Read Imbabura Highland Quichua ROMANOS 14 Bible Online

ROMANOS 14 - Imbabura Highland Quichua bible

ROMANOS 14

¹Nara ali yachajuj crijtapash, chasquinami canguichi. Ashtahuangarin imata yarinajushcataca, na tapuchishpa fiñanajunachu canguichi.

²Shuj ali crijca, imatapash tucuita micunallami yanmi. Ashtahuangarin nara ali yachajushca crijca, aicha illaj micunatallami micun.

³Imata cashpapash micuj runaca, na micuj runataca na yangapi churanachu. Shinallata micuj runapash, imata cashpapash micuj runataca, na juchachishpa llaquichinachu. Taita Diosca, paitapash chasquishcami.

⁴¿Canga, pita canguiyari, shujpaj servijta ricushpa llaquichijungapaca? Paipaj amomi, imatalla rurashcata ricushpa mandana cajpipash, mandanata charin. Apunchi Jesusmi, paita shinllichingapaca ushaita charin.

⁵Shujca, huaquin punllatallami ashtahuan alicachin. Shujca, tucui punllacunatallatami alicachin. Tucuicunallata imashna crishpa yarijushpapash, chashnatallata yarichun ninimi.

⁶Maijan punllata agllajpash, Apunchi Jesusta alicachingapajmi agllan. Shinallata chai punllata na cazujpash, Apunchi Jesusta alicachingapaca, na chashna ruranllu. Micushpapash, Taita Diosta pashi nishpaca, Apunchi Jesusta alicachingapajmi micun. Shinallata na tucuita micushpapash, Apunchi Jesusta alicachingapajllatami, na micushpa Taita Diostaca pashi nijun.

⁷Maijambash na quiquimbajllata causanchica. Shina cashpami huañushpapash, na quiquimbajllata cashun.

⁸Causajushpapash, Apunchi Jesuspajmi causanajunchi. Huañushpapash, Apunchi Jesuspajmi huañushunchi. Shinamandami causajushpapash, huañushpapash, Apunchi Jesuspaj canchi.

⁹Ashtahuangarin Cristo huañushpa causarishpaca huañushcacunatapash, causajcunatapash mandangapajmi, huañushpapash, cutin causarirca.

¹⁰Shina cashpaca canga, ¿imashpata cambaj huauquitaca ricuriashpa llaquichijungui? Shinallata cambash, ¿imamandata cambaj huauquitaca, yangapi churajungui? Tucuillami jatun tiarinapi tiajuj Cristopaj ñaupajpi ricurina canchi.

¹¹Escribishcapica cashnami nijun: “Jatun Dios ñucami, cashna nini: ‘Ñucaca causajunipachami. Tucuicunami, ñuca ñaupajpi cungurinajunga. Tucuicunami ñucataca, Taita Dios cajta paicunapaj shimihuan villanajunga’ ninmi” nijunmi.

¹²Shinamandami ñucanchica, tucuicuna imata rurashcata quiquinllata Taita Diosman ricuchigrinata charinchi.

¹³Shina cashpaca, na ashtahuan caishujmanda chaishujmanda juchachirishpa llaquichirinachu canchi. Ashtahuangarin cambaj huauqui ama nitijachun, na cashpaca ama urmachun ayudanatami yarina canguichi.

¹⁴Apunchi Jesusta crij cashpami, imatapash na mapa cajta aligutapacha yachani. Ashtahuangarin caica mapami yashpa yarijujpaca, paipaca mapami.

¹⁵Micunamandalla cambaj huauquita llaquichishpaca, na juyaj cashcashnallatami purijungui. Micunamandalla cambaj huauquita chingachinguiman. Paitapash quishpichingapajmi, Cristoca huañurca.

¹⁶Aliguta rurashpapash, pactarallapash nalicachi tucunguichiman.

¹⁷Taita Dios mandajuj llactaca, na micunamandalla, ufianamandalla canllu. Ashtahuangarin Diospaj jucha illaj Espíritu yarichijpi, imatapash cashcatapacha rurana, casilla aliguta causana, cushijushpa causanami.

¹⁸Cristota chashna servishpa causajca, Taita Diostapash cushichishpami causajun. Runacunapash, paitaca alicachijpimi causan.

¹⁹Shinamanda cunanga, casilla ali causaiguta charinata, caishuj chaishuj ashtahuan shinlli tucushpa causanata catishunchi.

²⁰Pactara micunamandallara, Taita Dios aliguta rurajujta tucuchinguiman. Tucui ima micunapash, napacha mapachu. Ashtahuangarin imatapash micushpalla, shujcunata nitijachishpa urmachinaca napacha alichu.

²¹Cambaj huauqui nitijanshna ama pandachun, na cashpaca ama huagli crij tucuchunga, aichata na micushpa, vinota na ufiashpa, ima nalitapash na ruranami alipacha.

²²¿Canga cringuichu? Crishpaca, Taita Diospaj ñaupajpi cambajllata ali cachun, canhuan charingui. Imata rurajushpapash, quiquinllata llaquichi tucungapaj na rurashpaca, ninandami cushijun.

²³Ashtahuangarin caitaca micunallachu, nachu micuna imashi yashpa nali crishpata micushpaca, llaquichi tucunapachami. Napash crishpata imata rurashcapash juchami.