Read Imbabura Highland Quichua HECHOS 20 Bible Online

HECHOS 20 - Imbabura Highland Quichua bible

HECHOS 20

¹Chashna caparinajui chulunyashca jipami Pabloca, Jesusta catijcunata cayarca. Shina cayashpa, aliguta yarichishpa ugllarishca jipaca, cayacaman nishpa, Macedonia llactaman ringapaj llujshircallami.

²Chai llactacunapica, tucui crijcunamanmi aliguta yarichishpa ninanda yachachijurca. Shina villashpandi rishpami, Grecia llactaman chayagrirca.

³Quimsa quillata chaipi cashca jipaca, barcopimi Siria llactaman rigrinajujpi, Judea llactamanda gentecunaca, paita huañuchingapaj chapanajushca carca. Chaimandami, Macedonia llactamanllata yaligrisha yajurca.

⁴Asia llactaman Pablo rijujpica, Berea shuti pueblomanda Sópater shuti runapash, Tesalónica pueblomanda Aristarco shuti, Segundo shuti runacunapash, Derbe shuti pueblomanda Gayo shuti runapash, Timoteopash, Asia llactamanda Tíquico shuti runapash, Trófimo shuti runapashmi cumbashpa rinajurca.

⁵Paicunaca, Troas shuti pueblopi ñucanchita shuyangapajmi ñauparca.

⁶Levadura illaj tandata micuna fiesta punllacunapica, Filipos pueblopimi carcanchi. Chai jipami, Troas puebloman barcopi, picha punllata rircanchi. Ñaupashca huauquicunahuan chaipi tuparishpami, canchis punllacaman quedarcanchi.

⁷Tandata chaupishpa micungapajmi, domingo punllapica, Jesusta catijcunalla tandanajurcanchi. Cayapaj rina cashpami Pabloca, chaupi tutacaman yachachijurca.

⁸Ñucanchi tandanajushca altibajo jahuapica, tauca michacunata japichishcami carca.

⁹Chaipica, Eutico shuti huambrami ventanapi tiajurca. Pablo unai unaita villajujpimi, chai huambraguca puñui mishajpi puñujushpa, quimsa altibajomanda alpaman urmarca. Crijcuna ricungapaj uriajushpaca, huañushcatami japigrirca.

¹⁰Pablopash uriajushpa, chai huambraguta japishpa ugllarishpami: —Na manllarinachu canguichi, causajllatami— nirca.

¹¹Pablo cutin tigrashpaca, Jesús huañushcata yarishpami, tandata chaupishpa carashpa micunajurca. Chai jipami, punllayangacaman villajushpa, Pabloca llujshishpa rirca.

¹²Chai huambrataca, causajta huasiman pushashpami, tucuicuna ninanda cushijunajurca.

¹³Ñucanchica, barcopi ñaupashpami, Asón shuti puebloman rircanchi. Chaipi tuparishun nishpami, Pabloca chaquilla rinayachishpa rirca.

¹⁴Asón shuti pueblopi Pablo tuparishpami, ñucanchihuan barcopi tiarirca. Chaimandaca, Mitilene shuti pueblomanmi shamurcanchi.

¹⁵Chaimanda barcopi llujshishpaca, cayandi punllami, Quío shuti llacta chimba puraman chayarcanchi. Chai cayandimi, barcocuna shayana Samos shuti llactaman chayarcanchi. Chaimanda llujshishpaca, Trogilio shuti pueblopi ashata quedashpami chai cayandica, Mileto shuti puebloman chayagrircanchi.

¹⁶Asia llactapi tiaj Efeso puebloman na chayashpa rinatami, Pabloca yajurca. Pentecostés nishca fiesta punllapi, Jerusalenman ucha chayangapaj munashpami, Pabloca rijurca.

¹⁷Pabloca, Mileto shuti pueblopi cashpami, Efeso pueblopi tandanajuj crijcunata mandaj rucucuna shamuchun, cayachun cacharca.

¹⁸Paicuna chayamujpimi Pabloca, cashna nijurca: “Asia llactaman ñuca chayamushca punllamandapacha, imashna cangunahuan causashcataca, alimi yachanguichi.

¹⁹Judea llactamanda gentecuna ñucata huañuchingapaj pacalla chaparianajujpimi, llaquicunata apashpa ninanda huacashpa tiajushcani. Na jariyashpami, Apunchi Jesustaca servijushcani.

