Read Imbabura Highland Quichua HECHOS 28 Bible Online

HECHOS 28 - Imbabura Highland Quichua bible

HECHOS 28

¹Tucuilla ña quishpirishca cashpami, mama cucha chaupipi tiajuj Malta shuti llactaman llujshishcata yacharcanchi.

²Chai llactapi causajcunaca ñucanchitaca, ali shunguhuambachami chasquirca. Tamiajujpi chirichinajujpimi, ninata japichishpa, ñucanchitaca cunuchun cayarca.

³Chaipimi Pabloca, chaquishca yamdacunata tandachishpa, ninapi churajurca. Shina churajujpimi, nina rupajujmandaca, huañuchijlla culebra ñapash llujshishpa, Pablopaj maquita canirca.

⁴Chaipi causajcunaca chai culebra, Pablopaj maquipi huarcuriajta ricushpaca, cashnami ninajurca: “Huañuchij runapachami yarin. Yacupi na huañushpa llujshimujpipash, imatapash cashcatapacha ruraj diosca, nallata causachun cai runataca saquinllu” ninajurcami.

⁵Ashtahuangarin Pabloca chafsishpami, chai culebrataca ninapi shitarca. Shina shitashpaca, na imapash tucurcachu.

⁶“Ñami punguinga, na cashpaca huañushpa urmangami” nishpami, Pablotaca ricunajurca. Ña unaita ricunajujpillata, ima nalipash na ricurijpimi: “Cai runaca, diosmari yarin” ninajurca.

⁷Ñucanchi cununajuj lado alpacunaca, chai llactata mandaj Publio shuti runapaj alpami cashca carca. Paimi, ñucanchitaca llaquishpa, quimsa punllacaman mingachirca.

⁸Chai Publio shuti runapaj taitaca, tabardillo ung:uihuan, yahuar ishpai ung:uihuambash huañujujmi sirijurca. Chai huañujujta Pablo ricungapaj rishpami, Diosta mañashpa, huañujujpaj uma jahuapi maquita churashpa alichirca.

⁹Shinamandami, chai llactapi causanajuj shuj huañunajuj gentecunapash shamushpa, ali tucunajurca.

¹⁰Chai gentecunapash, ñucanchita ninanda alicachishpami, imatapash ricuriashpa caranajurca. Ñucanchi barcopi ña rigrinajujpica, ñucanchi ima minishtishcatapash carashpami cacharca.

¹¹Ña quimsa quillata chaipi cashca jipami, Cástor nishpa, Pólux nishpa shutichishca barcopi tiarishpa llujshircanchi. Chai barcoca, Alejandría shuti pueblomanda shamujushpami, huairahuan tamia quillacuna yalingacaman, chaipi shayajurca.

¹²Siracusa shuti puebloman chayashpaca, quimsa punllacamanmi chaipi carcanchi.

¹³Chaimanda llujshishpaca, chai llacta manñatalla rishpami, Regio shuti puebloman chayarcanchi. Chai cayandica, vichai huaira shamushpami, barcotaca apajpi ishcai punllahuanga, Puteoli shuti puebloman chayarcanchi.

¹⁴Chai pueblopi causaj crijcunahuanmi tuparircanchi. Paicunaca: “Canchis punllacaman quedapaichi” nijpimi, quedarcanchi. Chai jipaca, Roma puebloman rircanchillami.

¹⁵Roma pueblopi causanajuj crijcunaca, ñucanchi shamunajun nijta uyashpami, Apio Plaza shuti pueblopipash, Quimsa Mingarina shuti pueblopipash, ñucanchitaca tuparimurca. Paicunata Pablo ricushpaca, Taita Diosta pashi nishpami, ninanda cushijurca.

¹⁶Roma puebloman chayashpaca, patsaj soldadocunata mandajca, chai prezucunataca chai llactapi soldadocunata mandajmanmi curca. Ashtahuangarin Pablotaca, shuj huasipimi shuj soldado cuidajpi causachun saquirca.

