Read Imbabura Highland Quichua HECHOS 5 Bible Online

HECHOS 5 - Imbabura Highland Quichua bible

HECHOS 5

¹Ananías shuti runaca, Safira shuti paipaj huarmihuanmi, shuj alpata jaturca.

²Chai runaca, alpata jatushca culquimanda ashata japishpami alichirca. Chaitaca, paipaj huarmipash yacharcami. Chai culquitaca ashatalla apamushpami, villachun cachashcacunapaj ñaupajpi churarca.

³Shinamandami Pedroca, cashna nirca: —Ananías, ¿imapajta cambaj shungupi, Satanás yaicuchun saquircangui? ¿Imashpata alpata jatushca culquimanda ashata japishpa, Diospaj jucha illaj Espirituta llullajungui?

⁴Alpaca, ¿nachu cambaj carca? Chai jatushca culquitaca, ¿nachu tucuilla alichinalla carcangui? ¿Imashpata cambaj shungupi chashna nalita ruranatara yarircangui? Runacunataca na llullashcanguichu, ashtahuangarin Taita Diostami llullajungui— nircami.

⁵Pedro chashna nijpica, Ananías runaca huañushpa urmarcallami. Chashna huañushcata uyashpaca, tucui gentecunami ninandapacha manllarirca.

⁶Chaipi tiaj chairalla huambracuna shamushpami, Ananías runa huañushcataca pilluchinajurca. Shina rurashpami, apashpa pambanajurca.

⁷Ña quimsa horaspishnallami, paipaj huarmipash chaiman yaicumurca. Paipaj cusa huañushcataca nara yacharcachu.

⁸Chai huarmi shamujpimi, Pedroca cashna nirca: —Cangunaca, ¿chaipajllachu alpataca jaturcanguichi? Villahuai— nircami. Shina tapujpimi: —Ari, chaipajllami jatuparcanchi— nirca.

⁹Shina nijpimi Pedroca, cashna nirca: —¿Imashpata ishcandi parlarishpa, Jatun Diospaj Espirituta umachinatara yarircanguichi? Ricui, cambaj cusata pambashpa shamujcunaca, ñami punguta yaicumunajun. Candapash, paicunallatami apagrin— nircami.

¹⁰Chashna nijujhuanmi, chai huarmipash paipaj ñaupajpi urmashpa huañurca. Chai huambracuna yaicushpaca, huarmipash huañushcata ricushpami, paitapash apashpa, cusapaj ladopillata pambarca.

¹¹Chashna tucushcataca, tandanajuj crijcunapash, shujcunapash uyashpami, tucuicuna ninandapacha manllarinajurca.

¹²Villachun cachashcacunaca, tucui gentecunapaj alipajmi, ashtaca ricuchinacunata, imatapash jatun manllarinacunata ruranajurca. Crijcunaca, tucuillami Salomón rurashca corredorman, shujllashnalla tandanajun carca.

¹³Shujcunaca, paicunahuan tandanajunataca manllarcami. Ashtahuangarin gentecunaca, ninandami paicunata alicachinajurca.

¹⁴Jaricunapash, huarmicunapash, Apunchi Jesusta crishpami ashtahuan ashtahuan miranajurca.

¹⁵Huañujujcunataca camacunandi, jatanacunandimi ñanman llujchimushpa churanajurca. Pedro chaita yalijujpica, paipaj llandullapash alichingapashchari nishpami, chashna churanajurca.

¹⁶Chai ladolla pueblocunapi causanajuj gentecunapashmi, ashtacacuna Jerusalenman shamunajurca. Paicunaca huañujujcunatapash, mapata rurachij ayacuna jundashpa llaquichijpi causanajuj gentecunatapashmi apamunajurca. Paicunaca, tucuicunami alichi tucunajurca.

¹⁷Shina alichijta ricushpami, curacunata mandajpash, paihuan tucui tandanajujcunapash ninanda fiñarishpa jatarirca. Paicunaca, saduceo nishca puralla tandanajuj runacunami carca.

¹⁸Chashna cashpami, villachun cachashcacunataca japishpa, prezuna jatun huasipi churachun cachanajurca.

¹⁹Ashtahuangarin Jatun Diosca, paipaj angeltami tuta cachamushpa, prezuna huasi pungutaca pascashpa, paicunataca llujchirca. Chashna llujchishpami, cashna nirca:

²⁰—Cunanga, Diospaj huasiman richi. Chaipica, shayarishpa, gentecunaman mushuj causaimanda tucuita villanguichi— nircami.

²¹Shina mandajpi cazushpami, Diospaj huasiman tutamandata yaicushpa yachachinajurca. Chaicamanmi, curacunata mandajpash, paihuan purijcunapash, mandaj puracunalla tandanajungapaj nishpa, israelcunata mandaj rucucunatapash tandachirca. Shina tandanajushpami, villachun cachashcacunataca, prezuna huasimanda llujchimugrichun cacharca.

²²Ashtahuangarin apangapaj rij chai soldadocunaca, prezuna huasipica na tarircachu. Chaimandami villangapaj tigranajurca.

