Read Imbabura Highland Quichua HECHOS 4 Bible Online

HECHOS 4 - Imbabura Highland Quichua bible

HECHOS 4

¹Pedropash, Juanbash gentecunaman villanajujpimi curacunaca, Diospaj huasita cuidajcunata mandajcunahuan, saduceo nishcacunahuan, paicunata japingapaj shamunajurca.

²“Jesuspimi, huañushcacunapaj chaupimanda causarina tian” nishpa, gentecunaman yachachinanajujta, villanajujta uyashpami, ninanda fiñarishpa shamunajurca.

³Shina fiñashpa paicunata japishpaca, ña chishajujpimi cayandi punllacaman, prezuna huasipi pacarichun churanajurca.

⁴Ashtahuangarin paicuna villanajujta uyashpaca, ashtacacunami crirca. Jaricunata cuentajpica, picha huarangashnami carca.

⁵Chai cayandi punllami, israelcunata mandajcunandi, mandaj rucucunandi, mandashca shimita yachachijcunandi, Jerusalenbi tandanajunajurca.

⁶Shinallata curacunata mandaj Anás shuti curapash, Caifás, Juan, Alejandro shuti curacunapash, paicunapaj tucui familiacunapash chaipimi tandanajurca.

⁷Pedrotapash, Juandapash, paicunapaj chaupipi shayachishpami, cashna tapunajurca: —¿Cangunaca, pipaj ushaihuan, pi mandajpita, chai suchu runataca alichircanguichi?— ninajurcami.

⁸Shina tapuchijpimi Pedroca, Diospaj jucha illaj Espíritu junda cashpa, cashna nirca: —Mandajcunapash, israelcunata mandaj rucucunapash, uyahuaichi.

⁹Ñucanchica, shuj huañujuj runaguta llaquishpami alichircanchi. ¿Imashna alichishcata, yachangapajchu tapuchinguichi?

¹⁰Cunanga cangunapash, tucui israelcunapash yachachunmi, cashna villagrini: Nazaret pueblomanda Jesucristopaj shutipimi, cai runagutaca alichircanchi. Chai Jesusta canguna chacatashpa huañuchijpipash, Taita Diosmi huañushcacunapaj chaupimanda causachirca. Cai runaguca, pai alichijpi ali tucushcami, cangunapaj ñaupajpi shayajun.

¹¹Chai Jesustaca, huasichinata yachaj cangunaca, imapajpash na valij rumitashnami shitashcanguichi. Ashtahuangarin paica, huasi tigranapi churana rumishnami tucushca.

¹²Quishpirinaca, maijan runapipash na ashtahuan tianllu. Ñucanchi quishpiri ushachun, cai pachapi runacunaman cushca, ashtahuan shuj shutica na tianllu— nijurcami.

¹³Pedropash, Juanbash na yachajushca, yanga runacuna cashpapash na manllashpami, aligutapacha villanajurca. Shina villanajujta chai mandajcuna uyashpami, ninanda manllarinajurca. Shinallata, paicunahuan Jesús purijushcatapashmi rijsinajurca.

¹⁴Chai ali tucushca runaca, paicunapaj ladopimi shayajurca. Chaita ricushpami, imatapash na rimai ushanajurca.

¹⁵Chaimandami, paicunata canllaman llujchishpa, mandaj puracunalla parlanajurca.

¹⁶Paicunaca cashnami ninajurca: —Cai runacunataca, ¿imatata rurana canchi? Paicuna imatapash juyaillaguta rurashpa ricuchishcataca, Jerusalenbi causajcunapash tucuicunamari yachan. Shinamandami, na chashnachu nitaca na ushanchi.

¹⁷Paicuna imata rurashcapash, gentecunapi ama ashtahuan uyarichunga, cashnami rimana canchi: ‘Chai Jesuspaj shutipi, villashpa catijpica, cunanmandaca llaquichishunmi’ ninami canchi— ninajurcami.

¹⁸Paicunata cayashpami, cashna ninajurca: —Cunanmandapacha pactarallapash, Jesuspaj shutipi villashpa yachachinguichiman— nishpa rimashpami manllachinajurca.

