Read Imbabura Highland Quichua HECHOS 2 Bible Online

HECHOS 2 - Imbabura Highland Quichua bible

HECHOS 2

¹Pentecostés fiesta punlla chayamujpimi, tucuicuna shujllashnalla tandanajushpa tianajurca.

²Shina tianajujpimi, jahua pachamandaca huaira ninanda huacamunshna ñapash uyarimurca. Chai huairami, paicuna tianajuj huasi ucuman jundarca.

³Shina shamushpami, rupajuj ninashna paicunaman ricurishpa, tucuicunapaj umapi tiarirca.

⁴Shina tiarijpimi tucui paicunaca, Diospaj jucha illaj Espíritu junda tucurca. Shina cashpami, Diospaj Espíritu rimachishcashnallata, shuj shuj rimaicunata rimai callarinajurca.

⁵Chai punllacunapimi, Diosta yarishpa causanajuj, Judea llactamanda runacuna, cai pachapi tiaj tucui llactacunamanda Jerusalenman shamushpa causanajurca.

⁶Huaira ninanda huacamunshna uyarijpimi, ashtaca gentecuna tandanajurca. Tucuicunallata paicunapaj shimi rimaipipacha villajta uyashpami, chai gentecunaca musparinajurca.

⁷Chai gentecunaca, ninandapacha manllarishpa ricunajushpami, cashna nishpa tapurinajurca: —Ricuichi, cashna parlanajuj tucui cai runacunaca, ¿nachu Galilea llactamanda?

⁸¿Imashpata paicunataca, huahuamandapacha ñucanchi rimashpa viñashca shimicunapi, tucuicuna parlanajujta uyanchi?

⁹Ñucanchica: Partia, Media, Elam, Mesopotamia, Judea, Capadocia, Ponto, Asia,

¹⁰Frigia, Panfilia, Egipto shuti llactacunamanda, Africapi tiaj Cirene pueblota yalishca llactacunamandapash, Roma llactamandapashmi, caipica causanajunchi. Huaquingunaca, israelcunami canchi, huaquingunaca israelcuna yachachishcata catijcunami canchi.

¹¹Shinallata Creta shuti, Arabia shuti llactacunamandapashmi, caipi canchi. Taita Dios juyailla rurashcataca, ñucanchi rimaicunapipacha villanajujtami uyanajunchi— ninajurcami.

¹²Chashnata uyashpami, tucuicuna ninandapacha manllarishpa muspayashpa, caishuj chaishuj: —Caicunaca, ¿ima ninajundayari?— ninajurca.

¹³Ashtahuangarin huaquingunaca: —Llullu vinohuanmari machashca— ninajurcami.

¹⁴Shina ninajujpimi, villachun cachashca chunga shujcunandi shayarishpa, Pedroca shinllita rimashpa cashna nishpa villajurca: “Judea llactapi tucui causajcuna, cai Jerusalenbi causajcunapash. Caita cangunapash yachangapaj, ñuca villajuj shimicunataca ali uyaichi.

¹⁵Cangunami, paicunaca: ‘Machashcamari’ ninajunguichi. Ashtahuangarin na chashnachu, chaira iscun horasllamari.

¹⁶Ashtahuangarin cashna tucunataca, Dios ima nishcata villaj Joelmi cashna nishca:

¹⁷‘Taita Diosca, cashnami nijun: Tucuri punllacunapica, tucuicunamanmi ñuca Espiritutaca talinshna cachamusha. Shina cachamujpimi, cangunapaj churicunapash, ushicunapash ñucamandaca villanajunga. Shinallata cangunapaj chairalla viñai huambracunapash, muscuipishnami ricunajunga. Cangunapaj rucucunapash, muscuicunatami muscunga.

¹⁸Chai punllacunapica, ñucata servij jaricunamambash, huarmicunamambash, ñuca Espirituta talinshna cachamushami. Shina cachamujpimi, ñucamanda villanajunga.

¹⁹Jahua pachapica, jatun manllarinacunata rurashpami ricuchisha. Cai pachapica, ricuchinacunata rurashpami, yahuarta, ninata, cushni samaitapash ricuchisha.

²⁰Jatun Dios agllashca juyailla, jatun punlla nara chayamujpillatami, indipash yana yana tucunga, lunapash yahuarman tigranga.

²¹Jatun Diospaj shutipi mañajcunaca, tucuillami quishpiringa’ nijushcami.

²²Israel runacuna, cai ñuca villashcacunata ali uyapaichi. Nazaret pueblomanda Jesustaca, imatapash juyaillacunata pipash na rurai ushanacunallata, jatun manllarinacunata canguna purapi rurashpa ricuchijpimi, imashna cajta ricushpa Taita Diosca alicachirca. Chaicunataca, cangunallata alimi yachanguichi.

²³Taita Diosca, ña yarishcalla cashpa, pundamandapacha ali yachashpami Jesustaca, cangunaman saquirca. Shina saquijpimi cangunaca, Jesusta prezu japishpa, nali runacuna cruzpi chacatashpa huañuchinajuchun japichircanguichi.

²⁴Chai Jesustami Taita Diosca, huañuchina nanaicunamanda cacharichishpa causachirca. Huañuica, Jesusta charitaca napacha usharcachu.

