, villachun cachashcacunandi, crijcunata mandaj rucucunandimi, cushijushpa chasquinajurca. Taita Dios ushaita carajpi tucui imata rurashcatapashmi, paicunaman villanajurca.

⁵Chai jipami, fariseo puralla tandanajushcamanda huaquin runacuna shayarishpa, cashna ninajurca: —Chai crijcunataca, circuncisionda ruranapachami, Moisés mandashca shimitapash pactachinapachami nishpami yachachina canchi— ninajurcami.

⁶Chashna yachachishcata aligutapacha yaringapajmi, villachun cachashcacunapash, crijcunata mandaj rucucunapash tandanajurca.

⁷Ña unaita parlanajushca jipami, Pedroca shayarishpa cashna nijurca: —Huauquicuna. Na israelcunamambash ali villaita ñuca villajujpi, crishpa quishpirichunmi, Taita Diosca ñucata punda agllahuarca. Chaitaca, cangunallata yachanguichimi.

⁸Tucuicunapaj shunguta yachaj Taita Diosmi, na israelcunatapash chasquirca. Chaita ricuchingapajmi ñucanchiman carashcashnallata, paicunamambash jucha illaj paipaj Espirituta cararca.

⁹Na israelcunapash crijpimi, Diosca paicunapaj shungumanda juchata anchuchishpa paicunapash, ñucanchipash chashnallata cajta ricuchirca.

¹⁰Mandashca shimicunataca ñucanchipash, ñucanchi ñaupa taitacunapash na pactachi ushashpami causarcanchi. Shina cashpaca cunanga, ¿imashpata Jesusta crishpa catijcunatapash, yugota apachinshna llaquichishpa, Taita Diosta fiñachingapaj munanguichi?

¹¹Ashtahuangarin Apunchi Jesuspaj ninan juyaimandallami, ñucanchipash paicunashna quishpiri ushanata crinchi— nijurcami.

¹²Chai jipami Bernabendi, Pablondi villanajujta tucuicuna upalla uyanajurca. Paicunaca, na Israel puracunapi cashpa, imatapash juyaillagucunata, pipash na rurai ushashcacunata rurachun, Taita Dios ushaita carashcatami villanajurca.

¹³Shina villashpa tucuchijpimi Jacoboca, cashna nishpa tigrachirca: —Huauquicuna, ñucata uyahuaichi.

¹⁴Taita Diosca, na israelcunatapash, paipaj huahua tucushpa causachun, imashna agllai callarishcatami, Simón Pedroca ña villarca.

¹⁵Dios ima nishcata villajcunaman, Diosllata escribichishca Shimipipash, chashnallatami nijun:

¹⁶‘Cashna tucushca jipa ñuca tigramushpami, Davidpaj jatun carpa urmashcatapash cutin alichisha. Shina rurashpami tucuilla urmashcatapash, alichishpa shayachisha.

¹⁷Shina rurajpimi huaquin gentecunaca, Jatun Dios ñucata mascanga. Shinallata na israelcunapashmi mascanajunga. Paicunamandami, ñuca shutipi mañanajun.

¹⁸Ñaupa huatacunamandapacha tucuita villachij Jatun Diosmi, chashna nijun’ nijunmi.

¹⁹Shinamandami, Taita Diosta cazushpa tigrarij na israelcunataca, na llaquichina canchi yanimi.

²⁰Ashtahuangarin cashnata escribishpa cachashunchi: ‘Yanga dioscunaman carashcacunataca na micushpa mapayanachu, na huainayanachu, sipishpa huañuchishca aichatapash, yahuartapash na micunachu canguichi’ nishpa cachashunchi.

²¹Chashna nishpami, Moisespash ñaupa huatacunapillata mandashca. Chaitaca, samana punllacunapimi, tucui pueblocunapi tandanajuna huasicunapipash, leyishpa villanajun— nijurcami.

²²Shina nijpica villachun cachashcacunapash, crijcunata mandaj rucucunapash, tandanajushca tucui crijcunapashmi alicachinajurca. Shina ninajushpami Pablota, Bernabeta cumbashpa Antioquía puebloman richunga, crijcuna ashtahuan alicachishca Barsabás nishca Judastapash, Silastapash, paicuna puramanda agllanajurca.

