Read Imbabura Highland Quichua HECHOS 24 Bible Online

HECHOS 24 - Imbabura Highland Quichua bible

HECHOS 24

¹Picha punlla jipaca, curacunata mandaj Ananías shuti curami, huaquin mandaj rucucunahuan, urai rirca. Shinallata mandashcata yachaj, Tértulo shuti runatapashmi paicunamanda rimachun, Cesarea shuti puebloman pushashpa rirca. Paicunaca, Félix shuti mandajpaj ñaupajpi, Pablota juchachishpa villangapajmi rirca.

²Pablota cayachimujpimi, Tértulo shuti runaca paita juchachishpa, chai mandajman cashna nishpa villajurca: —Imatapash canga, aliguta yarishpa rurajushpami, cai llactataca aligutapacha mandajungui. Shina mandajpimi, casilla aliguta causashpa, ninanda cushijunchi.

³Ninanda alicachi tucushca Félix, quiquindaca ima horapash maipipash ninanda cushijushpami chasquinajunchi.

⁴Cunanga, ama ashtahuan fiñachingapaj, tucuipaj ali cachun ruranata yachanshnallata, ashaguta uyapai.

⁵Cai runataca, huañuchij ung:ui cajta, Judea llacta puracunata fiñanajuchi callarishpa, tucui cai pachapi pandachishpa purijtami ricushcanchi. Shinallata Nazaret pueblomanda runa yachachishcata catijcunatapash, cai runaca mandajmi cashca.

⁶Shina cashpami Diospaj huasimambash, yanga huasimanshna yaicujushca. Chaimandami cai runataca, ñucanchita mandashcapi nijunshna, tapuchingapaj japircanchi.

⁷Ashtahuangarin huaranga soldadocunata mandaj Lisias shuti runa shamushpaca, ñucanchica na cacharingapaj munajpipash, quichushpami aparca.

⁸Shina apashpami, cai runata juchachijcunataca quiquimbajman cachamushca. Imamanda ñucanchi paita juchachinajujtapash, quiquinllata tapuchishpa tucuita yachapanguillami— nijurcami.

⁹Chaipi shayanajuj, Judea llacta runacunapashmi: —Cai tucui villashcacunaca chashnapachami— ninajurca.

¹⁰Shina nijpimi chai mandaj runaca, Pablo imatapash rimachun nishpa, maquihuan ricuchirca. Shina ricuchijpimi Pabloca, cashna nijurca: —Ña tauca huatacunata, cai llactapaj juez cajtami yachapani. Shina cajpimi, ñuca imatapash nalita na rurashcataca, cushijuihuan villapasha nipani.

¹¹Paicunatapash tapupailla. Diosta ninanda alicachingapaj Jerusalenman ñuca vichai rishcapash, chaira chunga ishcai punllallami tucujun.

¹²Chaipica, pihuan fiñanajujtapash na ricuhuarcachu. Diospaj huasipi, ñucanchi tandanajuj huasicunapi, chai pueblopipash ashtaca gentecuna jatarichun ima nalita ñuca rurajujtapash, na japihuarcachu.

¹³Caipi ñucata juchachishpa shayanajujcunaca, chashnapachami carca nishpa, canman villaitaca napacha ushanllu.

¹⁴Ashtahuangarin cashnatami quiquinman villapani. Ali Ñandarami, llullata yachachishcamari ninajun. Chai Ñanguta catijunshnallatami, ñaupa ñuca taitacunapaj Taita Diosta servijuni. Mandashca shimipi nijujtapash, Dios ima nishcata villajcuna escribishca shimitapash, tucuitami crini.

¹⁵Imatapash cashcatapacha rurajcuna, imatapash cashcatapacha na rurajcuna huañushcatapash Taita Dios causachinatami cushijushpa shuyajuni. Paicunapash, chashnallata crishpami shuyanajun.

¹⁶Shina cashpami, Diospaj ñaupajpi, gentecunapaj ñaupajpipash, ama fiñachingapaj, aliguta causanatalla yarijuni.

¹⁷Ashtahuangarin tauca huatacuna yalishca jipami, carashca culquita ñuca llactapi causajcunaman saquingapaj shamurcani. Shinallata Diosman imagutapash carangapajmi shamurcani.

¹⁸Diospaj ñaupajpi mapa illaj cangapaj armashca jipami, Diospaj huasi ucupi purijurcani. Chaipi cajtami, Asia llactapi causanajuj huaquin Judea llactamandacuna ñucataca japij shamurca. Chaipica, ashtaca gentecunahuan tandanajushcatapash, ninanda caparinajujtapash na japihuarcachu.

¹⁹Ñucata imata juchachina tiajpipash, paicunami cambaj ñaupajman shamunman carca.

²⁰Ñucataca, mandaj puralla tandanajushpami tapuchihuarca. Ñuca ima nalita rurashcata tarishca cashpaca, paicunallata canman villachunlla.

²¹Paicuna purapi cashpami, shinllita caparishpa, cashna nishpa rimarcani: ‘Huañushcacunata causarinata villashcamandami, cunanga cangunapaj ñaupajpi tapuchi tucujuni’ nishpami rimarcani— nijurcami.

²²Félix runaca, Pablo chashna villajpi uyashca jipami, crijcuna imashna causanajushcata ali yachashpa, cashna nirca: —Huaranga soldadocunata Lisias shuti mandaj shamujpimi, canguna cashna ninajujtaca, aligutapacha yachasha— nishpa saquichirca.

²³Patsaj soldadocunata mandajtaca, cashnami nirca: “Pablotaca cuidajushpapash, asha asha cacharingui. Paita ali rijsijcuna imagutapash carashpa ricungapaj shamujpica, ama mitsashpa saquinguilla” nishpami mandarca.

²⁴Huaquin punllacuna jipami, Judea llactamanda Drusila shuti paipaj huarmindi Félix runaca, prezuna huasiman shamurca. Paica, Pablota cayachunmi cacharca. Pablo shamushpaca, Jesucristota imashna crinata villajpimi, aliguta uyarca.

²⁵Pablo villajushpaca, cashnami nirca: —Taita Dios munashcashna imatapash cashcatapacha rurashpami causana, nali munaicunatapash mishanami. Shinallata imata rurashcatapash tucuicunamanmi, Taita Diosca shamui punllapi ricuchinga— nircami. Shina villajpimi Félix runaca, ninanda manllarishpa: —Cunanga ripailla. Cutin uyangapaj munashpaca, cayapashallami— nirca.

²⁶Cacharichun Pabloca culquita cunga yashpami Félix runaca, cutin cutin parlangapaj Pablotaca cayajurcalla.

²⁷Ña ishcai huata jipami Félix runapaj randica, Porcio Festo shuti runa mandai callarirca. Ashtahuangarin Félix runaca, Judea llacta runacunapaj ñaupajpi ali ricuringapajmi, Pablotaca prezullata saquirca.