²⁵Davidpash, Jesusmanda villashpami, cashna nijushca: ‘Jatun Diostaca, ñuca ñaupajpimi ricushpa causajurcani. Ñuca ali ladopi cajpimi, na cuyuchi tucusha.

²⁶Shina cajpimi ñuca shungupipash, ninanda cushijurcani. Shinallata ñuca jalluhuambash, cushijuihuanmi rimajurcani. Huañushpapash, shuyashpami ñuca cuerpoca samajunga.

²⁷Ñuca almatapash, Hades nishcapica na saquinguichu. Shinallata cambajlla causajuj Runagupaj cuerpo ismuchumbash, na saquinguichu.

²⁸Causaipaj ñangunatami rijsichihuarcangui. Can ñucahuan cashpami ñucataca, ninanda cushichihuangui’ nijushcami.

²⁹Huauquicuna, ñucanchi ñaupa taita David huañushpa pambai tucushcataca, na manllashpami cangunaman villajuni. Paita pambashca utujupash, cunangamanmi ñucanchi llactapi tiajun.

³⁰Davidca, Dios ima nishcata villaj cashpami, cashna nishcata yacharca. Pai mandashpa tiarinapica: ‘Quishpichij Cristo runa aichayu cashcamanda, paipaj miraimanda jatarichisha’ nishpa, Taita Dios juramentushcatami yacharca.

³¹Quishpichij Cristo causarinataca ñaupamandapachami Davidca, ricujunshna cashna nishca: ‘Paipaj almataca, Hades nishcapica na saquishcachu. Paipaj cuerpopash, na ismushcachu’ nishcami.

³²Chai Jesustami, Taita Diosca causachirca. Ñucanchica, tucuicunami chaita ricushcata villajcuna canchi.

³³Taita Diosca, Jesusta jatumbi churashpami, paipaj ali ladoman tiachirca. Taita Dios carashapachami nishca paipaj jucha illaj Espiritutaca cararcami. Chai Espirituta ñucanchimambash caramujpimi, cangunapash ricunajunguichi, uyanajunguichi.

³⁴David jahua pachaman rishcataca, na nijunllu. Ashtahuangarin paillatami, cashna nishca: ‘Jatun Diosmi, ñucata Mandajtaca cashna nirca: Canga, ñuca ali ladoman tiajuilla.

³⁵Canda fiñajcunata can saruchun, cambaj chaqui ucupi ñuca churangacaman tiajuilla’ nishcami.

³⁶Tucui israelcuna, caitaca aligutapacha yachanami canguichi. Canguna chacatashca Jesustallatami, Mandaj cachumbash, Quishpichij Cristo cachumbash, Taita Diosca churashca” nijurcami.

³⁷Chashna villajujpimi, shungupi ninanda llaquirishpa Pedrotapash, villachun cachashca caishujcunatapash, cashna ninajurca: —Shina cashpaca, ¿imatata rurapashun, huauquicuna?— ninajurcami.

³⁸Shina nijpimi Pedroca, cashna nirca: —Ninanda llaquirishpa Diospajman tigrarichi. Tucuicuna Jesucristopaj shutipi bautizarichi. Shina rurajpimi Diosca, cangunapaj juchacunata anchuchishpa, paipaj jucha illaj Espirituta cangunaman caramunga.

³⁹Cashna carashapachami nishcataca cangunamambash, cangunapaj huahuacunamambash, carupi causajcunamambash, ñucanchi Jatun Taita Dios cayasha nishca tucuicunamambashmi caranga— nircami.

⁴⁰Pedroca, ashtahuan shuj shimicunatapash villashpami, aliguta yarichishpami cashna nijurca: —Jatun nalita rurashpa causanajuj cai miraicunamanda anchurishpa quishpirichi— nijurcami.

⁴¹Pedro villajujta chasquijcunaca bautizarircami. Chai punllapica, quimsa huarangashna crijcunami mirarca.

⁴²Villachun cachashcacuna yachachijujtapash na saquishpami, aliguta catinajurca. Caishuj chaishuj aliguta causanajushpami, tandata chaupirishpa micungapajpash, Diosta mañangapajpash, tucuilla tandanajun carca.

⁴³Villachun cachashcacunaman Dios ushaita carajpimi, imatapash juyaillacunata ninanda rurashpa ricuchinajurca. Shina rurajta ricushpami, tucuicuna ninanda manllarinajurca.

⁴⁴Tucui crijcuna tandanajushpami, aliguta causanajurca. Shina causajpimi, imata charishcapash tucuillapaj carca.

⁴⁵Paicunapaj alpata, imata charishcacunatapash jatushpami, caishujman chaishujman imata minishtinajujta ricushpa, chai culquitaca chaupishpa caranajurca.

⁴⁶Punllandimi, Diospaj huasipipash shujllashnalla yarishpa tandanajunajurca. Shinallata paicunapaj huasicunapipash tandata chaupishpami, ali shunguhuan ninanda cushijushpa, tandanajushpa micunajurca

⁴⁷Taita Diosta alicachinajujpimi, paicunatapash tucui gentecuna alicachinajurca. Jatun Diosca, pai quishpichisha nishcacunata punllandi quishpichishpami, tandanajuj crijcunata mirachirca.