²³Paicuna apachunga, cashna nishpami escribirca: “Villachun cachashcacunandi, crijcunata mandaj rucucunandi, tucui crijcunandimi, cashnata nipanchi: Antioquía pueblopi, Siria shuti, Cilicia shuti llactacunapi causanajuj na Israel crijcunataca, alillachu capanguichi nipanchimi.

²⁴Ñucanchi puramanda huaquingunami, cangunapajman rishcata yacharcanchi. Paicunaca: ‘Circuncisiondapash, Moisés mandashca shimicunatapash pactachinami canguichi’ nishpami, pandachishpa cangunaman yachachishca. Paicunataca, na ñucanchi mandashcachu carcanchi.

²⁵Chaimandami tucuilla tandanajushcacuna cashnata yarircanchi: Ñucanchi juyashca Bernabeta, Pablota cumbashpa richunmi, caicunataca agllarcanchi.

²⁶Paicunaca, huañuchi tucunatapash na manllashpami, ñucanchi Apunchi Jesucristopaj shutipi villanajurca.

²⁷Ñucanchi parlashcata cangunaman villachunga Judastapash, Silastapashmi cachamunchi.

²⁸Diospaj jucha illaj Espíritu aliguta yarichijpimi, cashna ruranata yarircanchi. Cangunata ama ashtahuan fiñachingapajmi, caitalla cazupaichi ninchi:

²⁹Yanga dioscunaman carashcatapash, yahuartapash, sipishpa huañuchishca aichatapash na micunachu, napacha huainayanachu canguichi. Caicunata pactachishpaca, aligutami ruranguichi. Cayacaman” nishpami, escribishpa cacharca.

³⁰Shina cachajpimi, Antioquía puebloman apashpa urai rinajurca. Chaipica, crijcunata tandachishpami, chai cartataca cunajurca.

³¹Cushichingapaj chashna escribishpa cachashcata leyishpaca, ninandami cushijunajurca.

³²Judaspash, Silaspash Diosmanda villajcuna cashpami, crijcuna shinlli catinajuchun, ashtacata yachachishpa cushichinajurca.

³³Chaipi unaita causashca jipaca, paicunata cachashcacunapajman cutin tigrachunmi, aliguta ripanguichi nishpa, chai crijcunaca cacharca.

³⁴Ashtahuangarin Silas runapaca, chaipi quedanaca alimi ricurirca.

³⁵Pablopash, Bernabepash, Antioquía pueblopillatami quedanajurca. Chaipimi, Jatun Diospaj Shimita yachachishpa, ashtahuan ashtacacunahuan ali villaita villanajurca.

³⁶Tauca punllacuna jipami Pabloca, Bernabetaca cashna nirca: —Apunchi Jesusmanda ñucanchi villanajujpica, tauca pueblocunapimi crirca. Chai crijcuna imashna catinajujta, tucuilla pueblocunapi cutin ricungapaj tigrashpa ripashun— nircami.

³⁷Shina nijpimi Bernabeca, Marcos nishca Juandapash pushangapaj munarca.

³⁸Marcosca, villashpa nara tucuchijpillatami, Panfilia shuti llactapilla paicunata saquishpa rishca carca. Shina cajpimi Pabloca, na ashtahuan pushangapaj munarca.

³⁹Paicunapura shujlla yuyaita na japishpami, ishcandimanda shicanyarirca. Chaimandami Bernabé runaguca, Marcosta pushashpa, jatun barcopi tiarishpa, Chipre shuti llactaman chimbarca.

⁴⁰Pabloca, Silastami pushangapaj agllarca. “Jatun Dios cangunata ninanda juyashpa pushachun” nishpa, crijcuna mingajpimi rinajurca.

⁴¹Paicunaca, Siria shuti, Cilicia shuti llactacunapi tandanajuj crijcuna shinlli catinajuchun yarichishpami yalishpa rinajurca.