¹⁹Ashtahuangarin Pedropash, Juanbash, cashna nishpami tigrachirca: —Cangunallata aliguta yaripaichi. Taita Diospaj ñaupajpica, ¿cangunatara cazushpa, Taita Diosta na cazunachu ali canga?

²⁰Ñucanchi ricushcata, uyashcata villanataca, napacha saqui ushanachu canchi— ninajurcami.

²¹Shina ninajujpimi chai mandajcunaca, llaquichishumbachami nishpa rimashpa cacharirca. Pedrohuan, Juanhuan imatalla rurashcata tucuicuna yachashpami, Taita Diostaca punchapambagumi cangui ninajurca. Chaimandami, imashna llaquichitapash na usharca.

²²Pipash na alichi ushanallata rurashpa alichishca chai runaca, chuscu chunga huata yalitami charirca.

²³Ña cacharijpica Pedropash, Juanbash crijcunapajman shamushpami, curacunata mandajcuna, mandaj rucucuna imatalla nishcata parlanajurca.

²⁴Shina parlajpimi, tucuicuna caparishpa, Taita Diostaca cashna nishpa mañanajurca: —Ñucanchita Mandaj Taita Dioslla, canmi Taita Dios cangui. Canmi, jahua pachata, cai pachata, mama cuchata, chaicunapi tucui imalla tiajcunatapash rurashcangui.

²⁵Canda servij Davidman can rimachijpimi, cashna nijushca: ‘Chai na israelcunaca, ¿imashpata chashna tandanajushpa nalicachinajun? Gentecunaca, ¿imashpata yangacunata yarinajun?

²⁶Cai pachata jatun mandajcunaca, llactacunata mandajcunapash, shujllashnalla tandanajushpami, Jatun Diostapash, pai cachamushca Quishpichij Cristotapash fiñarca’ nijushcami.

²⁷Cashna nishcashnapachami mandaj Herodesca, jucha illaj cambaj Churi Jesusta llaquichingapaj, Poncio Pilatondi, na israelcunandi, israelcunandi, cai pueblopi tandanajurca. Chai Jesustami, aceitehuan javircangui.

²⁸Ushaita charishpami chashna tucuchunga, canllata pundamandapacha yuyaita charishcangui. Paicunaca chashna rurashpami, can munashcata pactachinajurca.

²⁹Jatun Dioslla, paicuna llaquichingapaj munanajujtaca, cunanga ricupairi. Canda servijcunaca, na manllashpa cambaj Shimita villachun ushaita carapairi.

³⁰Huañujujcunata alichishpa, jatun manllarinacunata rurashcatapash, imatapash rurashpa ricuchinatapash, cambaj Churi Jesuspaj shutipi ushaita carapairi— nishpami mañanajurca.

³¹Chashna mañashca jipami, paicuna tandanajushca pushtuca ninandapacha chujchurca. Tucuicuna Diospaj jucha illaj Espíritu junda cashpami, Diospaj Shimitaca na manllashpa villanajurca.

³²Ashtaca ashtaca crijcuna cashpapash, tucui shunguhuan, tucui almahuanmi, shujllashnalla yarishpa causanajurca. Imatalla charishcacunapash, tucuillapajmi carca. Shina cajpimi, caica ñucapajmi nishpaca, pipash na ninajurca.

³³Villachun cachashcacunaca, Apunchi Jesús causarishcataca, ninan ushaihuanmi villanajurca. Diosca ninan juyaihuanmi, tucuilla crijcunataca aliguta charijurca.

³⁴Shina cashpami, crij puracunaca imagupash na illaj causanajurca. Alpata, huasita maijan charishpapash jatushpa, chai jatushca culquitaca apamushpami,

³⁵villachun cachashcacunaman cunajurca. Shina rurashpami, caishujman chaishujman ima minishtirishcata ricushpa, culquita cunajurca.

³⁶Chipre shuti llactamanda Josepash, paicunahuanmi causajurca. Paica, levita puramandami carca. Paitaca, villachun cachashcacunaca, Bernabé shutitami shutichirca. (Cai shutica, “Cushichij” nijunmi).

³⁷Chai runaca, pai charishca alpata jatushpami, villachun cachashcacunaman cungapaj culquita apamurca.