Read Imbabura Highland Quichua HECHOS 3 Bible Online

HECHOS 3 - Imbabura Highland Quichua bible

HECHOS 3

¹Diosta mañana horaspi, quimsa horas chishipimi Pedrondi, Juandi, Diospaj huasiman rinajurca.

²Chaimanmi, huacharishca punllamandapacha suchu causaj runaguta apamushpa, Juyailla Pungu nishca ladopi punllandi tiachinajurca. Diospaj huasiman yaicujcunata culquita mañashpa tiachunmi, churanajun carca.

³Diospaj huasiman Pedrondi, Juandi yaicunajujta ricushpami, chai runaca imagutallapash carahuaichi nishpa mañarca.

⁴Shina mañajpimi Pedropash, Juanbash paita ricushpa: —Ñucanchita ricui— nirca.

⁵Shina nijpimi, imagutapash paicuna carajpi japishami yashpa, paicunata ricuriajurca.

⁶Ashtahuangarin Pedroca, cashnami nirca: —Culquitapash, orotapash na charinichu. Ashtahuangarin ñuca imaguta charishcatami carani. Nazaret pueblomanda Jesucristopaj shutipimi, candaca jatarishpa rilla nini— nircami.

⁷Shina nishpami Pedroca, chai runapaj ali lado maquimanda japishpa jatarichirca. Shina jatarichijujhuanmi, chai runapaj chaqui tullucunaca shinlli tucurca.

⁸Shinamandami fahuashpa shayarishpa, puri callarirca. Paicunahuan purishpa cushijuihuan fahuashpa, Diospaj huasiman yaicushpami, Taita Diostaca alicachijurca.

⁹Tucui gentecunami, pai purishpa Taita Diosta alicachijujta ricunajurca.

¹⁰Diospaj huasiman yaicuna Juyailla Pungu nishcapi, imagutapash mañashpa chai runa tiajtaca, tucuicunami rijsin carca. Chai runa ali tucushcata ricushpaca, ninandapachami manllarinajurca.

¹¹Chai ali tucushca runaca, Pedrotapash, Juandapash na cacharishpami charijurca. Chaita ricushpami, tucuicuna ninanda manllarishpa paicunata ricungapaj, Salomonbaj corredorman tandanajurca.

¹²Chashna tandanajujta ricushpami Pedroca, cashna nishpa gentecunaman villajurca: “Israel runacuna, ¿imashpata caita rurashcamanda manllaringuichi? ¿Imashpata ñucanchitalla ricunajunguichi? Ñucanchi ushaihuanlla, na cashpaca ¿Diosta ali yarijcuna cashcamandalla purichishcatashnachu ricunajunguichi?

¹³Ashtahuangarin ñucanchi ñaupa taita Abrahambaj, Isaacpaj, Jacobopaj Taita Diosmi, cashna alichishca. Shina alichishpami Taita Diosca, paipaj Churi Jesustaca, punchapambagu causanata curca. Cangunami, paitaca mandajcunapajman aparcanguichi. Pilato cacharingapaj munajpipash, cangunaca ama cacharichu nircanguichimi.

¹⁴Ashtahuangarin Jesusca, jucha illaj, imatapash cashcatapacha ruraj cajpipash, paita cacharipailla ningapaj randica, huañuchij runatarami cacharipai nircanguichi.

¹⁵Chashna rurashpami, Causaita caraj Jesustaca, huañuchi tucuchun saquircanguichi. Ashtahuangarin paitaca, Taita Diosmi huañushcacunapaj chaupimanda causachirca. Ñucanchica, chaita ricushcata villajcunami canchi.

¹⁶Jesuspaj shutipi crijpimi, canguna ricushpa ña rijsishca cai runataca alichirca. Jesusta crishpa ali tucushpami, cunanga cangunapaj ñaupajpi ali tucushca shayajun.

¹⁷Ashtahuangarin cunanga huauquicuna, panicuna, cangunapash cangunata mandajcunapash, na yachaimanda Jesusta chashna huañuchishcatami yachani.

¹⁸Taita Diosca, pai cachamushca Quishpichij Cristoca, ninandami llaquichi tucunga nishpa, pai ima nishcata tucui villajcunahuan pundallata villachishcatami, cunambi pactachishca.

¹⁹Shina cashcamanda cangunapaj juchata Dios cungachun, ninanda llaquirishpa Diospajman tigrarichi. Samashpa causana huatacunata Jatun Dios caramuchunmi, chashna rurana canguichi.

²⁰Paica, cangunapajman cachamusha nishca Jesucristotaca cachamungami.

²¹Ima tiajtapash mushujman tigrachisha nishpami, Taita Diosca paipajlla causashpa, pai ima nishcata villajcunahuan ñaupa huatacunallata villachijushca. Chaita pactachina punllacuna chayangacamanmi, Jesucristoca jahua pachapi tiajunatapacha charin.

²²Moisespash, ñucanchi ñaupa taitacunataca, cashnami nishca: ‘Cangunata Mandaj Jatun Diosca, canguna puramandallatami, Dios ima nishcata shuj villajta ñucatashnalla cachamunga. Pai ima nijujtapash, tucuipimi cazuna canguichi.

²³Maijambash chai villajta na cazujcunaca tucuillami, Israel puracunamanda llujchishpa shitai tucunga’ nishcami.

²⁴Dios ima nishcata villajcunaca, Samuelmanda callarishpa, tucui jipa villajcunapash, cai punllacuna shamunatami ña villanajushca.

²⁵Cangunaca, Dios ima nishcata villajcunapaj miraicunami canguichi. Taita Diosca, ñucanchipaj ñaupa taitacunahuan ari nijushpami, Abrahammambash cashna nishca: ‘Cambaj miraimandaca, cai pachapi causanajuj tucui familiacunami, bendiciai tucunajunga’ nishcami.

²⁶Taita Diosca, huañushcacunapaj chaupimanda paipaj Churita causachishpami, cangunatara punda bendiciachun cachamurca. Tucuicuna nali causaita saquishpa, Diospajman tigrarichunmi, chashna cachamurca” nijurcami.