Read Imbabura Highland Quichua HECHOS 16 Bible Online

HECHOS 16 - Imbabura Highland Quichua bible

HECHOS 16

¹Chai jipami, Derbe shuti, Listra shuti pueblocunaman Pablondi, Silas runagundi chayagrirca. Chaipimi, Jesusta crij Timoteo runata tuparinajurca. Paipaj mamaca, Judea llactamanda crij huarmimi carca. Taitaca, griego runami carca.

²Listra shuti, Iconio shuti pueblocunapi causanajuj crijcunapash, Timoteoca ali causaitami charin ninajurcami.

³Paitaca, Pablo pushangapaj munashpami, circuncisión nishcata rurarca. Timoteopaj taita, griego cajtaca tucui chaipi causanajuj, Judea llactamanda gentecunami yacharca. Chaimandami paicuna ama fiñachun, chashna rurarca.

⁴Villachun cachashcacunandi, crijcunata mandaj rucucunandi, Jerusalenbi tandanajushpami, crijcuna imatalla ruranatapash parlashca carca. Chai parlashcata cazuchunmi, chai pueblocunapica villashpandi rinajurca.

⁵Shina villajpimi tandanajuj crijcunaca, shinllita crishpa aliguta catinajurca. Punllandimi, ashtahuan tauca gentecuna crishpa miranajurca.

⁶Pablondi, Silas runagundimi, Frigia shuti, Galacia shuti llactacunata yalinajurca. Asia llactapi Diospaj Shimita villachunga, Diospaj jucha illaj Espirituca na saquircachu.

⁷Misia shuti llactaman chayashpaca, Bitinia shuti llactaman yalingapajmi munanajurca. Chaiman richumbash, Diospaj Espirituca na saquircachu.

⁸Shina cajpimi, Misia llacta ladota yalishpa, Troas shuti puebloman urai rinajurca.

⁹Chaipimi, Macedonia llactamanda shuj runaca, Pabloman muscuipishna tuta ricurirca. Paica: “Macedonia llactapi ñucanchiman yachachingapaj shamupai” nishpa, ninanda mañashca shayajujmi ricurirca.

¹⁰Muscuipishna chashna ricushpaca, ali villaita chaipi villagrichun, Taita Dios munajtami yacharcanchi. Shina yachashpami, Macedoniaman ringapaj ucha alichirircanchi.

¹¹Troas shuti pueblomandaca, barcopimi mama cucha chaupipi tiajuj Samotracia shuti llactaman rircanchi. Chaimanda rishpaca cayandimi, Neápolis shuti puebloman chayarcanchi.

¹²Chaimandaca, Macedonia llactapi tiaj Filipos shuti jatun pueblomanmi rircanchi. Chai pueblopica, Roma llactamanda shamushcacunami causanajushca carca. Chaipimi, huaquin punllacunata quedarcanchi.

¹³Chaipi cashpami, samana punlla chayajpica, chai pueblomanda llujshishpa, yacu manñaman rircanchi. Chaimanmi, Diosta mañangapaca tandanajuna carca. Ñucanchipash chaipi tiarishpami, tandanajushca huarmicunaman yachachircanchi.

¹⁴Paicuna purapica, Tiatira shuti pueblomanda, Taita Diosta ninanda alicachij, Lidia shuti huarmimi chaipi uyashpa tiajurca. Paica, juyailla morado telacunata jatuj huarmimi carca. Pablo villajujta chai huarmi aliguta uyachunmi Apunchi Jesusca, chai huarmipaj shunguta pascarca.

¹⁵Shinamandami, paica huasi ucu purandi bautizarirca. Chai jipami, ñucanchita cashna nirca: —Apunchi Jesusta ñuca ali crishpa cazujujta canguna ricushpaca, jacupaichi ñuca huasipi samapanguichi— nishpami, ñucanchi quedachun mingachirca.

¹⁶Chai jipami, Diosta mañangapaj rinajurcanchi. Shina rinajujpimi, imatapash yachajlla ayata charij cuitsata tuparircanchi. Chai cuitsaca, imatapash yachajlla cashpa paita randishpa charijuj amocunataca, ninanda culquichishpami causarca.

¹⁷Chai cuitsami Pablota, ñucanchitapash catimushpa cashna nishpa caparijurca: —Cai runacunaca, jahua pachapi causaj Taita Diosta servijcunami. Canguna imashna quishpiri ushanatapash villajcunami— nijurcami.

¹⁸Chashna nishpa, tauca punllacunata catiriajujpimi Pabloca, na ashtahuan uyanayachishpa tigrarishpa chai ayataca: —Candaca, Jesucristopaj shutipimi, chai cuitsagumandaca llujshi nini— nirca. Shina nijpica llujshircallami.