²⁰Canguna ashtahuan ali catichunmi, tucuicunapaj ñaupajpi, cangunapaj huasicunapipash, Diospaj Shimita villashpa yachachijushcani.

²¹‘Llaquirishpa Taita Diospajman tigrarichi. Ñucanchi Apunchi Jesucristotami, crina canguichi’ nishpami, Judea llactamanda gentecunapash, na israelcunapash crichun villajushcani.

²²Ricuichi, Jerusalenbi ñuca ima tucunatapash na yachanichu. Ashtahuangarin ñuca shungupi nijujta cazushpallami, cunanga rigrijuni.

²³Maijan pueblopi cashpapash: ‘Prezuna huasipi churajpi, ninandami llaquichi tucungui’ nishpami, Diospaj jucha illaj Espirituca ñucaman villajuhuan. Chaitallami yachani.

²⁴Shina nijpipash na manllashpa, ñuca causaitapash na llaquinichu. ‘Taita Dios ninanda juyashpami quishpichijun’ nishpa villachunmi, Apunchi Jesusca ñucaman mingahuarca. Caitaca, ñuca huañuna punllacaman cushijushpa pactachinatami charini.

²⁵Ricuichi, cangunahuan cashpami, Taita Dios mandajujmandaca villajurcani. Shina cajpimi cunanga, cangunamandaca pipash na cutin ñucata ricunata yachani.

²⁶Chaimandami cunan punllapillata, cangunataca cashna nini: Maijambash chingaita chingagrishpaca, pipash na ñucataca juchachinachu cahuanguichi.

²⁷Taita Dios imata rurajujtapash na pacashpami, tucuita cangunaman villashcani.

²⁸Shina cajpimi, cangunallata aliguta yarishpa causana canguichi. Tandanajuj tucui crijcunataca, llamata michinshna cuidachunmi, Diospaj jucha illaj Espirituca, cangunata churashca. Paicunataca, aligutami ricuna canguichi. Apunchi Jesusca, paipaj yahuarhuanmi paita crijcunataca, paipajlla cachun quishpichirca.

²⁹Ñuca rijpica, llama chaupicunapi millai atuj yaicunshnami, canguna purapica yaicushpa, crijcunataca tucuchinajunga. Chaitaca yachanipachami.

³⁰Canguna puramandallatami, jatun nalita rimaj runacuna jataringa. Jesusta catijcuna paicunata catichunmi, chashna runacunaca jataringa.

³¹Shina tucunata yarishpami, rijcharianshna causana canguichi. Caitapash yaringuichi: Ña quimsa huatatami, tutandi punllandi na saquishpa, shuj shujlla japishpa, huacashpa shinllita tacurishpa yachachijushcani.

³²Cunanga tucui crijcuna, cangunataca Taita Diosmanmi mingani. Paipaj ninan juyaimanda villajuj paipaj Shimimambashmi mingani. Chai Shimica, ushaita charishpami cangunataca, ashtahuan ali catinajuchun shinllichinga. Diosca, paipajlla causajcunahuan japigrichunmi, tucuillaman caranga.

³³Pipaj culquita, orota, churajunatapash na ninanda munashpa ricushcanichu.

³⁴Ashtahuangarin ñucapaj minishtirijpi, cumbashpa purijcuna minishtijpipash, ñuca maquihuanmi imagutapash rurajushcani. Chaitaca, cangunallata alimi yachanguichi.

³⁵Cashna imatapash rurashpa causashpami: ‘Imagupash illajcunaman carana canguichi’ nishpa yachachijurcani. ‘Carajpi japijcunatapash yalimi carajcunaca, ninanda cushijun’ nishpami, Apunchi Jesusca yachachishca. Chaitaca, yarinami canguichi” nijurcami.

³⁶Shina tucuita nishca jipami, tucuicunahuan cungurishpa Pabloca, Diosta mañarca.

³⁷Chai jipami, tucuicuna ninanda huacashpa, Pablotaca ugllarishpa muchashpa, cayacaman ninajurca.

³⁸“Ñucataca, cutinga na ricui ushanchu canguichi” nishpa paicunaman villajpimi, llaqui llaqui tucunajurca. Shina cashpami Pablotaca, barcopi yalichingapaj cumbanajurca.