Read Imbabura Highland Quichua HECHOS 27 Bible Online

HECHOS 27 - Imbabura Highland Quichua bible

HECHOS 27

¹Mandaj Festo runaca, ñucanchita Italia llactaman barcopi cachangapajmi yarirca. Paimi Pablotapash, shuj prezu tiajcunatapash, patsaj soldadocunata mandaj Julioman cushpa cacharca. Chai Julioca, Augusta nishpa shutichi tucushca ashtaca soldado purami carca.

²Adramitio shuti pueblomandaca, barcopi tiarishpami rircanchi. Chai barcoca, Asia llactapi tiaj pueblo manñacunapi shayarishpandi yalinami carca. Macedonia shuti llactapi tiaj Tesalónica shuti pueblomanda Aristarco shuti runapash, ñucanchihuanmi rijurca.

³Chai cayandimi, Sidón shuti puebloman chayarcanchi. Chai mandaj Julioca, Pablotaca ninandami llaquirca. Shina llaquishpami Pablotaca, pai ali rijsijcunapajman rijpi, imagutapash carachun cacharirca.

⁴Chai pueblomanda llujshingapaca, facha huatashcacunata vichai pascashpami barcopi rinajurca. Shina rinajujpi huaira ninanda tuparimujpimi, Chipre shuti llactataca ali ladota yalircanchi.

⁵Cilicia shuti, Panfilia shuti llactacunaca, mama cucha chimba ladoman cajpimi rinajurcanchi. Shina rishpaca, Licia shuti llactapi tiaj Mira shuti pueblomanmi chayarcanchi.

⁶Chaipimi, patsaj soldadocunata mandaj runaca, Alejandría shuti pueblomanda Italia llactaman rijuj barcota japishpa, ñucanchitapash chaipi pusharca.

⁷Ninanda huaira tuparimujpimi, na ucha ri ushashpa, alimandalla rircanchi. Shina rinajushpami, Gnido shuti pueblo chimba puraman catishpalla chayarcanchi. Huairajujpilla na ri ushashpami, Salmón shuti alpa llujshirishca ladota yalircanchi. Creta shuti llacta huashatami muyurcanchi.

⁸Chashna na ri ushashpami, manñatalla rishpa, barcocuna shayarina Lasea shuti pueblo ladoman manñata rishpa chayarcanchi. Chai pushtutaca, Ali Shayarinami nishpa shutichishcami carca.

⁹Barcopi ringapaca, llaqui japinalla cajpimi, tauca punllacunata shuyashpa, na ucha ri usharcanchi. Ninan huairahuan tamiana quillacuna chayajujpimi, na ri usharcanchi. Shina cajpimi Pabloca, paicunata shinllita tacurishpa,

¹⁰cashna nirca: —Tucuilla caipi rinajuj cumbacuna. Huairahuan tamiana quillacunapira rishpaca, ninan llaquita aparinga yanimi. Cai barcopash, caipi imata apajushcapash, yacupimi chinganga. Ñucanchipash huañuringami— nircami.

¹¹Ashtahuangarin patsaj soldadocunata mandaj runaca, na uyarcachu. Shinamandami chai barcota purichij runahuan, barcopaj dueño runahuan nishcatara ashtahuan uyarca.

¹²Tamiana quillacunapica, barco chaipi shayangapaca, nalichu carca. Shina cajpimi, Creta shuti llactapillata tiaj Fenice shuti pueblocaman ringapaj, ashtacacuna munarca. Chaipica ura ladota, janaj ladota llujshinalla cajpimi, tamia quillacunapica chaipi yaligrishun ninajurca.

¹³Vichai ladomanda alilla huairamujpimi, cunanga ringapaj alimi cagrin ninajurca. Shinamandami, barcota shayachij jirrucunataca, tandachishpa ri callarirca. Shina rishpaca, Creta shuti llacta manñatami rinajurca.

¹⁴Ña ashata rijushca jipaca, ninan huaira ñapash tuparimushpami, barcota cuyuchirca.

¹⁵Barcota huaira apajujpica, na imatapash rurai ushashpami, huaira apachun saquircanchi.

¹⁶Mama cucha chaupipi tiajuj Clauda shuti uchilla llacta huashata rijujpimi, na yapa huaira tuparirca. Shina cajpimi, uchilla canoata aisashpa rijujtaca, ninanda shaijushpa jahuaman churarcanchi.

¹⁷Chai uchilla canoata jahuaman churashpaca, barco ama faquirichun nishpami, ninanda huatanajurca. Yacu ucupi t'iyu alpa lomayashca Sirte nishca ladoman rishpa, pambarinatami ninanda manllarca. Chaimandami, huaira maiman apachumbash nishpa, jatun facha huatashcacunata pascarca.

¹⁸Chai cayandi punllapash, shinllitapacha ninan huairahuan tamiajujpimi, barcopi imalla tiashcatapash, yacupi shitai callarirca.

¹⁹Quimsa punllacaman chashnalla cajpimi, barcota purichingapaj imata charishcatapash, ñucanchi maquihuambacha shitarcanchi.

²⁰Tauca punllacamanmi indipash, luzerocunapash na ricurirca. Shina huairahuan tamia ashtahuan catijujpimi, quishpirinata shuyanataca na ashtahuan charircanchi.