¹⁹Chai cuitsapaj amocunaca, na ashtahuan culquita japinatami yacharca. Chaimandami Pablotapash, Silastapash japishpa, jatun plazapi tiaj mandajcunapajman aparca.

²⁰Chai mandajcunapajman apashpaca, cashnami ninajurca: —Cai runacunaca, Judea llactamanda cashpapash, ñucanchi pueblopimi fiñanajuchishpa purinajun.

²¹Caicunaca, ñucanchita mandashcapi nijunshnaca, na yachachinllu. Ashtahuangarin ñucanchica, Roma llactamanda gentemi canchi. Shina cashpami paicuna yachachijujtaca, napacha uyana canchi— ninajurcami.

²²Shina nijpimi Pablota, Silastaca tucuilla gentecuna fiñashpa tandanajurca. “Chaicunataca, churajunata surcuchishpa caspihuan macaichi” nishpami, mandajcunaca mandarca.

²³Shina ninanda astichishca jipaca, prezuna huasipi churachunmi cacharca. Prezuna huasita cuidajtapash: “Ama anchurishpa cuidangui” nishpami mandanajurca.

²⁴Shina mandajpi cazushpami paicunataca, na llujshi ushanalla ashtahuan ucuman churagrirca. Paicunapaj chaquitapash, canichina caspihuan canichishpami saquirca.

²⁵Ashtahuangarin chaupi tutaca Pablondi, Silas runagundimi, Taita Diosta mañashpa candanajurca. Chaipi tiaj prezucunapash, chaitaca uyanajurcami.

²⁶Shinamandami, alpa mama ñapash ninanda chujchushpa, prezuna huasi ucucunandi ninanda cuyuchirca. Shina cuyujpimi, pungucunapash tucuilla pascarirca. Prezu tiajcunata huatashca cadenacunapash, tucuillami pascarirca.

²⁷Prezuna huasita cuidaj rijcharishpa, pungucuna pascariajta ricushpaca, prezucunaca llujshishcamari yashpami, paillata espadahuan huañuchiringapaj munarca.

²⁸Ashtahuangarin Pablo ninanda caparishpami: —Ama canmandallata huañuchirichu. Tucuillami caipi capanchi— nirca.

²⁹Shina nijpimi, prezuna huasita cuidaj runaca, michata mañashpa, ucuman calpashpa yaicurca. Paica, ninanda manllarishpa chujchushpami Pablopaj, Silaspaj ñaupajpi cungurirca.

³⁰Paicunataca, canllaman llujchishpami: —Ñuca quishpiringapaca, ¿imatata rurana capani, taitacuna?— nishpa tapurca.

³¹Shina tapujpimi, paicunaca cashna nirca: —Apunchi Jesucristota cringui. Cambash, cambaj huasi ucu purandi crishpaca, quishpiringuichimi— nircami.

³²Apunchi Jesusmandaca, paimambash, paipaj huasipi tucui tiajcunamambashmi villanajurca.

³³Prezuna huasita cuidaj runaca, chai tutallata Pablota, Silastapash pushashpami, chugricunata maillachirca. Chai jipami, paipaj huasipi causajcunandi, tucuilla bautizarirca.

³⁴Ña bautizarishpaca, paipaj huasiman pushashpami, micunaguta cararca. Taita Diosta crishcamandami, paica paipaj huasipi causajcunandi tucuilla cushijunajurca.

³⁵Chai pueblota mandajcunaca, tutamandatami: “Chai runacunataca cacharilla” nichun, prezuna huasita cuidajpajman soldadocunata cacharca.

³⁶Shina nijpimi Pablotaca, chai cuidaj runaca cashna nirca: —Cangunata cacharilla nishpami, mandajcunaca cachamushca. Cunanga, cungailla ripaichilla— nircami.

³⁷Ashtahuangarin Pabloca, soldadocunataca cashnami nirca: —Ñucanchitaca, tucuicunapaj ñaupajpimi macachirca. Paicunaca, imatapash na tapuchishpallatami ñucanchitaca, Roma llactamanda cajpipash, prezuna huasipi churarca. Cunanga, pacalla llujshichunmi paicunaca munashca. Na paicuna llujchij shamujpica, napacha rishunllu— nircami.

³⁸Shina nishcatami soldadocunaca, mandajcunaman villagrirca. Roma llactamanda cashcata paicuna yachashpaca, ninandami manllarirca.

³⁹Mandajcuna Pablopajman, Silaspajman shamushpaca cashnami ninajurca: —Na yachaimandami, cashna rurapashcanchi. Cunanga, cai pueblomanda llujshishpa ripaichilla— nishpami cacharirca.

⁴⁰Prezuna huasimanda llujshishpaca, Lidia shuti huarmipaj huasimanmi rirca. Chaipi crijcunahuan tandanajushpaca, aliguta catichunmi yachachirca. Chai jipami, chaimanda llujshishpa rinajurca.