Read Imbabura Highland Quichua ROMANOS 1 Bible Online

ROMANOS 1 - Imbabura Highland Quichua bible

ROMANOS 1

¹Jesucristota servij Pablomi cani. Paimanda villachun cachashcami cani. Taita Diosmanda ali villaita villachun, shicanyachi tucushcami cani.

²Chashna villanataca Diosca pundallatami, pai ima nishcata villajcunahuan villachishpa, jucha illaj Shimicunapi escribichishca carca.

³Chai Shimipimi Diospaj Churi, ñucanchi Apunchi Jesucristomanda villajun. Paica, runa aichayu cashcamandaca, Davidpaj miraimi carca.

⁴Paica, Taita Diospaj Churipachami, paica ninan ushaita charijmi ni tucurcami. Paica, huañushca puracunamanda causarishpami, Diospaj jucha illaj Espiritumanda shina ni tucurca.

⁵Paimandami Diospaj ninan juyaitapash, villachun cachai tucunatapash chasquircanchi. Tucui llactacunapi causajcuna, paipaj shutita juyashpa, paita crishpa cazunajuchunmi, villachun cacharca.

⁶Paicuna purapica, cangunapashmi Jesucristopaj causangapaj cayai tucushcacuna canguichi.

⁷Roma pueblopi tucuilla causanajuj cangunamanmi escribimuni. Cangunaca, Taita Dios juyashcacunami canguichi. Paipajlla causanajuchun cayai tucushcacunami canguichi. Ñucanchi Taita Diospash, Apunchi Jesucristopash ninan juyaita, casilla ali causaiguta cangunaman carachunmi munani.

⁸Pundaca, ñuca Taita Diostami cangunamandaca Jesucristopi pashi nijuni: Canguna alipacha cazushpa crishpa catinajujtaca, tucui cai pachapimi uyanajun.

⁹Diosta ñuca mañajushpaca na cungashpami, cangunamandapash mañajuni. Chaitaca, Taita Diosllata yachapanmi. Paita tucui shunguhuan servijushpami, paipaj Churimamdaca na shaijushpa, ali villaita villajuni.

¹⁰Shinallata Taita Diospaj munai cajpica, imashnallapash cunanllata cangunata ricungapaj rishpa ali chayangapaj munashpami, ninanda mañajuni.

¹¹Canguna ashtahuan shinllitapacha catichun, Diospaj Espíritu ñucaman imaguta caramushcatapash yarichingapajmi, cangunataca ricungapaj munani.

¹²Cangunapash, ñucapash paitallata crij cashpami, ashtahuan aliguta catingapaj, shujmanda shujmanda yarichirinajungapaj shamunata munani.

¹³Ashtahuangarin huauquicuna, panicuna, cangunapajman shamungapaj cutin cutin munajushcataca yachachunmi munani. (Shina cashpapash cunangamanmi jarcai tucushcani). Caishuj na israelcunapipash, canguna purapishnallata granota fucuchinshna mirachingapajmi munani.

¹⁴Griego nishca gentecunamambash, na griegocunamambash, alipacha yachajushcacunaman, na yachajushca gentecunamambash villanatapachami charini.

¹⁵Shinamandami, Roma pueblopi causaj cangunamambash, ali villaita villangapaj ninanda munajuni.

¹⁶Ali villaita villanataca, na pinganayachinichu. Ali villaica, maijan crijpipash quishpichingapajmi, Taita Diospaj ushaita charin. Pundaca, Judea llactamanda gentetarami quishpichin, shinallata griego gentetapashmi quishpichin.

¹⁷Ali villaica, crishcamandami imatapash cashcatapacha rurashcatashna Taita Dios chasquinata, ashtahuan crishpa catichun ricuchijun. Shinallata crishpa causanatapashmi ricuchijun. “Ashtahuangarin imatapash cashcatapacha ruraj runaca, crishcamandallami causanga” nishpami, escribishcapica villajun.