²¹Tauca punllacunatami, micuitapash na micurcanchi. Shina cajpimi, tucuillapaj chaupipi Pablo shayarishpa, cashna nijurca: —Caipi rinajuj cumbacuna. Ñuca nishcata uyashpaca, napacha Cretamanda llujshishpa shamunchimanllu carca. Na cashna chingachishpa, llaquitapash na apanchimanllu carca.

²²Ashtahuangarin cushilla cangapajmi, cashna aliguta yarichini: Shujllapash na huañunachu canchi. Cai barcollami, huashajushpa chinganga.

²³Cunan tutami, Taita Diospaj angelca villahuarca. Diostami, ñucaca servishpa causani.

²⁴Chai angelmi, cashna nihuarca: ‘Pablo, ama manllaichu. Cesarpajman chayagrinapachami cangui. Canda juyashpami, cai barcopi rinajuj runacuna huañunamandaca, Taita Diosca tucuillata quishpichisha nijun’ nihuarcami.

²⁵Chashnata yachashpami, cangunaca cushijuna canguichi. Taita Dios ñucaman villashcata pactachinataca crinipachami.

²⁶Shina cashpapash mama cucha chaupipi tiajuj llactaman, maiman cashpapash chayashpami ali canchiman— nijurcami.

²⁷Ña ishcai semanata, huaira caiman chaiman apashpa rijujpimi, Adria shuti yacuman ñapash shuj tuta chayarcanchi. Ña chaupi tutami, barcota purichijcunaca, alpamanmi chayanchi yanajurca.

²⁸Yacu junduta medingapaca, cabiapi jirruta huatashpami cacharirca. Shina ricujpica, quimsa chunga sucta metrotami charirca. Chaimanda ashata rishpa, cutin medijpica, ishcai chunga canchis metrotami charirca.

²⁹Rumipi huactarinata manllashpami, barco shayarichun, chuscu jirrucunata huashaman cacharirca. Shina cacharishpaca, ucha punllayashcanman yashpami shuyanajurca.

³⁰Nara punllayajpillatami barcota purichijcunaca, saquishpa ringapaj munanajurca. Shina munashpami, ñaupaj ladomambash, jirrucunata cacharishun nij tucushpalla, uchilla canoataca uriajuchi callarirca.

³¹Shina ruranajujpimi, patsaj soldadocunata mandajtapash, chaipi rinajuj soldadocunatapash, Pabloca cashna nirca: —Caicuna barcota saquishpa rijpica, huañunguichimi— nircami.

³²Chashna nijpimi soldadocunaca, chai uchilla canoata huatashcataca fitishpa, yacupi chingachun saquirca.

³³Ña punllayajujpimi, tucuicuna micuchun Pabloca, aliguta yarichishpa cashna nirca: —Ña ishcai semanatami, puñuitapash na puñushpa, imatapash na micushpa, yarjai shamunguichi.

³⁴Ama ungungapaj, imagutapash micupanguichi ninimi. Cangunapaca, shuj ajchallapash na chingangachu— nircami.

³⁵Cashna nishpallami Pabloca, tandata japishpa, tucuicunapaj ñaupajpi Taita Diosta pashi nishpa, tandata chaupishpa micui callarirca.

³⁶Shina micujta ricushpaca, paicunapash cushijushpami tucuicuna micurca.

³⁷Chai barcopica, ishcai patsaj canchis chunga sucta puracunami rinajurcanchi.

³⁸Ali micushca jipaca, barco fangalla tucuchun nishpami, trigotaca yacuman shitanajurca.

³⁹Ña punllayajpimi, barcota purichijcunaca, shuj llactata ricurca. Chai llactata na rijsishpapash, yacu yaicurishca ricurijpimi, barco shayaringapaca alishnalla ricurijpi, chaiman ringapaj munarca.

⁴⁰Yacu ucuman cacharishca jirrucunata charijuj huascacunata chaipillata fitishpami, mama cuchaman shitanajurca. Barcota caiman, chaiman purichij caspicunata huatashcatami pascanajurca. Jatun fachatapash, ñaupajman huatashpami shayachirca. Yacu manñaman huaira apachunmi, shina ruranajurca.

⁴¹Chaipica, ishcandi ladomanda t'iyu alpata yacu lomayachishcami tiarca. Ñaupaj ladoca ñapash pambarijpimi na llujshi usharca. Shina tiajujpica, mama cucha yacu ninanda shitarimushpami, barcotaca huashata faquirca.

⁴²Shina faquirijpimi, prezu apamujushca runacuna ama yacumanda llujshishpa pacajuchun, soldadocunaca huañuchishunlla ninajurca.

⁴³Ashtahuangarin patsaj soldadocunata mandaj runaca, Pablo huañuchun na munashpami, cashna nirca: “Yacupi huambunata yachajcunara, yacuman punda shitarishpa, manñaman llujshigrichi.

⁴⁴Shujcunaca tablacunapi, barco faquirishca caspicunapi, huambushpa llujshigrichi” nircami. Shina rurashpami llaquitapash na apashpa, tucuilla pambaman llujshircanchi.