Read Imbabura Highland Quichua HECHOS 18 Bible Online

HECHOS 18 - Imbabura Highland Quichua bible

HECHOS 18

¹Chashna tucushca jipa, Atenas shuti pueblomanda Pablo llujshishpaca, Corinto pueblomanmi rirca.

²Chaipica, Judea llactamanda Aquila shuti runatami tuparirca. Paica Ponto shuti llactapimi huacharishca carca. Chai runaca, Priscila shuti paipaj huarmindi, Italia llactamanda chaira shamushcallami carca. Claudio shuti jatun mandaj, Judea llactapi causajcunata Roma pueblomanda tucuillata llujshichun mandajpimi, paicunaca chaiman shamushca carca. Paicunapajmanmi Pabloca rirca.

³Pablopash, paicunapash carpata ruranata yachashpami, carpata rurashpa causajurca.

⁴Pabloca, samana punllacunapimi, tandanajuna huasiman rijurca. Chaipimi, Judea llactamanda gentecunapash, griego nishca gentecunapash crichun, paicunahuan chimbapura parlajurca.

⁵Macedonia llactamandaca Silaspash, Timoteopashmi, Pablopajman shamurca. Paicuna shamujpica: “Jesusca, Quishpichij Cristomi” nishpami, Judea llactamanda gentecunaman punllandi Diospaj Shimitaca, Pabloca villajurca.

⁶Pablo villajujta paicuna na uyanayachishpami, nali shimicunata rimanajurca. Chashna rimanajujta ricuchingapajmi, pai jahualla churajushcata chafsirishpa Pabloca, cashna nirca: —Canguna juchayullata huañushpaca, na villarcachu nishpaca, ñucataca na juchachinachu canguichi. Ñuca villanataca, ña cangunaman villanimi. Cunanmandaca, na israelcunamanmi villangapaj rigrini— nircami.

⁷Chai ucumanda llujshishpaca, Taita Diosta cazuj Justo shuti runapaj huasimanmi rirca. Tandanajuna huasi ladollapimi, paica causarca.

⁸Chai tandanajuna huasipi mandaj Crispo shuti runaca, paipaj huasi ucu puracunandimi tucuilla, Apunchi Jesusta crirca. Corinto pueblopi causajcunapash, Pablo villajujpimi, ashtacacuna crishpa bautizarinajurca.

⁹Muscuipishna tuta ricurishpami Apunchi Jesusca, Pablota cashna nirca: “Na manllanachu cangui, na upalla canachu cangui. Ñucamandaca villajunallami cangui.

¹⁰Ñuca canhuan cajpimi, na manllana cangui. Candaca, pipash na llaquichi ushangachu. Ashtacacunatami, cai pueblopi agllashcata charini” nircami.

¹¹Paicunaman Diospaj Shimita yachachishpami, shuj huata sucta quillata Pabloca chaipi causajurca.

¹²Galión shuti runami, Acaya shuti llactataca mandajurca. Chai punllacunapimi, Judea llactamanda gentecunaca shujllashnalla yarishpa jatarirca. Paicunaca, Pablota fiñashpami japishpa, mandajcunapaj ñaupajman apanajurca.

¹³Chaiman apashpaca, cashnami ninajurca: —Cai runaca, Taita Diosta yarinami canguichi nijunmi. Shina nijushpapash, mandashca shimipi nijujtaca nalicachishpami, shujtara yachachijun— ninajurcami.

¹⁴Pablo rimai callarijujpica, Galión shuti runaca Judea llactamanda gentecunataca cashnami nirca: —Judea llactapi causajcunalla. Cai runaca, imatapash jatun nalita rurashca cajpi, na cashpaca pitapash ninanda llaquichishca runa cajpica, ñucaman villajtaca, mandashcapi nijunshnallatami uyaiman.

¹⁵Ashtahuangarin cai runaca, shuj shimicunamanda, shuj shuticunamanda cangunata mandashcapi nijunshna yachachishpami purijun. Chashna yachachishcamandaca, na imatapash ricunachu cani. Cangunallata ricuichilla— nircami.

¹⁶Chashna nishpami, chai ucumandaca llujchishpa cacharca.

¹⁷Shinamandami griego nishca tucui gentecunaca, paicuna tandanajuna huasipi mandaj Sóstenes shuti runata japishpa, chai tandanajushcacunapaj ñaupajpi macanajurca. Chaita Galión ricushpapash, na imata nircachu.

¹⁸Corinto pueblopimi, Pabloca unai punllacunata quedarca. Chai jipami, crijcunata cayacaman nishpa, Siria llactaman ringapaj barcota japirca. Paitaca Priscila shuti huarmindi, Aquila shuti runandimi cumbashpa rirca. Diosman pactachishami nishcata ricuchingapajmi, nara rishpallata Pabloca, Cencrea shuti pueblopi ajchata rutuchirca.

¹⁹Efeso puebloman chayashpaca Aquila shuti runatapash, Priscila shuti huarmitapash chaipi saquishpami, tandanajuna huasiman rishpa, Judea llactamanda gentecunahuan chimbapura rimanajurca.

²⁰Pablotaca, ashtahuan punllacunata shuyapai ninajujpipash, na shuyarcachu.

²¹Pabloca, paicunata cayacaman nishpami, cashna nirca: “Cunan cai chayamuj fiestapaca, Jerusalenman rinapachami cani. Taita Dios munajpica, cutin muyumushami” nircami. Shina nishpaca, Efeso pueblomanda barcota japishpa rircallami.

²²Cesarea shuti puebloman chayashpaca, Jerusalenbi tandanajuj crijcunata ricungapajmi vichai rirca. Chai jipaca, Antioquía pueblomanmi urai rirca.

²³Chaipi huaquin punllacunata tiashca jipaca, Galacia shuti, Frigia shuti llactacunamanmi, callarimanda Pabloca purijurca. Chaipica, tucui crijcuna aliguta catinajuchunmi yachachijurca.

²⁴Alejandría pueblopi huacharishca Apolos shuti runaca, Judea llactamandami Efeso puebloman shamurca. Paica, alipacha villanata yachaj, Dios escribichishca Shimitapash alipacha yachajmi carca.

²⁵Apunchi Jesús imashna causachun munajtapash, yachajushcami carca. Apolosca, imamanda Juanga bautizaj cashcatallami yacharca. Shina cashpapash paica tucui shunguhuanmi, Apunchi Jesusmandaca aliguta villashpa, na quillanayachishpa yachachijurca.

²⁶Paica, tandanajuna huasipimi, na manllashpa villai callarirca. Shina villajujpimi Priscila shuti huarmihuan, Aquila shuti runahuan paitalla huasiman pushashpa, Taita Dios imashna causachun munajta ashtahuan aliguta Apolosman yachachinajurca.

²⁷Acaya shuti llactaman Apolos rinayachijpimi, Efesopi causaj yachajujcunaca, paita cushichingapaj ayudanajurca. Acaya shuti llactapi causaj crijcuna paita aliguta chasquichunmi, escribishca cartata cachanajurca. Apolos chaiman chayashpaca, Dios ninanda juyajpi crijcunapaj ali cachunmi yachachijurca. Paicunaca, Dios ninanda juyajpi crishcacunami carca.

²⁸Chaipi yachachishpaca, Dios escribichishca Shimicunata leyishpami: “Jesusca, Quishpichij Cristomi” nishpa, na manllashpa villajurca. Chashna villashpaca, Judea llactamanda gentecuna pandashcatapash, tucuicunapaj ñaupajpimi aligutapacha villajurca. Shina villajpimi, na imatapash ni ushanajurca.