Read Imbabura Highland Quichua HECHOS 21 Bible Online

HECHOS 21 - Imbabura Highland Quichua bible

HECHOS 21

¹Chai crijcunata cayacaman nishca jipami, barcopi tiarishpa, Cos shuti llactaman rircanchi. Chai cayandi punllami, Rodas shuti llactaman rircanchi. Chaimandaca, Pátara shuti pueblomanmi yalircanchi.

²Chaipica, Fenicia llactaman rijuj barcota japishpami, chai barcopi tiarishpa rircanchi.

³Chipre shuti llactaca, lluqui ladoman cajpimi, Siria llactaman rircanchi. Imalla tiashcata uriajuchingapaj, Tiro shuti pueblopi barco shayarijpimi, ñucanchipash chaipi uriajurcanchi.

⁴Chai pueblopi causanajuj, Jesusta catijcunahuan tuparishpami, canchis punllacaman chaipi quedarcanchi. Paicunaman Diospaj Espíritu yuyaita cujpimi, Pablotaca: “Jerusalenman ama vichai ripaichu” ninajurca.

⁵Canchis punlla tucujpimi, tucui crijcuna huarmicunandi, huahuacunandi chai pueblomanda llujshina ladocaman cumbamurca. Chaipimi, mama cucha manñapi cungurishpa, Diosta mañarcanchi.

⁶Chai jipaca, caishujhuan chaishujhuan ugllarishpa, cayacaman nishpami, cutin barcopi tiarircanchi. Paicunapash, huasiman tigrarcallami.

⁷Tiro shuti pueblomanda barcopi rishpaca, Tolemaida shuti pueblomanmi chayarcanchi. Chaipi causaj crijcunata ricungapaj rishpami, paicunahuan shuj punllata chisharcanchi.

⁸Chai cayandi punlla chaimanda rishpaca, Pablota cumbaj ñucanchindimi, Cesarea shuti puebloman chayarcanchi. Chaipica, ali villaita villaj Felipepaj huasipimi, mingarishpa quedarcanchi. Paica, crijcunata ayudachun canchis runacunata agllashca purami carca.

⁹Felipeca, Dios ima nishcata villaj, chuscu ushicunatami charirca. Chai cuitsacunaca, jarihuan nara tacarishca cuitsacunami carca.

¹⁰Ña tauca punllacunata ñucanchi chaipi cajpimi, Dios ima nishcata villaj Agabo shuti runaca, Judea llactamanda shamurca.

¹¹Paica, ñucanchita uyaj shamushpami, Pablopaj chumbita japishpa chaquindi, maquindi huatarishpa, cashna nirca: —Diospaj jucha illaj Espiritumi, cashna nihuan: ‘Cai chumbita charij runataca, Judea llactapi tiaj Jerusalenbi causajcunami, cashna huatashpa, na israelcunapaj maquipi cushpa saquinga’ nihuanmi— nircami.

¹²Chashna nijpica, ñucanchipash, chaipi causanajuj crijcunapashmi: —Jerusalenman ama vichai ripaichu— nishpa, Pablotaca jarcarcanchi.

¹³Shina nijpimi Pabloca, cashna nishpa tigrachirca: —¿Imashpata huacashpa, ñuca shungupi llaquichihuanguichi? Huatai tucunatapash, na manllanichu. Ashtahuangarin Jerusalenbi huañuchijpipash, Apunchi Jesusta crishcamandaca huañushallami— nircami.

¹⁴Shina nijpipash, na quedangapaj munajpica: —Apunchi Jesús munashcata pactachijuchun— nishpami saquircanchi.

¹⁵Chai jipami, tucuiguta apashpa, Jerusalenman vichai rircanchi.

¹⁶Cesarea shuti pueblomandaca, Jesusta catinajuj huaquingunami ñucanchita cumbashpa shamunajurca. Paicunahuanga, Chipre shuti llactamanda Nasón shuti unaita crij runapashmi shamujurca. Paipaj huasipi ñucanchi mingarichunmi pushamujurca.

¹⁷Jerusalenman ñucanchi chayajpica, crijcunaca cushijushpami mingachirca.

¹⁸Cayandi punllapaj Pablo ñucanchita pushajpimi, Jacobota ricungapaj rircanchi. Chaipica, crijcunata mandaj rucu puracunalla tandanajushcatami japigrircanchi.

¹⁹Pabloca, paicunata alillachu capanguichi nircami. Shina nishpallami, na israelcunaman Diospaj Shimita pai villajujpi, Taita Dios imata rurashcatapash, callarishpa parlajurca.

²⁰Shina parlajpimi paicunaca, Taita Diostaca punchapambagumi cangui ninajurca. Pablotapash cashnami ninajurca: —Canllata ña yachanguimi, huauquigu. Judea llactapica, huaranga huarangacunami Jesustaca crishca. Shina cashpapash paicunaca, tucuicunami Moisés mandashca shimitapash pactachinapachami ninajun.

²¹Ashtahuangarin na israelcunahuan causanajuj, Judea llactamanda gentecunaman, can imashna yachachijtaca, ñami paicunaman villashca: ‘Jari huahuacunataca, circuncisión nishcata na ruranachu. Ñucanchi yachaita ruranacunatapash, na catinachu. Moisés mandashcata ama cazuchunmi, villashpa yachachishca’ ninajushcami.

