Read Imbabura Highland Quichua HECHOS 25 Bible Online

HECHOS 25 - Imbabura Highland Quichua bible

HECHOS 25

¹Chai llactata mandangapaj Festo shuti runa yaicushpaca, quimsa punlla jipami, Cesarea shuti pueblomanda Jerusalenman vichai rirca.

²Chaiman chayajpimi Pablota juchachingapaca, curacunata mandajcunapash, Judea llactata mandajcunapash, Festo shuti runapajman rirca.

³Paitami cashna ninajurca: —Pablotaca, ñucanchi mañashcaguta uyashpa, Jerusalenman cachamupai— ninajurcami. Paita cachamujpica, chaupi ñambi chapashpa huañuchingapajmi, paicunapura parlarishpa, chashna mañanajurca.

⁴Ashtahuangarin Festoca, cashna nishpami tigrachirca: —Pabloca, Cesarea pueblopimi vichariajun. Ñucapash, chaiman ñami rigrijuni.

⁵Canguna purapi maijambash ri ushashpaca, ñucahuan Cesarea puebloman jacuchilla. Pai huañuchishcashna nalita rurashca cajpica, chaipimi juchachi ushanguichi— nircami.

⁶Festo shuti runaca, Jerusalenbi pusaj punllata, na cashpaca chunga punllata paicunahuan cashpami, Cesarea puebloman tigrarca. Cayandi punllami paica mandangapaj, jatun tiarinapi tiarishpa, Pablota apamuchun cacharca.

⁷Pablota chaiman apamujpica, Jerusalenmanda shamushca Judea llacta runacunaca, chaupipi churashpami shayarirca. Paicunaca, Pablotaca ashtaca nalicunata rurashca nishpami juchachishpa villanajurca. Shina ninajushpapash, chashnapacha cajtaca na ricuchi usharcachu.

⁸Cacharihuachun yashpami Pabloca, cashna nirca: —Judea llacta runacunata mandashca shimipi nijushcatapash, na fiñashcanichu. Diospaj huasitapash, na yangapi churashpa juchata rurashcanichu. Cesartapash nalicachishpaca, na rimashcanichu— nircami.

⁹Ashtahuangarin Festo shuti runaca, Judea llacta runacuna alicachihuachun yashpami Pablotaca, cashna nishpa tapurca: —Canda cashna ninajujtaca, Jerusalenbimi imatalla rurashcatapash ali tapuchingapaj munani. ¿Chaiman ringapaj munanguichu?— nircami.

¹⁰Shina nijpimi Pabloca, cashna nirca: —César churashca tapuchijpaj ñaupajpimi cani. Judea llacta runacunata imatapash nalita ñuca na rurashcataca, canllata alimi yachahuangui.

¹¹Ima nalitapash, huañuchi tucuna ima llaquitapash rurashca cashpaca, huañuchi tucuimanllami. Ashtahuangarin paicuna juchachishcashna, imamanda ñucata llaquichina na tiajpica, pipash ñucataca na paicunapajman cachangallachu. Ñucataca, César tapuchihuachun ninimi— nircami.

¹²Shina nijpimi Festo shuti runaca, paiman yuyaita cuj runacunahuan parlarca. Chai jipami Pablotaca, cashna nirca: —Canga: ‘César ñucata tapuchihuachun’ ninguimi. Cunanga, Cesarpajmanmi rina cangui— nircami.

¹³Huaquin punllacuna yalishca jipami, Agripa shuti jatun mandajca, Berenice shuti huarmindi, Cesarea shuti pueblopi Festo shuti runata ricungapaj shamurca.

¹⁴Ña tauca punllacunata, paicunaca chaipi cajpimi Festo shuti runaca, chai jatun mandajman Pablo imashna cajta parlashpa, cashna nijurca: —Félix shuti runa llujshishpaca, shuj runatami prezushcalla tiachun caipi saquishca.

¹⁵Chaimanda parlangapaj Jerusalenman ñuca rijpica, curacunata mandaj curacunandi, Judea llacta runacunata mandaj rucucunandimi, ñucapajman shamurca. Paicunaca, cai runata ninanda llaquichipai ninajurcami.

¹⁶Shina ninajujpimi, paicunaman cashna nishpa tigrachircani: ‘Juchachi tucuj runaca, juchachijcunapaj ñaupajpica ima nalitapash na rurarcanichu ninata charinrami. Na chashna chimbapurashpa rimajpica, Roma llactamanda mandajcunaca, na huañuchi ushanachu canchi’ nircanimi.

¹⁷Shina nijpimi, paicunaca tandanajushpa, caiman catimurca. Paicuna shamujpica, ñuca mandangapaj tiarinapi, cayandi punllallata tiarishpami, chai runata uchalla apamuchun cacharcani.

¹⁸Paitaca, nali runapachami canga yarcanimi. Ashtahuangarin paita juchachijcunaca, ima nalita rurashcatapash paipaj ñaupajpica na ricuchircachu.

¹⁹Paicunaca, pai imata crishcatallami fiñashpa rimanajurca. Shinallata: ‘Jesús shuti runa huañushpapash, causajunmi’ nishpami, Pabloca shinllitapacha villajurca. Chaitallami juchachinajurca.

²⁰Chashna ninajujpi ñuca na yachai ushashpami, Pablotaca cashna nircani: ‘Can imatalla rurashcata ricuchun, Jerusalenman ¿nachu ringapaj munanguiman?’ nishpami tapurcani.

²¹Shina nijpica: ‘Augusto César tapuchihuachun’ nircami. Shina nijpimi, chai jatun mandajpajman paita cachangacaman, prezu tiajuchunlla nircani— nijurcami.

²²Shina villajpimi Agripa runaca, Festo shuti runata cashna nirca: —Ñucapash chai runa villajtaca uyangapajmi munaiman— nijpimi, Festo runaca: —Caya uyanguillami— nirca.

²³Chai cayandimi Agripa shuti runaca, Berenice shuti huarmindi juyailla churajunata churajurca. Paicunaca, huaranga soldadocunata mandajcunandi, chai pueblopi mandajcunandimi, Festo shuti runa tapuchina ucuman shamurca. Paicuna chayajpimi Festo shuti runaca, Pablota pushamuchun cacharca.

²⁴Pablo chayamujpimi Festo shuti runaca, cashna nijurca: —Agripa shuti jatun mandajpash, caiman shamushpa ñucanchihuan tandanajushca tucuicunapash, uyahuaichi. Caipi shayajuj cai runataca Jerusalenbipash, cai pueblopi causanajuj, Judea llacta ashtaca runacunapash, tucuillami cai runaca na causanachu nishpa caparinajun.

²⁵Ashtahuangarin nalita rurashcamanda huañuchi tucunapacha cajtaca, paipica na tarinichu. Paillata: ‘Augusto tapuchihuachun’ nijpimi paitaca, chaiman cachanata yarircani.

²⁶Imapash nalitapacha rurashcataca, paipica na tarinichu. Shina cajpimi, ñucata mandajpajman cachangapaj imata nishpa escribitapash na ushani. Agripa shuti jatun mandajlla. Chaimandami paitaca, tucui caipi tiajcunapaj ñaupajman, ashtahuanga quiquimbaj ñaupajman pushamuchun cacharcani. Can paita imashna cashcata tapuchishpaca, imatallapash escribi ushapashami.

²⁷Shuj prezuta cachangapaca, imamanda juchachi tucushcatapash, escribishcahuanmi cachani. Na escribishpa cachashpaca, imatapash na yachashcashnami ricugrini yanimi— nijurcami.