Read Imbabura Highland Quichua HECHOS 17 Bible Online

HECHOS 17 - Imbabura Highland Quichua bible

HECHOS 17

¹Pablondi, Silas runagundimi, Amfípolis shuti, Apolonia shuti pueblocunata yalishpa, Tesalónica shuti puebloman chayagrirca. Chaipimi, Judea llactamanda gentecuna tandanajuna huasi tiarca.

²Paicunapajmanmi, Pabloca rinata yachan carca. Chaipimi, quimsa semanacaman tiashpa, samana punllacunapica, paicunahuan chimbapura rimarinajurca.

³Dios escribichishca Shimipi nijujtaca, aliguta villashpami, cashna nishpa yachachijurca: —Quishpichij Cristoca, huañunapachami carca. Shina cashpapash, huañushcacunapaj chaupimanda causarinami carca. Ñuca cangunaman villajushca Jesusca, Quishpichij Cristomi— nijurcami.

⁴Shina yachachijpimi, paicuna puramanda taucacuna crishpa Pablohuan, Silas runaguhuan tandanajurca. Shinallata Diosta yarij griego nishca gentecunapash, alicachi tucushca huarmicunapashmi, ashtacacuna crinajurca.

⁵Chaita ricushpami, Judea llactamanda na crij gentecunaca ninandapacha fiñashpa, yanga purij nali runacunata chai pueblopi caparinajuchun tandachinajurca. Chashna rurashpami, Jasón shuti runapaj huasi punguta faquishpa, chai ucumanda tucuicunapaj ñaupajman Pablotapash, Silastapash llujchingapaj munanajurca.

⁶Chaipi na tarishpaca, Jasón shuti runata, huaquin crijcunatapash, pueblota mandajcunapaj ñaupajmanmi apanajurca. Chaipimi ninanda caparishpa, cashna ninajurca: —Cai runacunaca, tucui cai pachapi causajcunatamari umachishpa purinajun. Chaipajmi caimambash shamushca.

⁷Paicunatami, cai Jasón shuti runaca mingachishpa charijushca. Tucuilla paicunami: ‘Shuj jatun mandaj Jesusmi tian’ ninajun. Shina nishpami, Cesar mandashcatapash na cazunajun— ninajurcami.

⁸Chashna nijta uyanajushpami, chai pueblopi causajcunapash, mandajcunapash, ninanda caparinajurca.

⁹Mandajcunaman culquita cujpimi, Jasón shuti runatapash, caishuj crijcunatapash cacharinajurca.

¹⁰Chai jipallami crijcunaca, Pablotapash, Silastapash, Berea shuti puebloman uchalla cacharca. Chaiman chayashpaca, Judea llactamanda gentecuna tandanajuj huasimanmi yaicunajurca.

¹¹Chaipi causajcunaca, Tesalónica shuti pueblopi causajcunataca yali ashtahuan alicachi tucushcacunami carca. Chaimandami paicunaman villajpica, ninanda cushijushpa uyanajurca. Shina cashpami: “¿Dios escribichishca Shimipipash, shinallatachu nijun?” nishpa, punllandi aliguta mascashpa leyinajurca.

¹²Shina leyinajushpami, paicuna puramandaca ashtacacuna Jesusta crinajurca. Alicachi tucushca griega nishca huarmicunapash, tauca jaricunapashmi crinajurca.

¹³Berea shuti pueblopipash, Taita Diospaj Shimita Pablo villajun nijtami Tesalónica pueblopi causanajuj Judea llactamanda gentecunaca uyarca. Paicunaca, chai pueblomambash rishpami, ashtaca gentecunapi caparinajurca.

¹⁴Chaimandami chai crijcunaca, uchalla mama cucha ladoman Pablotaca, cumbacunahuan cachanajurca. Silashuan, Timoteohuanga, chai pueblopillatami quedarca.

¹⁵Pablotaca, pushangapaj mingai tucushcacunaca, Atenas shuti pueblomanmi pushanajurca. Paicunatami Pabloca: “Silastapash, Timoteotapash, ucha ñucapajman pushamuichi nijunmi nigripaichi” nirca.

¹⁶Atenas shuti pueblopimi Pabloca, Silasta, Timoteota shuyajurca. Chai pueblopi causajcunaca, yanga dioscunata ninanda yariajlla causajtami ricujurca. Shina ricushpami, paipaj shungupica ninanda llaquirishpa fiñarirca.

