Read Imbabura Highland Quichua ROMANOS 15 Bible Online

ROMANOS 15 - Imbabura Highland Quichua bible

ROMANOS 15

¹Shina cajpica ñucanchi shinlli crijcunaca, nara ali yachajuj crijcuna imata nalita rurajpipash, ricunami canchi. Na ñucanchilla cushijunachu canchi.

²Cumba runagupash ali crishpa cushijuchunmi, ñucanchica tucuicuna paicunamambash aliguta rurana canchi.

³Cristopash na pailla cushijushpa causajurcachu. Ashtahuangarin escribishcapi cashna nijunshnallatami pactachirca: “Canda nalicachishpa rimajcuna ima nalita rimashcapash, ñucatami nalicachishpa rimahuarca” nijunmi.

⁴Ñucanchi yachajuchunmi, Diosca ñaupallata escribichishca. Chai escribishca Shimicunami, na ñapash fiñarishpa causanata ñucanchiman yachachijun. Shinamandami, japigrinata yariajlla shuyanajunchi.

⁵Na ñapash fiñarij, cushijuita caraj Taita Diosllata canguna purapipash, Cristo Jesús munashcashnallata, shujllashnalla yarishpa causanata carachun.

⁶Shujlla shimi rimanshna, ñucanchi Apunchi Jesucristopaj Taita Diosta ninanda alicachinajuchun, chashna carachun.

⁷Shina cashcamandaca, Taita Diosta punchapambagumi cangui ninajuchun. Cristo ñucanchita chasquishcashnallatami, cangunapash caishuj chaishuj chasquirina canguichi.

⁸Cashna nishpami villajuni: Cristo Jesusca, circuncisión nishcata rurashcacunata servingapajmi shamurca. Shina shamushpaca, ñaupa taitacunaman Taita Dios carashami nishcataca, na llullashpa pactachishcatami ricuchimurca.

⁹Na israelcunapash, paicunata Taita Dios llaquishcamanda, punchapambagumi cangui ninajuchunmi, Jesusca shamurca. Escribishcapica cashnami nijun: “Chaimandami, na israelcunapaj chaupipi canmandaca villajusha. Cambaj shutitapash alicachishpami candajusha” nijunmi.

¹⁰Shinallata cutimbash cashnami nijun: “Shuj llactacunapi causajcunapash, Dios agllashcacunahuan cushijunguichi” nijunmi.

¹¹Cashnatapashmi cutin nijun: “Tucui llactapi causajcuna, Jatun Diostaca ninanda alicachinguichi. Tucuicunallata, paita jatunyachinguichi” nijunmi.

¹²Shinallata Isaiaspash, cutimbashmi cashna nijun: “Isaí shuti taitapaj miraimandami, tucui llactapi causajcunata mandangapaj jataringa. Tucui na israelcunami, paita yariashpa shuyanajunga” nijunmi.

¹³Taita Diosllatami, japigrinata yariajlla shuyachun yarichimujun. Canguna paita crishcamandaca cushijuita, casilla ali causaitapash, paillata ninanda carachunmi munani. Diospaj jucha illaj Espíritu ushaita carajujpimi, japigrinataca yariajlla shuyanajunguichi.

¹⁴Shina cajpipash ñuca juyashca huauquicuna, panicuna, cangunamandaca aliguta yachanipachani. Canguna purapi ninanda llaquirishpa, alipacha causanata yachajushcatami yachani. Shina cashpami shujmanda, shujmanda yarichirishpa causanguichi.

¹⁵Huauquicuna, panicuna, ashtahuangarin huaquin shimicunataca shinllita rimashpami escribimuni. Taita Dios ñucaman ninan juyaita carajujpi cangunata yarichingapajmi, cashna cachamuni.

¹⁶Ñucaca, na israelcunaman villashpami, Jesucristopajta rurajuni. Na israelcunaca, Diosman animalta carashpa rupachishcashna, Diospaj jucha illaj Espiritumandaca, Diospajlla causanajuchunmi, Taita Diospaj ali villaita villajuni.

¹⁷Taita Diospajta rurashcamandaca, Cristo Jesusta crishcamandami ninanda cushijuni.

¹⁸Cristo ñucata villachun na mandajpica, ñucamandalla imata villaitapash na ushaimanllu. Imagutapash ñuca rurashpandi villajujpica, na israelcunapash paita crishpa cazunajuchunmi villajuni.

¹⁹Taita Diospaj Espíritu ushaita carajpi, jatun manllarinacunata rurashpa, imagutapash juyaillaguta rurashpami ricuchijurcani. Cristomanda ali villaita villashpaca, Jerusalenmanda callarishpa, tucui llactacunapipash villashpandimi, Ilírico shuti llactacaman chayarcani.

²⁰Chashnami, Cristopaj shutita nara uyashca llactacunapipash, ali villaita ashtahuan shinllipacha yarishpa villajurcani. Ña shujcuna villai callarishca llactacunapica, na villarcanichu.

²¹Ashtahuangarin escribichishca Shimipi cashna nijunshnami rurarcani: “Paimanda ima horapash villajta nara uyajcunami ricunajunga. Paimanda ima horapash nara uyajcunarami yachanajunga” nijunmi.

²²Shina villajushpapash, cutin cutin cangunata ricungapaj shamusha yajushpapash, na shamui ushashcanichu.

²³Ashtahuangarin cunanga, ñami cai llactacunapi villaita tucuchircani. Tauca huatacunatami, cangunata ricuj shamungapaj munarcani.

²⁴España llactaman rijushpaca, cangunata ricushpandi yalingapajmi shamusha. Chaipi cangunahuan cushijushpa tiashca jipaca, chaimandaca cangunami imashnallapash ayudashpa, Españaman cachahuanguichi.

²⁵Ashtahuangarin cunanga Jerusalenmanmi, Diospajlla causajcunata ayudangapaj rijuni.

²⁶Macedonia shuti, Acaya shuti llactacunapi causanajuj crijcunaca, Jerusalenbi, Diospajlla causajcuna purapi imagutapash na charijcunaman carangapajmi, aligutapacha yarinajushca.

²⁷Chashna ruranaca, paicunapaj ali cajpimi, paicunaman caranatapacha charirca. Israelcunaman aliguta Dios carajpimi, na israelcunapash japinajunga. Chaimandami, cutin paicunaman imagu illajpipash, caranata charin.

²⁸Shinamandami, tandachishca culquita alichishpa paicunaman saquigrishca jipaca, cangunata ricushpandi Españaman yalisha.

²⁹Cangunapajman ñuca shamushpaca, Cristomanda ali villai ninanda caramujujtaca, cangunapash charichun villajungapajmi shamusha. Chaitaca, aligutami yachani.

³⁰Shina cajpipash huauquicuna, panicuna, ñucanchi Apunchi Jesucristomanda, Diospaj Espíritu ninan juyaita caramujushcamandaca, Taita Diosta ninanda ñucamandapash mañapanguichi nipanimi.

³¹Judea llactapi causaj na cazujcuna, ama imatapash ñucata rurachun mañapanguichi. Shinallata ñuca saquigringapaj culquitapash, Jerusalenbi Diospajlla causajcunaca aliguta chasquishca cachun mañapanguichi nipanimi.

³²Taita Dios munajpica, cangunapajman cushijushpa chayamuchumbash mañapanguichi. Chayamushpaca, cangunahuan aligutami samasha.

³³Casilla ali causaita caraj Taita Dios tucui cangunahuan cachun ninimi. Shina cachun.