Read Imbabura Highland Quichua HECHOS 23 Bible Online

HECHOS 23 - Imbabura Highland Quichua bible

HECHOS 23

¹Chai mandajpura tandanajushcata ricushpami, Pabloca cashna nirca: —Huauquicuna, cunan punllacamanmi Taita Diospaj ñaupajpica, ali yuyaihuambacha ali cazushpa causajuni— nircami.

²Shina nijpimi curacunata mandaj Ananías shuti runaca, Pablota shimipi huactaichi nishpa, paipaj ladopi shayajcunataca mandarca.

³Shina nijpimi Pabloca, cashna nirca: —¿Canga, mandashca shimipi nijunshnachu ñucata tapuchingapaj tiajungui? ¿Canga, mandashca shimita na cazushpachu, ñucata huactachun mandangui? Pirca jahualla yurajyachishca runalla. Shinamandami, Taita Diosca candapash huactanga— nircami.

⁴Shina nijpimi, chaipi tiajcunaca: —¿Taita Dios churashca mandaj curatachu chashna nalicachishpa rimangui?— ninajurca.

⁵Shina nijpimi Pabloca, cashna nirca: —Huauquicunalla, paica curacunata mandaj cajtaca, na yachapashcanichu. Dios escribichishca Shimipica: ‘Cambaj llactapi mandajtaca, ama nalicachinguichu’ nijunmi— nircami.

⁶Pablo chashna nijushpaca, chai tandanajushca puracunapi, huaquingunaca saduceocuna, huaquingunaca fariseocuna tianajujtami ricurca. Shina ricushpami, tucuicunata shinlli rimashpa cashna nirca: —Huauquicunalla, ñucaca fariseo runapaj churi cashpami, ñucapash fariseo cani. Huañushcacuna causarinata cushijushpa shuyajushcamandami, cashna tapuchi tucujuni— nircami.

⁷Shina nijpimi fariseocunahuan, saduceocunahuan paicunapura ninanda fiñanajurca. Shina fiñanajushpami, chaipi tandanajushca tiajcunaca chaupirirca.

⁸Saduceocunaca, huañushcacuna causarinata, angelcuna tiajta, espiritucuna tiajtapash na crinllu. Ashtahuangarin fariseocunaca, chai tucui tiajtami crin.

⁹Paicuna purami, ashtahuan ninanda caparirca. Shina cashpami, mandashca shimita yachachij fariseo puramanda huaquinguna fiñarishpa jatarishpaca, cashna ninajurca: —Cai runa ima nalita rurashcapash, na ricurinllu. Ashtahuangarin shuj espíritu cashpa, na cashpaca shuj ángel cashpapash, paiman rimashca cajpica, Taita Diostaca na fiñachinachu canchi— ninajurcami.

¹⁰Paicunapura ninanda fiñanajujpimi, huaranga soldadocunata mandaj runaca, Pablota ñutushpa huañuchinataca manllarca. Shina manllashpami, soldadocunataca: “Paicunapaj chaupimanda Pablota llujchishpa, canguna tianajuj shinlli torreman apaichi” nishpa mandarca.

¹¹Chai tutallatami Apunchi Jesusca, Pabloman ricurishpa cashna nirca: “Pablo, ama manllaichu. Imashnami Jerusalenbi ñucamanda villajurcangui, chashnallata Roma pueblopipash villagrinapachami cangui” nircami.

¹²Chai tutamandami, Judea llactapi causanajuj huaquin runacunaca, shujllashnalla yarishpa cashnata rurashunchi ninajurca: “Cunanga, Pablota huañuchingacaman na micushpa, na ufiashpami shuyana canchi. Chaita na pactachishpaca, ima llaquipash japishpami ali canman” nishpami juramentunajurca.

¹³Chashna huañuchingapaj munashpa juramentushca runacunaca, chuscu chunga yalishnami carca.

¹⁴Paicunaca, curacunata mandajcunapajman, mandaj rucucunapajman rishpami cashna ninajurca: —Ñucanchica, chaita na pactachijpica, ima llaquipash japishpami ali canman nishpami, cashna juramenturcanchi: ‘Pablota huañuchingacaman, imatapash na micunachu canchi’ nircanchimi.

¹⁵Cunanga, cashna rurashunchi: Mandaj puralla cangunapura tandanajushpa, huaranga soldadocunata mandajtaca: ‘Pablota ashtahuan ali tapuchingapaj, cayapaca apamupai’ nij tucupaichi. Ñucanchica, chaupi ñambimi huañuchingapaj chapanajushun— ninajurcami.

¹⁶Chashna pacalla chapashpa huañuchingapaj yarishcataca, Pablopaj panipaj churimi uyarca. Paimi, soldadocuna tiaj shinlli torreman yaicushpa, Pabloman villarca.