¹⁷Chaimandami Pabloca, tandanajuj huasipica, Judea llactamanda gentecunahuan, Diosta yariashpa causajcunahuan, Pabloca chimbapura parlajurca. Jatun plazapi purijcunamambash, punllandimi yachachijurca.

¹⁸Epicúreos nishca, estoicos nishca yachachij runacunapash, Pablohuanga chimbapura parlangapajmi tandanajurca. Jesusmanda ali villaitapash, huañushcacuna causarinatapashmi, Pabloca villajurca. Shina villajpimi, huaquingunaca: —Cai shimisapa runaca, ¿imatata nirijunlla?— ninajurca. Ashtahuan shujcunaca: —Ñucanchi na rijsishca dioscunamanda villajmi yarin— ninajurcami.

¹⁹Pablota japishpami, Areópago nishca pushtuman pushashpa, cashna ninajurca: —Ñucanchi nara uyashcatami yachachijungui. Chaitaca, ¿yachai ushanachu capanchi?

²⁰Ñucanchi nara uyashca shimicunatami villaj shamushcangui. Can imata villajujtapash yachashumbacha nipanchimi— ninajurcami.

²¹(Atenas shuti pueblopi tucui causajcunapash, caru llactamanda shamushpa causajcunapash, nara uyashca shimicunata uyanata, imatapash parlanatallami, ninanda munashpa causan carca).

²²Pabloca, Areópago nishca plaza chaupipi shayarishpami, cashna nijurca: —Atenas pueblopi causajcuna. Cangunataca, dioscunata alipaj yarijcuna cajtami, tucuipi ricujuni.

²³Ñuca cai pueblopi purijushpaca, cangunapaj dioscunata yarina huasicuna tiajtami ricurcani. Shuj altarpica: NA RIJSISHCA DIOSTA YARINAMI nishpa escribishca tiajujtami ricurcani. Chai Diostaca, na ricushpapash, ninanda alicachishpami causashcanguichi. Paimandami cangunaman villajuni.

²⁴Chai Diosllatami, cai pachatapash, cai pachapi tucui ima tiachumbash rurashca. Paica jahua pachata, cai pachata Mandaj cashpami, gentecuna yaringapaj rurashca huasicunapica, na tiajun.

²⁵Pai imata minishtijujpishna paita alicachishpa gentecuna imata maquihuan rurachumbash, na munanllu. Paica causaita, samaita, imata munashcatapash tucuicunamanmi caramujun.

²⁶Shujlla runamandami cai pachapica, maipipash shuj shuj gentecuna mirashpa causanajuchun Diosca rurashca. Paillatami, gentecuna causana huatacunatapash, paicuna maipi causanajuchumbash, ñaupallata churashca.

²⁷Ñucanchi causashpallata, Taita Diosta mascashpa, imashnallapash paita tuparichunmi munan. Ashtahuangarin paica, ñucanchimandaca na carupi canllu.

²⁸Paimandami causanchi, purinajunchi, imatapash ruranchi. Canguna puracunamanda ali yachajushca runacunapashmi, cashna nishca: ‘Ñucanchica, Diospaj huahuacunami canchi’ ninajushcami.

²⁹Taita Diospaj huahuacuna cashpaca, orota, culquita, rumita rurashcacunaca, Diosman rijchajpachami nishpaca, na yarinachu canchi. Chaicunaca, imatapash ruranata ali yachaj runacuna aliguta yarishpa rurashcallami.

³⁰Chashna na yachashca causanajujpipash yanga saquishpami, Taita Diosca na llaquichirca. Ashtahuangarin cunanga, maipi causajcunatapash tucuillatami ninanda llaquirishpa, paipajman tigrarichun mandajun.

³¹Diosca, ñami shuj punllata agllashca. Chai punllapimi, cai pachapi causajcuna imata rurashcatapash ricuchishpa, imatapash cashcatapacha ruranga. Chashna ricuchingapajmi, tucuicuna yachachun pai agllashca runataca, huañushcacunapaj chaupimanda causachirca— nijurcami.

³²“Huañushcacunapaj chaupimandami causachirca” nijta uyashpaca, huaquingunaca ninanda asishpami ricurca. Shujcunaca: —Can chashna villajujtaca, cutimbajmi uyapashun— ninajurca.

³³Shina nijpimi Pabloca, paicunapaj chaupimandaca llujshishpa rirca.

³⁴Ashtahuangarin huaquingunaca Jesusta crishpami, Pablohuan tandanajurca. Paicuna purapica, Areópago nishca mandajpura tandanajuj, Dionisio shuti runapashmi carca. Dámaris shuti huarmipash, shujcunapashmi crirca.