Read Imbabura Highland Quichua ROMANOS 13 Bible Online

ROMANOS 13 - Imbabura Highland Quichua bible

ROMANOS 13

¹Jatun mandajcunataca, tucuicunami cazuna canguichi. Mandana ushaitaca, Taita Dios cujpillami charin. Cunambi mandajcunaca, Taita Dios churajpimi mandanajun.

²Mandajcunata pipash na cazushpaca, Taita Dios mandachun churashpa callarichishcatami na cazun. Na cazungapaj munajcunaca, paicunallata ninanda llaquichi tucungapajmi, chashna ruran.

³Aliguta rurashpa causajca, mandajcunata imamanda manllanatapash na charinllu. Ashtahuangarin nalita rurajllami, manllanataca charin. ¿Mandajcunata na manllashpa causangapaj munanguichu? Aliguta rurashpa causayari. Shina causashpaca mandajcuna alicachijpimi causangui.

⁴Paicunaca, cambaj ali cachunllata, Taita Diosta servijcunami. Nalita rurashpaca, manllanami cangui. Taita Diosta servijcuna cashpami, mandajcunaca na yangamanda espadata charinajun. Paicunaca, nalita rurajcunata tigrachishpa llaquichijcunami.

⁵Llaquichinata manllaimandalla cazunaca, na canllu. Ashtahuangarin cazunapacha cajta yarishpami, cazuna canguichi.

⁶Chaimandami, impuestotapash cunguichi. Taita Diosta servijcuna cashpami mandajcunaca, ricuriashpa chaitallata rurashpa causanajun.

⁷Maijanda imaguta mañashca cashpapash, tigrachinami canguichi. Ima mirashcamanda cuna cajpipash, cunami canguichi. Impuestota cuna cajpipash, cunami canguichi. Cazunatapash cazunami canguichi. Alicachinatapash alicachinami canguichi.

⁸Pimambash, imatapash na divinachu canguichi. Ashtahuangarin caishuj chaishuj juyarinatami charina canguichi. Pipash paipaj cumba runaguta juyajca, mandashca shimipi nijujtami pactachijun.

⁹Mandashca shimicunapica, cashnami nijun: “Cazarashca jahua ama shujcunahuan causanguichu, ama huañuchinguichu, ama shuhuanguichu, ama llullanguichu, shujcuna imata charijtapash ama munanguichu” nijunmi. Maijan mandashca shimicunapipash, cashna nijuj shimicunaca: “Canllata juyarinshnallatami, cumba runagutapash juyana cangui” nijunmi.

¹⁰Juyaita charishpaca, paipaj cumba runagutaca, ima nalitapash na ruranllu. Shina juyaita charishpaca, mandashca shimipi nijujtami pactachijun.

¹¹Cunan punllacuna imashna cajtapash, yarinami canguichi. Rijcharina horas ña chayamushcami. Ñucanchi cringapaj callarishca punllata yarijpica, cunanga ashtahuanmi quishpichi tucuna punlla chayamujun.

¹²Tutaca ña pacarijunmi, punllayamujunmi. Shina cajpimi, yanapishna causashpa nalita ruranataca shitana canchi. Michapi causana macanajunatami, churajunshna japina canchi.

¹³Punllapi purijunshnalla, imapipash aliguta causashunchi. Ninanda micushpa, ufiashpa causanatapash saquishunchi. Ima munashcata ruranata, nalita rurana munaihuanlla purinatapash jichunami canchi. Na fiñanajunachu canchi. Shujcuna imata charijtapash, na ñucapaj cashcanman yashpa munanachu canchi.

¹⁴Ashtahuangarin, Apunchi Jesucristopaj ushaitami churajunshna japina canguichi. Nalita rurana munaicuna japijpipash, na ruranachu canguichi.