²³Paicunaca cashnami villanajurca: —Prezuna huasi pungutaca, alipacha vichashpa jarcashcatami japigrircanchi. Cuidaj soldadocunapash, canllapimi pungucunapi cuidashpa shayanajushca carca. Ashtahuangarin punguta pascashpa ricujpica, pipash illashcami carca— nishpami villanajurca.

²⁴Curacunata mandajpash, Diospaj huasita cuidajcunata mandajpash, curacunata shuj mandajcunapash, ¿chai runacunaca imashi tucurca? ninajushpami na yachai ushanajurca.

²⁵Ashtahuangarin shuj runa shamushpami, cashna nishpa villarca: —Ricuichi, prezuna huasipi canguna vichashca runacunaca, Diospaj huasipimi gentecunaman yachachinajun— nircami.

²⁶Shina nijpimi, cuidajcunata mandaj runaca, chai cuidaj runacunahuan cutinllata paicunata japingapaj rirca. Chaipi tandanajushca gentecuna, rumicunahuan huañuchinata manllashpami, imatapash na nishpa paicunataca alilla aparca.

²⁷Shina apamushpaca, mandaj puracunalla tandanajushcapaj ñaupajpimi shayachinajurca. Chaipimi curacunata mandajca, cashna nishpa tapujurca:

²⁸—¿Nachu cangunataca: ‘Chai Shutimandaca, napacha cutin yachachinachu canguichi’ nircanchi? Shina cajpipash na cazushpami, Jerusalenbi tucuicunaman yachachishpa puringuichi. Chai runatapash, paicunami yahuarta jichashpa huañuchirca nishpami, ñucanchitaca juchachingapaj munanguichi— nircami.

²⁹Shina nijpimi Pedroca, villachun cachashca caishujcunandi, cashna nishpa tigrachirca: —Taita Diostami, runacunatapash yali ashtahuan cazunapacha canchi.

³⁰Cangunami, Jesustaca caspipi chacatashpa huañuchircanguichi. Shina huañuchijpipash, ñucanchi ñaupa taitacunapaj Taita Diosmi causachirca.

³¹Paitami, Mandaj cachumbash, Quishpichij cachumbash, Taita Diosca jatumbi churashpa, paipaj ali ladoman tiachirca. Israelcuna llaquirishpa, Diospajman tigrarijpi juchacunata anchuchingapajmi, chashnaca rurarca.

³²Ñucanchica, chaita ricushcata villajcunami canchi. Diospaj jucha illaj Espiritupash, shinallatami villajun. Chai Espiritutaca, paita cazujcunamanmi Taita Diosca cararca— ninajurcami.

³³Chashna villajpi uyashpami chai mandajcunaca, ninanda fiñashpa huañuchingapaj munanajurca.

³⁴Ashtahuangarin mandaj puracunalla tandanajushca purapica, Gamaliel shuti fariseo runami tiarca. Mandashca shimita alipacha yachachij cajpimi, paitaca tucuicuna ninanda alicachin carca. Pai shayarishpami, villachun cachashcacunataca ashagucamanlla canllaman llujchipaichi nirca.

³⁵Paicuna llujchijpimi chai yachachijca, mandajcunataca cashna nijurca: —Ricuichi, Israel runacuna, pactarallapash nara ali yarishpata, chai runacunata imatapash ruranguichiman.

³⁶Cainani punllacunapica, Teudas shuti runataca, mandajmi cani nijpimi, chuscu patsajshna runacuna catinajurca. Ashtahuangarin chai runata huañuchijpimi, paita tucuilla cazujcunaca caita chaita rishpa tucurirca.

³⁷Chai jipami, mashna gentecuna tiajta yachangapaj cuentana punllacunapica, Galilea llactamanda Judas shuti runapash jatarishpa, ashtaca gentecunata catichirca. Shinallata paita huañuchijpica, paita tucui cazujcunapash caita chaita rircallami.

³⁸Chaimandami cunambash, cashna nini: Cai runacunamandaca anchurichi, ama imatapash nishpa cacharichilla. Paicuna yarinajushpa imata rurashpa purijushcapash, paicunapaj munaimandalla cashpaca, tucuringallami.

³⁹Ashtahuangarin Taita Diosmanda cajpica, na tucuchi usharingachu, pactarallapash Taita Diosta fiñachinguichiman— nijurcami.

⁴⁰Pai villashcataca, alicachishpami uyanajurca. Chaimandami, villachun cachashcacunata cayachun cachashpaca astirca. Chai jipaca: “Jesuspaj shutipica, cutinga na villanachu canguichi” nishpa rimashpami, manllachishpa cacharirca.

⁴¹Mandaj puracunalla tandanajushca ñaupajmanda paicuna llujshishpaca, Jesuspaj Shutimanda llaquita apachun Dios saquishcamandami, ninanda cushijunajurca.

⁴²Ashtahuangarin paicunaca Jesucristomamdami, punllandi Diospaj huasipipash, shuj huasicunapipash yachachishpa villanataca na saquinajurca.