¹⁸Taita Dios ninanda fiñarishcataca, jahua pachamandami ricuchimujun. Paita na manllajcunata, imatapash cashcatapacha na rurajcunata fiñashpa llaquichinatami ricuchimujun. Paicunaca, na llullashpa villajuj shimitami, imatapash cashcatapacha na rurashpa jarcanajun.

¹⁹Ashtahuangarin Taita Diosmanda imatami yachan, chaitaca Taita Diosllata ricuchijpimi yachan.

²⁰Diosca, causaita causaicaman ninan ushaita charij cajta, Diospacha cajtaca, pipaj ñavipi na ricurinallataca, cai pachata pai rurashcamandapachami aligutapacha ricuchijun. Chaita tucui imatalla rurashcacunata ricuchishpami entendichishca. Shinamandami, na yachashcanichu nitaca na ushan.

²¹Paicunaca, Taita Diostaca rijsircami. Shina rijsishpapash, Taita Diostashnaca na punchapambagumi cangui ninajurcachu, pashi nitallapash na ninajurcachu. Ashtahuangarin paicunapaj yuyaicunapash yangacuna tucushpami, paicunapaj shinlli shungupash yanayashcashna tucurca.

²²Alipacha yachajushcami canchi ninajushpapash, paicunaca shinlli shungumanmi tigrarca.

²³Shina cashpami, na tucurij punchapamba Taita Diosta alicachinapaj randica, huañuna genteman rijchajta, jahuata purij alasyu animalcunata, chuscu chaquita charij animalcunata, llucajuj animalcunatara alicachinajurca.

²⁴Chaimandami, paicunapaj shungu munashca mapacunata rurashpa causanajuchun, Taita Diospash saquirca. Shinamandami, paicuna purallata paicunapaj cuerpocunata huaglichishpa causanajurca.

²⁵Shina cashpami, Taita Diospaj na llullaj Shimita catinajushcata saquishpa, llullatara catinajurca. Tucuita Ruraj Diosta alicachinapaj randica, Diosllata rurashcacunatarami alicachinajurca. Diosca, causaita causaicaman ninanda alicachi tucunatami charin. Shina cachun.

²⁶Chashna nalicuna cajpimi, pinganayai nali munaicunata rurachun, Taita Diosca saquirca. Chaimandami paicunapaj huarmicunaca, jarihuan causanapaj randica, pai purallata nalita rurashpa causanajurca.

²⁷Shinallatami jaricunapash, huarmihuan causanataca saquishpa, jari purallata paicunapura nina japirinshna munarinajushpa jatun nali pinganayaita ruranajurca. Chashna nalita ruranajushpami, cuna cashcata cujpi paicunallata chingagrinata japinajun.

²⁸Paicunallata Taita Diosta catingapaj na munajpimi, paicunapaj yuyaipi yarishcata rurashpa causanajuchun, Taita Diosca saquirca. Napash ruranacunatara ruranajuchunmi saquirca.

²⁹Paicunaca, imatapash cashcatapacha na rurashpa, huainayashpa, jatun nalita rurashpa, charijyashpa, imatapash nalitalla rurashpa causana, munaicunahuan jundacunami. Paicunaca, shujcuna imata charishcacunatapash ñucapaj cashcanman yashpa ricujcuna, huañuchijcuna, paicunapura fiñanajujcuna, umachijcuna, imatapash nalitalla yarijcunami.

³⁰Shujcunata huasha parlajcuna, Taita Diostapash na ricunayachijcuna, nalicachishpa rimajcuna, jariyashpa jatun tucujcunami. Nalita ruranatalla ashtahuan mushujta yarijcuna, taitata mamatapash na cazujcunami.

³¹Shinlli shungucuna, mandashcatapash napacha cazujcuna, pitapash na juyajcunami. Fiñanajushpapash napacha ali tucujcuna, pitapash na llaquijcunami.

³²Taita Dios llaquichinata ali yachashpata chashna nalicunata rurajcunaca, huañushpa chingagrinatapachami charin. Na chashna rurajcunalla chingagringachu, ashtahuangarin chashna ruranajujpi alicachishpa cushijujcunapashmi chingagringa.