Read Imbabura Highland Quichua ROMANOS 10 Bible Online

ROMANOS 10 - Imbabura Highland Quichua bible

ROMANOS 10

¹Huauquicuna, panicuna, Taita Dios israelcunatapash quishpichijuchun munashpami, tucui shunguhuambacha mañariajuni.

²Taita Diospajtaca ninandapacha pactachingapaj munanajushpapash, paicunaca imashna aliguta pactachinataca, na yachanllu. Shina cajpimi, ñucapash chashnapachami nishpa villajuni.

³Ashtahuangarin imatapash cashcatapacha rurashcatashna Taita Dios chasquijujta na yachashpami, paicunapaj munailla imatapash cashcatapacha rurangapaj munan. Shina cashpami, imatapash cashcatapacha rurashcatashna Taita Dios chasquichunga na munashca.

⁴Cristomi, mandashca shimicunataca pactachishpa tucuchirca. Paita crijcunataca, imatapash cashcatapacha rurashcatashna chasquingapajmi, chashna rurarca.

⁵Mandashca shimita pactachijpi imatapash cashcatapacha rurachun Dios chasquinamandaca, Moisesca cashnami escribishca: “Cai mandashcata pactachijllami, pactachishcamanda causajunga” nishcami.

⁶Ashtahuangarin crijpilla imatapash cashcatapacha rurashcatashna Dios chasquinamandaca, cashnami nijun: “Cambaj shungupica, ama: ‘¿Pita jahua pachaman ringayari?’ ninguichu” nijunmi. (Shina nishpaca, Cristota jahuamanda urai apamunshnami nijungui).

⁷Na cashpaca: ‘¿Maijanda manllanayai ucu ucu utujuman uriajunga?’ nitapash ama ninguichu” nijunmi. (Shina nishpaca, huañushcacunapaj chaupimanda Cristota jahuaman llujchimunshnami nijungui).

⁸Ashtahuangarin Diospaj Shimipica, ¿ima nijunda? Cashnami nijun: “Diospaj Shimica, cambaj ladopi cashpami, cambaj shimipipash cambaj shungupipash tiajun” nijunmi. Cai shimicunata crinamandami villanajunchi.

⁹“Jesusca, ñucata Mandajmi” nishpa, cambaj shimihuan villashpa, shinallata huañushcacunapaj chaupimandaca, Taita Dios paita causachishcata, tucui shunguhuan crishpaca quishpiringuimi.

¹⁰Shunguhuanga, imatapash cashcatapacha rurashcatashna Dios chasquijujtami crina. Ashtahuangarin shimihuanga, quishpiringapajmi villana.

¹¹Dios escribichishca Shimipica, cashnami nijun: “Pipash paita crishpaca, na pingai tucungachu” nijunmi.

¹²Judea llacta gentecunahuan, griego nishca gentecunahuanga chashnallatami. Apunchi Jesusca, tucuicunata mandaj cashpami, pai ninan charij cashcamanda, paita tucui mañajcunaman caramujun.

¹³“Shina cashcamandami, maijan cashpapash Jatun Diospaj shutipi mañashpaca quishpiringa”.

¹⁴Ashtahuangarin paita na crij cashpaca, ¿imashnata mañangayari? Shinallata paimanda villajta na uyaj cashpaca, ¿imashnata cringayari? Pipash paimanda na villajpica, ¿imashnata uyangayari?

¹⁵Pitapash villachun na cachajpica, ¿imashnata villangayari? Escribishcapica cashnami nijun: “¡Casilla ali causaiguta villashpa purijcunapash, ali villaita villashpa purijcunapash juyaillamari villanajun!” nijunmi.

¹⁶Ashtahuangarin ali villaita villajujpica, na tucuicuna cazurcachu. Shinamandami, Isaiasca cashna nijun: “Jatun Dioslla, ñucanchi villajujtaca, ¿maijanda crirca?” nijunmi.

¹⁷Shina cashcamandami, Diospaj Shimita villajujta uyanajun. Villajujta uyashpallami crinajun.

¹⁸Shina cajpipash, cashnami nini: Villajujtaca, ¿nachu uyashcanga? Ari uyashcami. Villashcapica cashnami nijun: “Paicuna villajuj shimica, tucui llactacunapimi uyarijun. Paicuna villajuj shimicunaca, cai pacha tucuri manñacamanmi uyarijun” nijunmi.

¹⁹Caitapashmi nini: Israelcunaca, ¿chaitaca nachu yachashcanga? Moisesmi, pundata cashna nishca: “Na ñucapajlla causajcunata agllashpami, cangunataca cambajmi canchi nichisha. Imatapash na yachajcunatara agllashpami, cangunataca fiñachisha” nishcami.

²⁰Isaiaspash, na manllashpami cashna nishca: “Ñucata na mascashpa purijcunahuanrami tuparircani. Ñucata na tapujcunamanmi ricurircani” nishcami.

²¹Ashtahuangarin israelcunamandaca, cashnami nin: “Ñucata na cazushpa fiñachij gentecunataca, punllandimi maquita chutashpa cayajurcani” nijunmi.