²²Shina cajpica, ¿imatata rurashun? Can shamushcata yachashpaca, chai ashtaca gentecunaca shamungapachami.

²³Cunanga, cashnata rurai ninchimi: Ñucanchi purapica chuscu runacunami, Diosman rurashapachami nishcata pactachinata charin.

²⁴Diospaj ñaupajpi mapa illaj cangapaca, paicunahuan rishpami, paicuna ajchata rutuchishpapash, culquita can cuna cangui. Shina rurajpica, can imatalla yachachishcata uyajcunapash, tucuicunami llullami yanajunga. Paipash Moisés mandashcataca, aliguta pactachijmari cashca ninajungami.

²⁵Ashtahuangarin na israelpura crijcunamanga, cashna nishpami ña escribircanchi: ‘Yanga dioscunaman carashcata na micunachu. Animalpaj yahuartapash, sipishpa huañuchishca aichatapash na micunachu, napacha huainayanachu’ nircanchimi— nishpami villarca.

²⁶Pabloca, chai chuscundi runacunata pushashpami, chai cayandi punllapaj mapa illaj tucushca jipaca, Diospaj huasiman yaicurca. Diosman imagutapash cungapaca, mapa illaj cana punllacuna pactamushcatami villangapaj yaicurca.

²⁷Ashtahuangarin chai canchis punllacuna ña tucurinalla cajpimi, Judea llactamanda Asia llactapi causaj tauca runacuna, Diospaj huasiman shamurca. Paicunaca, Pablo chai ucupi cajta ricushpami, chaipi ashtaca gentecuna fiñachun caparishpa, ñapash japinajurca.

²⁸Paicunaca, cashna nishpami caparinajurca: “¡Israel runacuna, ayudaichi! Cai runami, cai llactapi causaj gentecunatapash, Moisés mandashcatapash, Diospaj cai huasitapash nalicachishpa, tucuicunaman maipipash yachachishpa purijun. Ashtahuambash griego nishca runacunataca, Diospajlla cai ucumanmi, yanga huasimanshna pushamushca” ninajurcami.

²⁹Efeso pueblomanda Trófimo shuti runatami, Jerusalenbi Pablohuan purijujta ricushca carca. Chaimandami chai runatapash, Diospaj huasi ucuman pushashcangami yanajurca.

³⁰Chai pueblopi causajcunaca, tucuilla jatarishpa caparishpami, Diospaj huasiman calpamurca. Paicuna Pablota japishpaca, canllaman aisashpa llujchishpami, pungucunatapash ucha vicharca.

³¹Pablota huañuchingapaj munashpami, Jerusalenbi causajcunaca tucuilla jatarishpa caparinajurca. Chaitami, huaranga soldadocunata mandajman villarca.

³²Chai mandajmi, soldadocunata, patsaj soldadocunata mandajcunata pushashpa, chai gentecunapajman calpamurca. Ashtaca ashtaca soldadocunata, chai mandaj runa pushashpa shamujujta ricushpami, Pablota macanajushpapash saquirca.

³³Chai mandaj chayashpa, Pablota japichun mandashpaca, ishcai cadenahuan huatachunmi mandarca. Shina mandashpami: “¿Pita chashna rurarca?” nishpa tapurca.

³⁴Chaipi ashtaca gentecunaca, shujta shujta maitapash villashpami, ninanda caparinajurca. Chashna ninanda caparinajujpimi, chai mandaj runaca, imamanda chashna caparinajujtapash na yacharca. Chaimandami: “Canguna tiaj shinlli torreman apaichi” nishpa, Pablotaca cacharca.

³⁵Gradascaman ña chayanajujpi, ninandapacha llaquichingapaj gentecunaca catinajujpimi Pablotaca, soldadocunaca huandushpa rinajurca.

³⁶Chai tucuilla gentecunaca: “¡Huañuchishun!” nishpa caparishpa catimunajujpimi, chashna huandushpa rinajurca.

³⁷Shinlli torre ucuman Pablota apajujpimi, chai mandaj runataca: —¿Canman imagutapash ni ushapanichu?— nishpa tapurca. Shina tapujpimi, chai mandaj runaca cashna nirca: —Cambash griego rimaita yachashcanguimi.

³⁸¿Nachu can ñucanchita fiñashpa huañuchingapaj munaj, Egiptomanda runa cangui? ¿Nachu cainani punllacunaca, chuscu huaranga na cazuj runacunata, jichushca pambaman llujchircangui?— nircami.

³⁹Shina nijpimi Pabloca, cashna nirca: —Cilicia shuti llactapi tiaj Tarso shuti jatun pueblomanda, Judea llactamanda yangalla runami cani. Cai tucui gentecunaman ñuca ashaguta rimachun, ¿nacha saquihuanguiman?— nircami.

⁴⁰Chai mandaj runaca rimailla nijpimi, gradaspi shayarishpa chaipi gentecunataca, Pabloca maquihuan ricuchishpa upallaichi nirca. Paicuna ña upalla quedajpimi, hebreo shimipi rimashpa cashna nirca: