Read Imbabura Highland Quichua HECHOS 6 Bible Online

HECHOS 6 - Imbabura Highland Quichua bible

HECHOS 6

¹Chai punllacunapica, yachajujcunaca ashtahuan ninanda miranajushpami, griego nishca shimita rimajcunaca, hebreo shimita rimajcunata nalicachishpa parlanajurca. Punllandi ricuriashpa caranacunataca, paicunapura sapalla mamagucunaman na ricuriashpa carajpimi, chashna parlanajurca.

²Shinamandami, villachun cachashca chunga ishcaicunaca, ashtaca crijcunata tandachishpa, cashna ninajurca: “Diospaj Shimita ñucanchi villanata saquishpa, micunatara caranajushpaca na cashcatapacha ruranajunchica.

³Huauquicuna, panicuna, canguna puramanda canchis runacunata agllapaichi. Paicunaca, Diospaj jucha illaj Espíritu junda causanajuj, tucuipi alicachi tucushca, aliguta yachajushcacuna cachun ninchimi. Cai ruranataca, paicunamanmi mingangapaj munanchi.

⁴Paicunata churashpami, ñucanchica Diosta mañashpa, paipaj Shimita villashpa catishun” ninajurcami.

⁵Shina nishcacunataca, chaipi tandanajushca tucuicunami alicachirca. Shina alicachishpami, Esteban runaguta agllanajurca. Paica, alipacha crij cashpami, Diospaj jucha illaj Espíritu junda carca. Shinallata: Felipe, Prócoro, Nicanor, Timón, Parmenas, Nicolás shuti runacunatapashmi agllarca. Nicolás runaca, Antioquía pueblomandami carca. Paica, israelcuna yachachishcata catijmi carca.

⁶Shina agllashpami, villachun cachashcacunapajman pushamurca. Paicunaca, chai agllai tucushcacunapaj umapi maquita churashpami, Diosta mañanajurca.

⁷Jatun Diospaj Shimita ashtahuan ashtahuan villanajujpimi, Jerusalenbica ashtacacuna crinajurca. Shinallata curacunapash ashtacacunami, Jesusta crishpa cazunajurca.

⁸Esteban runaguca ninan juyaihuan, ninan ushaihuan junda cashpami, jatun manllarinacunata rurashpa, juyailla ruranacunata gente puracunapi rurajurca.

⁹Shinamandami, gañan causashcamanda cacharishcami nishca shuti tandanajuna huasipi tandanajuj puramanda huaquingunaca, Estebanda fiñashpa ningapaj jatarinajurca. Paicunahuanga, Cirene shuti, Alejandría shuti pueblocunamanda, Cilicia shuti, Asia shuti llactacunamanda shuj runacunapashmi shamushca carca.

¹⁰Esteban runaguca, Diospaj Espíritu yachachijpi, ali yachaihuan villajujpimi, na chashnachu nishpa rimaitaca na ushanajurca.

¹¹Shinamandami paicunaca, shuj runacunaman culquita pacalla curca. Paicunaca: “Moisés mandashca shimitapash, Diostapash nali shimicunata rimajujtami, cai runataca uyarcanchi” nishpa llullashpa villachunmi, chashna cunajurca.

¹²Paicunami, chaipi causajcunapash, mandaj rucucunapash, mandashca shimita yachachijcunapash fiñarishpa jatarichun, nali yuyaita cunajurca. Shina tandanajushpaca, Estebanda japishpami, mandaj puracunalla tandanajushcapaj ñaupajman apamunajurca.

¹³Llullashpa villachun churashca runacunaca, cashnami ninajurca: “Cai runaca na shaijushpami, Diospajlla tiajuj cai huasitapash, Moisés mandashca shimitapash, nali shimicunatalla rimajun.

¹⁴Cai runataca, cashnatapacha nijujtami uyarcanchi: ‘Nazaret pueblomanda Jesusca, Diospaj huasita urmachingami. Paillatami, ñucanchi catichun Moisés yachachishcataca chingachishpa, shujta yachachinga’ nijujtapashmi uyarcanchi” ninajurcami.

¹⁵Shina nijpimi, mandaj puracunalla tandanajuna ucupi tianajuj runacunaca, Estebandalla tucuicuna ricunajurca. Paipaj ñavica, angelpaj ñavishna cajtami ricunajurca.