¹⁷Shina villajpimi, patsaj soldadocunata mandaj puramanda shuj runata Pablo cayashpa, cashna nirca: —Cai huambragutaca, huaranga soldadocunata mandajpajman pushapai. Paimi, shuj villanata charipan— nircami.

¹⁸Shina nijpimi, huaranga soldadocunata mandajpajman chai huambrata pushashpaca cashna nirca: —Prezu tiajuj Pablomi ñucata cayashpa, cai huambrataca cambajman pushapai nihuan. Canman imatachari villanata charin ninmi— nircami.

¹⁹Shina nijpimi mandaj runaca, chai huambrata maquimanda ashaguta pushashpa: —¿Imatata villagrihuangui?— nishpa tapurca.

²⁰Shina tapujpimi chai huambraguca, cashna nirca: —Mandaj puralla tandanajushpa, Judea llactapi causajcunaca, Pablota ashtahuan ali tapuchishun nij tucushpallami: ‘Paicunapajman caya punlla pushamupai’ nishpa, canda mingangapaj parlarinajun.

²¹Ashtahuangarin chashna nishpa shamujpipash, ama umai tucupanguichu. Runacunaca, chuscu chunga yalimi huañuchingapaj chapagrinajun. Paicunaca, cashna nishpami juramentushca: ‘Pablota huañuchingacaman na micushpa, na ufiashpa shuyanami canchi. Chaita na pactachijpica, ima llaquipash japishpami ali canman’ ninajunmi. Cunanga, can imata nijtallami shuyashpa chapagrin— nircami.

²²Chai mandajman chashna villajpimi: —Ñucaman cashna villashcataca, pacta pimambash villanguiman— nishpa, chai huambrataca tigrachirca.

²³Patsaj soldadocunata ishcai mandajcunata cayashpami, huaranga soldadocunata mandaj runaca cashna nirca: “Cunan tutayashcapi, Cesarea shuti puebloman richunga, chaquilla rij ishcai patsaj soldadocunata tandachinguichi. Shinallata caballopi tiarij canchis chunga soldadocunatapash, lanzata charij ishcai patsaj soldadocunatapash tandachinguichi.

²⁴Pablo tiarichumbash, caballocunata alichishpa cunguichi. Paitaca, mandaj Félix shuti runapajman llaquipash illajta chayachinguichi” nircami.

²⁵Félix shuti runaman cuchunmi shuj cartatapash, cashna nishpa escribirca:

²⁶“Claudio Lisias ñucami, ninanda alicachi tucushca mandaj Félix quiquindaca, alillachu causajupangui nishpa cachamupani.

²⁷Cai runataca huañuchingapajmi, Judea llactapi causajcunaca japishpa charishca carca. Paitaca, Roma llactapura cajta yachashpami, soldadocunahuan rishpa cacharichircani.

²⁸Imamanda chashna juchachinajujta yachangapaj munashpami, mandaj puralla tandanajushcapaj ñaupajman pusharcani.

²⁹Chaipimi, mandashca shimicunata na pactachinllu nishpalla juchachinajurca. Ñucapica, paica huañuchi tucungapaca, ima nalitapash na rurashcachu carca. Prezuna huasipipash, na churanashnami carca.

³⁰Ashtahuangarin: ‘Judea llactapi causajcunamari, cai runataca huañuchingapaj pacalla chapanajun’ nishpami villahuarca. Chaimandami, cambajman ucha cachamuni. Paita huañuchingapaj munajcunataca, cambaj ñaupajpi imatapash nigrichi nircanimi. Caicunata nishpallami, cayacaman” nishpa escribirca.

³¹Chai soldadocunaca, paicunata mandashcashnallatami Pablotaca, chai tutallata pushashpa, Antípatris shuti pueblocaman rirca.

³²Chai cayandi punllami, chaquilla rij soldadocuna, caballopi rij soldadocuna, Pablota pushashpa richun saquishpa, shinlli torreman tigramurca.

³³Chai cayandi punlla Cesarea shuti puebloman chayashpaca, mandajman cartatara punda cushpami, Pablotapash cushpa paipaj ñaupajpi saquirca.

³⁴Cartata chai mandaj leyishpaca: —¿Maimandata cangui?— nishpami, Pablotaca tapurca. Shina tapujpimi: —Cilicia shuti llactamandami capani— nirca.

³⁵Shina nijpica: —Canda juchachijcuna shamujpimi, can imata nijtapash uyasha— nirca. Shina nishpaca, Herodes rurashca jatun huasipi Pablota churashpami, soldadocuna cuidachun cacharca.