¹⁷Roma puebloman Pablo chayashca quimsa punllapimi, cashna tucurca: Chai llactapi, Judea llactamanda runacunata mandajcunata tandanajuchun, cayachun cachashpami Pabloca, cashna nijurca: —Caiman shamushca huauquicuna. Ñucanchi llactapi causajcunataca, na fiñachircanichu. Ñucanchipaj ñaupa taitacuna, imata rurachun saquishcatapash nalicachishpaca, na imatapash nijurcanichu. Ashtahuangarin Jerusalenbi causajcunaca, Roma llactamanda mandajcunamanmi, ñucataca prezu japichishpa cachamuhuan.

¹⁸Chai mandajcunami, imashna cashcata ricungapaj tapuchihuarca. Shina tapuchishpaca, nalita rurashcamanda huañuchi tucunapacha cashcataca na tarishpami, cacharishunlla ninajurca.

¹⁹Ashtahuangarin Judea llacta runacunaca, ñucata ninanda fiñanajujpimi: ‘César ñucataca tapuchihuachun’ nircani. Shina nishpaca, na ñuca llactapi causajcunata, imatapash juchachishpa villangapaca munashcanichu.

²⁰Israelcuna cushijushpa shuyanajuchunmi, cashna cadenahuan huatai tucushca cani. Chaimandami chimbapura parlangapaj, cangunataca cayachiparcani— nijurcami.

²¹Pablo chashna nijpimi, paicunaca cashna ninajurca: —Ñucanchica, canda imatapash nishpa, Judea llactamanda cartacunataca, na japishcachu canchi. Chai llactamandaca, nalita rurajunmi nishpa, canda nalicachishpa villangapaca, ñucanchi puramanda shujllapash na shamushcachu.

²²Can catijujtaca, maipipash ninandami nalicachin nijtallami uyarcanchi. Chaimandami can imata yarishpa villajujta, uyangapaj munanchi— ninajurcami.

²³Shina nishpami, shuj punlla tandanajushun ninajurca. Paicuna nishcashnami, Pablo mingarishpa tiaj huasiman ashtaca gentecuna tandanajumurca. Paicuna Jesusta crichunmi, Moisés mandashca shimipi imata nijujta, Dios ima nishcata villajcuna escribishca Shimicunatapash leyishpa, Pabloca villajurca. Taita Dios mandajujmanda villashpaca, tutamandata callarishpami, chishangacaman villajurca.

²⁴Huaquingunaca, Pablo villajujtami alicachinajurca, shujcunaca na crircachu.

²⁵Paicuna purapi na shujlla yuyai cashpa, ña llujshi callarijpimi Pabloca, cai shimicunata cashna nijurca: —Diospaj jucha illaj Espirituca, ñucanchipaj ñaupa taitacunaman villachunmi, Dios ima nishcata villaj Isaías runaguhuan, cashna villachishca:

²⁶‘Cai gentecunapajman rishpa, cashna nigri: Rinrihuan uyashpapash, napacha yachai ushashpami causanguichi. Ricuitaca ricushpapash, na ricushcashnami causanguichi.

²⁷Cai gentecunapaj shunguca, ninanda shinlliyashcami. Rinrihuan uyashpapash, nali uyanajunllu. Ama ricungapaj, ñavitapash vichashcami causanajun. Rinripash ama uyachun, shungupash yuyaita ama japingapaj ñucapajmambash ama tigraringapaj, ñucapash paicunata ama alichijuchunmi, chashna tucushca’ nijushcami.

²⁸Caita yachachunmi, cashna nini: Taita Diosca, na israelcunata quishpichingapajmi, villachun cachamushca. Paicunarami, aliguta uyanajunga— nijurcami.

²⁹Pablo chashna nijpimi, Judea llactamanda runacunaca, paicunapura ninanda fiñanajushpa rimarinajurca.

³⁰Pabloca, ishcai huatatami, arrendashca huasipica causajurca. Paipajman shamujcunataca, pitapash aligutami mingachijurca.

³¹Shina causajushpami, Taita Dios mandajuj llactamandaca villajurca. Shinallata Apunchi Jesucristomandapash, na manllashpami yachachijurca. Tucuicunamanmi, pipash na jarcajpi villajurca.